Oni Ra Fu ababanda Akandoro Niumbasitise
“Oni gí sangba gaoni abaakumba ki nira fu yo.”—AEBERE 13:17.
1, 2. Gini veresi rogo Ziazia Kekeapai nayugo gupai nga aYesu na Yekova nga wene ababanda akandoro?
YEKOVA MBORI na wiriko nga Yesu Kristo nga agu ababanda akandoro duna nyemuse. Yesaya agumba sangbanebi ki yaa: “Oni ngére, Gbia Mbori! naye na tandu apai dũ, kina beko nikazoga rago fu ko; . . . Ko aríga gako rimbasa akandoro wa babandara, ko adúngura wiri akandoro ku beko, ki nitindi ra ti ngbaduko, ki ningbe fu agu ra ku mbata yo ni zera nahaga awira.”—Yesaya 40:10, 11.
2 Gu bambata digisidigisi sangbanebi re adigi ho yangara aYuda akaragatiyo ni ku Yuda yo rogo gu garã nangia 537 M.B.K. (2 Pekapai 36:22, 23) Gu kuraha ki digi berewe ti gu regbo yangara mbedimbedi aKristano akuru rogo “Babera Duna Bakere Ome Ti Ni” rogo gu garã nangia 1919 mbiko gu bakere Kurese nga Yesu Kristo. (Yugoti 18:2, NW; Yesaya 44:28) Ko nga ‘be’ Yekova, nga gu nika zogarago tipa ka dungura akandoro dunduko kini ngerefuo ra niwesewese nyemuse. Yesu nitiko ayaa: “Mi nga wene babanda akandoro; mi ini gimi ra, ami ki ini re a.”—Yoane 10:14.
3. Wai Yekova ayugu gupai nga ko aduna nunga tiko nibi gu gene gbegberẽ ababanda akandoro aangerafuo gako akandoro ngbaha?
3 Gu sangbanebi du rogo Yesaya 40:10, 11, si nanyakasapa gu nunga Yekova angerafuo gako aboro nani. (Atambuahe 23:1-6) Ti regbo ga Yesu tungusapai auru kpotosende, ko ayugu nunga koyo du gako abawiriki ni na koyo du kura aboro ni dunduko a. (Matayo 11:28-30; Marako 6:34) AYekova na Yesu aaidanga na gu gbegberẽ sino ababanda akandoro watadu abangbembatayo nangia ga aYisaraere yó, nga aguyo naarungosi ga Yekova akandoro te. (Yezekere 34:2-10; Matayo 23:3, 4, 15) Yekova akidohe ki yaa: “Mi abátasa gimi rimbasa akandoro, ami adu nga berewe ni ũmozi te [watadu he ho nika zio ra te]; mi ki sari ngbanga dagba gu kandoro nakura kandoro. Mi ki moi babanda akandoro sa ku ri ra, nga gi moyambu nga [Davide], ko ki nirigi ra: ko ariga ra kidu ni babanda ra.” (Yezekere 34:22, 23) Rogo gi yangara arame re, Yesu Kristo nga bakere Davide, ko nga gu “babanda akandoro” sa Yekova namoiko kurii gako amoyambu auru kpotosende dunduko, nga agu aKristano du nimbedimbediyo nitoro gbiati “kura akandoro.”—Yoane 10:16.
Gamahe be Yekova fu Dungurati
4, 5. (a) Gini nyanyakipa gamahe Yekova nafuhe fu gako aboro auru kpotosende? (b) Na gini gamahe Yesu nafuhe fu gako dungurati?
4 Ho Yekova amoi Yesu Kristo ni ‘nibabanda [Gako] akandoro’ nga Gako amoyambu, gure nga Ko afu kikiipa gamahe fu gu dungurati nga ga aKristano. Gi bangbembatayo i afu ko nigamahe re, i agumba pako rogo Yesaya 55:4 ki yaa: “Oni ngére mi fu ko ni dezire fu aboro, ni bangbembatayo fu aboro ni gbia a.” Mbedimbedi aKristano gbiati “bakere rimbasa aboro” ni agu aboro i adungura yó dagba angbatunga yo, na angbatunga afugo aboro, na aboro, na arikaaboro dunduko. (Yugoti 5:9, 10; 7:9) I dunduko nikodikodiyo kurogo agu adungurati du rogo dungu aringara na kidu nga ‘rimbasa akandoro sa’ tiibe Kristo Yesu, nga gu ‘babanda akandoro’ du sa.
5 Yesu a tigako aima fu nyanyakipa gamahe fu gako dungurati auru kpotosende. Ko aima maa ruru ababanda akandoro i naamangasunge tiibeko, nga aguyo nawirika asino Yekova na asinoko rogo ngerafuo akandoro niwesewese nyemuse. Gu mokedi nangia Pauro afura tipa gi gamahe nga ga nyemuse re rogo gu waraga ko akehe fu agu aKristano nadu Efesa yo. Ko ayaa: “‘Ho ko aga ni ku ari yo; ko angbe ku mbata yo fu rimbasa zizi aboro, ki gamu ahe fu aboro [“ko afuku agamahe rogo aboro yo,” NW].’ Ko afu agu yo i du ni amokedi; agu yo ni anebi; agu yo ni abatungusipai; na agu yo ni amoyambu na abayugupai; sa du ga Mbori aboro nzunzu, sa gu sunge nga mangaapai, sa sonosa boro Kristo.”—AEfeso 4:8, 11, 12.
6. Rogo Yugoti 1:16, 20, wai sakiyó pai tipa agu abaakumba nga mbedimbedi aKristano nga aguyo namangasunge rogo gu gbuu nga ga abaakumba, na ginipai rengbe ani ka pehe tipa agu abaakumba nga kura akandoro?
6 Agu ‘agamahe du rogo aboro yo’ nga ababiapai watadu abaakumba re, i nga agu aboro kina Yekova na wiriko aʹasiayo rogo gu gene nga ga ziazia toro tipa i naangerafuo gako akandoro ninunga. (Amokedi 20:28, 29) Agi ababiapai re dunduko angia kina mbedimbedi aKristano ti tonatonaha. Agu akumba nanaamangasunge rogo gu gbuu nangia ga abaakumba, i yugu payo rogo Yugoti 1:16, 20 ni “akerekuru” watadu “amaraika” rogo kumbabe Yesu du rogoyo ngawee i kutii gako arugute. Ono tie, rogo gi yangara arame re, wa bange agu abaakumba nga mbedimbedi aKristano aumba aumba kina kumbatayo auru kpotosende, agu abaakumba ngee namba yó rogo adungurati nga kura akandoro. Wa duhe nga Riigbu Bipasunge du nasia agu abaakumba namangasunge kuba yó tii gu rugapai nga ga ziazia toro, si daada ani ya tipa yó wee, i dunduko tii gu rugapai nga ga gu bawene babanda akandoro nga Yesu Kristo. (Yesaya 61:5, 6) Wa duhe nga abaakumba rogo gaani dungurati nara fu Kristo nga rii dungurati, si naida ani gi tirani naayó rogo apai yo dunduko.—AKorosaio 1:18.
Giasangbaa na Ranigose
7. Gini rugute gu mokedi nangia Pauro afuhe tipa gaani bipai koyo du agu aKristano ni nga ababiapai?
7 Agu ababanda rani du ngbangbaturũ yo nga Yekova Mbori na Yesu Kristo, i naida ani naagiasangbaa na kini ra nigorani fu agu ababanda akandoro namangasunge tii beyo nga aguyo i nafu sunge fuyó rogo dungurati. (1 Petero 5:5) Ga Mbori toro asa gu mokedi nangia Pauro ko kepai ki yaa: “Oni tíngidi pa agu yo . . . [du] ni abazogoroni, nagumba pa Mbori fu roni; oni mákia pa zuzu gayo sunge, ki wiriki pa gayo idapase. Oni gí sangba gaoni abaakumba ki nira fu yo; bambiko i nangera tipa pa mbisimoroni, wa i ka ringbisa pai tipa roni; ya i ka manga gere ni ngbarago, ni rungo te: bambiko ka gi ngba nga fu roni te re.”—AEbere 13:7, 17.
8. Gine fugo Pauro ayamba rani ani ‘makiaha’ na wai rengbe ani kadu ni ‘agisangbaa’?
8 Oni kparia gupai nga, fugo Pauro nayamba rani ani “makia” gu wene ruru asino du ti abaakumba na kini pekefuo gayó wene kpiapai rogo idapase. Kurigure, fugoko naruga rani ani gisangba abaakumba na kini ra fuyó rogo agu arugapai i amangaha. Gu kumba nga Richard. T. France nga gu boro duna bakere inohe rogo Ziazia Kekeapai, ko nasakarogo gu fugo Giriki i asaha nga ‘oni gí sangbaa’ kini yawee anga si nga “gu fugo nidu tipa giasangbaa te, ono si nga ‘ka rugusapai bangiri boro,’ nga ka rugusapai bangiri boro ní kini idi kadu kutii ga abaakumba pagbia wa i angbembatayo rogo apai.” Ani nagiasangba abaakumba mbiko fugo Mbori naruga rani ani mangihe wo, na mbiko i narugusapai bangirani nga i na nyemu agu apai nga ga Kindo na i nakpinyemu ani du wenengai rogo toroyo na rogo borose yo wadu ani nibasasa dunduko. Ani aduna ngbarago ka ani idi payo na ngbaduraniyo dunduko nigaani abangbembatayo.
9. Tipagine daha ada ti ni ani ‘ra’ fu abaakumba na kini gisangbayo?
9 Ono ginipai ka ani mangihe ka ani bi gupai nga, gu kura arugute abaakumba nafuhe, si nga wene gene ka mangapai ngbaha te? Herẽ du si aida gupai ni nga ani ranigorani fuyó. Si nitaataha tipa ani gisangbaa ho du apai ni dunduko ziazia na ani ki idi kuti ni, ono si naida ani ranigorani nirengo baraho ani aruganga tirani ni na agu arugapai si aida ani mangihe ya. Petero, nga guko nada kusa nimokedi, ko aduna ngbatunga gu ranigose re.—Ruka 5: 4, 5.
Nduapai Biama Tipa Giatise na Abaakumba
10, 11. Ngba gini gene abaakumba ‘anaagumba fugo Mbori’ fu akurayo aKristano rogo bambata sa kama agarã na wai i amangaha areme?
10 Rogo AEbere 13:7, 17 nga gu i nifura tipaha kuari re, Pauro afu nduapai biama si aida ti ni ani gisangba agu aKristano nga ababiapai na kini ra fuyó. Bambata ndupai nga ‘i nagumba fugo Mbori’ furani. Oni tingidi gupai nga, agu ‘agamahe du rogo aboro yo,’ Yesu nafuhe fu dungurati re, si tipa sa ‘ga Mbori aboro i du nzunzu.’ (AEfeso 4:11, 12) Ko arugu gu berã na gu mangaapai nangia ga agu aKristano nadu rogo bambata sa kama agarã vurube gu ruru ababanda akandoro naamangasunge tiibeko, nga agu aboro ga Mbori toro adu kurii gu kurayo i keke awaraga fu adungurati. Ko amangisunge na gu mbedimbedi abaakumba re tipa i niingbembatayo rogo apai na kini nyakasi agu aKristano nadumbata.—1 AKorindo 16:15-18; 2 Timoteo 2:2; Tito 1:5.
11 Areme, Yesu naruga rani vurube ‘ruru kangara moyambu,’ nga agu aboro Riigbu Bipasunge amangasunge kuba yó gbiati agu abaakumba i amoi yó. (Matayo 24:45) Mbiko wa ani aida ka irisa gu “baira ababanda akandoro” nga Yesu Kristo, si nasa gupai nga ani irisi ga Pauro rugute nga gu nayaa: “Oni íni agu yo namanga nyanyaki sunge dagba roni yo, ki du ri roni rogo Gbia kini rugu roni.”—1 Petero 5:4; 1 ATesaroniko 5:12; 1 Timoteo 5:17.
12. Wai ababiapai ‘angera tipa mbisimorani’?
12 Gu ue ndupai si aida ti ni ani gi tirani na agu aKristano nga ababiapai nga, ‘i nangera tipa mbisimorani.’ Ka si du nga abaakumba bi wiripai kubara rani yo watadu gu mangapai rengbe ka gberesa parani rogo toroyo, i nafu gu rugute furani niipo rẽ tipa si rugu rani. (AGaratio 6:1) Gu fugo Giriki i asaha kurogo pa-Zande nga “nangera,” rogoyo nga “nazanga rame.” Ringbisihe kuti gu kura kumba duna bakere inohe rogo Ziazia Kekeapai, ko ayawee si nakoda “gu sunge-sinzirirago babanda akandoro amangaha zanga pirigo ti ni.” Kurigure, wo abaakumba naazanga rame kaa bakabangiriyo na agu apai du tipa akandoro. Ya mo si aidanga ani gitirani na agi ababanda akandoro namangasunge kutiibe Yesu re tee, nga aguyo namanga ome ka wirika Yesu Kristo nga “bakere babanda akandoro”?—AEbere 13:20.
13. Da du abaakumba na aKristano dunduko nika karagapai funi na tipagine?
13 Gu biata ndupai si aida ani gitirani ti ni na ababiapai, si nga i nangerafuo rani ‘wa i ka ringbisapai tipa rani.’ Abaakumba ima ino gupai nga, i nga agu ababanda akandoro namangasunge kutiibe agu ababanda akandoro du ngbangbaturũ yo nga Yekova Mbori na Yesu Kristo. (Yezekere 34:22-24) Yekova nga Baira agu akandoro ‘ko angbe ra nikure wiriko,’ na Ko asana abaakumba asana tipa gu gene i amanga gako rimbasa akandoro ngbaha. Ko naida i naangerafuo ra ‘ninunga.’ (Amokedi 20:28, 29) Mbiko agi apai re, ani dunduko nika karagapai akaraga fu Yekova nibi wai du gaani mangaapai koyo du agu arugapai ni i nafuhe furani. (ARomo 14:10-12) Pa gia ani sangba abaakumba nayugo gupai nga ani nara fu Kristo nga Rii dungurati.—AKorosaio 2:19.
14. Gine rengbe ka sa agu aKristano nga ababiapai i niimangisunge na “rungo” kpotoyo yo, na sangbanaha rengbe kadu nga gine?
14 Pauro afu biama ndupai si aida ani ra ti ni na umbasitise fu agu ababiapai nga aKristano. Ko akepai ki ayaa: “I ka manga gere ni ngbarago, ni rungo te: bambiko ka gi ngba nga fu roni te re.” (AEbere 13:17) Gu bakere sunge dube abaakumba nga yugopai, ngerafuo akandoro, ngbembatayo rogo sunge tungusapai, gbiati ngerafuo gayó aborokporo, mbakada gu fudifudiapai du rogo dungurati, si nayugo gupai nga agu abaakumba nga aKristano, i na rorõi atindiro beyo i atindaha. (2 AKorindo 11:28, 29) Ka si du nga ani zanga giatirani naayó, gure wa ka i ya ani nafu kina kura tindiro berewe kurii gu du beyó. Gipai re rengbe ka sa gupai nga i “rungo” kpotoyo yo. Pa yugo ani gu toro nga ga zanga giatise naayó rengbe ka fu gberarago fu Yekova na si rengbe ka gbirisa parani. Kuba gure, ho ani ayugo ndikidi irisa ni na kini gitirani na abaakumba, si nasa gupai nga i naamanga gayó sunge na ngbarago, na gipai re kini ye na ngbarago gbiati kodatise rogo sunge tungusapa Kindo.—ARomo 15:5, 6.
Yugo Gaani Ranigose
15. Wai rengbe ani ka yugo gaani irisa gbiati ranirii?
15 Dungu agene duho rengbe ani ka giatirani na abaakumba ngbaha. Ya mo gu mbakadapai mangi abaakumba ha tipa kaa manga adunguratise nga ga sunge rogo agu aʹuru na ti agu aregbo si aida ani mangihe ti ni tipa ka gbia aboro batungusapai yo, si ye na gupai nga ani mangi ariapai rogo gaani aregbo sunge? Si naida ani mangi bakere asadatise ka songoda gu vovo mbakadapai re. Pa manga ani he wo rengbe ka ye na tunguotunguo amaku furani. Ya mo gu babipai nga ga sunge tungusapai ko ye kurogo gu gaani badona nga ga Wisigo Buku Nga ga Dungurati? Si naida ani koditirani kurogo sunge tungusapai rogo gu poso re, a wa rengbe omerani nani. Ya mo i fu sunge furani rogo gu Sukuru Nga ga Siokrasia? Kangia si wo, si naida ani mangi ome kadu pati dunguratise na ki mangi gu gumbapai i afuhe furani re. Ya mo gu babiapai nga ga Wisigo Buku Nga ga Dungurati ko tingidi gupai furani nga gaani badona nga ga wisigo buku nika giriso Bambu Kindo rogo gu poso naye re? Si naida ani undoko a wa rengbe omerani nani. Ngba gi gene re na agu akuraha, ani kini yugu gupai nga ani naranigorani fu agu akumba Yekova na wiriko nasia yó tipa i naangerafuo gako rimbasa akandoro.
16. Ka si du nga bakumba amanganga pai kuti rugute te, tipagine si aidanga ti ni ani sa tirani ni airanyakarii mbikoho ya?
16 Ti kura aregbo, bakumba rengbe ka mangapai angianga kuti gu rugapai nga ga ruru kangara moyambu na ga Riigbu Bipasunge ya. Ka si du nga ko nikaa mangaha wo kindi, ko akaragapai akaraga fu Yekova, nga ‘Babanda mbisimorani, na nga gaani Barumbatayo.’ (1 Petero 2:25) Ono ka si vura du nga baakumba mangi irairapai, si afunga gene furani tipa ani duna nyakarii te. Yekova afunga maku fu agu aboro duna nyakarii na kidu ni abasamungu te.—Pa Geda Aboro 12:1, 2, 9-11.
Yekova Nafu Maku Kurii Giatise
17. Gini bipai si aida ani du nani koyo du gaani abaakumba ni?
17 Yekova ima ino gupai nga, agu akumba ko nasia yó ni ababiapai, i nga kpakpa aboro. Wa vura duhe wo, ko namangasunge amanga naayó vurube ziazia toro tipa i naangerafuo gako aboro auru kpotosende. Rengo du ngaha tipa abaakumba na tipa rani a nga, ‘gu bakere tandu susi, si naye be Mbori, si ayengo berani te.’ (2 AKorindo 4:7) Si naida ani tambua Yekova tipa gu ringbisapai ko amangaha vurube ruru ababiapai, na si naida ani duna wene giatise naayó.
18. Ho ani ara ni fu gaani ababiapai, ginipai nzunzu ani amangaha?
18 Ababiapai namanga asadatise ka raka na ngbanyaa kuti agu arugute Yekova afuhe tipa gu sunge nga ga babanda akandoro rogo gi yangara arame re, a wa duhe rogo Yeremaya 3:15. Si nayaa: “Mi afu ababanda akandoro fu roni wa kpotore yo akpi nyemu he, nikariga roni na inahe na rugatinapai.” Nirengo, agu abaakumba du dagbarani namanga wene sunge nga ga yugopai na ka banda ga Yekova akandoro. Ani naandunga andu kumbatayo kindi kaa yugo gaani tambuahe tipa gayó nyanyaki sunge nigiani ani tirani naayó, kini gisangbayo na kini ra fuyó. Nimanga ani he wa gure, ani kini yugu gaani tambuahe nani fu agu ababanda akandoro du ngbangbaturũ yo nga Yekova na Yesu Kristo.
Fugöpai
• Wai Yekova na Yesu ayugu nani nga i nga agu ababanda akandoro duna nyemuse?
• Kurii gupai nga si naida ani duna giasangbaa koyo du abaakumba ni, tipagine si aida ani ra nigorani ti ni a fuyó?
• Rogo gini mangaapai rengbe ani ka yugo gaani ranigose ngbaha fu abaakumba?
[Gu kpiahe du ti kpewaraga 29]
Agu aKristano nga abaakumba, i nara fu Kristo nigayo barumbatayo
[Gu kpiahe du ti kpewaraga 31]
Dungu agene kinaho rengbe ani ka yugo gaani ranigose ngbaha fu agu ababanda akandoro Yekova namoi yó ti sunge