Yekova Nafu ‘Ziazia Toro Fu Agu Aboro Nasana Ko’
“Wa du oni tigaoni nga gbegberẽ aboro ki ini pa gama wene ahe fu awironi, [anga gu] Baroni du ngbangbaturũ yo ko susi na gama Ziazia Toro fu agu yo nasana ko, te?”—RUKA 11:13.
1. Ti gini aregbo nzunzu ani aida gu undohe nga ga ziazia toro?
‘MI ARENGBANGA ka diabe gipai re nitire te. Kina mbiko gu undohe nga ga ziazia toro!’ Ya mo oni agumbanga ngbatunga agu afugo naye ngbaduseyo re? Badungu aKristano naima gumbaha. Isoke si rengbe kadu nga oni agumbaha ti gu regbo kere kaza aso roni. Watadu ho gu gaoni badiarogatise oni aima ima na ní akpi ni. Watadu oni agumbaha ho oni aduni na bakere gberarago na si ki sa roni ka oni mangingo gu gaoni apai oni aamangaha mbata wenengai ya. Si rengbe kadu nga ti regbo arungo wa gure rogo raka yo, oni abi gupai nga oni aaraka mbiko kina gu ome ga Yekova ziazia toro afuhe furoni “susi” gu tandu nga ga boro.—2 AKorindo 4:7-9; Atambuahe 40:1, 2.
2. (a) Gini akpakarapai ndikidi aKristano agbiatiyo nani? (b) Gini asanahe ani ka wisigoho rogo gi papara kekeapai re?
2 Si naida ndikidi aKristano sovura aso kuti gu sosodahe gbiati sogote du rogo gi zegino adunga na sinombori re ya. (1 Yoane 5:19) Kurigure, kina boro Satana Bakitingbanga nazubo apefuo Kristo. Ko nasovura nyanyakii kuti agu aboro “naka kuti ga Mbori rugute, na agu yo naka kuti gu dezire pai nga ga Yesu.” (Yugoti 12:12, 17) Si airiwongo tie te nga, ani naida gu undohe nga ga ga Mbori ziazia toro awere susi gu niidumbata. Ginipai rengbe ani ka mangaha tipa ka rugatirani nani nga ani nikaa gbia ga Mbori ziazia toro agbia kindi kpaima? Na wai rengbe ani kadu naa kido nga Yekova ima ida ka fu ome furani ti regbo asada? Ani nagbia akaragapai kuti agi asanahe re rogo agu asanza ue Yesu agumbaha.
Oni Naakparakpee Kindi
3, 4. Gini sanza Yesu agumbaha, na wai ko aringbisihe kuti kparakpee?
3 Ga Yesu bawiriki sa ahõpai beko ti kura regbo sa ki yaa: “Gbia, mo raba rani ani kpari.” (Ruka 11:1) Nikaragapai, Yesu afu asanza ue fu gako abawiriki, nga agu asanza naawiratihe awira. Gu bambata sanza nafura tipa gu boro duna gino kpuni yo. Gu ue he nafura tipa gu bagude nagia gupai wirini agumbaha. Ani wisigingo agi asanza re.
4 Yesu ayaa: “Da du na badiangba dagba roni, ni ki ndu koyo du ni ni bebere yuru, ki ya fu ni, ‘Badiare, mo fú kpokuta biata fere; bambiko . . . badiare ye kono du mi ni ngba gani nunguro, a nga he be re ka mi fu he fu ni wa sa te’. Gu ni du dimo yo ki karaga ha ki ya, ‘Ka mo fudi nga re ya; ngbadimo du ni kisikisi he awere, awire du na mi barame no; ka si adu nga wa ka mi guari ka fu he foro ya.’ Ya mi fu roni wẽ, ka ni aguari nga ka fu he fu ni bambiko badiani nangia ni ya, ono mbiko gani zadapai ni aguari ka fu gu he fu ni a wa ni akpi nyemu he.” Fuo gure, Yesu asakirogo wai gi sanza re abipa kparakpee kini yaa: “Ya mi fu roni wẽ, Oni sána he tipa he, i ki fu he fu roni; oni gbáta he, oni ki bi he; oni ngóka ngbadimo, i ki uru he fu roni. Bambiko gu ni nasana he tipa he ni adía ha adia; gu ni nagbata he ni abí he abi; gu ni nangoka ngbadimo i aúra ha [aúra] fu ni.”—Ruka 11:5-10.
5. Ginipai gu sanza Yesu agumbaha tipa gu boro nazadapa he ayugoho furani tipa gu bipai si aida ani du nani nibipa kparakpee?
5 Gi sanza du zukazuka nafura tipa gu boro nazadapa he re, si nayugo gu bipai si aida ani du nani nibipa kparakpee. Oni kparia gupai nga Yesu aya i afuhe fu gi boro re “mbiko gani zadapai [watadu zadapa he].” (Ruka 11:8) Gu fugo Giriki i asaha nga “zadapai,” rogoyo nga “zanga zee.” Ka mangapai zanga zee watadu ka zadapa he, si nga gbegberẽpai kisusi bangiri aboro. Ono tie, ho boro azadapa he ni na wene nduhe ti ni, pazee ngaha te. Kina gu bangisapai re du tipa gu boro gino aye ku kpuni yo du rogo ga Yesu sanza re. Zee amanganga ko wagu tooni ti zadapa gu he ko akpinyemuhe te. Wa duhe nga Yesu agumba pa gi boro re nikpiapai furani, si naida ani naakpara akpara kindi. Yekova naida gupai nga ani naasanahe kindi, kini gbata he kindi, na kini ngoka ngbadimo kindi. Nikaragapai, ko nika “gama Ziazia Toro [agama] fu agu yo nasana ko.”
6. Ti regbo Yesu, wai aboro anaabi gu sino nga ga dia boro kugume?
6 Anga Yesu ayugu kina gupai furani nga si naida ani naakpara kindi te, ono ko ayugu gupai a furani si aida ani mangihe wo ti ni. Tipa ka rugatise na gupai re wenengai, si naida ani wisigi wai agu aboro nagi gu sanza Yesu agumbaha re anaabi gu sino nga ga dia boro kugume. Badungu apangbangaa du rogo Ziazia Kekeapai nayugo gupai nga, ti agu aregbo i aakeka Ziazia Kekeapai, ngerafuo agino angia gu sino aboro anaabihe na nyanyakipaha, gbe, ga Mbori amoyambu. (Bambata Pai 18:2-5; AEbere 13:2) Pa zanga dia boro kurani kugume angia kere pazee kisusi. (Ruka 7:36-38, 44-46) Nidu ani na gipai re berã rani yo, ani ngerenga berewe kurogo gu pangbangaa Yesu agumbaha re.
7. Tipagine gu kumba du rogo ga Yesu sanza aadunga na zee ti ni ka zingisa bakureako bebere yuru ya?
7 Rogo gu ga Yesu sanza re, gu gino re aye kua gu kumba yo re bebere yuru. Gu kumba re abihe nga si nidingisoro fuko ko fu riahe fu gu gako gino re, ono ‘ka he adunga beko wagusa ya.’ Kuti gi irakporo re, tunguotunguopai du nangia ha! Si aidi ko gbata bete kpakuto fuko ko rihe, ka kina gine vura du vurũ. Sidu, ko kini ndu fuo bakureako zanga zee ka zingisa ko bebere yuru. Ko ki poi kuari ki yaa: “Badiare, mo fú kpokuta biata fere.” Ko kini kparipa gi kpakuto re kindi daho i afuhe ni fuko. Kinaho ka i afu kpakuto ni fuko, si ka ko adu ti ni nindikidi badi boro kugume.
Oni Sanahe Tipa Kina gu Bakioho Oni Aidaha
8. Gine nika sa rani ani naakpara kindi tipa ziazia toro?
8 Wai gi sanza re ayugo gupai si aida ti ni ani naakpara akpara kindi? Gu kumba re azadipa kpakuto kindi bambiko ko abihe nga padu ko na kpakuto beko nika sa ko du nindikidi badi boro kugume, nga gupai nadu ninyanyakipa pai gbe. (Yesaya 58:5-7) Ka kpakuto aadunga ya, ka ko adunga niwene badi boro kugume te. Wakina gure a, mbiko wa ini ani gupai nga, ga Mbori ziazia toro nga nyanyakipa pai tipa ani mangi gaani sunge nga ga ndikidi aKristano, si naida ani naakpara kindi fu Mbori tipaha. (Zekaraya 4:6) Ka ga Mbori ziazia toro adunga tirani ya, ani arengbanga kadu na diabese te. (Matayo 26:41) Oni nabi gu nyanyakipa pai rengbe ani ka gbiaha niyangaraha rogo gi sanza Yesu agumbaha re? Ka ani aabi ga Mbori ziazia toro niguhe ani aidaha aida niipo, si nawira gupai nga ani nisana ko asana kindi tipaha zanga zee.
9, 10. (a) Nimanga oni sunge na kpiapai, oni gumbanga ndu gupai si aida ti ni ani naasana Mbori kindi tipa gako toro. (b) Gini sanahe si aida ani sana tirani nani, na tipagine?
9 Ani ringbisinga gipai re kuti gupai ninaamanga amanga ti gi gaani regbo re. Ka kaza so boro sa dagba gaoni aborokporo bebere yuru, oni ndunga ka zingisa munganga yuru tipa undo tee? Nirengo, ka si du nga taata kaza du gbua, oni ndunga fuo munganga yuru te. Ono tie, ka si du nga kaza bagunda du namanga ní, zee mangingo roni ti ndu ka zingisa munganga yuru te. Tipagine? Bambiko tunguotunguopai du ngaha. Oni bi gupai nga si naida kina abangbasia mangipai sa gu kaza re niipo. Ka oni ayambanga munganga ya, gu boro re rengbe ka kpiakpi. Wakina gure a, ndikidi aKristano nagbiatiyo na tunguotunguoapai kina kumbatayo kindi, ka pepai nimasaku. Gupai namanga nga, ‘wa bahu nata kini poi,’ kinawo Satana ata kini gbata gene ka rita rani. (1 Petero 5:8) Ga Mbori ziazia toro nga nyanyakipa he gbe tipa ani naangera angera kindi rogo toroyo. Ka ani asananga he tipa ga Mbori undohe ya, ani rengbe arengba ka kpi rogo toroyo. Sidu si aida ti ni ani naasana Mbori asana kindi tipa gako ziazia toro. (AEfeso 3:14-16) Kinagu ka ani mangihe wo, si ka ani gbia gu ome ti ni si aidaha tipa ka ‘hipai ki da ti yangara rago.’—Matayo 10:22; 24:13.
10 Sidu tie, si nibanyanyakipa pai furani tipa ani naarunga ti kura aregbo ki sana tirani ki yaa, ‘Ka gumba rengo nzunzu, wai mi naakpara fu Mbori kindi?’ Oni tingidi gupai nga, ho ani aino gupai ni nzunzu nga ani naida gu undahe nga ga Mbori, ani nikaa kpara akpara fuko kindi tipa gako ziazia toro.
Gine Nasa Rani Ani Kpari Naa Kido?
11. Wai Yesu aringbisi gu sanza du tipa bagude na wirini kuti kparakpee?
11 Gu sanza Yesu agumbaha tipa gu boro nazadapa he re, si nayugopa gu sino berã nga ga gu boro nakparakpee, nga gu boro duna idapase. Gu ue sanza nayugopa gu sino berã nga ga gu boro nagia akpee, nga Yekova Mbori. Yesu asanahe ki yaa: “Gini bakumba du dagba roni, ka wirini sana ni tipa kpokuta, ni ki fu mbia fu ni? si ngia tipa tĩo, ni ki fu wo fu ni? Ka ni sana he tipa parakondo ni ki fu ngerembia fu ni?” Yesu agumba gupai gipai re ayugoho kini yaa: “Wa du oni tigaoni nga gbegberẽ aboro ki ini pa gama wene ahe fu awironi, [anga gu] Baroni du ngbangbaturũ yo ko susi na gama Ziazia Toro fu agu yo nasana ko, te?”—Ruka 11:11-13.
12. Wai gu sanza du tipa gu bagude nafu guhe fu wirini ní nasana ní tipaha ayugopa wai Yekova akaragapai sa gaani akpee?
12 Nimanga Yesu sunge na gi sanza du tipa gu bagude nafu guhe fu wirini sana ní ní tipaha, ko ayugu wai Yekova akaragapai fu agu aboro nakpara fuko. (Ruka 10:22) Nibambatapai, oni bingo gu kparakparapai du dagba agi asanza re. Anga Yekova wa gu kumba du rogo gu bambata sanza nga guko nadu na ndundu ka karagapai fu gu bakureako naye fuoko tipa undo te, ono ko wakina gu bagude nangerafuo wirini, kidu na nyemu ka fu guhe funi sana ní ní tipaha. (Atambuahe 50:15) Yesu ayugupai fuo gure furani tipa ga Yekova sino berã tipa rani na kpiapai dagba gude na bai. Ko ape gupai nga, wa vura du gu bagude du auru kpotosende ‘nigbegberẽ boro’ mbiko gu ingapai ani adihe ti atitarani, ní kini gamu wene ahe agama fu awirini, angbatika gu barani tie du ngbangbaturũ yo, duna wene sino, wai ko afu ziazia toro fu agu aboro nairisoko!—Yakoba 1:17.
13. Gini kido rengbe ani kadu nani ho ani akpara ni fu Yekova?
13 Ginipai ani awirikaha be gipai re? Ani rengbe arengba kadu naa kido nga ho ka ani sana gu Barani ni du ngbangbaturũ yo tipa ziazia toro, ko afuhe afu furani nirengo. (1 Yoane 5:14) Ka ani akpara fu Yekova kindi, ko agumbanga gupai furani naye re te, nga: “Ka mo fudi nga re ya; ngbadimo du ni kisikisi he awere.” (Ruka 11:7) Kuba gure, Yesu ayaa: “Oni sána he tipa he, i ki fu he fu roni; oni gbáta he, oni ki bi he; oni ngóka ngbadimo, i ki uru he fu roni.” (Ruka 11:9, 10) Ii, Yekova nikaa “karagapai [akaraga] fu rani ho ani ka kpara ni.”—Atambuahe 20:9; 145:18.
14. (a) Gini iraira bipai nafuda bete agu aboro nagbiatiyo na aʹasada? (b) Ho du ani ni rogo aʹasada, tipagine si aida ti ni ani kpari fu Yekova naa kido?
14 Gu ga Yesu sanza du tipa gu baagude namaa berãni fuo agu apai nga ga awirini, si nayugo gupai a nga ga Yekova wene sino ima susa gu nga ga agu abaagude du auru kpotosende. Sidu, boro ho dagbarani si aida ní bi gupai nga agu aʹasada rengbe ní ka gbia tiní nani, Mbori du naba gako zinga kuri ní te. Bangbasia vura rani du nga Satana naida ani naaberã wa gure. (Eyobo 4:1, 7, 8; Yoane 8:44) Ndupai ho rogo Ziazia Kekeapai tipa ngbatunga agu aberã boro akitangbaanga ní nani nitini re te. Yekova aʹasadanga rani “na gbegberẽpai te.” (Yakoba 1:13) Ko ayengo na ngbatunga gu asada furani igirã wa woo watadu wa ngerembia te. Gu barani du ngbangbaturũ yo nagama ‘wene ahe agama fu agu aboro nakpara fuko.’ (Matayo 7:11; Ruka 11:13) Kina wai a bakere gbe ani aruga tirani naapa ga Yekova wene sino gbiati gupai nga ko ima ida ka undo rani, kinawo a bakere gbe ani kaa kpara fuko naa kido. Wa ani kaa mangaha wo, ani arengba rengba a ka gumba afugo wagu bake apapara Atambuahe agumbaha, nga gu nayaa: “Ni rengo Mbori agi pa re; ko adege tuko sa gi kpetambuahe.”—Atambuahe 10:17; 66:19.
Wai Du Ziazia Toro Nigaani Mounda
15. (a) Gini kidohe Yesu amangihe nibipa ziazia toro? (b) Gine nga gu bangua gene ziazia toro aundo rani ngbaha?
15 Ngbutuko mbata fu kpio Yesu, ko agumba agu apai berewe ko akidopaha rogo agu asanza ko agumbaha. Ko afura tipa ziazia toro fu gako amokedi ki yaa: “Mi akpara fu Buba, ko fu kura Mounda fu roni, ko nye anye na oni kindi.” (Yoane 14:16) Rogo gi gene re, Yesu ape gupai nga gu mounda re, watadu ziazia toro, si nika nye na apefuoko ti agu aregbo nika ye, na kini kodi gi gaani regbo re a. Gine nga gu bangua gene ani agbia gu undahe nga ga ziazia toro re areme ngbaha? Ziazia toro naundo rani ani hi badungu aʹasada. Wai si aundo rani wo? Gu mokedi nangia Pauro, nga guko nagbia tiko na badungu aʹasada, ko aringbisipa wai ga Mbori toro aundo ko. Ko aringbisipaha rogo gu waraga ko akehe fu agu aKristano nadu Korinda yo. Ani wisigingo gupai niguruhe ko akehe.
16. Wai rengbe agu apai du tipa rani kadu wakina gu nadu tipa Pauro?
16 Nibambatapai, Pauro agumbaha ziazia fu akurako aidipase ki yawee ko aasovura kuti ‘kiwe tii kpotokoyo,’ nga gu ngbatunga asada sa ko aambu behe. Fuo gure, ko ayaa: “Mi azungadi Gbia [Yekova] bara biata, ya si guari ti re.” (2 AKorindo 12:7, 8) Wa Pauro avura zungodi Mbori ko di gu rungosiro re tiko kusayo, si aaguaringa tiko te. Si rengbe kadu nga kina gu bangisapai re du tipa roni areme. Si rengbe kadu nga oni aima digo nikpari fu Yekova naa kido tipa ko di gupai re tironi kusayo, a wa Pauro amangihe. Ono wa oni avura kaa zungodi tironi fuko, gupai re nafuda roni kindi. Ya mo gipai re nayugo gupai nga Yekova akaraganga pai sa gaoni akpee te, na gako toro aundongo roni tee? Wagusa te! (Atambuahe 10:1, 17) Ani wisigingo gupai Pauro agumbaha fuo gure.
17. Wai Yekova akaragapai sa ga Pauro akpee?
17 Mbori akaragapai sa ga Pauro akpee ki yaa: “Gimi undahe rengbe foro, bambiko gi tandu du ni mbakadimbakadi he ziazia rogo rungbura yo.” Pauro ki yaa: “Ngbatika mi asámbua he zaza ni ngbarago tie ti agu apai mi arungbura ti ni, ya gu ome nga ga Kristo du auru re [“wa bamburokoo,” NW].” (2 AKorindo 12:9; Atambuahe 147:5) Sidu, Pauro abi gupai nga, ga Mbori bandahe rogo Kristo yo adu riko wakina bamburokoo. Yekova nakaragapai sa gaani akpee areme a wakina gure. Ko nagbaraga gako bandahe rii gako amoyambu wakina bamburokoo.
18. Tipagine rengbe ani arengba ti ni ka hi aʹasada?
18 Rengo ngaha nga, bamburokoo akanga na mai te, watadu ka sa gupai nga wege zanga ya te, ono si nabanda boro abanda a be mai na wege. Teketeke a, gu bamburokoo naye be “gu ome nga ga Kristo,” si asanga gupai nga fudifudiapai zanga manga rani te, watadu ka kpakarapai yengo sa rani ya te. Wa vura duhe wo, si nabanda rani abanda rogo toroyo be gu gbegberẽ ahe du rogo gi zegino re na be gu zubohe nga ga gaha bazogo, nga Satana. (Yugoti 7:9, 15, 16) Sidu tie, ka si vura du nga oni nasovura kuti gu asada aidanga ka ‘guari tironi ya,’ oni rengbe arengba kadu naa kido nga Yekova ima rugatiko na gupai oni asota nani re, na ko ima karagapai kuti “gaoni kpe.” (Yesaya 30:19; 2 AKorindo 1:3, 4) Pauro akepai ki yaa: “Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.”—1 AKorindo 10:13; AFiripoio 4:6, 7.
19. Ginipai di oni berã ka mangaha, na tipagine?
19 Nirengo, gi “kusa rago” ani araka ti ni re, nga gu adunga na sinombori rogoho re ya, “gbegbere rago” du ngaha na si nikpakarakpakarapai ka mangapai sani. (2 Timoteo 3:1) Wa vura duhe wo, tipa ga Mbori amoyambu tigayó, i rengbe arengba ka mangapai sani. Tipagine rengbeyó arengba tigayo ti ni ka mangapai sani? Si wo bambiko gu undahe na bandahe nga ga ga Mbori ziazia toro, nga gu Mbori afuhe kpaima fu aguyó nasana ko tipaha kindi naa kido. Sidu, ani dinga berã kaa kpara akpara kindi tipa ziazia toro na aʹuru dunduko.—Atambuahe 34:6; 1 Yoane 5:14, 15.
Gaoni Karagapai Nga Gine?
• Ginipai si aida ani mangihe tipa ka gbia ga Mbori ziazia toro?
• Tipagine rengbe ani kadu ti ni naa kido nga Yekova nika karagapai akaraga sa gaani akpee tipa ziazia toro?
• Wai ziazia toro aundo rani ani hi aʹasada?
[Gu kpiahe du ti kpewaraga 13]
Ginipai rengbe ani ka wirikaha rogo gu sanza Yesu agumbaha tipa gu kumba nazadipa kpakuto bebere yuru?
[Gu kpiahe du ti kpewaraga 15]
Ya mo oni naakpara kindi tipa ga Mbori ziazia toro?
[Gu kpiahe du ti kpewaraga 16]
Ginipai ani awirikaha tipa Yekova rogo gu sanza du tipa gu baagude nangerafuo awirini?