Wai Rengbe Ani Ka Sovura Kuti Adaimona?
‘Agu amaraika naakanga kuti gayo bambata rago ya, ono nahe gu rago i aringbisihe fuyo, ko akakuti yo rogo nyenye azogbo tii bitimo yo dati gu sapangbangaa nga ga gu uru re.’—YUDA 6.
1, 2. Gini asanahe nakura nibipa Satana Bakitingbanga na adaimona?
GU MOKEDI nangia Petero afu arugute ki yaa: “Oni du na rugatise ki ningere, bambiko wa bahu nata ki nipoi, nigbata boro ka rita ni, kina wo vuraroni nga bakitingbanga nata.” (1 Petero 5:8) Nibipa adaimona, gu mokedi nangia Pauro ayaa: “Mi akpi nga nyemu ngbanya du dagba roni na adaimona te. Ka oni mbiri nga he ti ngba gu inga nga ga Gbia, na gu inga nga ga adaimona te, ka oni dí nga he ti gu mbisa nga ga Gbia, na gu mbisa nga ga adaimona ya.”—1 AKorindo 10:20, 21.
2 Ono tie, ada nga Satana Bakitingbanga na adaimona? Wai i aenge, na gini regbo i aenge ti ni? Kina Mbori nakusi yó? Wai nyaki gayó ome kurii ngbatunga aboro? Wai rengbe ani ka bandatirani beyó kangia gene ho ke?
Wai Satana na Gako Adaimona Aenge?
3. Wai ga Mbori maraika asa tiko ni Satana Bakitingbanga?
3 Bakuru kusayo, ho ngbatunga aboro aenge ni ati Edene yo, kura ga Mbori maraika sa asamungu kutiko. Tipagine? Bambiko ko aarengbanga be gu sunge Yekova afuhe fuko ngbangbaturũ yo te. Fuo bi Satana gupai nga Mbori kusi Adamu na Eva, ko agbia mamu tipa ka sa yó i he giasangba Mbori na ki mbu iriso Mbori ono ki tona kaa gia kina sangbako na kini irisi kinako. Ho gi maraika nasamungu kuti Mbori re asa bambata aboro ni i mere ngba gene ingapai, ko asatiko ni Satana Bakitingbanga. Kusa, kura amaraika angbe naako rogo samungu. Wai i amangihe?—Bambata Pai 3:1-6; ARomo 5:12; Yugoti 12:9.
4. Ginipai bete amaraika amangihe mbata fu Ime Akangbii ti rago Noa?
4 Ziazia Kekeapai naya furani wee, ti kura regbo mbata fu Ime Akangbii ti rago Noa, bete amaraika atona kaa kpinyemu agu awiri aboro nangia adee. Tipa gi irairapai i amangihe re, Ziazia Kekeapai nayaa: “Awiri Mbori [nga ga ngbangbaturũ yó] abi agu awiri aboro nangia ade ya i angbaki angbaka bangirise; i ki rogo ade dagba yo dunduko wa i akpi nyemu he.” Ngbatunga gi kodatise na aboro amaraika amangihe re angia gupai nadukia ti gu sino i akusi amaraika nani, sidu, si kini mo ka kusa agu agude nadu nikpurakpura yó na amaraika, na i kingia diangbadiangba aboro. (Bambata Pai 6:2-4) Agi atoro Mbori amangi yó nabasa sangbako ngba gi gene re angbe na Satana rogo gako samungu kuti Mbori.
5. Ginipai namangi agu abasamungu nangia amaraika re ho Yekova ayeni na Ime Akangbii ka gberesarago nani?
5 Ho Yekova ayeni na Ime Akangbii kurii ngbatunga aboro, gi diangbadiangba aboro re kodihe na anayó akpiki. Gi ngirimo re amangi agu amaraika nasamungu re ngbaome i mbu gu kpotoyo nangia ga borose ki ga kurogo ngbii atoro yo. Ono tie, i akaraganga tiyó kurogo “gayo bambata rago [watadu ba]” nadu na Mbori te. Kuba gure, i andu naayó kurogo gu “bitimo [nga ga toro],” i ayambaha nga azogbo bitimo.—Yuda 6; 2 Petero 2:4.
6. Wai adaimona ananga aboro?
6 Natona ti gu regbo re, gu gbegberẽ amaraika re ambu “gayó bambata rago [watadu ba],” na ki sa tiyó ni adaimona na ni abadiangba Satana na kini mangi gu gbegberẽ apai ko aidaha. Natona ti gu regbo re kaa ndu kumbatayo, adaimona arengbanga berewe ka dia kpoto aboro kuti yó te. Wa vura duhe wo, i rengbe arengba ka zomia adee gbiati akumba i niimangi wasiwasi kodaba ngba dungu arikoho. Adaimona nananga ngbatunga aboro ananga a ngba gu gene nga ga sangbaatoro, nga gu rengbe ka koda ngbatunga agu duwa manga ngua, na ngua akpiiri. (Pa Fu Rugute ni Ue he 18:10-13; 2 Pekapai 33:6) Gupai nika manga gi gbegberẽ amaraika re, si nga kina gu nika manga Bakitingbanga, nga nyenye kpio. (Matayo 25:41; Yugoti 20:10) Ono tie, vuru gi regbo re, si naida ani ru ngutete ka sovura kuti yó. Si nipatatamana furani ani makia gu ome du Satana nani, na wai rengbe ani ka sovura kutiko na gako adaimona ani kidu na diabese.
Wai Nyaki gu Ome Dube Satana?
7. Gini ome du Satana nani kurii zegino?
7 Satana aima digo nigumba aziree tipa Yekova natona bakuruyo daaku awere. (Asanza 27:11) Na ko ima maapai kurii badungu ngbatunga aboro. Sa Yoane 5:19 nayaa: “Zegino dunduko du ni zogozogo ho be gbegberẽ ko.” Si du nga ndu gupai Satana aʹasadi Yesu ti ni nigumbako pa fu “angbi zegino dunduko” fuko. (Ruka 4:5-7) Nibi gupai du tipa Satana, gu mokedi nangia Pauro ayaa: “Si ngia gaani wene pangbangaa . . . ni okooko ho, si ni okooko ho fu agu yo nakpi akpi: nga agu yo mbori gi zegino re akisi gayo aberã nga agu yo zanga idapase, ya ka gu imarago ahasa nga rago ku ri yo nga ga gu wene pangbangaa nga ga gu taarimo nga ga Kristo, nga kpia Mbori, ya.” (2 AKorindo 4:3, 4) Satana nga “irazire . . . nga baha,” ono ko nambakada tiko wa “maraika imarago.” (Yoane 8:44; 2 AKorindo 11:14) Ko na ome tiko na gene manga apai ka kiso berã abazogo gbiati gayó azogo. Ko ima nanga ngbatunga aboro rogo takapande apai gbiati agu aziree nga ga apambori.
8. Gine Ziazia Kekeapai ayugoho nibipa ga Satana maapai kurii aboro?
8 Ga Satana ome na gako maapai kurii kura aboro ayugutihe ziazia ti rago gu nebi nangia Daniere, bisue kama agarã bakuru kusayo Mbata fu Batikayo Kristo. Ho Yekova akedi maraika ni na pangbangaa fu Daniere ka ngarasako, gu maraika re agbia tiko na vura be “gu bazogo ngbi nga ga Parasa,” nangia gbigbita toro. Gu maraika re aso gu vura re tipa arame 21 da kinaho “Mikaere, [nga] gu ko [du] dagba gbia abazogo” ayeni ka undoko. Gu bangisa pangbangaa re afura a tipa ‘gu gbigbita toro nangia bazogo aGiriki.’ (Daniere 10:12, 13, 20) Rogo Yugoti 13:1, 2, i naringbisapa Satana yo nga “daragona” nafu “gako tandu fu ru [nga gu nyarinde narukuba zogarago], na gako mbatabakindo, ko ki asia pa bakere bazogo fu ru a.”
9. Ada aKristano asovura kutiyó?
9 Si airiwonga te wa gu mokedi nangia Pauro akepai ki yaa: ‘Gaani kenahe sa borose na kure te, ono si kina sa angbii, sa atandu, sa azogo zegino nga ga gi bitimo re sa rimbasa agu atoro nga ga gbegberẽpai yo rogo agu arago du ngbangbaturũ yo.’ (AEfeso 6:12) Zavura areme, adaimona kina ti ni tiibe Satana Bakitingbanga wa ani avuranga bi yo ya, kini moipai kurii abazogo na kurii aboro, kini sa agi aboro re i naamanga agu apai nga ga ba tunga aboro kusayo kpäkäyä, kini imi aboro na kini so agu avura nga ga abamoi nga gu kereapai adunga ba gumbaha ti ni ya. Ani kparianga wai awere rengbe ani ka sovura na diabese kuti agi atoro duna nyanyaki ome re.
Wai Rengbe Ani ka Bandatirani be Adaimona
10, 11. Wai rengbe ani ka sovura kuti Satana na gako gbegberẽ amaraika?
10 Ani arengbanga ka sovura kuti Satana na gako gbegberẽ amaraika ngba gaani ome nisarani te, singia ngba gaani ome nga ga borose watadu gu nga ga berã te. Fugo Pauro naruga rani niyaa: “Oni nyáki anyaka rogo Gbia, na rogo gu ome nga ga gako tandu.” Si naida ani ngere kurogo Fugo Mbori tipa ka ino wai rengbe ani ka bandatirani. Pauro agbia kurapai kuti ni nga: “Oni úkadi ga Mbori ũvura dunduko oni ki rengbe ka ru aru sa ga bakitingbanga birĩ . . . Oni dí ga Mbori ũvura . . . dunduko, ka nyaka anyaka rogo gbegberẽ uru, si nyasi dunduko, oni ki ru aru.”—AEfeso 6:10, 11, 13.
11 Pauro azungodi akurako aKristano bara ue i ‘ukadi ga Mbori aũvura dunduko.’ Gu fugo nga “dunduko,” si nayugo gupai nga ani duwa ka ani sovura na omerani dunduko kuti agu azubohe nga ga adaimona. Sidu, gini nyanyaki papara aũvura nga ga toro i akpi nyemuhe be aKristano areme tipa i rengbe ka sovura kuti adaimona?
Wai Rengbe Ani ka Ru Ngutete?
12. Wai rengbe aKristano ka vo rengo dimoyó?
12 Pauro asakirogopaiyo ki yaa: ‘[Oni rú ngutete], ki vo rengo dimoroni, ki ukadi marã ngbaduse nga rurupai.’ (AEfeso 6:14) Agu aũvura ue fura yó tipaha herẽ, si nga gaasi na marã ngbaduse. Si aniidi banzengere tapa bebere ní na gani gaasi nyanyakii, (nga dimoni, bebere ní, na tii-vuni kusende) na tipa ka asa gani basape ti ni. Ka pepai nimasaku, si naida ani vo gu rengo nga ga Ziazia Kekeapai dimorani tipa ani naaraka na ngbanyaa kuti ni. Ya mo oni na ringbisiringbisi regbo geda Ziazia Kekeapai na aʹuru dunduko beroni? Gaoni aborokporo dunduko rogoho? Ya mo ani naawisigo agu averesi nga ga aʹuru nibasasa wadu ani ni aborokporo? Ya mo ani nandu sa na agu asakarogo apai yo ‘ruru kangara moyambu’ naafuhe rogo agu abuku i naakusaha? (Matayo 24:45) Kangia ani namangaha wo, gure nga ani namanga nyanyaki asadatise ka irisa sangba Pauro. Ani a na akasete nga ga vidio berani gbiati agu asaani nga DVD nga gu du na agu arugute rogoho nga ga Ziazia Kekeapai. Pa banda ani rengo nyanyakii rengbe ka undo rani ani mangi agu adiaberã nga ga tatamana na si ki banda rani ti manga irairaapai.
13 Wai rengbe ani ka banda ngbaduraniyo?
13 Ndikidi marã ngbaduse anaabanda nganzira banzengere, na ngbaduní gbiati kura nyanyaki abarapaní. Ka pepai nimasaku, Kristano rengbe ka banda ngbaduniyó rogo sonosa nyemuse tipa ga Mbori ruru mangapai na ki kakuti gako ruru andiko. Marã ngbaduse nabanda rani ka ani banga Fugo Mbori sande ya. Wa ani aye ka soga “gbigbitapai, ki nikpi nyemu wenepai,” gure nga ani nadia ndurani kusayo ngba ‘gene agbigbitapai dunduko.’—Amosa 5:15; Atambuahe 119:101.
14. Gine gu fugo nga oni vodi “nduroni ni gu ũnyaka nga ga wene pangbanga zereda ” ayugoho?
14 Agu abanzengere nangia ga aRomo yó, i anaavoda tiyó wenengai na arakata tipa gbanga anunguro tipa akama amairo, ngba agu amasua nadu rogo gu bariwara ngbii nangia ga aRomo re. Gu fugo nga oni vodi “nduroni ni gu ũnyaka nga ga wene pangbanga zereda,” rogoyo nga gine tipa aKristano? (AEfeso 6:15) Rogoyo nga, i nimbakadimbakadiyo tipa mangapai. Ani nimbakadimbakadi rani tipa tungusa gu wene pangbangaa du tipa ga Mbori Kindo ti agu aregbo dunduko mamu kaani kuru ni. (ARomo 10:13-15) Padu ani ngangaraa rogo gu sunge tungusapai nga ga aKristano nabanda rani be ga Satana “birĩ.”—AEfeso 6:11.
15. (a) Gine nayugo gupai nga, gu kikii vurakube nga idapase, si na nyanyakipaha? (b) Gini gbegberẽpai rengbe “siida we” ka mangaha na gaani idapase?
15 Pauro aafura kindi kini yaa: “Oni rógo vurakube nga idapase ku ri he a oni ki rengbe ka bisa gu siida we nga ga gbegberẽ ko na ni.” (AEfeso 6:16) Gu rugute Pauro afuhe tipa ani di gu vurakube nga idapase, ko agbia gupai ku ti ni nga “ku ri he a,” si kini yugu gupai nga, pa gi papara ũvura re ima nyaka nirengo. Si aidanga ani he kurapai koyo nga gu si aida aida si du berani rogo gaani idapase te. Wakina bakere vurakube, gaani idapase nabanda rani be ga Satana “siida we.” Gine nga gu siida we re areme? Agu asiida we re rengbe kadu nga agu afugo nazo boro wa ka i zo ní niwe, aziree, agu afugo angianga kina ku rengo ya abasamungu kuti ndikidi pambori agumbaha rogo asadatise ka zeresa gaani idapase nani. Agi awe siida re rengbe kadu a nga orafuo aũzegino, kini sa rani ani naangbeka dungu ahe na kini sa rani a ani naamanga abaangira na agu aboro naima konga kurogo gu sino raka nga ga rekangose na ahe. Si rengbe kadu nga i aima ngbeka kikindigi akporo nga gu ngbaki gbe na ki ngbeke wene atarambiri watadu i naenda na kikindigi geno afongo na gu vovo arokoo ngbaati aboro. Zanga bipa gupai kura aboro amangaha, si naida ani duna nyanyaki idapase nga gu nika nyaga agu “asiida we” re kusayo. Wai rengbe ani ka sonosa gaani idapase na ki bandaha?—1 Petero 3:3-5; 1 Yoane 2:15-17.
16. Gine rengbe ka sa gaani idapase si du nyanyakii?
16 Ani rengbe ka mbeda na Mbori rogo gaani wisigo Ziazia Kekeapai ani amangaha nisarani na rogo kakaka kparakpee. Ani rengbe ka sana Yekova tipa ko nyakasi rani rogo gaani idapase, na ani kini mangiapai na ngbanyaa kuti gaani kparakpee. Nikpiapai, ya mo ani nambakada Ngbaõbambu Sinziri nga gu i naawisigoho rogo aposo dũ tipa ka karagapai ti regbo wisigoho? Gaani idapase rengbe ka nyaka ka ani awisigo Ziazia Kekeapai na agu abuku du mburuhe rii Ziazia Kekeapai.—AEbere 10:38, 39; 11:6.
17. Wai rengbe ani ka ‘rogoda akpakpari bata’?
17 Pauro adigisi gako fugo wa ko aaringbisapa agu aũvura nga ga toro na gu rugute nga: ‘Oni rogodi akpakpari bata, na gu basape nga ga toro, nga sangba Mbori.’ (AEfeso 6:17) Kpakpari bata anaabanda rii banzengere gbiati dudu ní, nga gu ba boro aberã rogoho kini mangi adiaberã. Wakina gure a, gaani maabangirise nga aKristano nabanda gaani ome berãpai. (1 ATesaroniko 5:8) Kuba gupai nga ani hiisi berã rani na agu asásá nga ga zegino gbiati agu apai du tipa aũzegino, si naida ani gbeberã rani kuti gu maabangirise fu Mbori he furani, a wa Yesu amangihe.—AEbere 12:2.
18. Tipagine si aidanga ti ni ani mbupa gu gaani mbakadapai du tipa geda Ziazia Kekeapai dedede ya?
18 Gu yangarapai rengbe ka banda rani be ga Satana ome na be ga adaimona, si nga fugo Mbori du rogo Ziazia Kekeapai. Gere nga gu kura ndupai si aidanga ti ni ani basapa gu gaani mbakadapai du tipa geda Ziazia Kekeapai dedede ya. Gu ndikidi inohe nga fugo Mbori, si nabanda rani be ga Satana aziree na be gu takapande apai nga ga adaimona na be gu gbegberẽ afugo nga ga abasamungu kuti ndikidi pambori.
‘Oni Naakpara Akpara Kindi’
19, 20. (a) Ginipai napido Satana na gako adaimona? (b) Gine rengbe ka nyakasa rani rogo toroyo?
19 Pa dia yó Satana kusayo, na gako adaimona na gi gbegberẽ zegino re ima mbeda kada. Satana ima inoho nga “kina bete rago” gbua nye fuko. Ko na bakere zinga na kini sovura na agu aboro “naka kuti ga Mbori rugute, na agu yo naka kuti gu dezire pai nga ga Yesu.” (Yugoti 12:12, 17) Si ninyanyakipa pai ani sovura kuti Satana na gako adaimona.
20 Nangbaa gu tambuahe ka ani du nani tipa gu rugute du tipa dia ani ga Mbori aũvura dunduko kube rani! Pauro adigisi gako arugute tipa agu aũvura nga ga toro ki yaa: “Oni . . . [naakpara] akpara kindi ni akpe na sarawati dũ rogo Toro yo, ningere angera sa gere ni kenahe na sarawati tipa ga Mbori aboro dunduko.” (AEfeso 6:18) Kparakpee rengbe ka nyakasa rani rogo toroyo na si ki undo rani ani nye kaa ngera angera kindi. Ani dinga fugo Pauro ka mangaha na ki kpatagara kuti kparakpee, mbiko si nika undo rani ani sovura kuti Satana na kuti gako adaimona.
Ginipai Wiriki Oni He?
• Wai Satana na gako adaimona aenge?
• Wai kii ga Bakitingbanga ome?
• Gini ahe ani abanda tirani nani be Satana na gako adaimona?
• Wai rengbe ani ka voda agu aũvura Mbori afuhe furani?
[Gu kpiahe du ti kpewaraga 17]
“Awiri Mbori abi agu awiri aboro nangia ade ya i angbaki angbaka bangirise”
[Gu kpiahe du ti kpewaraga 19]
Oni rengbe ka yamba rimo gu gaani apapara aũvura nga ga toro du sita?
[Gu kpiahe du ti kpewaraga 21]
Wai pa rimiso ani tirani kurogo gi mangaapai re abanda rani be Satana na gako adaimona?