Avunguagudee, Oni Asadi Ka Gbata Agu Ahe Zingoho Amanga Gaoni Aborokporo
“Gu . . . [boro] ka aberã nga pa agumeni [ya], . . . ni basa pa idapase.”—1 TIMOTEO 5:8.
1, 2. (a) Tipagine duhe ti ni ni gupai nangarasa rani wa ani naabi aborokporo pati agu adunguratise nga ga aKristano tibarayo dũ? (b) Gini bete kpakarakpakaraapai aborokporo agbiatiyo nani nibipa gayo nduge kupati adunguratise yo?
HO ONI angera ni pati roni rogo gu dungurati nga ga aKristano mbata fu tona dunguratise, oni rengbe ka bi gigiri agude nga aguyo vodi wene arokoo i nasusungu rii gayo abasungo pati avunguyo. Anga si nibawenepai ka bi gu nyemuse du niyuguyuguhe be ngbatunga agu aborokporo re nga gu nyemuse du tipa Yekova na dagbayo nibasasa tee? Ono tie, si taata bangirani go tipa gu bakere asadatise si aidaha be aborokporo i du ba adunguratise yo ti aregbo tonaha.
2 Bakere gbe, avunguagude na bakere sunge beyo na aʹuru pitipiti, na rogo agu ayuru nga ga dunguratise, aborokporo na asunge beyo a kisusi. Si naida i mbakadi riahe, i mangi gu kura rukutu asunge nga ga kporo, na agude nyasi na agu asunge i naafuhe fuyo sukuru yo tipa i ga nani ka mangaha kporo yo. Avunguagude namanga bakere agu asunge re, i nabi gupai nga aboro dunduko duwa ka i du gigirii, na i ima ririahe, na ki ima mbakadatiyo ti wene regbo. Rengo ngaha nga, tipa agude, i rengbe arengba ka manga gupai ani naasonga gimaha ya ti kina boro gu yangara regbo nye tipa nduge ku ba dunguratise yo. Gu gude nga sosono ni, ni rengbe ka siro gani soronduru watadu rokoo ho i angimbaro ni. Gu wiri tooni ni nga kiaro nasiko gani riahe si ki uka ku sande. Gu kura agude ki tona ka tikango dagbayo. (Asanza 22:15) Sangbana agi akeesa oni asonga gimaha re ya nga gine? Zavura kina gu bawene sogimapai mangi avunguagude he, si rengbe arengba ka gbera. Ono, wa vura duhe wo, agu aborokporo re, mbembedii ti aregbo dũ, nidu kina Bambu Kindo yo mbata fu tona dunguratise. Nairiwo wai si angarasa rani kaa bi yo na aposo dũ, na agarã dũ wa agu agude re amaapai kini mangisunge fu Yekova!
3. Wai ani aino gupai nga Yekova nabipa aborokporo ni nyanyakipa pai kisusi?
3 Wa vura duhe nga gaoni sunge nga ga vunguagude nidu adu ti kura aregbo nikpakarakpakaraha, na zavura nibatasa ome a, oni rengbe kadu naa kido ya Yekova nabi gaoni aʹasadatise abi na kikiipaha. Yekova nga batona gu mbakadapai nga ga maakporo. Sidu, Fugo ko nagumba gupai nga, akporo dunduko nibasasa, si ho “mbiko” Yekova. (AEfeso 3:14, 15) Fuo duhe wo avunguagudee, ho oni aʹasada tironi ni ka manga gaoni sunge nga ga kporo ngba ruru gene, gure nga oni nafu irisa fu gu Bakerepa Gbia nga ga haurago ko. (1 AKorindo 10:31) Anga gure nga bakere mamu tee? Sidu, ruhe aru nga ani wisigipa gu sunge Yekova nafuhe fu avunguagude. Rogo gi papara kekepai re, ani nika berãpa gu sunge re rogo gu gene nga ga ngerafuo gaani aborokporo. Ani wisiginga agene biata nga gu Mbori aida avunguagude ngerefuo agu azingo nga ga gayo aborokporo rogoho.
Gbata Ahe Tipa Borose
4. Rogo kporo, gini mbakadaapai Yekova ambakadihe nibipa mbiisa agu azingo nga ga agude?
4 Gu mokedi nangia Pauro akepai ki yaa: “Ono gu . . . [boro] ka aberã nga pa agumeni, na gani aboro kporo a ya, ni basa pa idapase, ki gberẽ susi gu ni aida nga pai ya.” (1 Timoteo 5:8) Baraho Pauro aafura ni tipa ‘gu boro’ herẽ, da pani adu berã ko yo? Gu boro ko aaberã pani nangia bairakporo, dedede nga baagude. Mbori nafu gu iriiripa sunge a fu dee nga ga du ri nimoundo fu kumbaari. (Bambata Pai 2:18) Ti agu aregbo i aakeka Ziazia Kekeapai, dedede adee anaaundo akumbayo rogo gbata ahe tipa aborokporo. (Asanza 31:13, 14, 16) Areme, agu akporo nga ga bangisa vunguagude ima maapai rogo dungu aringara. Dungu agu aKristano nga avunguagude du nisayo, i namanga bawene sunge nga ga ye na ahe tipa gayo aborokporo. Rengo ngaha nga, si naida kporo duna avunguagude dũ tibarayo ue rogoho, ono baagude kingia barumbatayo.
5, 6. (a) Gine nga bete gu kpakarakpakaraapai agu aboro agbiatiyo nani naʹasada ka ye na aũzegino tipa gayo aborokporo? (b) Gini bipai tipa sunge zegino si aida agu aKristano naye na ahe tipa gayo aborokporo du nani nga gu rengbe ka undo yo i nimangihe kindi?
5 Rogo 1 Timoteo 5:8, gini ngbatunga ye na ahe paha adu bangiri Pauro? Rogo gipai yo re nafu gu berã nga ko aafura ngburungburu tipa agu azingo aũzegino nga ga aborokporo. Rogo zegino areme, dungu apai gu du kinaho rengbe kaa kisa gene be bairakporo tipa ni ye na agu ahe nga ga zegino tipa gani aborokporo. Kpakarakpakaraapai tipa gbia mosoro ima rengba na arago rogo zegino dũ, a wa duhe tipa mbu aboro ti sunge-marã, bakere bange agu aboro adunga tingba sunge-marã ya, gbiati sona geno agu ahe rengbe tipa raka. Gine rengbe ka undo gu boro naye na ahe tipa aborokporo ni nimangihe kindi wa ni avura nigbia tini na kpakarakpakaraapai vurũ?
6 Gu boro naye na ahe tipa aborokporo duwa ka ni tingidi gupai nga, ni namanga gu sunge Yekova afuhe funi. Agu afugo Pauro ziazia toro adu kuriiko ko kehe nayugo gupai nga, gu boro rẽarẽ ka irisa gi rugute re, ono ni kini mo ka ká ka mangaha, i naringbisa pani kuti gu boro “basa pa idapase.” Sidu, Kristano duwa ka ni mangi asadatise na omeni dũ ka ne ngbatunga gu mangapai re barabangiri gani Mbori. Ono tie, si nafu kina gberarago nga, dungu aboro rogo zegino areme ni “airasakparakpa.” (2 Timoteo 3:1, 3) Nirengo, dungu abaagude adunga bagida bangeyo ti ni ya naneka gayo sunge aneka, kini mbu gayo aborokporo zanga songoda yo. Agu akumbakuadee nga aKristano, i na ngbatunga gu sakparakpa mumungo bipai re bangiri yo nibipa ye na ahe tipa gayo aborokporo te. Agu aKristano naye na ahe tipa gayo aborokporo, i wa gu kura aboro i amangasunge naayo rogo ba sa te, i nabi agu asunge tigayo kura aboro abisirapaha abisira niiriirihe na ninyanyakipaha, nigu sunge mangaha afu ngbarago fu Yekova Mbori, bambiko si nasa gupai nga i niye na ahe tipa abadiangbayo.
7. Tipagine daha ada ti ni nga avunguagude berẽpa wirika manga ga Yesu kpiapai?
7 Abairakporo rengbe arengba a ka bihe ni gupai nafu undo ka i berẽkurii ga Yesu wene kpiapai. Oni tingidi gupai nga, Ziazia Kekeapai nafura rogo sangbanebi tipa Yesu ni “Nyenye Ba[rani].” (Yesaya 9:6, 7) Wa du Yesu nga “yangara Adamu,” rẽ ko arẽ ka diaba gu “bambata boro nga Adamu” ni bavungu gu ngbatunga aboro duna idapase. (1 AKorindo 15:45) Nidu Yesu kia ti Adamu, nga gu boro nasa tiko ni iragbangbati, nigu baagude naaberã kina pa tiko kisusi, Yesu tigako nga ndikidi wene sino baagude. Ziazia Kekeapai naya tipa ko wee: “Ani ini gu he nga nyemuse mbiko ko azogo ungako tipa rani.” (1 Yoane 3:16) Ii,Yesu aidi nitiko ka fu kina boro gako unga nimotumo tipa kura aboro. Ono tie, na aʹuru dunduko, ko anaamaa agu azingo a nga ga kura aboro mbata fu gako rogo agu apai paha adu kusende. Tipa agu roni nga avunguagude, si adu niwenepai tipa roni na tipa gaoni aborokporo ka oni wiriki manga ngbatunga gu sino mbupa kura gaoni apai re.
8, 9. (a) Ginipai rengbe avunguagude ka wirikaha be azire nibipa ye na ahe fu awiriyo zanga gbangbati? (b) Wai dungu agu aKristano nga avunguagude ayugo gu sino nga ga mbupa kura gayo apai?
8 Avunguagude rengbe arengba ka wirikapai gbe tipa nyemuse zanga gbangbati be afugo Yesu fu gu ga Mbori aboro nangia aboro nyakarii yo nga gu nayaa: “Mi akpi nyemu dungura awironi a wa kondo nadungura awiru ku tii puporu bara wãi!” (Matayo 23:37) Yesu aringbisipa nakondo herẽ rogo fugo teketeke wa u nadada rukutu awiru na apupo ru. Nirengo, avunguagude rengbe arengba ka wirikapai bakere be agu abirĩ bandahe nga ga na-zire, nga gu ru namaa tiru ngbapai zanga keesa tipa ka banda rukutu awiru be kerepai. Ono tie, agu apai agu azire amangaha na aʹuru dũ duna rukutu awira ni iiriwoho ka bihe. Ami nata gu kusayo rogo bambu ra kaa gbata riahe tipa awira, kini karaga tira nani fura zanga piriga. Zavura ho omera nambedi ni ka bata, ami naye na riahe kindi kini zozogoho ku ngba awira yo nga gu nyeanye tigaha nizazaha, ami kita mbifaha kini idi kina kuraha berewe kindi. Dungu ga Yekova kusikusi unga ahe nga “airatatamana ki susi” rogo gu gene ami angerafuo agu azingo nga ga rukutu awira ngbaha.—Asanza 30:24.
9 Ngba gu gene du wa kina gure, agu avungu agude nga aKristano rogo zegino dũ nayugo bawene sino nga ga mbupa kura gayo apai tipa kaa ngerafuo awiriyo. Gupai ka ngba nga, gbegberepai mangi kina roni kuba gu nga oni mbugene fu gbegberepai si mangi awironi. Kurii gure, oni naida aida na aʹuru dũ ka mbupa kura gaoni apai tipa ka ye na ahe fu gaoni aborokporo. Dungu roni ninaaguari kina boro wiso ka manga nyanyaki asunge watadu agu asunge nabatasa ome. Oni namanga agu asunge re tipa ka ye na wene riahe fu gaoni aborokporo. Oni naaʹasada tironi ka bi gupai nirengo nga awironi na gigiri arokoo beyo, na wene bambu tipa rame tiihe, na i nawirikapai wenengai. Na oni namanga gipai re na aʹuru dũ, na na agarã dũ. Nirengo, ngbatunga gu mbu boro pa kura gani apai wa gure na kini hipai nafu ngbarago afu fu Yekova! (AEbere 13:16) Ono tie, wa vura duhe nga agi apai dunduko re nga kina ku rengo, oni tingidi gupai nga kura agene kinaho nyakipaha kisusi nga gu rengbe oni ka ngerafuo gaoni aborokporo rogoho.
Fu Undo fu Aborokporo I Banda Gayo Pagume na Mbori
10, 11. Gini nyanyakipa azingo kisusi du aboro nani, na ginipai duwa ka agu avunguagude nga aKristano mangihe mbata i nimo ka digiso gi zingo re tipa awiriyo?
10 Ono gu undo rengbe tipa fuhe gbe nga ga toro susi gu nga ga aũborose. Yesu ayaa: “Boro anye nga ni ungani mbiko kina riahe [sa] te, ono mbiko agu apai dunduko naye ngba Mbori yo.” (Matayo 4:4; 5:3) Oni avunguagudee, gini apai rengbe oni ka mangaha tipa ka fu agu ahe nga ga toro fu awironi?
11 Tipa gi riipai re, anga papara Ziazia Kekeapai ho berewe rogodi yo apai rogoyo bara dunguhe gbe susi Pa Fu Rugute ni Ue he 6:5-7 te. Ani nasana roni oni zara gaoni Ziazia Kekeapai ki gedi agu averesi re. Oni kparia gupai nga, i nagumbaha fu avunguagude ya i sonosi gayo pagume mbata ngbaduyo yo dagbayo na Yekova, na gayo nyemuse tipa Ko na ki di fugoko kugume. Ii, oni duwa ka oni du nikakaka awisigi Fugo Mbori, kini gedi Ziazia Kekeapai dedede na kini berẽkuriihe tipa ka sonosa gaoni ndikidi giarogopaiyo gbiati nyemuse tipa ga Yekova agene, gako bangua andiko, na gako andiko. Nisangbana gipai re, ngbaduroniyo nika hi be iiriwo arengo nga ga Ziazia Kekeapai nga gu nika sa roni oni duna ngbarago, na kidu na irisa, gbiati nyemuse tipa Yekova. Mbiko gipai re oni adu na wene ahe beroni kpaima tipa ka fukaha fu awironi.—Ruka 6:45.
12. Wai rengbe avunguagude ka wirika manga ga Yesu kpiapai nibipa rimiso agu arengo nga ga Ziazia Kekeapai kurii awiriyo yo nidogoda gumbaha fuyo?
12 Agu avunguagude du nyanyakii rogo toroyo ni agu aboro ima mbakadatiyo ka mangasunge na agu rugute du rogo Pa Fu Rugute ni Ue he 6:7 (NW), nga gu nafura tipa ‘rimiso afugo Yekova kurii awiriyo yo nidogoda gumbaha’ ti agu aregbo dũ rengbe yo ka mangaha ti ni. Gu fugo nga ka ‘rimisopai kurii yo,’ rogoyo nga ka yugopai nidogoda gumbaha fu boro. Yekova ima ino gupai wenengai nga ani dunduko, ono gbe agude, duwa ka i dogodi gumbapai fuyo tipa i inihe. Sidu, Yesu anaamangasunge na dogoda gumbapai fu aboro rogo gako sunge tungusapai. Nikpiapai, ho ko aayugopai ni fu gako abawiriki ya i du nibayee yo kuba duna rukö na ki zanga du ni amangi abaangira, ko agbata agene nibakiakia tipa kaa dogoda gumba kina gu bangisa bangua andiko re fuyo. Ko anaayugopai fu aboro nisakapai naayo, na nikpiapai, na zavura nimanga ko pai nitiko. (Matayo 18:1-4; 20:25-27; Yoane 13:12-15) Ono tie, gupai nairiwo nga, Yesu aduna zerangbaduse. Teketeke a, avunguagude duwa ka i gbata agene ka yugo bangua arengo fu awiriyo, kini dogodi gumba ga Yekova bangua andiko fu awiriyo nizerangbaduse daho agu agude re nika inoho ni kini mangihe.
13, 14. Gine nga bete agu aregbo rengbe avunguagude ka rimiso agu arengo nga ga Ziazia Kekeapai kurii awiriyo yo nidogoda gumbaha ti ni, na kini mangisunge na gini aũsunge?
13 Agu aregbo du tipa gu wisigoapai nga ga aborokporo gu daada tipa ngbatunga gi yugopai re. Nirengo, gu wisigo Ziazia Kekeapai nga ga aborokporo i amangaha dedede nga gu duna ngbarago, si nasonosa gayo ida, na si nga memepai tipa gayo nyaka rogo toroyo. Agu aborokporo nga aKristano rogo zegino dunduko nidu na ngbarago be ngbatunga agi awisigopai re, i kini mangisunge na agu abuku ga Yekova riigbu afuhe na kini mbakadi gu wisigopai re ringbisihe kuti agu azingo nga ga agude. Gu buku nga Learn From the Great Teacher [Oni Wirikipai Be Bawene Bayugupai] aima du nibakere gamahe rogo gipai re, a wa du gu kura buku nga Questions Young People Ask—Answers That Work.a Ono tie, anga kina gu wisigopai nga ga aborokporo sa nga yangara regbo tipa yugopai fu agude te.
14 A wa gu buku du rogo Ziazia Kekeapai nga Pa Fu Rugute ni Ue he 6:7 ayugoho, dungu aregbo kinaho rengbe oni arengba nga avunguagude ka wisigo agu apai nga ga toro na awironi ti ni. Kangia oni nandu nunguro sa, oni namangasunge sa, watadu oni naongoda rogo ba sa, oni rengbe arengba ka gbia amamu tipa gumba agu apai du tipa ga awironi azingo nga ga toro. Rengo ngaha nga, si adunga adu nga oni nikaa “fura afura” kindi fu awironi zanga piriga tipa agu arengo nga ga Ziazia Kekeapai te. Kuba gure, oni asadi ka banda agu afugodagbase nga ga aborokporo kina kuti agu apai nasonosa aboro rogo toroyo. Nikpiapai, gu magazini nga Awake! na dungu apapara kekeapai rogoho tipa zagino riiapai nibakiakia. Ngbatunga agu apapara kekeapai re rengbe ka mbakada gene tipa fugodagbase riipa agu anyaa Yekova akusi ra, tipa gu bawene papara arago Mbori amangihe, na tipa gu iiriwo asino raka du dagba aboro nibakiakia na agenehe. Ngbatunga agu afugodagbase re rengbe ka sa paranga aboro i nigedi agu abuku gbe ruru kangara moyambu naakusaha.—Matayo 24:45-47.
15. Wai rengbe avunguagude ka undo awiriyo i bi ga aKristano sunge tungusapai na nyemuhe na nigu sunge duna mosoro ti ni?
15 Pa gaoni afugodagbase na awironi riipa agu apai nasonosa boro rogo toroyo aundo roni oni mbiisi kura zingo nga ga toro. Agu agude nga aKristano duwa ka i wirikipa fura wenengai na akurayo tipa gayo ida. Baraho oni kaa fura ni riipa kura bangiripai nga gu nagbeberã rogo Ngbaõbambu Sinziri watadu Awake! oni rengbe ka ngera tipa amamu ka mangasunge na gu bangiripai re rogo sunge tungusapai yo. Nikpiapai, oni rengbe ka sanahe ki yaa: “Anga ka si du nibawenepai wa ka dungu aboro niini gipai re tipa Mbori tee? Ginipai oni aberãha ya si ka ani mangihe ka ba nyemu gipai re ti boro?” Ngbatunga sakaapai wa gere rengbe ka undo rukutu agude i sonosi bakere nyemu fugo na akurayo tipa agu apai i awirikaha. Fuo gure, ho awironi agasa roni ni ku gene sunge tungusapai yo, i nabi ndikidi kpia agi afugodagbase re wa oni amangaha. I rengbe arengba a ka ino gupai nga, gu sunge nga sunge tungusapai re, si nga wene sunge ngbarago gbiati wasa nirengo.—Amokedi 20:35.
16. Gini apai rengbe agude ka wirikaha be degatuyo kuti ga avunguyo akpee?
16 Avunguagude nafu undo afu a tipa ga awiriyo azingo nga ga toro ho i afu kpee ni fu Mbori. Yesu ayugupai fu gako abawiriki tipa wai ka fu kpee, na ko anaakparakpee naayo bara dunguhe. (Ruka 11:1-13) Oni berẽnga kina kandara bakio agu apai i awirikihe be kodatiyo kupati kparakpee na kina boro ndikidi Wiri Yekova! Teketeke a, awironi rengbe ka wirika badungu apai be gaoni akpee. Nikpiapai, i rengbe ka wirika gupai nga, Yekova naida ani naafura fuko na ngbaduraniyo dũ zanga ndundu, kini fura fuko tipa agu apai dunduko nafuda rani. Rengo ngaha, gaoni akpee rengbe arengba ka undo awironi i wiriki nyanyakipa rengo nga ga toro: Gu rengo re nga i rengbe arengba kadu na pagume dagbayo na gu Bayo du ngbangbaturũ yo.—1 Petero 5:7.
Songoda Yo Ninunga
17, 18. (a) Wai Ziazia Kekeapai atakapande nyakapa yugo nyemuse tipa agude? (b) Wai si aida abaagude naawirika mangapai wa Yekova rogo yugo nyemuse tipa awiriyo?
17 Rengo ngaha nga, agude a na gu nyanyakipa azingo tiyo nga ga nunga. Fugo Mbori nagumbapa wai fu avunguagude duhe ninyanyakipa pai ka ngerafuo awiriyo rogo gipai re. Nikpiapai, i nangarasa paranga adee i “nikpi nyemu awiriyo.” Pa manga yo ho wo nasa gupai nga paranga anaagude rugatiyo napai, watadu i “duna wene berã.” (Tito 2:4, NW ) Nirengo, si ni gupai du niruruhe ka yugo nyemuse tipa gude. Gipai re nayugo wai fu gude si aida ni nikpinyemu aboro na kini fu undo funi dati kpio. Rogo gu kura gene, pa kpa avunguagude ti yugo nyemuse fu awiriyo nga mumungopai. Si nafu bakere egerã na kini yugupa kpa boro ti wirika mangapai wa Yekova, nga gu boro nayugo babakere nyemuse fu rani zavura gupai nga ani nga kpakpa aboro vurũ.—Atambuahe 103:8-14.
18 Kina Yekova a nadu nibambata boro ka kpinyemu agu awiriko nga ga kpotosende yo mbata. A wa 1 Yoane 4:19 agumbaha, “ko nyemurani adu ti ko mbata.” Oni gbe nga abaagude duwa ka oni wiriki manga ga Yekova kpiapai, kini ngbembatayo rogo sonosa kodatise nga ga nyemuse na awironi. Ziazia Kekeapai nazungodi abaagude i ne wingba awiriyo niwia, “i ka mbu [watadu, kadu na bakere gberarago tiyo].” (AKorosaio 3:21) Apai gbua nibetehe naimisa agude susi gu berã nga vunguyo akpinga nyemu yo te watadu gu nga ni aberãnga payo te. Agu abaagude aidanga ka yugo gayo nyemuse tipa awiriyo ya duwa ka i tingidi ga Yekova kpiapai. Yekova afura kina boro ngbangbaturũ yo ka yugopa ida ko na ga Wiriko pai gbiati pa kpinyemu ko. (Matayo 3:17; 17:5) Nairiwo wai gupai re angarasi Yesu nirengo! Teketeke a, agude nagbia bakere ome gbiati ngara be ga avunguyo ndikidi nyemuse na ho i aida ni na ga awiriyo apai.
19. Tipagine du arugute ti ni na nyanyakipaha, na gini ringbisapai si aida agu aKristano nga avunguagude asadi ka mangaha?
19 Rengo ngaha nga, anga gu nyemuse nga ga avunguagude si gbua nga kina kungbo gumbapai nifugo te. Nibambatapai, nyemuse niyuguyuguhe rogo mangapai yo. Paye na agu ahe nga ga borose gbiati agu nga ga toro rengbe arengba kadu nigu yugo nyemuse nga ga avunguagude, gbe ho avunguagude amangaha ni wo rogo gu gene nayugo gupai nga, nyemuse du nga gu bambatapai nafõngbaduyo yo i mangihe. Kurii gupai re, fu arugute ni gupai nyakipaha kisusi rogo yugo nyemuse nga ga avunguagude. Nirengo, “Gbia naruga gu boro ko akpi nyemu ni.” (AEbere 12:6) Ngba kura gene, ho avunguagude akpa ni ka fu arugute fu awiriyo, si nayugo gupai nga, i nasoga yo asoga! (Asanza 13:24) Yekova nidu ti aregbo dũ na ruru ringbisapai, kini fu arugute ‘ngba ruru gene.’ (Yeremaya 46:28, NW) Dedede, tipa ngbatunga gu ringbisapai re si nadunga taata fu avunguagude nga kpakpa aboro i mangihe te. Wa vura duhe wo, si daada tipa oni mangi bakere asadatise ka manga gupai re. Fu rugute nyanyakii rogo nyemuse, naundo gude ni sono rogo gu raka nga ga ngbarago duna zuzuhe ti ni. (Asanza 22:6) Anga gure nga gupai agu aKristano nga avunguagude dũ akpinyemuhe tipa awiriyo tee?
20. Wai rengbe avunguagude ka fu gu bawene mamu ngba kisusi fu awiriyo tipa “sia unga”?
20 Oni avunguagudee, ho oni amanga gu nyanyakipa sunge ni Yekova afuhe fu roni, nga ka fuka agu ahe fu awironi nga ga borose, gbiati agu nga ga toro, na kadu na nunga yo tironi, gaha amosoro nibakerehe. Rogo gu mangaapai re, oni nafu gu bawene mamu fu awironi rengbe tipa i “sia unga” na fuo gure i ki ‘nye ni unga yo.’ (Pa Fu Rugute ni Ue he 30:19) Agu agude nasia gupai nga ka mangasunge fu Yekova na ki nye ngba gu gene nandu na boro kurogo unga wa i nikaa nyaka, i nafu bakere ngbarago fu avunguyo. (Atambuahe 127:3-5) Ngbatunga gu ngbarago re nika nyeanye kindi! Ono wai tie, rengbe paranga aboro ka tambua Yekova awere? Gu papara kekepai naye fuo gere si nika sakapai tipa gu riipai re.
[Gu rukutu kekeapai du bandu kpewaraga yo]
a Si nga agu abuku aDezire Yekova akusihe.
Gaoni Karagapai Nga Gine?
Ginipai rengbe avunguagude ka mangaha tipa kaa songoda awiriyo
• na aũborose?
• rogo toroyo?
• ninunga?
[Gu kpiahe du ti kpewaraga 12]
Dungu azire namangasunge zanga mbugo tipa ka riga awira
[Gu kpiahe du ti kpewaraga 14]
Avunguagude duwa ka i sonosi gayo nyaka rogo toroyo mbata
[Gu kpiahe du ti kpewaraga 15]
Avunguagude rengbe arengba ka bi dungu aregbo ka yugopai fu awiriyo tipa Bakusiahe
[Gu kpiahe du ti kpewaraga 16]
Agude nagbia ome gbiati ngara be ida avunguyo na gayo apai