Agu Amaku Nga Ga Wene pangbanga

“Yekova nambedi re ni nzeme mi nitungusi wene pangbanga fu rungorungo aboro; ko kedi re mi vodi agu yo ngbaduyo akua, . . . ka ngarãsa agu yo dunduko nakpara kpenunga.”—YESAYA 61:1, 2.

1, 2. (a) Yesu ayugu tiko ni gini ngbatunga boro, na wai ko ayugu tiko? (b) Gini amaku gu wene pangbanga Yesu anatungusaha aye nani?

ROGO kura uru Sabiti sa ti tonatona ga Yesu sunge tungusapai, ko asungu bambutiria yo Nazareta yo. Kuti gupai i akehe, ya i “[a]fu gu kitabu fu ko nga ga Yesaya, ko ki ba waraga ki gbata ho si adu ni ni keke he were, ‘Ga Gbia Toro ti re, bambiko ko auka nzeme ku ri re mi tungusi wene pangbanga.’ ” Yesu asusi kumbatayo ka geda gu kura apai rogo gu sangbanebi re. Fuo nyasa ko gedaha, ko asungu sande ki ya: “Areme da gi Ziazia Kekeapai re ti rengo ku turoni yo.”—Ruka 4:16-21.

² Rogo gi gene re, Yesu ayugu tiko ni gu batungusi wene pangbanga i aima gumba pako ya ko aye gizo, nga bagumba wene pangbanga na bafu wasa fu aboro. (Matayo 4:23) Ii, gu pangbanga nadu ngba Yesu tipa ko tungusihe angia wene pangbanga nirengo! Ko atingidi agu aboro naadegatuyo kuti fugo ko na gupai nga: “Mi nga gu imarago nga ga zegino. Gu ni ka apeka re ni ta nga bitimo [yo] te, ni du adu na gu imarago nga ga unga.” (Yoane 8:12) Ko agumba kurapai berewe a ki ya: “Ka oni nye na gi pai, oni du adu tie ni gimi abawiriki ni rengo; oni aína rengo aina, ki ra ni rironi be rengo.” (Yoane 8:31, 32) Ii, Yesu aduna “agu apai be[ko] . . . nga ga nyenye unga.” (Yoane 6:68, 69) Nirengo, imarago, unga, na ranirii nga agu amaku si aida ani bihe na kikiipaha!

3. Gini wene pangbanga ga Yesu abawiriki anatungusaha?

³ Tingbafuo Pendekote rogo gu garã nangia 33 ti Gaani Regbo, ga Yesu abawiriki aandu kumbatayo kindi na gako sunge tungusa wene pangbanga. I anatungusa “wene pangbanga nga ga ngbi” fu aYisaraere na fu kura ngbatunga aboro a. (Matayo 24:14; Amokedi 15:7; ARomo 1:16) Agu aboro nadi gu pangbanga re kugume aye ki ini Yekova Mbori. I akusi goroyo kusayo be gu sunge kanga nangia ga pambori, fuo gure i ki da ni papara gu vovo rikaaboro nga ga toro yo, nga “ga Mbori Yisaraere,” nga gu rikaaboro duna gu maabangirise nga ga zogarago ngbangbaturũ yo na gayo Gbia nga Yesu Kristo. (AGaratio 5:1; 6:16; AEfeso 3:5-7; AKorosaio 1:4, 5; Yugoti 22:5) Gure angia bakere amaku nirengo!

Tungusa Wene Pangbanga Areme

4. Rogo gini gene i adigiso gu sunge nga ga tungusa wene pangbanga areme?

⁴ Areme, “bakere rimbasa” nga ga “kura avusende” bange yo akio kina kumbatayo nasongoda mbedimbedi aKristano, nga aguyo nandu kindi kumbatayo ka digiso gu sunge i afuhe mbata fu Yesu rogo sangbanebi. (Yugoti 7:9; Yoane 10:16) Ni sangbana gipai re, i natungusa wene pangbanga rogo arago dunduko susi gu nidu mbata. Rogo aringara na aba 235, aDezire Yekova aima digo ‘nitungusi wene pangbanga fu rungorungo aboro; kini zungodi agu aboro ngbaduyo akua, kini takipande pa ranirii fu zizi aboro, na pa za ngbadimo bambukisa fu aguyo duni vodivodi yo; kini takipande pa garã ga Yekova weneringise, na rago irabape nga ga gaani Mbori; kini ngarãsi aguyo dunduko nakpara kpenunga.’ (Yesaya 61:1, 2) Sidu, gu sunge tungusa wene pangbanga nga ga aKristano naye na amaku kindi fu dungu aboro na kini ye na ndikidi wasa “fu agu yo du rogo . . . gberãngbi yo.”—2 AKorindo 1:3, 4.

5. Nibipa tungusa wene pangbanga, waigu du aDezire Yekova kia ti agu aboro du rogo agu akanisa nga ga Ngbiiakristano?

⁵ Rengo ngaha, nga agu akanisa du rogo Ngbiiakristano nasongoda gu kura ngbatunga agene asongoda duni bakiakia nga ga tungusa wene pangbanga. Dunguyo nakeda amokedi i ndu ka sa aboro kurogo gayo pambori rogo kura aringara. Ni kpiapai, gu waraga pangbanga nga The Orthodox Christian Mission Center Magazine nafura tipa gu mangaapai nga ga agu amokedi du rogo gu kanisa nga ga Orthodox rogo agu aringara nga Madagascar, na aringara nga ga Afirika ku sudiyo, nga Tanzania, na Zimbabwe. Ono tie, rogo gu Kanisa nga ga Orthodox na a wa duhe rogo agu akuraha rogo Ngbiiakristano, badungu agu aboro du rogo amanganga gi sunge nga ga tungusa wene pangbanga re te. Kuba gure, agu aDezire nga ga Yekova yo dunduko nga aguyo naima kpara tiyo fuko na’asada tiyo tigayo ka tungusa wene pangbanga. I ini gupai nga, takapande wene pangbanga nga gopai tipa du yo na ndikidi idapase. Pauro ayaa: “Boro naida pase kpotoni yo, Mbori ki sa ni ni ruru ni, ni ki kusi pase ni ngbani sa bata.” Gu idapase afõnga ngbadu boro yo ni mangisunge nani ya, si nzunzu nga kangba idapase.—ARomo 10:10; Yakoba 2:17.

Gu Wene Pangbanga Naye na Nyenye Amaku

6. Gini wene pangbanga i atungusaha areme?

⁶ Gu pangbanga aDezire Yekova atungusaha, si nga wene pangbanga kisusi. I nata zara Ziazia Kekeapai kini yugu gupai rogo fu agu aboro duna wene ngbaduyo yo ya Yesu afu unga ko ni motumo tipa ka zaka gene fu ngbatunga aboro i mbedi na Mbori, na tipa Mbori mbupai fuyo ti gayo ingaapai, na gi motumo re nafu maabangirise fuyo tipa nyenye unga. (Yoane 3:16; 2 AKorindo 5:18, 19) I natakapande gupai nga, Mbori aima sigira gako Kindo ngbangbaturũ yo tiibe gu mbedimbedi Bakindo nga Yesu Kristo, na kini tingidi yo na gupai nga, mbembedii kumbatayo, gi kindo re nika dia gbegbere apai kusayo auru gi kpotosende re na kini ngere kurii sunge karaga kpotosende ni Paradiso. (Yugoti 11:15; 21:3, 4) Ni digiso ga Yesaya sangbanebi, i naya fu aboro wee gi regbo re nga “garã ga Yekova weneringise,” nga gu regbo du mamu kindi fu ngbatunga aboro tipa i idi kuti wene pangbanga. I naza aboro a kini ya fuyo, “rago irabape nga ga gaani Mbori” nika ye bambeda kumbatayo, ho Yekova nika digiso gu raka ni nga ga agu aboro ingaapai asanga gayo berã ya.—Atambuahe 37:9-11.

7. Ginipai namangi nayugopa gu kpamiatise nga ga aDezire Yekova, na tipagine i agbia ngbarago tini be ngbatunga gu kpamiatise re?

⁷ Rogo gu zegino hi be kere gbegbereapai na agberango, gere nga gu yangara wene pangbanga duna nyenye aundo. Agu aboro nadia gi pangbanga re kugume nakoda tiyo ki du sa na aKristano na ki duni agu awirina nga aKristano rogo zegino dunduko, nga agu awirina ambunga apai si kparaka yo ya wa gu nga, gu gayo aringara duni bakiakia, agu angbatunga yo duni bakiakia, watadu gu mosoro du beyo. I ima ‘ukadi nyemuse, mbiko si nga bawene dada tipa kpamiatise.’ (AKorosaio 3:14, NW; Yoane 15:12) Wo aboro abi gipai re gugorö rogo kura ringara Afirika yo. Rogo kura wiso sa, rogo gu bakerepa gbata nga ga gu ringara re, i azingisi aboro na woro bundu. Gupai naamanga nga, gu kura aboro a’asada tiyo ka aria gu zogarago nga ga gu ringara re ngbaome. Fuo i aria vura kurogo sogote nga ga angbatunga, i abisirapa kura aborokporo nangia aDezire ya i naoka agu aDezire du tunga yo kia. Agi aborokporo re akaragapai ki ya: “Kina aDezire Yekova sa nasungo fuo rani herẽ.” Tipa yo, gu kparakapai nga ga tunga bangiriyo ni pai te; ono gupai nyakipaha bangiriyo nga gu nyemuse nga ga aKristano, nga ka fu wasa fu agu aboro naidaha. Dee sa, angianga Dezire ya, ono nga gume agu aDezire i akitingbaanga yo re ayaa: “Aboro kura apambori dunduko akusi akurayo airisimbori fu kerepai. Kina aDezire Yekova sa naamanganga ha wo ya.” Gu dungu pangbanga apai du wa gure i atingida paha kurogo agu aringara vura agbarasi paha, nayugo gupai nga, aDezire Yekova ‘nakpinyemu awirinayo’ akpi nabayo dunduko nirengo.—1 Petero 2:17.

Wene Pangbanga Na’aria Sino Aboro

8, 9. (a) Gini ariapai agu aboro nadia wene pangbanga kugume amangaha? (b) Gini apangbanga nayugopa gu ome du ti wene pangbanga?

⁸ Pauro agumba ndu gupai i afu wene pangbanga tini fu aboro, ya si tipa mbakada “gu unga du awere, na gu nikaye.” (1 Timoteo 4:8) Anga si nafu kina maabangirise tipa wene apai kumbatayo sa te, ono si nambakada gu ga boro “unga du awere” a. Wa du yo nibasasa, nga aDezire Yekova, Fugo Mbori, nga Ziazia Kekeapai, nayugo gene fuyo tipa i niraki ringbisihe kuti gupai Mbori akpinyemuhe. (Atambuahe 119:101) I nasa asino yo nivovoho wa i asonosa agu asino du wa manga rurupai na du niruruse.—AEfeso 4:24.

⁹ Oni wisiginga gu kpiapai nga ga Franco. Pai adu tipa ko nga ga zizinga. Ti agu aregbo dunduko apai anamanganga ni wenengai kubara ko yo ya, ko anazinga nibasa kini kukuodi ahe. Diako aawisigo Ziazia Kekeapai na aDezire Yekova, sidu gayo kpiapai nga ga aKristano ki undo Franco tooni tooni ko ki bi gupai nga si aida ko aria sino ko. Ko awisigi Ziazia Kekeapai na yo na ni yangaraha, ko arengbe ka yugo gu zuzu toro nga zereda na rugatise. (AGaratio 5:22, 23) Ko angia guni sa dagba agu aboro bange yo angia 492 nazi bapatiza Belgium yo rogo gu garã sunge nangia 2001. Oni berẽnga pa Alejandro a. Kere angua azibaha ti gu paranga re ki da ti gupai nga ko naadungura kpatakpata ahe gugudo yo ka bagaha tipa kaa ngbeka gako kere angua nani. Ho garã Alejandro ada ni ti 22, aDezire Yekova ayambu ko ko wisigi Ziazia Kekeapai na yo, na ko ki idihe. Ko anageda Ziazia Kekeapai na auru dunduko na kini ndu ku pati ga aKristano adunguratise yo. Ko agirisi gako raka ni kina boro ipo si ki da ti gupai nga mbata fu susa adiwi sita, ko arẽ tipa sunge tungusa wene pangbanga, ko angia guni sa dagba gu 10,115 aboro namangi sunge tungusa wene pangbanga Panama yo.

Wene Pangbanga Nga Maku fu Bayee Aboro

10. Ada nakaragapai wenengai sa wene pangbanga, na waigu gayo bipai a’ariatihe?

¹⁰ Yesaya agumba sangbanebi ki ya regbo kinaho nika ye i ka tungusa wene pangbanga fu bayee aboro. Ada nga gi bayee aboro re? I nga agu aboro ringbisi yo payo rogo gu buku nga Amokedi ni ‘agu aboro dunduko duna ruru berã sa nyenye unga.’ (Amokedi 13:48, NW ) I nga agu aboro umbasitise du rogo ariko nga ga aboro dunduko nga aguyo nazaka ngbaduyo fu gu pangbanga nga ga rengo. Ngbatunga agu aboro re ini gupai nga, manga yo gupai Mbori akpinyemuhe naye na amaku nga gu kiipaha gbe susi agu ahe dunduko rengbe gi zegino re ka fuhe. (1 Yoane 2:15-17) Ono tie, waigu aDezire Yekova arimiso pai ku ngbadu aboro yo wa i amanga gayo sunge tungusa wene pangbanga?

11. Kuti sangba Pauro, waigu si aida i tungusi gu wene pangbanga re?

¹¹ Oni wisiginga gu kpiapai nga ga gu mokedi nangia Pauro, nga guko nakepai fu aKorindo ki ya: “Mi a, awirina, ho mi aye ni koyo du oni ni, mi aye nga na gu iriwo du ti fura na tatamana ka tungusa gu gasigasi pai nga ga Mbori te. Bambiko mi arugu tire ya ka mi aina nga pai dagba roni yo ya, kina Yesu Kristo, na wa i awagi ko.” (1 AKorindo 2:1, 2) Pauro a’asadanga tiko ka zeresa ngba agu aboro nanadegatuyo kuti fugo ko na agu apai ko awirikihe te. Anga kurapai kia ti agu arengo nadu tipa Mbori nga gu du areme nikekehe rogo Ziazia Kekeapai ko ayuguhe te. Oni kparianga gu kura afugo Pauro apehe berewe tipa ka ngarasa gu kurako batungusi wene pangbanga nangia Timoteo, ko ayaa: “Mo nitúngusi pai; mo ké na ni.” (2 Timoteo 4:2) Si adu nga Timoteo tungusi “pai,” nga ga Mbori pangbanga. Pauro akepai a fu Timoteo ki ya: “Mo ké na mbakada pa tiro bangiri Mbori, ko idi pa ro wa gu mangisunge [nga ga pambori] adu nga na zee ya, niyugu ga rengo pai [“niyugu gu fugo nga ga rengo,” NW ] nzunzu.”—2 Timoteo 2:15.

12. Waigu aDezire Yekova airisa afugo Pauro areme gbiakuti gako kpiapai?

¹² ADezire Yekova nairisa ga Pauro kpiapai, na kini irisi gu gako afugo a ko akehe fu Timoteo. I idi kuti gu ome du ti Fugo Mbori na kini mangisunge nani wa i agbata agene ka yugo gu ruru afugo nga gu nafu maabangirise fu aboro gbiakuti gu nafu wasa fuyo. (Atambuahe 119:52; 2 Timoteo 3:16, 17; AEbere 4:12) Rengo ngaha, i namangasunge amanga a na agu abuku du mburuhe rii Ziazia Kekeapai tipa wa ka agu aboro duna nyemu rengo tiyo gbia kura inohe nga ga Ziazia Kekeapai a wa i aidaha. Ono dedede, i nagbata agene ka yugo agu afugo nga ga Ziazia Kekeapai fu aboro. I ima ino gupai nga, gu Fugo Mbori gako toro adu kugiipa kehe nika fõngbadu aboro umbasitise yo i duna nyemuhe tiyo. Na wa i amangasunge nani ngba gi gene re, si nanyakasa gayo idapase a.

“Ngarãsa agu yo Dunduko Nakpara Kpenunga”

13. Rogo gu garã nangia 2001, ginipai namangi ki ba nunga ti aboro si kini sa gupai nga i ngarasi yo rogo dungu arago?

¹³ Gu garã nangia 2001 adu a na gaha agberango tini, ni sangbana agi agberango re, dungu aboro aida i ngarasi yo watadu ka fu wasa fuyo. Rogo gu diwi nga Mbirinvuo susi re, bakere kpia gipai re amangi Amerika yo, ho abamoi ati ni na vura kurii gu bakere babagaahe i ayambaha nga World Trade Center du New York yo na gu i ati na ni kurii Pentagon du mbembedii pati Washington, D.C. Nairiwo wai aboro akigi be gipai re! Ho pai nidu ni wa gere, aDezire Yekova naa’asada tiyo nyanyakii ka manga gu sunge i afuhe fuyo, nga ga ‘ngarasa agu aboro nakpara kpenunga.’ Bete apangbanga nika yugo wai i amangaha.

14, 15. Waigu aDezire ti aregbo ue nibakiakia arengbe ka mangasunge na Ziazia Kekeapai wenengai ka fu wasa fu agu aboro nadu na nunga?

¹⁴ Gu Dezire namangasunge ni natungusi wene pangbanga ti aregbo dũ ambedi koyo dee aduni naandu pangba gene yo na ki sana ri tipa gupai ri aberẽhe tipa gu vura abamoi azubo aboro nani bambeda kusayo re. Gu dee re atona kaa kpara ni nunga. Ri aya ri aduna gberarago tiri na gipai namangi re, na ki ya wa ka gene adu beri, ka ri fu undo afu fu agu aboro nadu na nunga be pa kpio agume yo re. Gu Dezire re aya furi, Mbori gu du adu na bakere nyemu rani tiko, fuo gure ri ki gedi Yesaya 61:1, 2. Agi afugo ga Mbori toro adu kugiipa kehe re aru aru bangiri gi nagbia re, nga guri naya aboro dunduko aduna nunga. Ri adi keke kpewaraga be gu Dezire re na ki sana ri ri ye ka bi ri kpuri yo.

¹⁵ ADezire ue naatungusa wene pangbanga agbia kumba naamangasunge tii gako nzereme. I agumbapa yugo agu afugo nga ga wasa fuko rogo Ziazia Kekeapai nibipa gu gberango nati kurii aboro bambeda kusayo rogo gu bakere babagaahe i ayambaha nga World Trade Center. Fuo ida ko paha, i agedi 2 AKorindo 1:3-7 fuko, nga gu du agu afugo rogo nga: “Wasa ni dunguhe rogo Kristo yo.” Rago angba ti gi kumba re mbiko gako amurakporo nga aDezire aangarasa aboro na afugo wasa na ko ki ya: “Mbori funga maku kurii gu wene sunge oni amangaha re.”

16, 17. Gini apangbanga ue nayugopa gu ome du ti Ziazia Kekeapai ka undo agu aboro gberarago nazi yo watadu adunga na ngbarago ya mbiko gu gberango ti kuriyo?

¹⁶ Ho Dezire akaraga tiko ni ka bi agu aboro nadu na nyemu rengo tiyo, ko agbia kumba nangia wiri gu dee nadu na nyemu rengo tiri na gi kumba re ki ya ko aabaka kina bangiriko tipa gupai naamanga gako amurakporo tingbafuo gi kere gberango re. Ngba gi kumba re azere ka bi gupai nga gi Dezire re adi gako regbo kaa biko aboro tipa ka bi gini ngbatungaapai nafuda yo. Gu kumba re aya ko aamangasunge mbembedii na gu bakere babagaahe nga World Trade Center re ho abamoi ati ni na vura kuriihe, na ko abi gipai re si kini mangi nabaha da ti digidoho. Ho ko asanahe ni tipa ndu gupai Mbori ambugene tini aboro nirungo wa gure, gu Dezire re agedi averesi rogo Ziazia Kekeapai, kodihe kuti Atambuahe 37:39, nga gu nayaa: “Ono ga ruru aboro bata si aye be Yekova; ko nga gayo nyanyaki gbata ti rago fudifudipai.” Gu kumba re asana gu Dezire re tipa wai du ko na gako aborokporo, na ki sana ko ko karaga tiko berewe fuo ko, na ki fu tambuahe fuko gbe tipa ye ko ka bi ko.

¹⁷ Gu kura boro sa dagba gu dungu akutu aboro nadu na nunga nga aguyo aDezire Yekova angarasi yo tingbafuo gu gberango re angia gu nagbia aDezire agbia ri kua gayo murakporo yo. Rago agbere tiri kisusi na gupai namangi re na ri adegeturi wa i aageda Atambuahe 72:12-14 nga gu nayaa: “Ko nabatasa irazingo ahe ho ni nakpara ni ku ari; na irarungo na gu ni adu nga mounda ti ni ya. Nunga rurungbura boro du ti ko na irazingo ahe a, ko nabanda unga airazingo ahe. Ko natumo ungayo be bau pai na zuu; kureyo ki du ni kikiipa he bangiriko.” Nairiwo wai agu afugo re aduna rogoyo tini! Gu nagbia re asana agu aDezire re i gedi agu averesi re furi berewe na ki yambu yo i ye ku kpuri yo tipa i ndu kumbatayo na gayo sakapai. Baraho i anyasi ni na gayo fugo, gure nga i aima simburu wisigo Ziazia Kekeapai na gi nagbia re.

18. Waigu Dezire aundo aboro ho i ayambu ko ni ko fu kpee tipa yo?

¹⁸ Dezire sa namangasunge rogo bambu baga riahe nga gu du rogo gu dagbarago nga ga airakumuko nga gu rago aboro ayugonga nyemu gu wene pangbanga nga ga Kindo rogo mbata ya. Tingbafuo gi kpio aboro naye be abamoi re, aboro gu rago re aduna bakere gunde. Nyemu, ni gu Rago Bisue Sunge naye tingbafuo gi gberango re, nangere kurii gu bambu baga riahe re ayambu aboro dunduko i kuru ku zegiyo ki zazadi tigitigi abaro beyo, ka berã ngbutuko kukiri ni tingidapa kpio agu aboro nakpiki re. Ni irisa, gu Dezire re akuru na yo a ki ru pangba gene zanga fugo. Gu nangere kurii gu bambu baga riahe re aima ino gupai nga ko nga guni sa dagba aDezire Yekova, sidu fuo nyasa regbo tingidapa kpio aboro, ri asana ko ko fu kpee tipa agu aboro dunduko narundu. Gu Dezire re aidihe. Rogo gako kpee, ko afura tipa gu nunga du ti agu aboro dunduko du rogo gu rago re, ono tie ko agumba gupai nga, si aidanga agu aboro duna nunga re duna gberarago ki zanga duna maabangirise te. Ko afura tipa gu regbo ngbatunga gu kere apai re nika dunga berewe ya, na ki ya aboro dunduko rengbe arengba ka mbeda na gu Mbori nga ga wasa ko ni gbia yo ruru inohe rogo Ziazia Kekeapai. Fuo ko ya “Amina,” gi nangere kurii bambu baga riahe re aye koyo gi Dezire aduni re na aboro fuo ri susi 60 nga aguyo narundu pati bambu yo, ri aye ka fu tambuahe fuko, na ki dungo ko, na ki ya ri agianga kparakpee mbata wa gure te.

Wene Sangbanapai Kurii agu Aboro Du Rogo Dagbarago

19. Gini pangbanga namangi nayugo gupai nga gu kura aboro kinaho naida kuti gu tumbatumba andiko nga ga aDezire Yekova?

¹⁹ Gbe, rogo agi auru re, gu rimbasa aboro aDezire Yekova amanga gayo sunge dagba yo nagbia undo behe, a wa dungu yo nagumbaha. Tipagine ka agu aboro nasonosa pazereda, namanga kina ruru apai, na duna gigiri mangaapai arengbanga tini ka duna wene undo fu kura aboro ya? Rogo ringara sa du bebere Asia yo, aDezire agbia kumba sa naima zora ti sunge biroo nga ga ababanda ringara. Ko aya i afu gu sunge fuko ti kura regbo sa nga ko wisigi agu apambori nga ga dungu ariigbu. Ho ko awisigi gu ni nga ga aDezire Yekova, ngbako azere be padu yo ni ruru aboro na be gayo wene mangaapai. Ko abi gayo idapase na irisa, na ki bi gupai nga i namaa mburu gayo yugopai rii Ziazia Kekeapai. Gi kumba re aidipa wisigo Ziazia Kekeapai.

20. (a) Gine gu sunge aDezire Yekova afu ripoti he gugorö ayugoho? (b) Gine nayugo gupai nga bakere sunge kinaho kindi kumbatayo tipa mangaha, na waigu ani abi gu gaani mamu nga ga mangasunge tungusa wene pangbanga?

²⁰ Mbiko gu bete apangbanga gumba yo paha rogo gi papara kekeapai re, nga gu du dagba gu dungu akutu akuraha rengbe ani ka tangaraha, si ziazia nga, aDezire Yekova amangisunge nyanyakii rogo gu garã sunge nangia 2001.a I afura na dungu aboro, i angarasi dungu agu aboro nadu na nunga, na gayo sunge tungusa wene pangbanga aduna zuzuhe tini. Bange agu aboro nakpara tiyo fu Mbori kini yuguhe gbaiga nizio yo bapatiza angia 263,431. Rogo zegino dunduko, bange abatungusi wene pangbanga asono kuari na 1.7 rii kama. Na gu rengo nga bange aboro 15,374,986 nadu pati Tingidapa Kpio Yesu rogo gu garã re, si nayugo gupai nga bakere sunge kinaho kumbatayo kindi. (1 AKorindo 11:23-26) Ani ndunga kindi kumbatayo kaa gbata bayee aboro nga aguyo nadia wene pangbanga kugume. A wa ga Yekova garã nga ga weneringise andu kindi kumbatayo, ani naandunga kindi kumbatayo kaa ngarasa agu aboro “ngbaduyo akua.” Nangbaa gu sunge du berani re! Nirengo, ani dunduko nakaraga agu afugo Yesaya agumbaha nga: “Mi angí bakere rogo Yekova yo, torore ki du na bakere ngbarago rogo gi Mbori yo.” (Yesaya 61:10) Mbori manginga sunge na ani kindi wa ko kaa digiso agi asangbanebi nga: “Gbia Mbori nikamanga rurupai na tambuahe si kuru ku bara bangiri arikaaboro dũ.”—Yesaya 61:11.

[Gu rukutu kekeapai du bandu kpewaraga yo]

Oni Natingidaha?

• Waigu bayee aboro agbia undo be gu wene pangbanga Yesu anatungusaha?

• Gini amaku agu aboro nakaragapai wenengai kuti gu sunge tungusa wene pangbanga ga Yesu abawiriki amangihe agbiaha?

• Waigu agu aboro duna nyemu giapai areme agbia maku be wene pangbanga?

• Waigu ani abi gu gaani mamu nga ga duni abatungusi wene pangbanga?

[Gu kpiahe du ti kpewaraga 25]

ADezire Yekova natingidapa gayo sunge dedede ka tungusa wene pangbanga

[Gu kpiahe du ti kpewaraga 27]

Agu aboro nakaragapai wenengai kuti wene pangbanga nada ni papara bange agu awirina duni kpamiakpamia yo rogo zegino dunduko