Ya Mo Aramegido Nga Kere Gbegbere Digido Zegino?

ARAMEGIDO! Ya mo gi fugo re naye na gu berã kuri roni yo nga ga bakere gbarasarago watadu we wa ngumbee nika rera rogo haurago dunduko ka zokoda ahe? Anga fugo ho du rogo Ziazia Kekeapai furanga aboro tipaha bakere gbe rogo kura apapara zegino wa gu fura yo tipa “Aramegido” te. Aboro naamangasunge na gu fugo re dedede ka ringbisapa gu gberango aboro angera bangiriyo nani. Abambakada asinima na avidio ima maa kere kpiaapai ku berã aboro yo tipa gu “Aramegido” ya yo wee si naye. Aboro aruganga tiyo na rogo gu fugoyo re te mbiko gu vunduvunduapai du tipaha. Wa vura du gu fugo nga Aramegido na dungu aberã tipa gine nzunzu nga rogoyo, dunguhe na ngbanyaa na gupai Ziazia Kekeapai ayugoho te, nga gu buku gu fugo re aenge rogoho.

Wa duhe nga Ziazia Kekeapai nakoda Aramegido kuti ‘digido zegino,’ ya mo oni aidanga kuti gupai nga, si ninyanyakipa pai ani du na ziazia giarogopai tipa ndikidi rogo gu fugoyo re tee? (Matayo 24:⁠3) Na ya mo si arengbanga kadu nirurupai oni ndu kurogo gu ba nga yangara mburu rengo, nga Fugo Mbori, tipa ka gbia ruru akaragapai tipa Aramegido na ka ino gupai si ka mangaha tipa roni na gaoni aborokporo tee?

Ngbatunga gu wisigopai re nika yugo gupai fu rani nga, kuba gupai nga Aramegido ye na kere gbegbere digido zegino, si nika ye na tonatona gu raka nga ga ngbarago fu agu aboro duna nyemu ka raka rogo gu vovo zegino duna ruruapai rogoho. Oni aduadu na wene giarogopai tipa gi nyanyakipa rengo nga ga Ziazia Kekeapai re wa oni ka wisigo ndikidi rogo gu fugoyo nga Aramegido rogo gu papara kekepai naye fuo gere.

GINE ONI ABERÃHA YA SI NIKANGIA ARAMEGIDO?

• Gu gberangbii naye be sumbuso kere gumbura?

• Kere gberesarago?

• Kura ũngbangbaturũ nika fõ tihe ti kpotosende?

• Imo gbegbere aboro Mbori nika mangaha?