Wai Du Kua Mbori Nga Ngbangbaturũ?

KURA aboro naberã gupai nga si nimbumbupai tipa i inipai tipa ngbangbaturũ, mbiko boro ho naye yo ka pe pa agu apai du yo furani te. Isoke, bangiriyo avura go ti gupai Yesu apehe nga: “Mi aye . . . ngbangbaturũ yo.” (Yoane 6:38) Ko aya fu kura abarumbatayo rogo pambori yo wee: “Oni naenge sende no; mi [tigimi] naenge ari yo.” (Yoane 8:23) Ginipai Yesu apehe tipa ngbangbaturũ?

Yesu agumba gupai nga ngbangbaturũ nga gu ba Yekova asungo rogoho. Ko aya ti Mbori wee “Buba du ngbangbaturũ yo.” (Matayo 12:50) Wa vura duhe were, anga gu haurago du ariyo nigu ba Yekova araka rogoho te, ko naraka rogo gu ngbangbaturũ du gii haurago yo. Ziazia Kekeapai nayaa: “[Yekova] nga gu ko nasunga ku ri kirikiri kpotosende, ono araki yo i du wa kina abakirigba.”​—Yesaya 40:22.

Ya mo gu ‘Barani du ngbangbaturũ yo,’ ko naraka dagba akerekuru? I nayamba gu haurago duna akerekuru rogoho a nga kina “ngbangbaturũ.” Nikpiapai, bake papara atambuahe sa akepai ki yaa: “Ho mi nangana gamo angbangbaturũ ni, nga gu mangaapai nga ga wirinzagaro, na gu diwi mo amoi ru na akerekuru; gini he nga boro, mo naaberã pa ni? na wiri boro, mo naandu ka bi ni?”​—Atambuahe 8:3, 4.

Yekova arakanga rogo gu haurago ko amangihe te, a wa bambakadi sanduki arakanga vuru gu sanduki yo ní ambakadihe ya. Ho Bakindo Soromo akpara gu Yekaru ni nadu Yerusarema yo fu Yekova, ko ayaa: “Mbori aráka auru kpotosende no ni rengo? Oni ngére, ngbangbaturũ na gu ngbangbaturũ du ku ari yo gbe si arengba nga na mo te; Waĩ ka gi bambu rengbe na mo dua mi he re!” (1 Abakindo 8:27) Ka si du tie nga Yekova arakanga rogo gu ngbangbaturũ duna akerekuru rogoho te, gini ngbatunga ngbangbaturũ tigaha ko araka rogoho?

Wa vura duhe nga aboro aima wisigopai dudunguroo tipa haurago, na aguyo ki ima rimo haurago dudunguroo, Ziazia Kekeapai nagumba kina rengo ho si ayani wee: “A nga boro sa nabi Mbori wa sa te.” (Yoane 1:18) Yesu ape ndu gupai ka boro abingo Mbori ti ni ya ki yaa: “Mbori nga Toro.”​—Yoane 4:24.

Toro nga gu unga susi ga aboro. Guhe nga toro si na pasio gbiati kure te na ka i bingo ho te na ka i zadingo ho a te. Ho Yesu ayani wee ko araki na Bako “ngbangbaturũ” yo, rogoyo adu nga ko aduna gu unga paha akii gbe kisusi gu nga ga aboro. (Yoane 17:5; AFiripoio 3:20, 21) ngbangbaturũ nga gu ngbii nga ga atoro Yesu anaaraka rogoho na Bako nga gu ba Ziazia Kekeapai ayambaha nga “ngbangbaturũ.” Ngbangbaturũ wa gine? Gini apai namanga yo?

Gu Ba Nga ga Ngbarago

Ziazia Kekeapai nasakapai tipa ngbangbaturũ ya si nga gu ba duna dungu asunge rogoho. I gumbapa dungu amirioni ruru aboro nga atoro naraka rogoho. (Daniere 7:9, 10) Agi atoro re na asinoyo nibakiakia. Wai ani ainoho? Rogo gu zegino ani araka rogoho, rakirakiahe ho ue duna asinoho kina sa te, kina gu bangisapai re a du tipa gu rakirakiahe du ngbangbaturũ yo. Wa vura du agu aboro re na asinoyo nibakiakia, i namangasunge kinakubani sa zanga kparakaro, nga gupai amanganga auru kpotosende gbe ya.

Ani bingo wai Ziazia Kekeapai agumbapa gu sunge namanga ngbangbaturũ yo. Si nayaa: “Oni sambua Yekova, oni nga gako arimbasa dunduko; agu roni du na nyaka na tandu namanga sangbako, ki nigi woro fugoko! Oni sambua Yekova, oni nga gako arimbasa dunduko, nga gako amoyambu namanga gu pai ngba ti ko!” (Atambuahe 103:20, 21) Badungu asunge i amangaha ngbangbaturũ yo. Zanga kapa, agu asunge re nga wene asunge.

Badungu wene apangbanga duho tipa amaraika nga agu aboro natona ka raka mbata fu Mbori mbakadi kpotosende. Ringbisihe kuti Ziazia Kekeapai, awiri Mbori ‘dunduko angbiko ningbarago’ na ki tona ka bi “bia ni wa sa” ho Mbori amoi mburu kpotosende ni. (Eyobo 38:​4, 7) Kura wiri Mbori sa aduna momu tipa ka mangasunge na bako tipa ka kusa kura ahe. (AKorosaio 1:15-17) Gi bawene ringbisapa agu apai namanga ngbangbaturũ yo re, si rengbe ka ye na sanahe ku berã rani yo tipa ngbangbaturũ na tipa aboro.

Ya Mo Mbori Amangi Aboro Tipa I Ruho ka Ga ku Ngbangbaturũ Yo?

Wa duhe nga amaraika aima digo nimangisunge fu Mbori ngbangbaturũ yo mbata fu i moimburu kpotosende, i aakusanga bambata kumba na dee tipa i raki ngbangbaturũ yo te mbiko ka Mbori amoi yó kina yo nibasa. Kuba gure, Mbori agumba gupai fu gu bambata aboro re nga: “Oni zúga azuga, ki nge ange, ki hisi kpotosende.” (Bambata Pai 1:28; Amokedi 17:26) Adamu nangia bambata gu kura ngbatunga unga nga ga kpotosende, na ki rengbe ka ino Mbori na kini irisiko ngba ruru gene. Si adu nga ko nikadu nibaa fu agu aboro dunduko nika raka auru kpotosende. Ziazia Kekeapai nafura tipa gipai re niyaa: “Angbangbaturũ nga ga Yekova angbangbaturũ, ono kpotosende ko afu fu awiri aboro.”​—Atambuahe 115:16.

Aboro aidanga ka kpi te, na si aadunga nga aboro nikpi a te. Mbori agumbapa kpio fu Adamu nimosoro gu ingapai ka ko mangihe. Wa ka Adamu agisangba Mbori, ka ko akpingo te.​—Bambata Pai 2:17; ARomo 5:12.

Mbori aagumbanga pa nduge ku ngbangbaturũ yo fu Adamu te. Anga kpotosende nga gu ba aboro asungo rogoho mbata tipa i asadiyo singia i rẽ tipa ka raka ngbangbaturũ yo te. Mbori ambakadi aboro tipa i raki auru kpotosende nyeanye kindi, na gu ga Mbori ringbisapai re atingidi ringbisitihe aringbisa. Ziazia Kekeapai nakidohe niyaa: “Ruru aboro adía kumbo ringara, ki nye anye kindi.” (Atambuahe 37:29) Si ziazia tie nga, i aamanganga boro tipa ní ga ku ngbangbaturũ yo te. Tipagine tie Yesu akidopa gu raka ti ni nga ga ngbangbaturũ fu gako amokedi? Ya mo Yesu ayawee ruru aboro dunduko nika ga ku ngbangbaturũ yo?