Yekova Naraba Ababanda Avusende Tipa I Naangerafuo Gako Rimbasa Avusende
“Yekova nafu tatamana; ngbako yo inahe nakura ni na rugatinapai.”—ASANZA 2:6.
1, 2. Ndu gupai agu akumba naaima zio bapatiza naagbata gene ti ni tipa mamu ka kiiso gayo sunge rogo dungurati nga gine?
NICK, nga gu wirina ima mangasunge awere nibakumba tipa agarã saba nayaa: “Mi aduna bakere ngbarago tire ho i amoi re ni nibakumba . . . Mi abi gipai re nimamu tipa ka kiiso gimi sunge fu Yekova. Mi abihe nga si naida mi tambuako tipa agu apai dunduko ko amangihe fere. Mi aduna nyemu gupai a nga ka undo agu aboro du rogo dungurati na omere dunduko a wa rengbe mi nani, nga ka undoyo kina ngba gu gene teketeke kura abaakumba aundo re ngbaha.” Ono wa si avura du wo, kura fudifudiapai adu kinaho nakoditihe na gako ngbarago. Nick asusi na fugo kumbatayo kindi kini yaa: “Wa si adu nga garãre adanga ti 30 ho i amoi re ni nibakumba te, mi aduna kina gunde nga mi adunga na agu abirĩ si aidaha te, zingo wene bipai, na zingo tatamana tipa ka ngerafuo dungurati ngba beedi gene.”
2 Agu aboro Yekova amaa yo i naangerafuo gako rimbasa avusende na dungu nduapai beyo tipa kadu na ngbarago. Gu mokedi nangia Pauro atingidi agu abaakumba nadu Efesa yo na ndupai sa ko adihe rogo fugo Yesu yo ki yaa: “Ngbarago ho gbe rogo gamahe susi gu duhe rogo diaha.” (Amokedi 20:35, NW) Agu akumba naima zio bapatiza, pa manga yo sunge nimoyambu-undo watadu nibakumba nazaka kura agene fuyo tipa i mangisunge nibakerehe fu Yekova na fu dungurati. Nikpiapai, amoyambu-undo naundo abaakumba. Agi amoyambu-undo re naangera a fuo kura dungu asunge rogo dungurati nga gu nadia bakere regbo, ono nga gu daada tipa i mangihe. Nyemuse tipa Mbori na tipa akurayo aboro nafõngbadu ngbatunga agi awirina yo re tipa i naamanga gu nyanyakipa sunge re.—Marako 12:30, 31.
3. Tipagine rengbe kura aboro ti ni kadu na kina ndundu ka gbata gene tipa amamu sunge rogo dungurati?
3 Ginipai rengbe kadu tipa gu Kristano duna ndundu ka gbata gene tipa gu mamu nga ga du nimoyambu-undo, na niyangaraha kidu nibakumba, ono nga guni naberã gupai nga ni arẽnga te? Wakina Nick, ni rengbe arengba kadu na bakabangirise ya ni na agu abirĩ beni si aidaha tipa kadu niwene babanda avusende te. Ya mo oni, nga gu wirina naaima zio bapatiza, dagba agu aboro yo rengbe ka berã wa gere? Anga ngbatunga agi abakabangirise re niʹirairaha te. Agu ababanda avusende i amaa yo akaragapai akaraga fu Yekova nibipa gu gene i angerafuo rimbasa avusende ngbaha. Yesu ayaa: “Gu ni i ka fu dungu he fu ni, i asána ni ti ni gbe; gu ni i ka asia pa dungu ahe fu ni, i . . . [a]kpi nyemu he be ni bakere a.”—Ruka 12:48.
4. Wai Yekova aundo agu aboro ko amaa yo i naangerafuo gako avusende?
4 Ya mo Yekova namaabangiriko ya agu aboro ko amaa yo ni amoyambu-undo na ni abaakumba, i nikaa manga gayo asunge nisayo zanga ko fu undo fuyo? Oó, kuba gure, ko nafu wene undo fuyo nga gu nasa yo ka i rẽnga kina kungba rẽ tipa mangaha ya, ono i mangihe a na diabese. A wa sakiyo pai tipaha rogo gu kekepai ye mbata fu gere, Yekova nafu gako toro fuyo, nga gu zuzu he naundo yo i ngere fuo avusende wesewese na nyemuse. (Amokedi 20:28; AGaratio 5:22, 23) Kurii gure, Yekova nafu tatamana, inohe, gbiati rugatinapai fuyo. (Asanza 2:6) Wai ko amanga gipai re? Ani sakinga pai tipa agene biata nga gu Yekova araba agu aboro ngbaha nibasasa ko amaa yo i naangerafuo gako avusende.
Agu Ababanda Avusende Duna Inohe Naraba Yo
5. Tipagine Petero na Yoane adu ti ni niwene ababanda avusende?
5 Ho agu amokedi nangia Petero na Yoane aru ni barabangiri ga aYuda agbia-ngbangaa, agu abasapungbangaa nadu na gu tatamana nga ga zegino beyo rogo gu bambu-sapangbangaa re aberẽ payo ya ‘i adunga nitatamana tatamana aboro na ni airainahe te.’ Ono tie, i angia agu aboro naima rengba ka gedapai na ka kepai, ono i awirikanga Ziazia Kekeapai be agu abayugupai i anaayamba yo nga arabi te. Wa si avura du wo, Petero na Yoane gbiati kura abawiriki ayugu gupai nga, i angia wene abayugupai, na gayo yugopai ki fõngbadu gu dungu aboro yo naadegatuyo kutiyo i satiyo ni aidipase. Wai gi kungba aboro-ringara re ada nibawene abayugupai wa gure? Fuo dega agbiangbangaa tuyo kuti afugo Petero na Yoane, i “atona ka rugatiyo na gupai nga, i anaasungo na Yesu.” (Amokedi 4:1-4, 13, NW) Rengo ngaha nga, i aima uka ziazia toro kuriyo. (Amokedi 1:8) Ono si aima du a ziazia zavura fu agu abasapungbangaa nangia airavurari rogo toroyo nga, Yesu du naraba agi akumba re. Ti gu regbo Yesu aduna agu amokedi re auru kpotosende, ko ayugonga pai fuyo gbua tipa kina wai ka dungura agu aboro naduwa avusende te, ono ko ayugupai fuyo a tipa wai ka ngerafuo agu aboro re fuo da yo nipapara dungurati.—Matayo 11:29; 20:24-28; 1 Petero 5:4.
6. Gini kpiapai Yesu na Pauro amoihe tipa raba kura aboro?
6 Fuo zingisa yo Yesu bekpio, ko asusi kumbatayo kindi kaa raba agu aboro i amoi yo ni ababanda avusende. (Yugoti 1:1; 2:1–3:22) Nikpiapai, ko nitiko asia Pauro na ki ngerekurii sunge raba ko. (Amokedi 22:6-10) Pauro abipa gu rabahe i afuhe fuko na kikiipaha na ko ki yugu agu apai ko awirikihe fu gu kura abaakumba. (Amokedi 20:17-35) Nikpiapai, ko adi bakere regbo na ki mangi bakere asadatise tipa ka raba Timoteo ko du ‘nigu bamangisunge’ pambori “adunga na zee ya.” (2 Timoteo 2:15) Dawedawe pabakure atona dagba agi akumba re. Mbata kusayo, Pauro akepai tipa Timoteo ki yaa: “Wa gude namanga pa bani, kina wo ko amangi pai, nigbandaka pa wene pangbanga na mi.” (AFiripoio 2:22) Pauro agbatanga gene tipa ka sa Timoteo watadu gu kura boro nigako bawiriki te. Kuba gure, ko angarasi akurako aidipase i du ‘ni awiriki mangapai wa ko, a wa ko adu nibawiriki mangapai wa Kristo.’—1 AKorindo 11:1.
7, 8. (a) Gini pangbangaa nayugo gu wene sangbana ninaamanga ho abaakumba naawirika mangapai ni wa Yesu na Pauro? (b) Gini regbo si aida abaakumba tona kaa raba agu aboro rẽ tipa i du gizo ni amoyambu-undo na ni abaakumba?
7 Rogo wirika mangapai wa Yesu na Pauro, agu ababanda avusende duna inohe natona raba agu awirina ima zio bapatiza, si kidu na kina gu wene asangbana re teketeke. Oni makianga gupai nadu tipa kumba nga Chad. Ko asono dagba agu aborokporo nadu na gayo apambori nibakiakia, ono mbembedii kusayo, i amoiko nibakumba rogo dungurati. Ko nayaa: “Tipa badungu agarã, dungu abaakumba aundo re mi sono rogo toroyo. Wa si adu nga buba adunga na mi ti idapase te, agu abaakumba re ayugu kparakpara nyemuse tipa re na i kidu wakina agu abaagude nga ga toroyo fere. I adi regbo ka raba re na sunge tungusapai, na kusa, bakumba sa adi regbo gbe ka raba re rogo ngerafuo agu asunge nga ga dungurati nga gu i anaafuhe fere.”
8 A wa gupai nadu tipa Chad ayugoho, agu ababanda avusende duna rugatinapai naima tona raba agu amoyambu-undo rẽ ki mbu regbo kumbatayo kindi nigbangaha tipa i du ni abaakumba rogo dungurati. I natona mangaha mbata agi amoyambu re nika sona wenengai rogo toroyo ka rẽ tipa ngbatunga agi asunge re. Tipagine i amangaha ti ni wo? Bambiko Ziazia Kekeapai nazinahe kini yawee si naida awirina gbia wene inohe gbiati wene sino mangaapai mbata fu i moi yo i nimangisunge ni amoyambu-undo na ni abaakumba. Si naida i ‘asadi yo mbata ka inoho singia rẽ yo arẽ.’—1 Timoteo 3:1-10.
9. Gini sunge dube agu ababanda avusende duna inohe, na tipagine duhe ti ni wo?
9 Kangia si naida i asadi agu awirina tipa sunge naima zio bapatiza, si nigupai daada nga i raba yo mbata. Ani yugunga ha na kpiapai: Kangia i sana gude-sukuru ni asadi ka manga kpakarakpakara asada nga gu abayugupai ayugonga pai tipaha funi ya, ya mo gu gude-sukuru re susi rogo gu asada re? Si nawira gupai gbe nga, ni ti ati rogo gu asada re. Sidu tie, si naida i raba boro araba mbata. Fuo duhe tie wa gure, agu abayugupai duna rubangirise naarabanga abawirikipai tipa kina gupai sa nga i susi rogo asada te, ono i naraba yo a tipa i mangisunge na gu inohe i nagbiaha re. Teketeke a wakina gure, agu abaakumba namangasunge na rubangirise, i naaundo agu awirina naima zio bapatiza tipa i sonosi agu asino si aidaha be agu aboro i amaa yo, nifuyo kparakpara rabahe fuyo. I amanganga ha wo gbua tipa kina ka undo agi awirina re rẽ tipa maa yo ti sunge ngerakurii apai te, ono tipa ka undoyo i rengbe a kaa ngerafuo rimbasa avusende wenengai. (2 Timoteo 2:2) Rengo ngaha nga, si naida agu awirina naima zio bapatiza naamanga asadatise nyanyakii ka gbia gu inohe si aidaha tipa sunge moyambu-undo na gu sunge nga ga abaakumba. (Tito 1:5-9) Wa vura duhe wo, agu ababanda avusende duna inohe rengbe arengba kaa undo agi awirina re i sono kumbatayo niipo niraba yo agu aboro ninyemuse naida ka gbia mamu tipa kiiso gayo sunge.
10, 11. Wai rengbe ababanda avusende ka raba kura aboro tipa kura amamu nga ga sunge?
10 Wai nzunzu rengbe agu ababanda avusende duna inohe kaa raba kura aboro i naangerafuo agu asunge nga ga dungurati? Bambatapai nga, ababanda avusende duwa ka i duna nyemu agu awirina du rogo dungurati, kini mangisunge tungusapai naayo dedede na kini undoyo i naayugo “ga rengo pai [“gu fugo nga ga rengo,” NW] nzunzu.” (2 Timoteo 2:15) Agu ababanda avusende duna inohe naasakapai na agu awirina rẽ tipa agu angbarago rengbe yo ka gbiaha ti mangasunge fu kura aboro, na gu ngbarago ababanda avusende naagbiaha ti maa yo agu asásá nga ga toro na kini da ti ni. Niweneringise, i nafu wene aberã a riipa wai rengbe wirina ka sona kumbatayo na kidu ‘nikpiapai fu rimbasa avusende.’—1 Petero 5:3, 5.
11 Ho i amaa wirina ni nimoyambu-undo, agu ababanda avusende duna tatamana nasusa kumbatayo kindi kaa raba ni. Bruce, nga gu wirina naima mangasunge nibakumba tipa agarã mbembedii wa 50 nayaa: “Mi naakpinyemu ani sungu na gu wirina moi yo ni nimoyambu-undo barambeda tipa ka ngerarii agu arugute na ni ruru kangara moyambu akehe. Ani naageda agu arugute dunduko a du tipa kina boro gu sunge fu yo ho funi, na mi naakpinyemu ka mangasunge na ni daho ni nika inido tini ni na gani asunge wenengai.” Wa gu moyambu re nikaa gbia inohe, si daada a i raba ni rogo gu sunge nga ga ngarasa avusende. Bruce nafura kindi kini yaa: “Ho mi nidi moyambu-undo ni na mi tipa ka ndu ka ngarasa kura boro, . . . mi naaundo ni ni sia agu averesi daada nga gu nika ngarasa gu boro re na ki fõngbaduniyo, watadu agu aborokporo ani andu ka biyo. Pa wirika ni wai ka mangasunge na Ziazia Kekeapai rogo ngbatunga gi gene re tipa si fõngbadu boro yo nigupai daada ka si du nga gu moyambu re nika da niwene babanda avusende.”—AEbere 4:12; 5:14.
12. Wai rengbe agu ababanda avusende duna inohe ka raba agu awirina i namoi yo bambeda ni abaakumba?
12 Agu ababanda avusende i amaa yo nivovo yo naagbia mamu a bakere be kura arabahe. Nick, nga gu wirina ani nifura tipa ko mbata, nayawee: “Gu rabahe mi agbiaha be sosono ababiapai ue afu bakere undo fere ngba kparakpara gene. Dedede, agi awirina re anidu na giarogopaiyo nibipa wai si aida i mbakadi kura apai. Ti aregbo dunduko, i anaadegatuyo nizerangbaduse kutire na kini makia gimi bipai nyanyakii, zavura gupai nga i aidanga nani te vurũ. Mi awiriki dungu apai be kparia mi agu agene i aamangapai ngbaha rogo dungurati na awirina niumbasitise gbiati irisa. Agi awirina re ayugupa nyakapa gupai fere du tipa mangasunge nibirĩ na Ziazia Kekeapai ho boro ambakada kpakarapai ni watadu ho ni angarasa kura boro ni.”
Agu Aboro Fugo Mbori Araba Yo
13. (a) Gine wirina aidaha tipa kadu niwene babanda avusende? (b) Tipagine Yesu aya ti ni wee: “Gi yugopai [re] nga gimi te, ono si nga ga gu ko nakedi re”?
13 Nirengo, Fugo Mbori, nga Ziazia Kekeapai, na andiko, gbiati abangua arugute, si na gu kura kpiaapai rogoho babanda avusende aidaha tipa kada “ziazia, aũ manga wene apai dunduko ki du be ni.” (2 Timoteo 3:16, 17) Wirina rengbe arengba kadu na wene wirikapai beni nga ga sukuru, ono gu gani inohe nga ga Ziazia Kekeapai na wai ni amangasunge nani nasa ni niwene babanda avusende. Ani makianga ga Yesu kpiapai. Ko angia bawene bainiapai kisusi, bawene barugutinaapai kisusi, na nigu bakere tatamanatatamana babanda avusende naraki auru kpotosende, ono, zavura gupai re ko akidonga kuti gako tatamana ho ko anaayugopai ni fu ga Yekova avusende te. Ko ayaa: “Gi yugopai [re] nga gimi te, ono si nga ga gu ko nakedi re.” Tipagine Yesu atambua rimo Bako ti ni du ngbangbaturũ yo? Ko asakirogoyo ki yaa: “Gu ni ka gumba pai ni tini ni nakpi nyemu gani taarimo.”—Yoane 7:16, 18.
14. Wai ababanda avusende ane gbata gene tipa gbia taarimo tipa kina tiyo?
14 Agu ababanda avusende nakakuti manga rurupai nane gbata taarimo tipa tiyo. I amaanga mburu gayo arugute na ngarasahe rii gayo tatamana nitiyo te, ono i naamaha rii Fugo Mbori. I ima rugatiyo na gupai nga, ga babanda avusende sunge nga ka undo avusende ami duna “ga Kristo berã,” angianga ga abaakumba ya. (1 AKorindo 2:14-16) Nikpiapai, ginipai ka mangi ka singia gu bakumba naaundo arogotise i mbakadi gayo akpakarapai nga ga rogatise, amoi gako arugute rii kina gako inohe, kuba maaha rii gu bangua arugute du rogo Ziazia Kekeapai gbiati gu tingidaapai ‘ruru kangara moyambu’ naakusaha? (Matayo 24:45) Si rengbe kadu nga gako arugute hi be kina agu asino nga ga aboro du rogo gu dagbarago du ko rogoho na kidu nikina betehe ringbisihe kuti gako tooni inohe. Rengo ngaha nga, kura asino kinaho adunga niʹirairaha ya, na gu bakumba re rengbe arengba kadu na inohe gbiati birĩ nga ga raka. Ono tie, avusende nagbia undo bakere ho ababanda avusende angarasa ra ni ami naadegatura kuti fugo Yesu na kuti agu apai Yekova agumbaha, kuba agu aberã nga ga aboro watadu kuti agu arugute nga ga sino raka nga ga dagbarago.—Atambuahe 12:6; Asanza 3:5, 6.
‘Ruru Kangara Moyambu’ Naraba Yo
15. Gini sunge Yesu afuhe fu ‘ruru kangara moyambu,’ na tipagine du gu riko nga ga moyambu re ti ni na diabese?
15 Ngbatunga agu ababanda avusende naduwa Petero, Yoane, na Pauro angia aboro gu badona Yesu aringbisipaha ‘niruru kangara moyambu.’ Gi riko nga ga moyambu re nakoda agu awirina Yesu du nimbedimbediyo nitoro auru kpotosende, duna maabangirise tipa ka zogarago na Kristo ngbangbaturũ yo. (Yugoti 5:9, 10) Rogo gi yangara aʹuru nga ga gi zegino re, gu namba nga ga agu awirina Kristo du auru kpotosende, si ima umba a wa si adu nga si nika manga. Ono tie, gu sunge Yesu afuhe fuyo i mangihe mbata fu digido zegino ye, nga sunge tungusa gu wene pangbangaa nga ga Kindo, si ima gbandaka awere rogo arago yasika susi gu nadumbata. Wa vura duhe wo, gu riko nga ga moyambu aima duna iiriwo diabese rogo manga gu sunge re! Tipagine? Ndupai sa dagba akuraha nga, i aima raba gu kura aboro dagba “kura akandoro” tipa i niundo yo rogo gu sunge nga ga tungusapai gbiati ga yugopai. (Yoane 10:16; Matayo 24:14; 25:40) Areme, gi badona aboro kakuti manga rurupai fu abadiangbayo re, i du nga agu aboro namanga bakere gi sunge re.
16. Wai gu riko nga ga moyambu araba agu aboro i amaa yo?
16 Wai gu riko nga ga moyambu naamanga gi rabahe re? Rogo bambata sa kama agarã, i afu asiahe fu agu aboro naarukuba gu riko nga ga moyambu i tayugupai fu aboro kini moi yo ni ababiapai rogo adungurati, na agi aboro re tigayo a, kini raba agu aboro du rogo dungurati. (1 AKorindo 4:17) Kina gu bangisapai re namanga areme a. Riigbu Bipasunge, nga gu wiri tooni badona nga ga mbedimbedi abaakumba narukuba gu riko nga ga moyambu, si nafu asiahe fu agu aboro narukuba gi tooni badona re i taraba kura aboro kini moi yo ni amoyambu na ni abaakumba rogo gu dungu akutu adungurati du rogo zegino dunduko. Kurii gure, Riigbu Bipasunge nambakada asukuru tipa raba agu aboro namangasunge rogo Rondo Be-basunge, na agu ababiapai ninaata ata, gbiati amoyambu-undo tipa wai ka ngerafuo avusende wenengai gbe. I nafuka kura arugusapa sunge rogo keke-keke awaraga, rogo apapara kekeapai rogo Ngbaõbambu Sinziri, na rogo kura abuku i akusaha, ngbatunga gu duwa Organized to Do Jehovah’s Will.a
17. (a) Wai Yesu nayugu gako kido kuti gu riko nga ga moyambu? (b) Wai rengbe agu ababanda avusende nga ga toro yo ka yugo gupai nga, i naa kido kuti gu riko nga ga moyambu?
17 Yesu nakido nyanyakii kuti gu riko nga ga moyambu, si du ko amoihe ti ni si naangerakurii “gako ahe dunduko,” nga gu gako apai dunduko nga ga toro ko akpinyemu si mangi auru kpotosende. (Matayo 24:47) Agu ababanda avusende i amoi yo nayugo gupai a nga i nakido kuti gu riko nga ga moyambu nimanga yo sunge na agu arugusapa sunge naye fuyo be gaha Riigbu Bipasunge. Ii, ho ababanda avusende araba kura aboro ni, ho i aida ni Fugo Mbori raba yo, na ho i amangasunge ni na gu rabahe gu riko nga ga moyambu afuhe, gure nga i nasonosa kpamiatise dagba rimbasa avusende. Nga gu tambuahe du ani nani tipa gupai nga, Yekova ima raba aboro nga aguyo nangera wenengai gbe fuo agu aboro nibasasa du rogo gu dungurati nga ga aKristano!
[Gu rukutu kekeapai du bandu kpewaraga yo]
a Si nga gu buku aDezire Yekova akusihe.
Gaoni Karagapai Nga Gine?
• Wai agu ababanda avusende nga ga toro yo duna inohe araba kura aboro?
• Tipagine ababanda avusende amaanga mburu gayo yugopai ti ni rii gayo aberãha nitiyo ya?
• Wai du ababanda avusende naa kido kuti gu riko nga ga moyambu na tipagine duhe ti ni wo?
[Gu kpiahe du ti kpewaraga 25]
Agu aKristano namangasunge ni abaakumba rogo dungurati naraba paranga akumba rogo dungurati
[Gu kpiahe du ti kpewaraga 26]
Gu riko nga ga ‘ruru kangara moyambu’ naraba abaakumba bakere gbe