Gu Wingbaduse Naye Mbiko Nyemuse

“Mbori afu nga toro gunde fu rani te; ono gu nga ga ome na nyemuse na rugatinapai.”​—2 TIMOTEO 1:7.

1, 2. (a) Nyemuse rengbe ka sa boro ní mangi ginipai? (b) Tipagine ga Yesu wingbaduse aima iriwo ti ni tigaha?

KUMBA na diako narogo tiyó bambeda aamanga wagia-barindo mbembedii na kura wiri gbata sa Australia yo pangba baime ku uroyo. Ho i ambedi ni ka kura kurii ime, badugbo tĩo agba sa dee. Nigu ome nga ga kumba, gu kumba re atura diako kusayo tipa gu tĩo re mbiri kina ko kuba ri. Ho aboro adunguratiyo ni ku kporokpio ko yo, gu dekurugbo ko re ayaa: “Ko afu ungako tipa re.”

² Ii, nyemuse rengbe arengba ka fõngbadu boro yo niyugu gu wingbaduse watadu ngara omehe naima kio kisusi. Kina boro Yesu nitiko nayaa: “A nga boro sa du na bakere nyemuse susi gi nga, boro bagi kpioni [“ungani,” NW ] tipa abadiangbani te.” (Yoane 15:13) Si aadanga ti asaa 24 te fuo gumbako agi afugo re, ko ki fu ungako, angianga tipa bangisa boro gbua ya, ono tipa ngbatunga aboro dunduko. (Matayo 20:28) Kurigure, pai aatunguongo Yesu atunguo ko fu ungako rogo gu mangaapai nga ga wingbaduse te. Ono ko aima inoho mbu regbo koyo kindi nga i nika sawia ko na ki mangi fuko gbegberẽe, ki saringbangako niʹiraʹiraha na ki imiko ti ngbunduru ngua-rungosi. Ko aima mbakada gako abawiriki a tipa gi sangbanaapai re, kini yaa: “Oni ngere, ani nandu ku Yerusarema yo; i afu Wiri boro [yo] fu abairamotumo na abakeapai; i asara ngbanga ko ko kpi, ki fu ko ku vurube a gendiria; i asawia ko, ki nisukudi ko, ki nitaki ko, ki imi ko; rame ki du biata ko ki zingi berewe.”​—Marako 10:33, 34.

3. Gine nasa Yesu ko duna bakere wingbaduse?

³ Gine nasa Yesu ko duna ngbatunga gu wingbaduse re? Idapase gbiati gunde ti Mbori nga gu bangua apai naundo ko gbe. (AEbere 5:7; 12:​2) Wa si avura duwo, ga Yesu wingbaduse aye mbiko gako nyemuse tipa Mbori na tipa akurako aboro. (1 Yoane 3:16) Ka ani sonosi ngbatunga gu nyemuse re kupati gaani idapase gbiati gunde ti Mbori, ani duadu a na wingbaduse wakina Yesu. (AEfeso 5:2) Wai rengbe ani ka sonosa ngbatunga gu nyemuse re? Si naida ani ini wari gu nyemuse re aye ni.

“Nyemuse Nga ga Mbori He”

4. Tipagine rengbe ani ti ni ka yawee nyemuse naenga yo du Mbori ni?

⁴ Mbori nitiko nga nyemuse na ko nyemuse aenga yo du ko ni. Gu mokedi nangia Yoane akepai ki yaa: “Abadiangba, nyemu akuarani du adu ti rani, bambiko nyemuse nga ga Mbori he; gu ni du na nyemuse ni nga ga Mbori vungu, ni ini Mbori a. Gu ni adu nga na nyemuse ya, ni aina nga Mbori te; bambiko Mbori nga nyemuse.” (1 Yoane 4:7, 8) Sidu, gu nyemuse duwa ga Mbori rengbe ka sona rogo boro yo kinaho ní ambeda ni na Mbori nidu ní na ndikidi inohe tipa ko na kini mangipai ringbisihe kuti gu inohe re rogo gu giasangbaa naye ngbaduseyo.​—AFiripoio 1:9; Yakoba 4:8; 1 Yoane 5:3.

5, 6. Gine naundo agu apefuo Yesu nadumbata i sonosi gu nyemuse naduwa gako?

⁵ Rogo gu yangara kparakpee Yesu amangihe na gu gako ruru amokedi nadu 11, ko ayugu gu kodatise du bangbanda ino Mbori na sona rogo nyemuse. Ko ayaa: “Mi yugu rimoro fu yo, mi ayúgo ho ayugo; ya gu nyemuse mo nakpi nyemu re na ni, si du rogo yo yo, mi ki du rogo yo yo.” (Yoane 17:26) Yesu aundo gako abawiriki i sonosi gu ngbatunga nyemuse nadu dagbako na Bako, kini yugu gupai fuyó rogo fugoyo na rogo kpiapai yo rimo Mbori arukubaha, nga iiriwo asinoko. Si du Yesu aya ti ni wee: “Gu ni bi re ni bi Buba.”​—Yoane 14:9, 10; 17:8.

⁶ Gu nyemuse duwa ga Yesu, si nga zuzu ga Mbori toro. (AGaratio 5:22) Ho agu aKristano nadumbata agbia ziazia toro ni rago Pendekote rogo gu garã nangia 33 F.B.K., nga gu ziazia toro i akidohe tipaha, anga i atingidi kina gu badungu apai Yesu ayuguhe fuyo te, ono i agirogo Ziazia Kekeapai yo a berewe wenengai. Si ziazia nga, gi dudunguro inohe i adu nani re asonosi gayó nyemuse tipa Mbori. (Yoane 14:26; 15:26) Sangbanaha angia gine? I atungusi wene pangbangaa zanga gunde na zaaza, zavura ho gayo unga aduni ngbapai.​—Amokedi 5:28, 29.

Yugo Wingbaduse Gbiati Nyemuse

7. Ginipai si aidi aPauro na Barunaba hihe rogo gu gayó sunge amokedi i aamangaha sa?

⁷ Gu mokedi nangia Pauro akepai ki yaa: “Mbori afu nga toro gunde fu rani te; ono gu nga ga ome na nyemuse na rugatinapai.” (2 Timoteo 1:7) Pauro aafura tipa gupai namangi kina boro ko nitiko. Oni makianga gupai nagbiayo na Barunaba ho i aamanga gayó sunge amokedi ni sa. I atungusipai rogo dungu abagbata, kodihe na Andiokia, Ikonio, na Rusetura. Rogo agu abagbata re dunduko, bete kura aboro adani aidipase, ono aguyó asatiyó ni akare kutiyo. (Amokedi 13:2, 14, 45, 50; 14:1, 5) Rusetura yo, ndurumo aboro-zuũ asopo Pauro na mbia daho i aberẽhe ni tigayó nga ko ima kpi! “Ono wa abawiriki aru kirikiri pati ko ko ki guari ki rimi ku bakporo yo; rago ya giri i ki ndu na Barunaba ku Derube yo.”​—Amokedi 14:6, 19, 20.

8. Wai gu wingbaduse nangia ga aPauro na Barunaba ayugu gayó bakere nyemuse tipa aboro?

⁸ Ya mo pa serãyó aPauro na Barunaba ka imo yo agundesi yó ti tungusapai? Oó, si adunga wo te! Fuo ‘sa yo dungu aboro ni abawiriki’ Derube yo, i “[a]karaga tiyo ku Rusetura yo, na ku Ikonio yo, a ku Andiokia yo.” Tipagine i akaragatiyo ti ni koyo? I akaragatiyo koyo tipa ka ngarasa gu vovo aidipase nadu yo tipa i nye nyanyakii rogo idapase yo. APauro na Barunaba ayaa: “Ani aríma arima ku rogo ga Mbori ngbi ti dungu gberãrago.” Si tie ziazia nga, gayó wingbaduse aye be gu bakere nyemuse i adu nani tipa ga Kristo umba “akandoro.” (Amokedi 14:21-23; Yoane 21:15-17) Fuo i moi abaakumba rogo gu vovo adungurati re dunduko, agu awirina ue re afu kpee na “ki fu yo ku be Gbia, nga gu ko i aidi pa ko.”

9. Ngba gini gene agu abaakumba nadu Efesa yo amangipai sa ga Pauro nyemuse tipa yó?

⁹ Pauro angia gu boro nadu na bakere nyemuse tiko gbiati ngara, si ki sa gupai nga agu aKristano nadumbata kpinyemu ko bakere gbe. Oni tingidinga gupai namangi pati gu dunguratise Pauro amangihe na agu abaakumba nadu Efesa yo, nga gu ba ko adi agarã kurogoho biata na kini mbu be dungu arungosiro. (Amokedi 20:17-31) Fuo ko ngarasi yó i ngerefuo gu ga Mbori akandoro i aʹasiapa ra fuyó, ko akuku sande naayo kini kpari fu Mbori. Fuo gure, “i ki nikpari akpara ni aume, gbe, i ki moi goyo auru gorõ Pauro, ki dungo ko, nirungo arungo bakere gbe mbiko gu pai ko agumba ha, ya i abi nga kpakpuko berewe te.” Nairiwo gu nyemuse agi awirina adu nani re tipa Pauro! Nirengo, ho regbo adani tipa Pauro na gako abadianunguro ‘guari’ pati agu abaakumba nadu rogo gu rago re, i aidanga i ga te, i azuno tiyó azuno ka ga.​—Amokedi 21:1.

10. Wai agu aDezire Yekova du ti gi gaani regbo re ayugu gu nyemuse duna ngara tipa awirinayo?

¹⁰ Areme, agu ababiapai ninaata ata, agu abaakumba nga ga dungurati yó, na kura dungu aboro, aboro nakpinyemu yó bakere gbe mbiko gu ngara i ayugoho tipa ga Yekova akandoro. Nikpiapai, agu ababiapai ninaata ata na adiayo aima maa gayó raka ngbapai tipa ka ndu ka biko adungurati rogo agu aringara gu vura du dagba aboro-ringara nisayo naye na arungosi rogoho sa aboro, watadu gu ringara irangbii narugusi sunge tungusapai rogoho. Wakina gure a, badungu aDezire Yekova aima mbu be gbegberẽ abazogo na be agu aboro du fuoyó mbiko pa zanga yó kitangbaanga akurayo aDezire, watadu ka yugupa gu rago i anaagbia gu riahe nga ga toro rogoho. Akutu aguyó i arungosi yó na ki imi aguyo a bambiko i aidanga ka mbu tungusapai te, watadu ka mbu kodatiyo na akurayo aidipase ti regbo agu adunguratise nga ga aKristano. (Amokedi 5:28, 29; AEbere 10:24, 25) Ani wirikinga gu idapase awirika gbiati gu nyemuse nga ga agi awirinarani duna wingbaduse re!​—1 ATesaroniko 1:6.

Ka Oni Mbunga Gaoni Nyemuse Si Zere Ya

11. Ngba gini agene Satana asovura kuti ga Yekova amoyambu, na si nahõ ginipai beyo?

¹¹ Ho i aba Satana ni ku auru kpotosende, ko adiberã ka igirãsi gako zinga kurii ga Yekova amoyambu bambiko i ‘nakakuti ga Mbori rugute, na kini kakuti gu dezirepai nga ga Yesu.’ (Yugoti 12:9, 17) Birĩ sa dagba agu abirĩ nga ga Bakitingbanga ko amangasunge nani nga rungosiro. Wa vura duhe wo, dedede, agi arungosi re na sa gupai nga ga Mbori aboro du nikpamiakpamiayo rogo gu nyemuse nga aKristano na si ki sa badunguyo i mangi ga Mbori sunge zaaza gbe. Gu kura birĩ nga ga Satana berewe nga ka wo ti nyemu ingapai ti boro. Tipa ka diabe gi birĩ re, si naida boro duna ngara ngba arikoho dunduko, bambiko si nga gu vura ani asoho ku kpotoraniyo, kuti gu ‘kpotoraniyo nga iranangahe na kidu na kaza ti ni.’​—Yeremaya 17:9; Yakoba 1:14, 15.

12. Wai Satana amangasunge na ‘gu sino mangaapai nga ga zegino’ rogo gako asadatise ka zeresa gaani nyemuse tipa Mbori?

¹² Kura ũvura kinaho berewe dagba agu aũvura nga ga Satana, si nga ‘gu sino mangaapai nga ga zegino,’ nga gu nasosoda aboro, na kini sovura kuti ga Mbori ziazia toro. (1 AKorindo 2:12) Gu sino mangaapai nga ga zegino nasonosa gupai nga ga ngbaduse gbiati nyemu aũzegino, nga “gu nyemuhe nga ga bangirise.” (1 Yoane 2:16; 1 Timoteo 6:9, 10) Wa vura duhe nga gbegberẽpai ti aũzegino watadu marã te, ka ani akpinyemuhe susi wai ani akpinyemu Mbori, Satana rengbe arengba kadu na diabese. Gu ome, watadu gu ‘tandu’ nga ga zegino, si rogo gu paha nga ga zomia aboro, rogo gaha biriki, na rogo gaha yososo mangaapai. Na mbiko wa duhe wakina wege rengbe na arago dũ, gaha iraira sino ima rengba na arago dũ a. Ka oni henga gu sino mangaapai nga ga zegino si gberesi ngbaduroniyo ya!​—AEfeso 2:2, 3; Asanza 4:23.

13. Wai gaani ngara ka nye gigirii narengbe kadu ngba asada?

¹³ Sidu tie, tipa ka diabe gu sino mangaapai nga ga zegino na tipa ka káha, si naida ani duna ngara tipa ka nye gigirii. Nikpiapai, si naida ngara tipa ka kura bambu bi vidio yo watadu tipa ka kiso terevizioni watadu ka kiso kompiuta ho gbegberẽ kpia aboro nakuru ni kpakpuhe yo. Si naida ngara tipa ka ru nyanyakii be gu gbegberẽ soapai nga ga abakure, watadu tipa ka mbu gbegberẽ kpamiatise. Teketeke a, si naida ngara tipa ka kakuti ga Mbori andiko na bangua arugute ho i asawia boro ni, singia agu akurani du sukuru yo du, agu akurani i amangasunge naayó, amurakporo, watadu agumeni du nasawia ni.​—1 AKorindo 15:33; 1 Yoane 5:19.

14. Ginipai si aida ani mangihe ka si du nga gu sino mangaapai nga ga zegino ima gbarasa rani?

¹⁴ Nairiwo wai nyakipa gupai tie nga ani nyakasi gaani nyemuse tipa Mbori na tipa awirinarani du ani naayó rogo toroyo! Oni di regbo ka wisigo gaoni asásá na gaoni gene raka ka bihe singia gu sino mangaapai nga ga zegino ima gbarasa roni ngba kura gene. Ka si du nga si ima gbarasa roni, zavura tooni vurũ, oni kparikpee tie fu Yekova tipa ko ngarasi roni oni dihe kusayo. Yekova akanga ngbatunga gu ndikidi kpee re te. (Atambuahe 51:17) Kurigure, gako toro na bakere ome ti ni susi gu nga ga zegino.​—1 Yoane 4:4.

Oni Mangipai sa Asada Ningara

15, 16. Wai rengbe gu nyemuse duwa ga Kristo ka undo boro ní dibe agu aʹasada namanga ní nitini? Oni funga kpiapai.

¹⁵ Gu kura kpakaraapai si aida ga Yekova amoyambu sovura kuti ni, si nakoda asangbana zangarengba gbiati gbinza, nga gu naye gbe na kaza, gbárã, bakere gberarago, na badungu kura fudifudiapai. (ARomo 8:22) Gu nyemuse duwa ga Kristo rengbe ka undo rani ani dibe agi aʹasada re. Oni bingo gu kpiapai nga ga Namangolwa, nga guri nasono rogo gu kporo nga ga aKristano Zambia yo. Ho garãri aduni ue, ri agbárĩ. Ri nayaa: ‘Kina zee nanaamanga re, mi kini berẽ gupai nga aboro dunduko nikaa maaberã yó kutire. Ono agu awirinami nga ga toro yó aundo re mi niibi apai kia. Nisangbanaha, mi adibe gu zee naamanga re re, na fuo bete regbo, mi ki zi bapatiza.’

¹⁶ Wa vura duhe nga Namangolwa na ngbagida gbarigbari aboro beri, si naaida ri zoro azora riru yo ka arãga sande ho ri nida ni ti gbegberẽ gene nga gu duna ngume ka ri arengbenga ka ora rii ngbagida ya. Wa vura duhe wo, ri naatungusapai nimoundo nazakigene kandara tipa adiwi ue rogo garã sa. Ho ri andu ni ka tungusapai fu kura dee sa, gu dee re ati nikina kpee. Tipagine? Ri ati nikpee bambiko gu idapase gbiati ngara nga ga gi wirinarani re nafõ ri. Nisangbana ga Yekova bakere maku, aboro bisue dagba aguyó Namangolwa ayugu Ziazia Kekeapai fuyó aima zio bapatiza, na guko sa namangasunge rogo dungurati nibakumba. Ri nayaa: ‘Ndure naaigirã aigirã dedede nikerehe, ono mi ambunga tungusapai mbiko egerãha te.’ Gi wirinarani re nga boro sa gbua dagba gu badungu aDezire Yekova du rogo zegino dunduko duna kaza ti kpotoyó ono i kidu nyanyakii rogo toroyo mbiko gu nyemuse du yó nani tipa Mbori na tipa akurayo. Nairiwo wai ngba ngbatunga agi aboro re bangiri Yekova!​—Agai 2:7.

17, 18. Gine naundo badungu aboro i hi akaza gbiati fudifudiapai? Oni gumbanga bete agu akpiapai du rogo gaoni dagbarago.

¹⁷ Bangabanga akaza rengbe arengba a ka ba bakere gberarago ti boro. Kura bakumba sa rogo dungurati nayaa: “Rogo gu badona nga ga wisigo buku mi naandu kurogoho, . . . wirina sa nidee nawoka be sukari (diabetes) na awirimbia ri amanganga sunge te. Gu kura ri kini woki be kanisa (cancer), aguyó ue kidu ningbaramaningbaramani yó, na gu kura ri kidu na gu kere kaza nagbarasa kpotoboro (lupus) gbiati kaza andikita (fibromyalgia). Ti kura aregbo, i nidu na bakere gberarago. Ono wa vura duhe wo, i anaakpa adunguratise kinaho gayó kaza nazingi ni nikerehe watadu ho du yó ni bambungua yo. I dunduko natungusapai dedede. I natingida re naapa Pauro, nga gu ko nayaa: ‘Ho mi nirungbura ni mi nidu ho nyanyaki.’ Rago nangba tire na gayó nyemuse gbiati ngara. Isoke gu kpakarapai du yó rogoho re, si nafu bakere giarogopaiyo fuyó tipa raka na tipa gupai nzunzu nyakipaha rogo raka yo.​—2 AKorindo 12:10.

¹⁸ Ka singia oni nasovura na gbárã, kaza, watadu kura fudifudiapai, “ka oni pirigi nga ti kpara kpe” tipa undo ya, bakere gberarago andu ka dia beroni. (1 ATesaroniko 5:14, 17) Rengo ngaha nga, apai rengbe arengba ka vugumo roni kubani na kubani, ono oni asadi ka zanga duna bakere gberarago, kini berẽ gbe tipa agu apai nga ga toro, gbe, gu maabangirise du ani nani tipa ga Mbori Kindo. Wirina sa nidee ayaa: “Tipa re, tungusapai ningia gimi ziga.” Tungusa wene pangbangaa fu kura aboro naundo ri tipa ri duna ndikidi maabangirise rogo raka yo.

Nyemuse Nakaraga Aboro fuo Yekova

19, 20. (a) Gine rengbe ka undo agu aboro naima ti kurogo ingapai i gbia ngara tipa ka karagatiyo koyo du Yekova ni berewe? (b) Ginipai ani ka wisigoho rogo gu papara kekeapai naye fuo gere?

¹⁹ Badungu agu aboro naima zera rogo toroyo watadu mangi ingapai, i nabihe nikpakarapai ka karagatiyo koyo du Yekova ni. Ono gu ndikidi ngara si aidaha rengbe ka ye ka ngbatunga agu aboro re saberã yó nzunzu na ki karaga gayó nyemuse berewe tipa Mbori. Oni bingo gupai du tipa Marioa naraka Amerika yo. Mario ambu gu dungurati nga ga aKristano, ki fu tiko sa bakere mbira buda, kini vu baangi na kere angua ki zi baha tiko, na i ki ba ko ku bambukiso yo fuo agarã 20 niyangaraha. Ko nayaa: ‘Mi atona ka berãpa gimi raka kumbatayo nyanyakii gbe na mi ki tona ka geda Ziazia Kekeapai berewe. Fuo bete regbo kusa, mi aduna bakere tambuahe tipa ga Yekova wene asino, gbe, gu nga inapai, nga gu mi anaakparakpee tipaha. Fuo i kusi re bambukiso yo, mi ambu bakure na agu aboro mi azi bakure naayó mbata, ono mi kini ndu kina kupati agu adunguratise nga ga aKristano, na i ki karaga re niyangaraha kurogo dungurati berewe. Mi nake zuzu guhe mi aruhe ti kpotore, ono awere, mi gu duadu na kandara maabangirise tipa raka kumbatayo. Mi ainongo bakio tambuahe wai ka mi fuhe fu Yekova tipa gako nunga gbiati mbupai te.’​—Atambuahe 103:9-13; 130:3, 4; AGaratio 6:7, 8.

²⁰ Rengo ngaha nga, agu aboro du apai tipa yó wagu nadu tipa Mario re, si naida i asaditiyo aʹasada gbe tipa ka karagatiyo koyo du Yekova ni. Ono gu nyemuse i akaragaha berewe kubaha, nga gu naye be wisigo Ziazia Kekeapai, kparakpee, gbiati berãkuriipai, si nika fu gu ngara fuyó si aidaha na i ki ru nyanyakii. Gu maabangirise du tipa Kindo angarasi Mario a. Ii, kodihe na nyemuse, idapase, gbiati gunde ti Mbori, maabangirise rengbe arengba ka sa rani ani gbia wenepai rogo raka yo. Rogo gu papara kekeapai naye fuo gere, ani nika wisigo gi kikiipa gamahe nga mabangirise re sirisiri.

[Gu rukutu kekeapai du bandu kpewaraga yo]

[Gu kpiahe du ti kpewaraga 21]

Ga Pauro nyemuse tipa aboro afu ngara fuko ko kakuti ruru mangapai

[Gu kpiahe du ti kpewaraga 23]

Si naida boro du na ngara tipa ka raka ringbisihe kuti ga Mbori agene

Namangolwa Sututu

Oni Rengbe ka Karagapai Sa Agi Asanahe Re?

• Wai nyemuse asa Yesu ko duna bakere wingbaduse?

• Wai padu aPauro na Barunaba na nyemuse tipa awirina afu bakere ngara fuyó?

• Ngba gini gene Satana aʹasada ka gberesapa gu nyemuse nga ga aKristano?

• Padu ani na nyemuse tipa Yekova rengbe ka fu ngara furani ani hi gini fudifudiapai?