Oni Ima Rengba ka Raka gu Raka Duna Rogoyo ti Ni Awere na Nyeanye Kindi

ONI ima rengba ka raka gu raka duna rogoyo ti ni tona kina awere. Ono ginipai si aida oni mangihe ka raka gu ngbatunga raka re? Gupai si aida oni mangihe nga kaa raka ringbisihe kuti gu bangua arugute du rogo Fugo Mbori nga Ziazia Kekeapai. Ani wisigingo bete gu bangua arugute re.

BANGUA RUGUTE NGA GA ZIAZIA KEKEAPAI: Bakindo Soromo ake gupai nga: “A nga he ho ngba fu boro susi gu pai nga ni ta ri he ni mbiri he, te, rago ki ningba angba ti ni mbiko gani sunge.”​—BATUNGUSIPAI 2:24.

I amangi rani ani gbia ngbarago be gu sunge ani amangaha. Zavura rogo kere akpakarapai, ani ima rengba ka gbia ngbarago rogo raka awere ka ani amangasunge kakaka na niruruhe.

BANGUA RUGUTE NGA GA ZIAZIA KEKEAPAI: ‘Fu he ngba ti dia ha.’​—AMOKEDI 20:35.

Nikpiapai, badungu aboro abi gupai nga mangapai fu aboro naye na bakere mosoro na kini sa ga boro raka si du nzunzu na rogoyo ti ni, wa ngbatunga gu nga fuyo gayo regbo na omeyo tipa ka undo akurayo ti regbo fudifudipai. Soromo akepai ki yaa: “Ka mo niká nga na manga wenepai fu agu yo du he fu yo ya, ho rengbe mo arengba ni namanga ha.”​—Asanza 3:27.

Ani makianga gu kpiapai nga ga Ralph. Tifuo ko mbu gu sunge ko anaamangaha, ko akodi tiko kuti diako tipa ka mangasunge tungusapai ti aregbo dũ. I anaadia bakere regbo rogo adiwi dunduko kuti sunge tungusapai, ki fu tiyo tipa ka yugo Ziazia Kekeapai fu kura aboro. Sangba Ralph nga: “Ho ani ayegoni nyemu gene tungusapai yo, anga kina gbinza sa nga gu he ninaasa rani ani mbu te, ono ani naambu be fu ani omerani tipa ka mangasunge fu gu Barani du ngbangbaturũ yo. Si niwenepai boro mbu be manga gu sunge ngba angba!” Ko gbiati diako na ngbarago mbiko i moi gayo raka tipa kaa fu he fu aboro.

BANGUA RUGUTE NGA GA ZIAZIA KEKEAPAI: “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.”​—ASANZA 17:17.

Si taata boro hi akpakarapai ho adunga ní ni nisani ya. Kura bawirikipai sa niboro Ngirisi nga Francis Bacon akepai tipa agu aboro adunga na bakure beyo ya ki yaa, “zegino fuyo wakina ngbakungba.” Du boro na ndikidi abakure beni na ní kingia wene bakure fuyo rengbe ka sa apai funi taata na ki sa apai nibawenehe na ki mbiisi ní.

BANGUA RUGUTE NGA GA ZIAZIA KEKEAPAI: “Aboro ngbarago nga agu aboro inipa gu gayó azingo nga ga toro.NW” ​—MATAYO 5:3.

Yesu ayugu gu nyanyakipa pai si aidaha ka si du nga oni naida ka bi ga Mbori akidohe si niringbisitihe. Si nga pa ruga oni tironi na agu “azingo nga ga toro” na kini mbiisihe. Ani kia ti anya bambiko ani na nyemu ka rugatirani naapa raka na gu ringbisapai du tipaha. Kina Yekova Mbori sa rengbe ka mbiisa gu nyemupai re, na ko namangaha wo vurube Fugoko nga Ziazia Kekeapai. A wa duhe rogo gu kekeapai ye mbata fu gere, Ziazia Kekeapai nayugo ga Mbori ringbisapai tipa kpotosende. Si nagumba ndu gupai furani du ani ti ni ane, na tipagine du bakere arungo ti ni, na gupai Mbori akpinyemuhe berani. Pa ruga ani tirani na ngbatunga agu arengo nga ga Ziazia Kekeapai re na nyanyakipaha tipa ani raki gu raka du niwenehe na ki mbiisi gaani nyemuapai. Agu aboro nadia regbo kaa wirika Ziazia Kekeapai na kini mangi agu apai i awirikaha, i nagbia ngbarago agbia. Tipagine? Si wo bambiko i nasonosa nyenye pagume dagbayo na Yekova nga gaani “betedi Mbori.”​—1 Timoteo 1:11.

BANGUA RUGUTE NGA GA ZIAZIA KEKEAPAI: “Mo nitíngidi pa Bamangiro . . ., mbata gbegberẽ arago nikada, na agu agarã nambeda ho mo ka ya ni, ‘Ngbarago ti re rogo ho te.’”​—BATUNGUSIPAI 12:1.

Ga Bakindo Soromo rugute fu gu paranga aboro arengbanga ti kura aregbo ka inopa gu gberango rengbe raka ka ye nani ya, si kindi areme na nyanyakipaha furani dunduko. Oni peresipa Bakusironi mbatayo rogo gaoni raka. Si nika sa gaoni raka si du na ndikidi rogoyo ti ni. Oni mbu gu berãpai nga: “Ani rí he ki nimbiri he, bambiko gba ani akpí akpi.” (1 AKorindo 15:32) Batungusipai 8:12 nayawee, ka oni moi Mbori kumbatayo furoni, si nika sa gupai nga ‘apai ngbá’ furoni.

Degude sa du rimori nga Wendi aima ida kuti gipai re. Ho ri aduni niparanga, ri na tameri awiriki pa aboro Spain tipa wa ka i ndu ku Dominican Republic yo, nga gu ba nadu na bakere zingo abatungusi wene pangbanga nga ga Ziazia Kekeapai rogoho. Sangbari nga: “Ani ambupa dungu gaani apai tipa ka ndu ka mangasunge rogo gu ba bakere zingo adu rogoho, ono si aima du nibawene regbo gbe. Mi abiranga tire tipa agu adiwi sita ani amangihe re te! Agu amaku ani agbiaha aima susa agu apai ani ambupaha.”

Padu Boro Niruruni fu Mbori Nasa Gani Raka si du Niwenehe

Sonosa wene pabakure na Yekova rengbe ka sa gaani raka si du niwenehe ngba kura gene. Wai duhe wo? Anga gupai gbua Satana amangihe nga ka sa aAdamu na Eva i samungu kuti ga Mbori zogarago te, ono ko aida ka yugo gupai nga ka boro nyenga niruruni fu Mbori rogo aʹasada te. (Eyobo 1:9-11; 2:4) Oni ima rengba ka sa Satana ni iraziree! Rogo gini gene? Ninye oni niruru roni fu Mbori, nika oni kuti gako arugute, na niyugo oni gupai nga kina Yekova sa duna rengo beko ka sia gupai du niwenehe na gu du nigbegberẽhe tipa roni.​—Yugoti 4:11.

Si naida ani hi akpakarapai ahi ka ani aida ka manga rurupai. Ya mo agu akpakarapai re rengbe ka sa gupai nga ka ani rakinga wene raka ya? Oni berẽnga gupai nga, boro gumba ziree tipa bakurearoni watadu gaoni borokporo. Kangia pa ngbe oni na gu bakurearoni re rengbe ka sa gaoni raka si dungbapai be gu boro re, ya mo gure nga oni rengbenga ka raka wene raka berewe te? Oó! Ani du adu na ngbarago tipa ka hipai wa ka ani di gu gbarasarimo re kusayo tiní. Kina gu bangisapai re a du tipa nye ani niruru rani fu Mbori. Ho ani anye ni niruru rani fu Mbori rogo aʹasada, si nafu ngbarago afu fuko.​—Asanza 27:11.

Wene Raka Nyeanye Kindi

Oni moingo ho amaa ni gaoni diaberã tipa kaa wirikapai tipa Mbori na gako ringbisapai. Yesu Kristo tigako aya: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” (Yoane 17:3) Ho Mbori nika digiso gako ringbisapai ni tipa kpotosende, ruru aboro nika gbia ngbarago be gako bambata ringbisapai tipa yó nga ga “nyenye unga” rogo paradizo auru kpotosende ane. Raka adu niwenehe na aboro kidu na ngbarago.​—Atambuahe 145:16.

Wari rengbe oni ka gbia gu inohe ni Yesu agumbapaha? Oni rengbe ka gbiaha rogo Fugo Mbori nga Ziazia Kekeapai. Ka oni aida boro undo roni tipa oni mangi gipai re, oni ke waraga fu agu aboro nakusa gi magazini re. I nikadu adu na ngbarago ka manga mbakadapai na boro tipa ní undo roni oni wiriki gupai nzunzu Ziazia Kekeapai ayugoho.