Wai ka Ino Ndikidi Irisombori
BADUNGU apambori nayawee agu apai i ayugoho fu aboro, si naye kina yo du Mbori ni. Sidu tie, si naida ani irisi sangba gu ga Yesu mokedi nangia Yoane, nga guko nakepai ki yaa: “Abadiangba, ka oni ídi nga pa agu yo dunduko naya Ziazia Toro ti yo ya, ono oni ásadi yo, si ngia i naye yo du Mbori ni, bambiko dungu zire anebi ndu rogo zegino.” (1 Yoane 4:1) Wai rengbe ani ka asada pai ka bihe singia si naye yo du Mbori ni?
Agu apai dunduko naye yo du Mbori ni, si nayugokpia asinoko, gbe, gu bangua sinoko nga nyemuse. Nikpiapai, guhe nasa rani ani gifuõ wene ambumbudo, watadu wene fuõ zamba buu, si nayugopa ga Mbori nyemuse koyo du ani ni. Pa rengba ani ka bi uru ho si ati ni, fufurafu, watadu ka bi fogogude u ni mamu, si nayugopa ga Mbori nyemuse koyo du ani ni. Kina gu bangisapai re a du tipa pa rengba ani ka gia wene woro manzigo, fugo aziree, watadu ka gia fugo gaani boro. Zavura gu gene Mbori ambakadi rani rogoho, wa vura du ani nikpakpa aboro, si nayugopa gako nyemuse koyo du ani ni. Si du ani aino gupai ti ni nga rengo du Yesu agumbaha ho ko ayani wee: “Gu ngbarago boro agbiaha ho ní agamahe ni, si susi gu ní agbiaha ho boro afu he ni funi.” (Amokedi 20:35, NW) Ani nagbia ngbarago rogo yugo nyemuse bambiko i amangi rani ‘nikpia Mbori.’ (Bambata Pai 1:27) Wa vura duhe nga Yekova na kura badungu asinoko ti ni, nyemuse nga gu banguaha dagbaha yo.
Gu kekeapai naye yo du Mbori ni, si duwa ka si yugukpia gako nyemuse. Agu aboro du rogo agu apambori du rogo zegino, i na badungu abuku beyo i akehe bakuru kusayo. Ya mo agu abuku re nafura tipa ga Mbori nyemuse?
Nirengo, badungu agu abuku nga ga akanisa i akekehe bakuruyo, si nasakapai gbua tooni tipa wai Mbori akpinyemu rani watadu tipa wai rengbe ani ka kpinyemu Mbori. Si ki ta du were, badungu amirioni aboro agbianga karagapai te ho i asanahe ni kini yaa, “Tipagine ya yó ti ni wee agu ahe Mbori akusihe, si nayugo gupai nga ko nakpinyemu rani akpi, baraho fudifudiapai na gbegberẽ apai andu ni kindi kina kumbatayo?” Ono tipa Ziazia Kekeapai tigaha, kinaha sa nga gu yangara kuru buku nasakapai wenengai tipa ga Mbori nyemuse. Si nayugo wai a rengbe ani ka yugo nyemuse tipa kura aboro.
Gu Buku Nafura Tipa Nyemuse
Fugo Yekova Mbori, nga Ziazia Kekeapai, si nayugopa ko nigu ‘Mbori nga ga nyemuse ko.’ (2 AKorindo 13:11) Ziazia Kekeapai nafura tipa wai nyemuse asa Yekova ko fu gu unga zanga kaza na zanga kpio fu gu bambata aboro ko amangi yó. Ono pa sa yó mungu kuti ga Mbori pagbia naye na arungo sa ngbatunga aboro. (Pa Fu Rugute ni Ue he 32:4, 5; ARomo 5:12) Wa si avura duwo, Yekova amangipai tipa ka karaga guhe berewe kubaha paha agbere re. Fugo Mbori nayaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yoane 3:16) Ziazia Kekeapai nayugo ga Mbori nyemuse berewe ho si afura ni tipa wai Mbori nambakadi zogarago ku vurube Yesu tipa ka karaga zereda berewe fu agu aboro nga agisangbaa.—Daniere 7:13, 14; 2 Petero 3:13.
Ziazia Kekeapai naguruso gupai si aida boro mangihe kini yaa: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ. Gu rugute nga bakumba ha susi si nga gere. Kura ha wa kina ha nga gere, nga, Mo nikpí nyemu kuaro wa mo akpi nyemu tiro. Agi arugute ue re nasongoda arugute dunduko.” (Matayo 22:37-40) Ziazia Kekeapai nayawee si aye be Mbori. Wa duhe nga si nayugokpia asinoko nzunzu, ani rengbe kadu naa kido tie nga si aye be gu ‘Mbori nga ga nyemuse ko.’—2 Timoteo 3:16.
Pa manga ani gi ringbisapai re naundo rani ani rengbe ka ino gu buku naye be Mbori dagba agu i aima kekaha bakuruyo. I naino ndikidi airisimbori a ti nyemuse, bambiko i napekafuo gu kpiapai nga ga Mbori.
Wai ka Ino agu Aboro Nakpinyemu Mbori
Aboro ima ino agu aboro nzunzu nakpinyemu Mbori, gbe, ti gi regbo Ziazia Kekeapai ayambaha nga “kusa rago [watadu yangara arame]” re. Aboro nandu kina kumbatayo kaa ‘kpi kina nyemu tiyo, kidu ni airakpinyemumarã, kini kpí nyemu sangba borose susi nyemu Mbori.’—2 Timoteo 3:1-4.
Wai rengbe oni ka ino agu aboro nakpinyemu Mbori? Ziazia Kekeapai nayaa: “Gi nga du [ani] na nyemu Mbori re, nga ka ani kuti gako rugute.” (1 Yoane 5:3) Kpinyemu Mbori nasa aboro i irisi agu andiko du rogo Ziazia Kekeapai tipa ruru sino mangaapai. Nikpiapai, Fugo Mbori na andiko rogoho tipa kodaba gbiati rogatise. Si nape gupai nga kodaba du sa kina dagba arogotise, na rogatise kidu niguhe nika nyeanye kindi. (Matayo 19:9; AEbere 13:4) Ani bingo gupai namangi tipa kura dee sa Spain yo, nga guri nawirikipai tipa agu aida nga ga apambori. Ho ri ayeni kupati gu dunguratise aDezire Yekova aawisigo agu andiko rogoho sirisiri du rogo Ziazia Kekeapai du tipa ruru sino mangaapai, ri afura tipaha ki yaa: “Mi aga ku kporoyo kidu nyanyakii rogo toroyo, angianga mbiko kina gu tungusapai i amangihe sa ya, ono mbiko gu kodatise du dagba agi aboro re na gayó iriiri mangaapai.”
Kurii gupai nga ndikidi aKristano nakpinyemu Mbori, i naino yó a ngba gu gene i ayugo nyemuse rogoho koyo du kura aboro ni. Gu gayó sunge nyakipaha gbe nga kaa gumbapa gu ndikidi maabangirise du tipa ngbatunga aboro dunduko, nga gu ga Mbori Kindo afuhe. (Matayo 24:14) He ho rengbe ka fu undo fu akuarani nyeanye kindi susi gu nga ka undoyo i gbia gu inohe du tipa Mbori te. (Yoane 17:3) Ndikidi aKristano nayugo gayó nyemuse ayugo a ngba kura agene. I naundo agu aboro narungo. Nikpiapai, ho bazigizo amangi ni Itaria yo, waraga apangbangaa ape gupai nga aDezire Yekova “amangipai niipo tipa ka undo agu aboro nadu rogo fudifudipai re, angianga kina aguyo du yó naayó rogo pambori sa ya, ono kura aboro a.”
Kurii gupai nga ndikidi aKristano nakpinyemu Mbori gbiati akurayo, i gu duadu a na nyemuse dagbayo. Yesu ayaa: “Vovo rugute fu mi fu roni nga, oni kpi nyemu akuaroni akpi; a wa mi akpi nyemu roni, oni kpi nyemu akuaroni a wo. Ka oni akpi nyemu akuaroni, si ka aboro ini ti ni dunduko ya gimi abawiriki nga oni.”—Yoane 13:34, 35.
Ya mo aboro abingo gupai nga gu nyemuse du dagba ndikidi aKristano, si kia tee? Kura dee sa namangasunge rogo kura kporo abihe nga wo duhe. Ri namangasunge rogo gu gbata nga La Paz, du Bolivia yo. Si nga gu ringara gu kparakaro nga ga angbatunga akparaka kumukokumuko aboro rogoho ti rungorungo aboro. Ri ayaa: “Ti gu bambata regbo mi andu kupati gu irisombori nga ga aDezire Yekova, mi abi bawene sino kumba navodi tiko na wene arokoo ko nasungu pati nagbia niboro India na i kini fura dagbayo. Mi aabingo pai wo mbata te. Ti kina gu regbo re, mi abi gupai nga, ga Mbori aboro du du re nirengo.” Kinawo si adu a tipa kura dee nga boro Brazil du rimori nga Miriam. Ri ayaa: “Mi aainongo wai kadu na ngbarago mbata te, zavura dagba gimi aborokporo vurũ. Gu bambata regbo mi abi nyemuse aboro niyuguhe rogo mangaapai yo, si angia kina dagba aDezire Yekova.” Amerika yo, bangere kuriipa gbandaka apangbangaa rogo terevizioni akepai fu aDezire Yekova ki yaa: “Ka si nidu nga badungu aboro naraka kina ngba gu gene aboro gaoni kanisa araka ngbaha, ka gi ringara re dunga nigbegberẽhe wagu duhe awere re te. Mi nga gu boro namangasunge na apangbangaa, mi ima ino gupai nga gaoni riigbu naru rii nyemuse gbiati nyanyaki ida kuti Bakusiahe.”
Oni Gbata Ndikidi Irisombori
Nyemuse nga guhe i aino ndikidi irisombori ti ni. Yesu aringbisipa gbia boro ndikidi irisombori kuti gbia ndikidi gene na kini ndu ngbaha. Kinaha sa nga gu bangisa gene nandu koyo du nyenye unga ni. Yesu ayaa: “Oni rími rogo pangipangi ngbadimo; bambiko gu ngbadimo na gu gene nangbe koyo du kpio ni, si du ni kikii he, ni basisi he, dungu aboro narima koyo. Bambiko gu ngbadimo na gu gene nangbe koyo du unga ni, si du ni pangipangi he, ni fitikiri he, aboro nabi he ni kina umba yo.” (Matayo 7:13, 14) Bangisa riigbu gbua sa nga ga ndikidi aKristano nandu ngba gu gene nga ga ndikidi irisombori nikpamiakpamiayo na Mbori. Sidu tie, anga apambori dunduko nikina wenehe te. Ka oni gbia gu gene re na kini ndu ngbaha, gure nga oni ima gbia gu bawene gene nga ga raka, bambiko si nga gu gene nga ga nyemuse.—AEfeso 4:1-4.
Oni bingo gu ngbarago ka oni du nani ka oni ata ngba gu gene nga ga ndikidi irisombori! Si wa ka i ya boro nata na Mbori. Mbori rengbe oni ka wirika tatamana gbiati nyemuse beko tipa ka zio wene bakure na aboro. Oni rengbe ka wirikapai beko tipa ndu gupai ani araka ti ni. Na oni ki rengbe a ka rugatironi naapa ga Mbori akidohe na kidu na maabangirise tipa raka kumbatayo. Ka oni gbata ndikidi irisombori, oni abiranga tironi wagu tooni te.
[Gu kpiahe du ti kpewaraga 3]
Dagba gu kuru abuku nga ga apambori, kina Ziazia Kekeapai sa nayugopa ga Mbori nyemuse
[Gu kpiahe du ti kpewaraga 5]
I naino ndikidi aKristano ti gu nyemuse i ayugoho