Asanahe be Agedihe

Ginipai Yesu aberẽhe ho ko ayani fu Nikodemo wee: “A nga boro sa naga ku ngbangbaturũ yo te, kina gu ko nazoro ngbangbaturũ yo, nga Wiri boro, du ngbangbaturũ yo”?—Yoane 3:13.

Yesu adu kina auru kpotosende ti gu regbo ko agumba agi afugo re, ko aganga ho ku ngbangbaturũ yo te. Ono tie, gupai ini ani he tipa Yesu na agu apai tiiworo fugoko ayugoho, si naundo rani ani girogo gupai ko agumbaha re.

Yesu ‘azoro ngbangbaturũ yo’ ngba gu gene nga ko aima raka mbata ngbangbaturũ yo na Bako, ono tie ti ringbisiringbisi regbo, Mbori adi gu unga nga ga gi Wiriko re ki moihe ku rukumbu Maria yo, si kini sa gupai nga ri batika Yesu niboro. (Ruka 1:30-35; AGaratio 4:4; AEbere 2:9, 14, 17) Si adu nga, fuo kpio Yesu, i nika zingisa ko nigu boro nga toro ko karaga tiko fuo Bako, nga Yekova. Sidu, ngbutuko mbata fu i imi Yesu, ko akparikpee ki yaa: “Ako Buba, mo táasi rimorani na mo awere ni gu taarimo ani adu na ni na mo mbata zegino nikadu.”—Yoane 17:5; ARomo 6:4, 9; AEbere 9:24; 1 Petero 3:18.

Nirengo, ho Yesu afura ni fu gu Farusi nangia Nikodemo nangia bayugupai ringara aYisaraere yo re, Yesu aganga ho ku ngbangbaturũ yo te. Rengo ngaha nga, anga boro ho nakpi ki ga kurogo gu ngbii nga ga atoro du ngbangbaturũ yo te. Kina boro Yesu nitiko ayawee anga boro ho nadunga dagba ga Mbori anebi wa Yoane Babapatiza te, ono ‘gu boro du niumbapa aboro rogo gu ngbii nga ga ngbangbaturũ ni susi ko.’ (Matayo 11:11) Na gu mokedi nangia Petero asakirogopai yo ki yawee zavura gu ruru kumba nangia Bakindo Davide nakpi, ko andunga ku ngbangbaturũ yo te; ono ko adu kindi mura yo. (Amokedi 2:29, 34) Ndupai adu kinaho agu aboro nadu wa Davide na Yoane Babapatiza nakpiki mbata fu Yesu andunga ti ni ku ngbangbaturũ yo ya. Nduhe ngawee i akpiki mbata fu Yesu zaki gene fu aboro ku ngbangbaturũ yo. Gu mokedi nangia Pauro akepai ki yawee, Yesu, wakina baperembatayo, “ambakadi . . . vovo gene nga ungaha” fu aboro ku ngbangbaturũ yo.—AEbere 6:19, 20; 9:24; 10:19, 20.

Wa si adu nga Yesu akpinga ti gu regbo re na i ki zingisi ko te, ginipai ko aaberãha ho ko ayani fu Nikodemo wee: “A nga boro sa naga ku ngbangbaturũ yo te, kina gu ko nazoro ngbangbaturũ yo, nga Wiri boro, du ngbangbaturũ yo”? (Yoane 3:13) Ani wisiginga tiiworo gu fugo re, watadu tiiworo gupai Yesu aasakapai tipaha na Nikodemo re.

Ho gu ga aYuda bazogo re ayeni yuru fuo Yesu, Yesu aya fuko: “Mi nagumba ha foro ni rengo, ni rengo, ka boro bi nga ga Mbori ngbi te kina gu ka i vungu ni avunga berewe.” (Yoane 3:3) Fuo gumbako gipai re, Nikodemo asana ko ki yaa: ‘Wai rengbe gupai re ka manga? Wai rengbeyo ka vunga boro berewe?’ Ko arengbanga ka rugatiko naapa du boro rogo ga Mbori Kindo te. Ya mo kura gene aduho ka ko ainihe ngbaha? Oó, anga boro ho nainipai tipaha ka ko agihe ngbani te; anga boro ho ka yugupai fuko tipaha te, bambiko anga boro ho sa nandu ku ngbangbaturũ yo na ki rugutini na agu apai du yo ni ki rengbe tie ka sakarogo wai rengbe boro ka rimo ga Mbori Kindo si ki kati mange tuko yo te. Gu yangara boro narengbe ka yugopai fu Nikodemo na fu kura aboro angia kina Yesu sa, bambiko ko naye ngbangbaturũ yo na ki rẽ ka yugopai fu aboro tipa ngbatunga agu apai re.

Sidu tie, gu sanahe du tipa gipai re nayugo gu nyanyakipa pai du ti wisigo Fugo Mbori. Si arunga fu boro ni naakapa tipa papara Ziazia Kekeapai na gu nduhe gbua nga ni agianga rogoyo te te. Gupai Ziazia Kekeapai agumbaha rogo kura ba sa, si naida ani bi wai kura apapara Ziazia Kekeapai afura tipa kina gu bangisapai re na gu ngbanyaa du dagbaha. Fuo gure, agu apai du tipa gupai re, nga tiiworo gupai du sakapai tipaha re, si rengbe ka undo rani ani girogo gupai ani arengbanga ka giarogoyo re ya.