“Oni Niyugu Gini Ngbatunga Aboro Kindi Nga Oni”

“Oni niʹasadi tironi kindi ka bihe singia oni rogo idapase yo, oni niyugu gini ngbatunga aboro kindi nga oni.”​—2 AKORINDO 13:5, NW.

1, 2. (a) Wai kapa tipa gaani aida narengbe ka manga ariapai tipa rani? (b) Ginipai nadu Korinda yo rogo bambata sa kama agarã narengbe arengba ka sa kura aboro i naakapa tipa gu gene si aida i ndu ngbaha?

ANI yaa, kumba sa nandu nunguro vuru ringara da ngboso gene. Mbiko wa ko aruganga tiko naapa gu gene nika ndu naako kurogo gu ba ko andu kurogoho ya, ko nasana agu aboro nasusa ti gene tipa i yugu gu gene fuko si aida ko ndu ngbaha, ono agu apai i agumbaha natagbagatihe atagbaga. Fuo vundo riko yo, gene beko tipa ko susi kumbatayo na gako nduge te. Padu ani na kapa tipa gaani aida rengbe kadu na sangbanaha wa kina gure kuti rani. Ngbatunga agu akapa re rengbe ka gbarasapa gaani abirĩ diaberã, ka ani aruganga tirani naapa gu gene nzunzu si aida ani ndu ngbaha ya.

² Pai akuru rogo gu dungurati nangia ga aKristano rogo bambata sa kama agarã Korinda yo ringara aGiriki yo narengbe kadu na sangbanaha wa kina gure kurii kura aboro. “Bawene amokedi kisusi” aasakapa gu ngerakuriisunge asaka nangia ga gu mokedi nangia Pauro kini yaa: “Gako keke apai du na tatamana nyanyaki, ono ngbanyako rurungbura, fugoko adu nga ni he te.” (2 AKorindo 10:7-12; 11:5, 6, oni ringbisinga ha na NW.) Ngbatunga gu bipai re arengbe arengba ka sa kura aboro rogo gu dungurati nadu Korinda yo i naakapa tipa wai si aida i naata.

3, 4. Tipagine si aida ti ni ani du na nyemu agu arugute tirani Pauro afuhe fu aKorindo?

³ Pauro nasigira gu dungurati nadu Korinda yo ti regbo gako nunguro koyo rogo 50 F.B.K. Ko asungu Korinda yo tipa “garã sa na diwi sita, niyugu ga Mbori pai dagba yo yo.” Nirengo, “aKorindo . . . [a]gi pai ki idi pa ha ni dungu yo, i ki bapatizi yo.” (Amokedi 18:5-11) Pauro aaida gupai wenengai nga agu akurako aidipase nadu Korinda yo i du na wasa gbiati ngbarago rogo toroyo. Kurii gure, aKorindo aima ke waraga fuko tipa arugute riipa kura apai. (1 AKorindo 7:1) Si ki ta du were, ko kini mo ka fu wene arugute fuyo.

⁴ Pauro akepai ki yaa: “Oni niʹasadi tironi kindi ka bihe singia oni rogo idapase yo, oni niyugu gini ngbatunga aboro kindi nga oni.” (2 AKorindo 13:5, NW ) Pa manga agu awirina nadu Korinda yo gi rugute re ka banda yo tipa ka i angbuonga angbuo ngba gu gene si aida i ndu ngbaha ya. Si rengbe ka manga kina gu bangisapai re tipa rani areme. Wai tie, rengbe ani ka manga ga Pauro arugute? Wai rengbe ani ka asada tirani ka bihe singia ani rogo idapase yo? Na gine nakodapa yugo ani pa gu ngbatunga aboro nga ani?

“ONi Niʹasadi Tironi Kindi ka Bihe Singia Oni Rogo Idapase Yo”

5, 6. Gini sigirasigirapai moi yo ho nikpiapai fu aboro du berani tipa asada tirani ka bihe singia ani rogo idapase, na tipagine du guhe re ti ni niwene sigirasigirapai?

⁵ Rogo asada dedede, he duwa ka si duho i aʹasadaha, na gu kura he i asigiraha nikpiapai fu aboro tipa ka manga gu asada re kuti ni. Tipa gipai ani afura tipaha re, anga guhe ani aʹasadaha si nga gaani idapase, nga agu apai dunduko ani aidi kuti ni te. Ono ani wadu ani nibasasa nga agu ahe naʹasada tirani. Tipa ani rengbe ka manga gu asada re, ani na rengberengbe kpiapai nga gu sigira yo ho fu aboro. Bia sa gu bake apapara Atambuahe nangia Davide asarihe nayaa: “Gu rugute nga ga Yekova si ziazia, nimbakadi mbisimo; gu dezirepai nga ga Yekova du ni nyanyaki he, ki nisa azangainahe i du ni airatatamana; gu ndika nga ga Yekova du ni ruru he, ningiisi kpotoyo yo; sangba Yekova du ziazia, ni hasi bangirise.” (Atambuahe 19:7, 8) Ziazia Kekeapai na ga Yekova rengberengbe andiko rogoho gbiati ruru azinahe, na agu atingidapai rengbe ani ka kido kuti ni gbiati gigiri arugute. Gu pangbangaa du rogoho, si nga gu wenepai sigira yo ho nikpiapai fu aboro tipa asadatise.

⁶ Gu mokedi nangia Pauro afura tipa gu pangbangaa ga Mbori toro adu kugii pakehe re ki yaa: “Gu pai nga ga Mbori du na unga, ki du na tandu, ki du ni títí he susi abasape dunduko du na rindihe ue, si narú boro dati kparaka mbisimo na toro, na ngbazunga na nzeme meme, si ki ipi ka ina agu aberã nga ga ngbaduse na gaha nyemuhe.” (AEbere 4:12) Ii, fugo Mbori rengbe arengba ka asada agu apai du ngbaduraniyo, nga gu boro nzunzu nga ani ku kpotoraniyo. Wai rengbe ani ka manga sangba gi pangbangaa du nitítíhe wa basape na duna bakere ome ti ni re rogo gaani raka? Bake apapara Atambuahe afura ziazia tipa wai rengbe ani ka mangasunge na fugo Mbori ka asada kpotoraniyo. Ko abibia ki yaa: “Boro maku nga gu boro . . . [du] gani ngbarago . . . rogo gu rugute nga ga Yekova, ni namakia pa gako rugute uru na yuru.” (Atambuahe 1:1, 2) Ani nabi “gu rugute nga ga Yekova” rogo Ziazia Kekeapai nga keke Fugo Mbori. Si naida ani du na ngbarago rogo geda Fugo Yekova. Nirengo, si naida ani di regbo ka gedaha na woro fugo rani kusende, watadu ka berãkuriihe. Wa ani kaa manga gipai re, si naida ani kusi tirani fu agu apai keke yo ho yo re, ani nga agu ahe si aida i asadihe.

7. Gine nga gu bangua gene duho tipa asada ani tirani ka bihe singia ani rogo idapase yo?

⁷ Gu bangua gene duho tipa asada tirani ka bihe singia ani rogo idapase, si tie nga ka geda Fugo Mbori kini berẽkuriihe na kini wisigi gaani gene mangaapai, singia si na ngbanyaa na gupai ani awirikaha. Fuo manga ani he wo, ani kini mo tie kadu na bakere ngbarago mbiko ani gbia bakere undo rogo giarogo Fugo Mbori yo.

8. Wai rengbe agu abuku nga ga ‘ruru kangara moyambu’ ka undo rani ani asadi tirani ka bihe singia ani rogo idapase yo?

⁸ Yekova ima fuka agu apai rengbe ani ka wirikaha gbiati arugute rogo agu abuku nga ga ‘ruru kangara moyambu,’ nga agu abuku nasakarogo Ziazia Kekeapai yo. (Matayo 24:45) Nikpiapai, oni wisiginga gu sanduki du riihe nga “Questions for Meditation (Asanahe Tipa Berãkuriihe)” du ti digido dungu akapita rogo gu buku nga Draw Close to Jehovah.a Gi papara buku re nirengo nga wene amamu tipa boro berẽkurii gupai ni awirikaha. Gu dungu riiapai i asakipai tipaha rogo gu gaani amagazini nga Ngbaõbambu Sinziri na Awake!, naundo rani a ani asadi tirani ka bihe singia ani rogo idapase yo. Nibipa gu papara kekeapai naafura tipa gu buku nga Asanza i akusihe bambeda kusayo rogo Ngbaõbambu Sinziri, Kristano sa nga dee ayaa: “Mi nabi gi papara kekeapai re nibawenehe kisusi. Si naundo re mi wisigi tire ka bihe singia gimi afugo, gimi asino mangaapai, na gimi asino berã si na ngbanyaa na ga Yekova ruru andiko.”

9, 10. Gini ambakadapai Yekova namangihe naundo rani ani asadi tirani ka bihe singia ani rogo idapase yo?

⁹ Ani naagbia kura dungu arugute gbiati ngarasahe a ti regbo agu dunguratise nga ga dungurati, na regbo kikindigi adunguratise. Agi apai re nga papara gu mbakadaapai nga ga toro Mbori amangihe tipa agu aboro Yesaya afura tipa yo kumbatayo ki yaa: “Si aye ka du rogo yangara arame ya i ambákada gu bagangara nga ga Yekova bambu ni bagbanga ha ki susi abaagangara dunduko, si adú ni tumbatumba ha ku ari ki susi agangara; arikaaboro dunduko andú koyo, aboro andú ni dungu yo, ki niya: ‘Oni yé, ani dákpa ku ri ga Yekova bagangara yo, . . . [tipa] ko raba rani na gako asino ani ki nipeke kina gako agene.’ ” (Yesaya 2:2, 3) Pa gbia ani ngbatunga gu yugopai tipa Yekova re nga maku nirengo.

¹⁰ Gupai si aidanga ani basapaha ya, si nga agu arugute agu aboro duna gu inohe nga ga toro beyo afuhe, kodihe na agu aKristano nga abaakumba rogo dungurati. Ziazia Kekeapai naya tipa yo wee: “Awirinaa, ka si du nga boro mangi irairapai mbata fu ni ini pai tipaha, si naida aguroni duna gu inohe nga ga toro, oni asadi tironi aʹasada ka ruga ngbatunga gu boro re rogo gu sino nga ga zera, na kini bi tironi wa du oni nibasasa, i ka asada roni a.” (AGaratio 6:1, NW ) Nairiwo gu tambuahe rengbe ani kadu nani tipa gi mbakadapai du tipa ruga rani re!

11. Gine pa asada ani tirani ka bihe singia ani rogo idapase aidaha?

¹¹ Gaani abuku, agu adunguratise nga ga aKristano, agu akumba i amoi yo rogo dungurati, i, gbiati agi ahe re, nigu wene mbakadapai ye be Yekova. Ono tie, pa asada ani tirani ka bihe singia ani rogo idapase naida wisigotise nisase. Sidu, ho ani ageda gaani abuku ni watadu ho ani adegaturani ni kuti agu arugute nga ga Ziazia Kekeapai, si naida ani sana tirani ki yaa: ‘Mi du gipai re aringbisa pare? Mi naamanga gipai re? Mi kakuti gu yugoapai nga ga aKristano?’ Gaani sino berã tipa gupai ani agbiaha rogo gi mbakadaapai re namanga ariapai amanga a tipa wai du ani rogo toroyo. Ziazia Kekeapai nayaa: “Boroboro adia nga agu apai nga ga ga Mbori Toro te; bambiko si du ni mumungo pai fu ni; ka ni ini nga ha te, bambiko i nawisiga ha ni Toro. Ono gu ni du na toro nawisiga apai dunduko.” (1 AKorindo 2:14, 15) Ya mo si aidanga ani mangi nyanyaki asadatise ka kakuti gu wene bipai nga ga toro du ani nani tipa agu apai ani agedaha rogo gaani abuku, amagazini, na kura abuku gbiati agu ani agiaha ti regbo adunguratise na gu ani agiaha ngba abaakumba tee?

“Oni Niyugu Gini Ngbatunga Aboro Kindi Nga Oni”

12. Gine pa yugo ani gu ngbatunga aboro nga ani akodaha?

¹² Pa yugo ani gu ngbatunga aboro nga ani nakoda wisigotise nisase. Ii, ani rengbe arengba kadu rogo rengo yo, ono wai nyaki ani rogo toroyo? Pa yugo ani gu ngbatunga aboro nga ani nakoda yugo ani gopa gaani sona rogo toro yo na ka yugo gupai nga ani nabi agu apai nga ga toro naapaha kuari nirengo.

13. Ringbisihe kuti AEbere 5:14, gine nayugopa nyaka ani rogo toroyo?

¹³ Gini gopai tipa gu nyaka nga ga aKristano rengbe ani ka ngera tipa ka bihe tirani watadu rogo rani yo? Gu mokedi nangia Pauro akepai ki yaa: “Nyanyaki riahe tipa sosono aboro, fu aguyo naraba gayo aome nga ga makiapai nimanga yo sunge nani tipa ka kpara rurupai kusayo ti irairapai.” (AEbere 5:14, NW ) Ani nafu gopa nyaka ani niraba ani gaani ome nga ga makiapai. A wa gu kura andikita nga ga baoro oto-abaangira aida i mangisunge amanga nani mbata fu ni kuru nibangbasia bangimbaro rogo gani mbaro, si naida gupai a nga ani raba gaani aome nga ga makiapai araba nimanga ani sunge nani wa ani amangasunge na gu bangua arugute nga ga Ziazia Kekeapai.

14, 15. Tipagine si aida ti ni ani mangi bakere asadatise zanga nyomoro ka wisigo gu dudunguroapai du rogo Fugo Mbori?

¹⁴ Ono tie, si naida ani gbia inohe mbata ani mo ka raba gaani ome nga ga makiapai. Tipa ka gbiaha, si naida kakaka wisigopai nisase zanga nyomoro. Ho ani amanga wisigopai nisase ni dedede, gbe riipa gu dudunguroapai du rogo Fugo Mbori yo, gaani ome nga ga makiapai nasona. Vuru agu agarã susi, dungu dudunguroapai i asakipai riipaha rogo Ngbaõbambu Sinziri. Ginipai ani naamangaha ho ani akura ni bara gu papara kekeapai nasakapai tipa gu dudunguroapai nga ga rengo? Ya mo ani naanekaha aneka na gu nduhe nga si na “bete apai rogo ho yo [du] ni kpakarakpakara ha tipa rugati na paha”? (2 Petero 3:16) Kuba gure, si naida ani mangi bakere asadatise ka rugatirani na gupai si agumbaha.​—AEfeso 3:18.

¹⁵ Ginipai ka ani mangihe ka si du nga pa wisigopai nisase fu rani nikpakarakpakaraha? Si ninyanyakipa pai ani mangi nyanyaki asadatise ka wirika wai kadu na nyemuhe tirani.b (1 Petero 2:2) Pa sona ani na ki nyaki naida gupai berani nga ani wiriki wai ka kusa wene riahe be ri nyanyaki riahe, nga gu dudunguro arengo du rogo Fugo Mbori yo. Ka si adunga wo ya, gaani ome nga ga makiapai anye nikina wiri umbaha. Ono tie, pa yugo ani gopa nyaka ani nakoda kura apai susi gu gbua nga ka gbia agu aome nga ga makiapai. Rogo gaani raka na aʹuru dunduko, si naida ani naamanga agu apai ini ani he be gaani wisigopai nisase zanga nyomoro.

16, 17. Gini arugute gu bawiriki nangia Yakoba afuhe tipa si sa rani ni ‘amangipai’?

¹⁶ Ani nabi gu gopai du tipa gu ngbatunga aboro nga ani a rogo gu gaani asunge nga ga tambuahe ani amangaha tipa rengo, nga gu gaani mangaapai nga ga idapase. Wa gu bawiriki nangia Yakoba aamangasunge na wene kpiapai ka yugopa gi ba du tipa wisigotise re, ko ayaa: “Oni dú ni amangipai, ka oni dú nga ni agipai gbua, ni nanga tironi ya. Bambiko ka boro du ni gipai, ka ni adu nga ni mangipai ya, ni wiri kina gu kumba nangana kpakpuni rogo bitiroabi, bambiko ni ngana tini, ki nindu, bangirini ki go ni ba sa ti gu ngbatunga boro nangia ni. Ono gu ni nangana gu ziazia rugute nga ga raniri, ki nye rogo ho, ka ni adu nga ni gipai nahe tingida pai ya, ono ni du ni mangipai namanga ha, gi boro re i afu maku afu fu ni rogo gani manga sunge.”​—Yakoba 1:22-25.

¹⁷ Gupai Yakoba agumbaha nzunzu nga: ‘Oni ngere kurogo gu bitirobi nga fugo Mbori, na oni ki wisigi tironi. Oni kakuti manga gipai re, na kini wisigi tironi rogo ima gupai oni abihe rogo fugo Mbori. Fuo gure, ka bangironi gonga niipo ti guhe bi oni he ya. Oni mbakadi agu apai si aida oni mbakadihe.’ Pa manga ani agi arugute re rengbe kadu ti kura aregbo nikpakarakpakaraha.

18. Tipagine du pa manga ga Yakoba arugute ti ni nikpakarakpakarapai?

¹⁸ Nikpiapai, ani dinga gu rugute du tipa sunge tungusapa Kindo. Pauro akepai ki yaa: “Boro naida pase kpotoni yo, Mbori ki sa ni ni ruru ni, ni ki kusi pase ni ngbani sa bata.” (ARomo 10:10) Pa tungusa ani pai na ngbarani sa bata naida ani mangi dungu aʹariapai rogo gaani raka. Pa rimiso ani tirani kurogo sunge tungusapai ayenga fu dungu rani nisaha te. Pa manga ani he zaaza na ki moihe rogo gu ba si aida ani moihe rogoho rogo gaani raka naida dungu aʹariapai na ki mbupa kura gaani apai. (Matayo 6:33) Ono fuo du ani kindi nga amangi gi sunge Mbori nafuhe fu rani re, ani nagbia ngbarago mbiko gu taarimo si aye nani fu Yekova. Wa duhe tie re, ani nga zaaza atakipande ga Mbori Kindo?

19. Gine si aida gu gaani mangaapai nga ga idapase kodihe?

¹⁹ Gine si aida gu gaani mangaapai nga ga idapase kodihe? Pauro ayaa: “Agu apai oni ata ina ha nidi he nigi he ki nibi he rogo re yo, oni mángi agi apai re. Mbori zereda ki du na oni.” (AFiripoio 4:9) Ani nayugo gopa gu ngbatunga aboro nga ani nimanga ani agu apai ani awirikihe, ani adihe kugume, ani agihe, na ani abihe, nga agu apai dunduko aKristano akparatiyo ka mangaha na nakoda sunge sa aboro ni abawiriki. Yekova afu arugute rogo gu nebi nangia Yesaya ki yaa: “Gene du re, oni ndú ngba ha.”​—Yesaya 30:21.

20. Gini ngbatunga aboro nga bakere maku wa du yo nibasasa fu agu aboro du rogo dungurati?

²⁰ Agu akumba gbiati adee nga kakaka awisigi Fugo Mbori namangaha zanga nyomoro, nga zaaza abatungusi wene pangbangaa, nga akakuti ruru mangaapai zanga pai duho ka i bira yo ti ni, na nga ruru asongodi Kindo, i nga bakere maku fu dungurati. Padu yo rogo dungurati nanyakasaha. I nayugo tiyo rogo gayo mangaapai nibakere afu-undo fu dungurati, gbe, bambiko dungu vovo aboro gu duho si aida i undoyo. Ho ani adia ga Pauro arugute ni kugume nga gu nangarasa rani ‘ani niʹasadi tirani kindi, ka bihe singia ani rogo idapase yo, ani niyugu gini ngbatunga aboro kindi nga ani,’ ani a nikadu niwene kpiapai fu kura aboro.

Oni Duna Ngbarago Rogo Manga Gupai Mbori Akpinyemuhe

21, 22. Wai rengbe ani kadu na ngbarago rogo manga gupai Mbori akpinyemuhe?

²¹ Bakindo Davide, nga gu kumba nazogo gu ringara aYisaraere nadumbata, abibia ki yaa: “Ako gi Mbori, rago ngba ti re ka amanga gu pai ngba angba ti ro; ii, ga rugute du kpotore yo.” (Atambuahe 40:8) Davide anidu na ngbarago rogo manga gupai Mbori akpinyemuhe. Tipagine? Bambiko ga Yekova andiko adu kpoto Davide yo. Davide anaakapanga tipa gu gene si aida ko ndu ngbaha te.

²² Ho du ga Mbori andiko ni kpotoraniyo, ani akapanga tipa gu gene si aida ani ndu ngbaha te. Ani nidu na ngbarago tirani ka manga gupai Mbori akpinyemuhe. Nirengo tie, ani ‘mangi nyanyaki asadatise’ rogo mangasunge fu Yekova na ngbaduraniyo dunduko.​—Ruka 13:24, NW.

[Gu rukutu kekeapai du bandu kpewaraga yo]

Oni Natingidaha?

• Wai rengbe ani ka asada tirani ka bihe singia ani rogo idapase yo?

• Gine pa yugo ani gopa agu aboro nga ani akodaha?

• Gini gopai rengbe ani ka yugopa gaani nyaka rogo sino aKristano nani?

• Wai gu gaani mangaapai nga ga idapase aundo rani ani ini gini ngbatunga aboro nga ani?

[Gu kpiahe du ti kpewaraga 9]

Oni ini gu bangua gene du tipa asada tironi ka bihe singia oni rogo idapase?

[Gu kpiahe du ti kpewaraga 10]

Ani nayugo gopa nyaka ani rogo sino aKristano nimanga ani sunge na gu ome nga ga gaani makiapai

[Gu kpiahe du ti kpewaraga 11]

Ani nayugo gopa gu ngbatunga aboro nga ani nizanga du ani ni ‘agipai gbua ono ni amangipai’