Gini He Kura Aboro Aya Si Nga Aramegido?

“I ki dungura yo ku rogo gu ba i niya ti ni rogo pa Ebere yo, Aramegido.”—YUGOTI 16:16.

GINIPAI ninaaye ku berãroni yo ho oni agia gu fugo ni nga “Aramegido”? Gupai tigaha ninaaye ku berãroni yo nga pa kere gberango. Wa vura duhe nga i fura gbua bara sa tipa gu fugo re rogo Ziazia Kekeapai, agu aboro ninaagbandaka apangbanga gbiati abarumbatayo rogo pambori nafura tipaha dedede.

Ya mo agu abipai du aboro nani tipa Aramegido nandu sa na gupai Ziazia Kekeapai ayugoho? Si naida oni ini karagapai aino kuti gu sanahe re. Tipagine? Bambiko pa ino oni gu rengo du tipa Aramegido rengbe ka dia gunde tironi kusayo, ka sa gupai nga oni du na wene bipai tipa raka kumbatayo, na ki sa roni oni du na wene bipai tipa Mbori.

Oni makianga agu asanahe biata du kusende re, na ki ringbisi agu apai aboro aberãha tipa Aramegido na gupai Ziazia Kekeapai ayugoho.

1. YA MO ARAMEGIDO NIKANGIA GU GBERANGO NAYE BE GU MANGAAPAI NGA GA ABORO?

Abakeke apangbanga gbiati abaweteke apai ninaamangasunge na gu fugo nga “Aramegido” ho i afura ni tipa agu agberango naye nisangbana gu mangaapai nga ga aboro. Nikpiapai, i afura tipa gu Bambata Vura Nga ga Zegino gbiati Uehe ki ya si angia Aramegido. Tifuo agu avura re, aboro aabaka kina bangiriyo nga agu aringara nga Amerika na Soviet Union, si nika sovura dagba tihe na kere aũvura. Agbandaka pangbanga agumba gupai nga gu vura re nikangia “Aramegido,” nga gu i nika ba kere bundu rogoho si ki zokodi arago dunduko. Areme, abaweteke apai nazahe kini ya agu ahe nabirikosi ime, wege, watadu sende, si nika sa gupai nga sino rago sa tihe nigbegberẽhe na si ki ye na gu faarago nikadu wakina “Aramegido.”

Gupai du ri agu aboro yo re nga: Kpotosende gbiati gu ungaahe du rogoho dunduko kube aboro. Ka abazogo amanganga pai nitatamana ya, aboro nika gbarasa kpotosende nyeanye kindi.

Gupai Ziazia Kekeapai ayugoho: Mbori ambunga aboro i gbarasi kpotosende te. Ziazia Kekeapai nagumba gupai nga Yekovaa “amanga nga ha ni kungba he te,” ko “ambakadi he aboro niraki rogo ho.” (Yesaya 45:18) Kuba gupai nga ka mbu kpotosende aboro gbarasihe, Mbori nika “gbarasa agu yo nagbarasa kpotosende.”—Yugoti 11:18.

2. YA MO ARAMEGIDO NIKANGIA GU GBERANGO NIKAYE BE OME ZEGINO?

Abakeke apangbanga ninaamangasunge ti kura aregbo na gu fugo nga “Aramegido” ho i afura ni tipa gu kere agberango naye be ome zegino. Nikpiapai, rogo gu garã nangia 2010, tingidapai aduho sa naafura tipa “‘Aramegido’ rogo gu ringara nga Haiti.” Gu tingidapai re aafura tipa gu rungo, gbarasa ahe, gbiati kpio nga gu namangi ti regbo gu bazigizo namangi rogo gu ringara re. Aboro pangbanga gbiati agu aboro nambakada afirimi namangasunge amanga a na gu fugo nga Aramegido re tipa gu kere agberango i aberã gupai nga si nika manga kumbatayo. Nikpiapai, i mangisunge na gu fugo nga “Aramegido” ka fura tipa gu kerepai rengbe ka manga ka gu kirikiri he nga gu nake pati uru fõ kpotosende.

Gupai du ri agu aboro yo re nga: Aramegido nga gu he naimo aboro tua kodihe na aguyo nga ruru aboro. Pai ho rengbe boro ka mangaha tipa ka banda tiní behe te.

Gupai Ziazia Kekeapai ayugoho: Anga Aramegido nika imo aboro aimo tua kodihe na aguyo du niruruyo te. Kuba gure, ti regbo Aramegido, kina gbigbita aboro sa i nika imo yó. Ziazia Kekeapai nakidohe nga barambeda kumbatayo, “gbegberẽ boro adú nga ho berewe te; ka mo vura wisiga ba ni sirisiri vurũ, ni adú nga ho te.”—Atambuahe 37:10.

3. YA MO MBORI NIKA GBARASA KPOTOSENDE AGBARASA TI REGBO ARAMEGIDO?

Dungu aboro pambori naberã gupai nga yangara vura kinaho nika manga dagba gbegberẽpai na wenepai nga gu nika gbarasa kpotosende naabaha. Gu riigbu nga Princeton Survey Research Associates asasana aboro rogo gu ringara nga Amerika ki bi gupai nga 40 ri kama nga ga sosono aboro naberã gupai nga i nika gbarasa gi kpotosende re agbarasa ti regbo gu “vura nga Aramegido.”

Gupai du ri agu aboro yo re nga: Mbori ambakadanga aboro tipa i raki araka nyeanye kindi te, ko ambakadanga kpotosende a tipa si nyeanye kindi te. Mbori ambakadi aboro na gu berã nga i kpi akpi tifuo bete regbo.

Gupai Ziazia Kekeapai ayugoho: Ziazia Kekeapai nagumba gupai zukazuka nga Mbori amoi ‘mburu kpotosende ka i gbisanga ha wa rago agira ya.’ (Atambuahe 104:5) Nibipa agu aboro naraka auru kpotosende, Ziazia Kekeapai nayaa: “Ruru aboro adía kumbo ringara, ki nye anye kindi.”—Atambuahe 37:29.

Nirengo, gupai Ziazia Kekeapai ayugoho tipa Aramegido, si kia ti agu abipai du aboro nani tipaha. Ono boro gini rengo tie nzunzu du tipa Aramegido?

[Footnote]