Ziazia Toro Nga gu Ome Si Aida Oni Du Nani Rogo Gaoni Raka

“KA MO ba nga re bara bangiro ku sa yo, ki di ga Ziazia Toro ti re ya.” (Tam. 51:11) Bakindo Davide afu gi kpee re ho ko amangi kere ingapai ni.

Davide aima inopa gu ome du ziazia toro nani rogo gako raka. Ho ko aduni nigude, si nasako ko imi Goriata nga gu basovura aboro anaagunde agunde beko. (1 Sam. 17:⁠45-50) Si adu a kugiiko ko keke bete wene abia Atambuahe. Ko ayaa: “Ga Yekova Toro nafura rogo re yo, gako pai du ti mirãre.”—2 Sam. 23:2.

Yesu Kristo nitiko apepa gu sunge ziazia toro amangihe rogo ga Davide raka. Ti kura regbo sa, Yesu aya fu agu aboro naadegatuyo kuti agu apai ko aapehe ki yaa:

“Dawidi aya ni tiko sangba Ziazia Toro yo, ‘Gbia aya fu gi Gbia, Mo súngu ku kumbabere, daho mi ka maa avuraro ni tii nduro yo.’ ” (Mk. 12:36; Tam. 110:1) Yesu aima ino gupai nga, ho Davide aake abia Atambuahe ni, ziazia toro du naangbe fuko kumbatayo. Ya mo gu bangisa ziazia toro re ho areme tipa ka undo rani?

“Oni Sana He Tipa He, I ki Fu He fu Roni”

Si awiranga ha tigu nga oni ake abia atambuahe ake rogo kura uru te. Ono si rengbe kadu nga kpakarapai kinaho du oni rogoho du bakioho wakina bakio Goriata. Nikpiapai, ani bingo gupai nadu tipa dee du rimori nga Isabela. Kumbaari ambu ri na awiriko ue nga adegude ki ga fuo paranga dee. Ko ambu ri na bakere bape ri tumoho na ki zanga fu marã furi ri naangerafuo awiriko nani. Ri ayaa: ‘Gu nadu tire aima nyasa. Na pare ki paya bangire. Wa apai avura du were tipa re, ga Mbori ziazia toro naaundo re.’

Ya mo Isabel aaida ka gbia ziazia toro zanga ri mangi ome amanga? Si aadunga wo te, ri anaasana Mbori asana na aʹuru dũ tipa ko undo ri nani. Ri aini gupai nga, si naida ri du na ga Mbori ome tipa si undo ri ki ngarasiri ri naangera fuo awiiri na ka bi tiri berewe nga kina boro nga ri. Ri amangi agu arugute Yesu afuhe nayaa: “Oni sana he tipa he, i ki fu he fu roni; oni gbata ha, oni ki bi he abi; oni ngoka ngbadimo, i ki uru he fu roni.”—Mt. 7:7.

Kina gu bangisapai re a nadu tipa Roberto. Ko aaida ga Mbori toro undoko, ono tipa kurapai kia. Gundö aima zio baru tiko. Ko asovura kuti ru tipa agarã ue, na kini karaga tiko kaa vu ru ti kura aregbo. Roberto ayaa: ‘Ho boro ambu vugundö ni, ní nambu be nyemuru nga gbegberẽe. Aʹuru dunduko kpotoni asosoda ní kindi tipa ní tona ru berewe.’

Roberto aafura kindi kini yaa: ‘Ono mi adiberã tipa ka manga ariapai rogo gimi raka tipa kaa irisombori ngba ruru gene. Mi amangi asadatise ka hiiso berã re na gu weneapai du rogo Ziazia Kekeapai. Mi anaafu kpee na aʹuru dũ kini sana Mbori tipa ko fu ome fere tipa mi raki ringbisihe kuti Ziazia Kekeapai. Mi aini gupai nga, mi arengbanga kadu na diabese rogo raka ngba gi ome te. Na mi abi wai Yekova akaragapai sa gimi kparakpee, gbe, ho mi anikaraga tire ni berewe fuo vugundö rago ki gberẽ tire mi ki sanako tipa undo. Mi abi gupai nga, ga Mbori ziazia toro nangia guhe nafu ome fere; mbiko ka ga Mbori toro aafunga undo fere ya, ka mi adinga be vugundö te.’—Frp. 4:⁠6-8.

“I Agúka Wa Adingimo Nagu na Apupora”

Wakina Isabel na Roberto, badungu amirioni aDezire Yekova ini gupai nga ziazia toro aima undoyo rogo gayó raka. Ga Yekova zaaza ome, nga gu ome ko amangisunge nani ka kusa agu ahe du rogo zegino, ko rengbe arengba ka fuhe furoni ka oni aidaha. Mbori na nyemu ka fu gako toro furoni ka oni asanahe tipaha kakaka. Tipa oni gbia gu toro re, ko naida oni wirikipai tipa ko na kini mangi gupai ko akpinyemuhe.—Yes. 55:6; Eb. 11:6.

Gu ome nga ga ziazia toro naundo roni oni naamangasunge fu Mbori na kidu na diabese rogo gaoni raka yo ka oni vura kaa gbia tironi na aʹasada wai vurũ. Ziazia Kekeapai nakido rani niyaa: “[Yekova] nafu tandu fu gu ni he amaka ni, na gu ni adu nga ome ti ni ya ko nakiisa omeni. . . . Agu yo nakida kuti Yekova i aúngasi omeyo, i agúka wa adingimo nagu na apupora, i aóra, ka i ambú nga ya, i atá, ka he amáka nga yo ya.”—Yes. 40:⁠28-31.

[Gu rukutu kekeapai du bandu kpewaraga yo]

[Gu kpiahe du ti kpewaraga 9]

AGU AGENE ZIAZIA TORO AUNDO RANI NGBAHA

Ziazia toro rengbe ka nyakasa rani ani sovura kuti gu gbegberẽ mangaapai naimisa rani. Gu mokedi nangia Pauro ayaa: “Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.”—1 Kor. 10:13.

Ziazia toro rengbe ka undo roni oni sonosi agu sino nafu ngbarago fu Yekova. “Zuzu Toro nga nyemuse, na ngbarago, na zereda, na hipai, na mangapase, na weneringise, na du ngangarã [idapase], na zera, rugatise.”—Gara. 5:⁠22, 23.

Ziazia toro rengbe ka nyakasa roni oni hi aʹasada. “Mi rengbe na manga apai dunduko rogo gu ko nanyakasa re.” —Frp. 4:13.

‘Mi anaafu kpee na aʹuru dũ kini sana Mbori tipa ko fu ome fere. Mi aini gupai nga, mi arengbanga kadu na diabese rogo raka ngba gi ome te. Na mi abi wai ko akaragapai sa gimi kparakpee’

[Gu kpiahe du ti kpewaraga 7]

GA MBORI TORO TINGBA SUNGE

Mbori amangisunge na ziazia toro ka kusa kpotosende na gu kura ahe du rogo haurago. Bake apapara Atambuahe apoi kuari ki yaa: “Ako Yekova, na nge gamo mangaapai! Mo amangi he dunduko na tatamana; kpotosende hi be gamo ũkumuko.” Na ko ki ya berewe wee: “Ho mo nakeda ga Toro ni, ami ki du ni mangimangi ra.”—Tam. 104:⁠24, 30; Bam. P. 1:2; Eyo. 33:4.

Ga Mbori toro adu kugii ruru akumba i ke Ziazia Kekeapai. Gu mokedi nangia Pauro akepai ki yaa: “Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai.” (2 Tim. 3:16) Gu fugo nga ‘Ziazia Kekeapai aye be ga Mbori toro,’ rogoho yo ngburungburu nga ‘Mbori avudi Ziazia Kekeapai kurogo aboro yo.’ Ga Yekova toro arugu abakeke Ziazia Kekeapai i keke “ga Mbori pai.”—1 Tesa. 2:⁠13.

Ziazia toro afu ome fu ga Mbori amoyambu i naafura tipa apai kumbatayo zukazuka. Gu mokedi nangia Petero ayaa: “Oni ini gere mbata, ya a nga gu tungusitungusi pai sa nga ga Ziazia Kekeapai naye be boro ni gani berã te. Bambiko a nga tungusitungusi pai sa naye mbiko sangba boro te, ono aboro agumba pai be Mbori, wa Ziazia Toro arugu yo.”—2 Pet. 1:⁠20, 21; Yoe. 2:28.

Ziazia toro aundo Yesu gbiati kura akumba i tungusi gu wene pangbanga du tipa ga Mbori Kindo na ka manga iiriwoapai. Yesu ayaa: “Ga Gbia Toro ti re, bambiko ko auka nzeme ku ri re mi tungusi wene pangbanga fu rungorungo aboro. Ko akedi re mi gumba pa kusa kisikisi aboro fu kina yo, na pa hahasa bangiri airavurari, ka kusa agu aboro du ni rungosirungosi yo.”—Ruka 4:18; Mt. 12:⁠28.

[Gu kpiahe du ti kpewaraga 5]

Photodisc/SuperStock