Tipagine Si Aida ti Ni Ani Naape Kina Rengo Kindi?

MANFRED aawirika sunge makatabu ho garãko aduni 18.a Gu sirika ko aamangasunge fuhe ambakadipai tipa ko gbiati akurako abawirikipai i naandu kurogo kura ba-sunge tipa kaa wirika sunge yo bara ue rogo poso. Rogo kura uru sa, i azaki agu abawirikipai re ti sunge rogo gi ba-wirika-sunge re mbata fu gu regbo i anaazaka yó ti ni. Ringbisihe kuti agu arugute nga ga gu sirika i aamangasunge fuhe re, si aidi i karagatiyo ku ba gayó asunge yó nga ga biroo tipa gu yangara regbo re. Kuba gure, i dunduko namere kina gene agu apai yo nangba tiyó kpara kina Manfred sa nakaragatiko ku ba sunge yo biroo yo. Pai kini mo ka manga nga gu bangerekurii sunge i asiako ko naangera kurii gu riko nangia ga abawirikipai re aye ku ba gayó sunge yo. Ho ko abi Manfred ni, ko asanako ki yaa: “Tipagine adunga mo ti ni areme ba-wirikapai yo ya? Na wari du akuaro ni?” Wai si aidi Manfred karagapai?

Wo aboro nidu rogo kpakarapai wagu nadu tipa Manfred re. Ya mo si aidi ko gumba rengo watadu ko gumba ziree ka batasa akurako? Tipa ko gumba kina rengo arengbe ka ye na kina fudifudiapai fuyó na ki gbarasi gako pagume dagbako naayó. Ya mo ruhe aru boro gumba ziree ho du pai ni wa ngbatunga gure? Ginipai ka oni amangihe wa ka i aya oni nangia Manfred? Ani nika fura tipa Manfred kusa, ono ani wisigingo gupai si aida ani mangihe ho si aida ni ani diberã singia ka gumba rengo watadu ziree.

Rengo na Ziree Natagbagatihe Atagbaga

Ti tonatona ga aboro raka, afugo dunduko nangia kina rengo. Abiriki, gumba aziree na akodooro aadunga ti ni te. Yekova, nga Bakusiahe, ko nga “Mbori nga irarengo.” Fugoko nga rengo; ko arengbanga ka gumba ziree te, sidu, ko nasoga gumba ziree gbiati airaziree.—Atambuahe 31:5; Yoane 17:17; Tito 1:2

Wa duhe tie nga wogu apai adu, ziree aye wari ka kura ku dagba aboro? Yesu Kristo afu karagapai ho ko aafura ni fu agu abarumbatayo rogo pambori nga aguyo naaida ka imoko. Ko ayaa: “Awiri Bakitingbanga nga oni nga baroni, gu nyemuhe nga ga baroni si oni akpi nyemu manga ha. Ko adu ni baimiaboro ho rago ainge ni, ko anye nga na rengo te, bambiko rengo adu nga tiko te. Ho ko nagumba zire ni, ko nagumba ha agumba ni tiko; bambiko irazire nga ko, nga baha.” (Yoane 8:44) Gupai Yesu aafura herẽ tipaha, si nangia gupai namangi ati Edene yo ho Satana azomia bambata aboro ni i basasangbaa Mbori na si kini rimisi yó kurogo ingapai na kpio.—Bambata Pai 3:1-5; ARomo 5:12.

Afugo Yesu nayugo Satana ziazia ni “irazire . . . nga baha,” nigu boro naenge ziree. Satana kindi nga bangbasia baurugu aziree na ‘nibanangi aboro kpotosende no dunduko.’ Ko du du bape agu apai kuriko ziree aye nani kurii ngbatunga aboro areme.—Yugoti 12:9.

Gu tagbagapai du dagba ziree na rengo, nga gu Satana Bakitingbanga atonaha, si namaapai kindi daa ku areme. Si ima mera kurogo agu ariko dunduko nga ga aboro na ki merefuo aboro dunduko nibasasa. Gu gene boro araka ngbaha, si namaa ní kubani watadu kubani nibipa gumba ziree na gumba rengo. Agu aboro du kubara Mbori yo, i namaa gayó gene raka rii gu rengo du rogo Fugo Mbori, nga Ziazia Kekeapai. Gu boro andunga ngba gu gene nga ga rengo ya, ní ima inoho nga ní ima zio ti ga Satana gbina watadu ní ainongo ho te. Tipagine ani agumbaha ti ni wo? Bambiko “zegino dunduko du ni zogozogo ho be gbegberẽ ko.”—1 Yoane 5:19; Matayo 7:13, 14.

Tipagine Aboro Agumba Ziree ti Ni?

Gu rengo nga, “zegino dunduko du ni zogozogo ho be gbegberẽ ko,” si nayugo ndu gupai furani dungu aboro agumba ziree ti ni. Ono ani rengbe ka sanahe ki yaa, ‘Tipagine Satana, nga “irazire . . . nga baha,” agumba ziree ti ni?’ Satana aima ino gupai nga Yekova nga Bakerepa Bakindo duna rengo beko ka zoga agu ahe dunduko ko akusihe, kodihe na bambata kumba na diako. Ono wa si avura duwo, Satana aaida gi iriiripa ba re tipa tiko, nga gu ba ko aadunga na rengo beko tipaha ya. Mbiko ngbaduse gbiati gbangbati, ko ataburo ka zio ga Yekova ba. Tipa ko gbia gi ba re, ko agumba aziree na ki mangi biriki.—1 Timoteo 3:6.

Ginipai namanga areme? Ya mo oni aidanga ha ya ngbaduse gbiati kere nyemu ahe nigbangbati, si nasa aboro i naagumba ziree tee? Gu sunge-bagaahe nga ga ngbaduse, gu birĩ zogarago aboro agbarasapa marã rogoho, gbiati zire pambori, si ni agu apai ima gbera be nanga aboro, gumba aziree, sa aboro i naamanga irairaapai, na kaa birika aboro. Tipagine i amangaha ti ni? Ya mo anga ngbaduse du nasa aboro dedede gbiati kere nyemuahe i naamanga agu apai re watadu ka gbata gene ka gbia kumuko, ka gbia ome, watadu ka gbia gu ba nga ga irisa adunga yó na rengo beyo ka gbiaha ya tee? Gu tatamanatatamana Bakindo nadu rogo gu ringara aYisaraere nadumbata ayaa: “[Gu boro] naipisa tini ka du ni irakumuko azanga nga mbusa te.” (Asanza 28:20) Na gu mokedi nangia Pauro akepai ki yaa: “Nyemu marã nga tarã ngbatunga gbegberẽapai dũ.” (1 Timoteo 6:10) Kina gu bangisapai re a rengbe ani ka gumbaha tipa agu aboro duna kere nyemu gbia ome ka maapai kurii akurayó watadu nyemu gu ba nga ga irisa dagba aboro.

Gu kurapai nasa aboro i naagumba ziree, si nga gunde, gunde be sangbana gupai pa gumba yó rengo narengbe ka ye nani watadu gunde be gupai kura aboro nikaa berãha ka i gumba rengo. Si nga sino aboro boro duna nyemu gupai nga akurani naakpinyemu ní na ki idi na ní. Ono tie, gi nyemupai re rengbe ka sa yó i he gumba rengo, watadu ka gumba ziree kandara tooni, tipa ka dada gu irairaapai nani i amangaha, ka oka gu kura apai angbanga ya, watadu ka sa aboro i naaberã kina wenepai tipa ní. Si daada wa Soromo akepai ki yaa: “Gunde . . . [be] boro nare gbina, ono gu ni nakida kuti Yekova ni du zezeredi.”—Asanza 29:25.

Ranigose fu Mbori

Ginipai Manfred agumbaha ho bangerekurii sirika asanako ni? Ko agumba kina rengo ki yaa: “Bayugupai nizaki rani ti sunge mbu regbo koyo kindi, sidu, mi kini karagatire tipa sunge. Tipa gu kura aboro tigayo, mi arengbanga ka fura tipa yo te. Si adu niwenepai ka oni sana kina yó.”

Manfred arengbe arengba ka ti-birĩ ki fu iraira karagapai, si ki mbakadi rimoko bangiri agu akurako i aawirikapai naayó re. Ono ko aduna wene ndupai tipa ka kakuti gumba kina rengo. Manfred nga boro sa dagba aDezire Yekova. Pa pe ko rengo abanda sangbakpotokoyo. Si asa gupai a nga, gu boro nadi ko tipa sunge, ní naakido kutiko. Nipapara ga Manfred yugopai, i asiako ko naamangasunge rogo gu basunge nadu tipa mbakada afongo, nga gu ba i anaaidanga ha fu abawiriki sunge i mangisunge rogoho ya. Ho i atumbapa Manfred ni kuari ki fu bakerepa sunge fuko fuo susa agarã 15, gu bangerekurii sunge naye ki bi Manfred basunge yo re, atambuako rogo terefuni tipa gi wenepai namangi fuko re na ki tingidi gi sinoko nga ga kakuti gumba kina rengo re.

Wa duhe nga Yekova nga gu Mbori nga irarengo, agu aboro dunduko naida ka zio dawedawe pagume naako, si naida i ‘mbu ziree’ kini ‘gumba kina rengo.’ Gupai si aidaha nga, ga Mbori moyambu naakpinyemu rengo. Tatamanatatamana kumba akepai ki yaa: “Irarengo dezire agumba nga zire te.” Ono gine nga ziree?—AEfeso 4:25; Asanza 14:5.

Gine Nga Ziree?

Aziree dunduko ni agu apai angianga rengo ya, ono anga agu apai dunduko angianga rengo ya nga ziree te. Wai duhe wo? Buku sa nga gu nasakarogo afugoyo naya tipa ziree wee “si nga gupai bagumbaha naima inoho ya anga rengo ngaha te, ní kini idi aida ka gumbaha tipa ka nanga aboro.” Nirengo, ziree nga gu mangapai nga boro nataino aino kini nangi akurani. Sidu, ho boro agumba gupai ni angianga rengo ya zanga ní inihe aino, wa gu nga ka gumba gupai fu boro arunga ya watadu ka gumbapa gu namba ahe arunga ya, anga si kina sa wa gumba ziree te.

Kurigure, si naida ani wisigipai ka bihe singia gu boro nasanahe tipa i karagapai funi re ní na rengo beni ka ino gupai ní aida ka inoho re watadu ní nani te. Nikpiapai, ka si adu nga gu kura bangerekurii sunge kia nasana Manfred, ya mo ka si adu nidingisoro fu Manfred ko gumba apai dunduko fuko? Nirengo nzunzu te. Wa duhe nga gu bangerekurii sunge re adunga na rengo beko tipa gu ngbatungapai re te, ka si adunga nidingisoro fu Manfred ko gumbaha te. Nirengo, zavura rogo gipai re, ka si adu niʹirairapai fu Manfred ko gumba ziree.

Gini kpiapai Yesu Kristo amoihe nibi gipai re? Ti kura regbo sa, Yesu aafura na agu aboro naaidanga kutiko ya ono nadu na nyemu ino apai tipa gu gako anunguro ko asogimaha. I aya fuko: “Mo gúari erẽ ki ndu ku Yuda yo.” Gine nangia gako karagapai? Ko ayaa: “Oni ndú sa pumbo [ku Yerusarema yo]; mi ata ndu nga sa gi pumbo te re; bambiko ragore ata da nga te.” Ngbutuko fuo gure, Yesu aima ndu nirengo tipa pumbo ku Yerusarema yo. Tipagine ko akaragapai ti ni wa gure tie? Ko akaragapai wo fuyó bambiko i aadunga na rengo beyo ka ino agu arago dunduko ko ata kurogoho te. Sidu, Yesu agumbanga ziree fuyó te, gupai ko amangihe nga ko akaraganga pai fuyó naabaha dunduko te tipa ka i arengbanga ka manga ko na gbegberẽpai ya watadu gako abawiriki. Anga ziree nangiaha ko agumbaha te, bambiko gu mokedi nangia Petero akepai tipa ko ki yaa: ‘Ko amanganga gbegberẽpai te, i abinga biriki ngbako yo te.’—Yoane 7:1-13; 1 Petero 2:22.

Ginipai tipa kina boro Petero nitiko? Rogo gu yuru i azi Yesu, anga Petero agumba ziree ho ko aoro rimo Yesu ni bara biata tee? Ii, gunde be aboro aima diabe Petero. Ono nibasa tie, ko ‘akpari akpara gbe’ na ki sa gako berã, na i ki mbu gako ingapai fuko. Kurigure, ko awirikipai be gi gako irairapai re. Kusa, ko afura dagba aboro tipa Yesu na ki ká ka mbu fugo wagu ga aYuda abarumbatayo agumbaha fuko ko mangihe. Nirengo, gi irairapai Petero amangihe tipa guru regbo na ki sa gako berã niipo re, si naida si ngarasi rani dunduko ho ani narungbura ni na ho ani nakoto ni rogo fugoyo na rogo mangaapai yo.—Matayo 26:69-75; Amokedi 4:18-20; 5:27-32; Yakoba 3:2.

Rengo Nika Sigiratihe Asigira Nyeanye Kindi

Asanza 12:19 nayaa: “Ngba bagumba rengo du ni mbakadimbakadi he nye anye kindi, ono mirã bagumba zire aíma ngbutuko.” Ii, agu afugo nga ga rengo, si nga agu apai nika nyeanye kindi. Rengo nga guhe nasigira gu pagume du dagba aboro, na si nasaha si du niwenepai ho aboro afu tiyó ni kaa gumba kina rengo na kini mangiapai na ngbanyaa nani. Nirengo, pa gumba boro rengo naye na amaku funi nikina ipo. Si nakoda gigiri sangbakpotoyo, wene rimose dagba aboro, na wene ramukporo nga ga rogatise, dagba aborokporo, dagba abakure, na rogo sunge-bagaahe a.

Ono tipa ziree tigaha, si aimanga te si ki go kusayo. Ziree nadu adu na diabese tipa bete regbo ono angianga tipa gbanga regbo ya. Kurigure, Yekova, nga gu Mbori nga irarengo, ko ima sia gu regbo ko ka hi aziree ki dakuti ni na tipa agu aboro naurugo aziree. Ziazia Kekeapai nakidohe kini yawee Yekova nika dia gu ome adia kusayo nga ga Satana Bakitingbanga, nga baenge ziree, nga guko naingisa aboro dunduko auru kpotosende. Ngbutuko kumbatayo, Yekova nika dia aziree kusayo kodihe na airaha.—Yugoti 21:8.

Nangbaa wai raka nikadu ho ‘ngba bagumba rengo’ nikadu ni nisigirasigiraha!

[Gu rukutu kekeapai du bandu kpewaraga yo]

[Gu kpiahe du ti kpewaraga 4]

Ngbaduse gbiati gu kere nyemu ahe nga ga gbangbati nasa dungu aboro i naagumba ziree

[Gu kpiahe du ti kpewaraga 5]

Aziree dunduko ni agu apai angianga rengo ya, ono anga agu apai dunduko angianga rengo ya nga ziree te