Fugo Yekova Akpanga Wa Sa Te

“A nga wenepai nakpa sa dagba agu apai dunduko Yekova gaoni Mbori akido pa ha fu roni te; si amangi dunduko fu roni.”—YOSUA 23:14.

1. Da nangia Yosua, na ginipai ko amangihe ho ko aambeda ni na kpio?

YOSUA adu nigu baira abanzengere nadu na ome na kidu niboro wingbaduse, nigu kumba nadu na idapase na kini kakuti ruru mangapai. Ko anaata na Moize na Yekova ki siako tipa ko ngbembatayo fu gu rikaaboro nangia aYisaraere rogo baiiriwo ngbakungba tipa ka ndu kurogo gu ringara nadu na mamuanyaa gbiati nzeme anyege kpaima. Ho gi iriiri bakumba re aambeda ni na kpio, ko agumba yangara sangbako fu gu sosono abaakumba nangia ga aYisaraere yó. Zanga kapa, gupai ko agumbaha re aima nyakasa gu idapase nga ga agu aboro nadegetuyo fuko. Kina gu bangisapai re rengbehe ka mangaha na oni areme a.

2, 3. Ho Yosua arugu agu abaakumba ni nga ga aYisaraere yo, ginipai nadu tipa aYisaraere, na Yosua aya wai?

² Oni kparianga gupai re wa Ziazia Kekeapai asakapai riipaha. Si nayaa: ‘Si ki tadu wa gere fuo dungu arame, ho Yekova afu zereda ni fu aYisaraere be avurayo dunduko kirikiri, Yosua adu nigbinza ko, dungu agarã asaki ko gbe, Yosua ki yambu aYisaraere dunduko, na gayo abaakumba na gayo abazogo na gayo abasapungbanga, na gayo abarumbatayo fu aboro ki ya fu yo, “Mi gbinza awere, dungu agarã saki re gbe.”’—Yosua 23:1, 2.

³ Garã Yosua aambeda kada nga 110. Ko araki ti gu regbo badungu iiriwoapai amangi rogo gu pangbangaa nga ga ga Mbori aboro. Ko angia dezire gu iiriwoapai Mbori amangihe, na ko ki ima bi gu dungu akidohe Yekova akidoho si niringbisitihe. Sidu tie, mbiko agu apai ko abihe nibangiriko, si nasako ko pe gupai nga: ‘Oni dunduko inihe kpotoroniyo na mbisimoroni, ya anga wenepai nakpa sa dagba agu apai dunduko Yekova gaoni Mbori akidopaha furoni te; si amangi dunduko furoni, anga pai sa nakpa te.’—Yosua 23:14.

4. Gini akidohe Yekova akido aYisaraere nani?

⁴ Gini afugo Yekova nada ti rengo ti rago Yosua? Ani nika wisigo agu akidohe biata Yekova akido aYisaraere nani. Bambataha nga, Yekova akido yó nga ko nika batasa yó be sunge kanga. Uehe nga, ko nika banda yó. Biataha nga, ko nika songoda yó asongoda. Yekova kido gu gako aboro du ti gi gaani regbo re na akidohe wakina ngbatunga agure, na ani ima bi agu akidohe re si nidigisitihe rogo gaani raka. Ono tie, mbata fu ani wisigi gupai Yekova amangaha ti gi gaani regbo re, si naida ani wisigingo gako mangapai ti rago Yosua.

Yekova Abatasi Gako Aboro

5, 6. Wai Yekova abatasi aYisaraere Ezipeta yo, na ginipai gupai re ayuguhe?

⁵ Ho aYisaraere akpari ni fu Yekova tipa gu sunge kanga i aamangaha Ezipeta yo, ko aima gia gayó kpee. (Gate 2:23-25) Yekova afura fu Moize rogo gu yegbende ngua yo naagbi ki yaa: “Mi zorõ ka batasa [gimi aboro] be aEzipeto ka kusa yo rogo gu ringara re ku rogo wene kikii ringara, ku rogo gu ringara du adu na mamuanya na nzeme anyege kpaima.” (Gate 3:8) Nairiwo gu ngbarago nangiaha ka bi Yekova ko ni digisi gi gako kidohe re! Ho Faro aidanga ni ka mbu aYisaraere i kuru Ezipeta yo ya, Moize atingidiko na gupai nga Mbori nika sa gu di nga Nire nikure. Fugo Mbori aazanganga manga te. Gu ime nga Nire re aima satihe dũ nikure nirengo. Atĩo akpiki, na ka gene adunga tipa mbira gu ime re ya. (Gate 7:14-21) Faro adu kindi na kina nyakarii, na Yekova ki ye na agberangbii berewe kuriko ribua na ki ima ringbisapaha mbata fu si mangi. (Gate, kapita 8-12) Ho gu bawe gberãngbii aimi bambata awiri aEzipeto ni, Faro afu ndiko fu aYisaraere i kuru kusayo rogo ringara na i ki kuru nirengo.—Gate 12:29-32.

⁶ Gupai re azakigene fu Yekova tipa gupai nga ko sa aYisaraere nigako siasia rikaaboro. Na si akiisipa Yekova nigu boro natapepai kini mangihe, nga gu boro fugoni atinga ku ime yo gbua ya. Si ayugu padu Yekova nibahe ti agu ambori nga ga arikaaboro yó dunduko. Pa geda ani gu pangbangaa du tipa gu batasa yó re nanyakasa gaani idapase. Oni makianga gupai re berã roni yó kina wai si adu! Zanga kapa, Yosua aima bi gupai nga Yekova nga “Bahe ki susi auru kpotosende dunduko.”—Atambuahe 83:18.

Yekova Abanda Gako Aboro

7. Wai Yekova abatasi aYisaraere be ga Faro riivura?

⁷ Na ginipai tigaha du tipa gu ue kidohe nga Yekova nika banda gako aboro abanda? Gu kidohe re adu nga Yekova nika kusa yó ringara Ezipeta yo na ki ndu naayó i rimi kurogo Ringara Mokido. Gu pangbangaa re natingida rani na gupai nga, gu zingizingi kumba nangia Faro re apefuo aYisaraere na gako dungu abanzengere gbiati akama angbagidavura. Nairiwo wai gu irarukö re adu naa kido kuti tiko, ho ko abi gupai ni nga ko ima kengeda aYisaraere ku dagba abaagangara na baime! Awere tie, Mbori arimisi tiko kurugo gupai re tipa ka banda gako boro nimaa ko bakamikami dubo dagba gu bataya nangia ga aYisaraere na gu nangia ga aEzipeto. Bara koyo aEzipeto aduni, kina bitimo kidu yo; ono bara koyo aYisaraere aduni imarago kidu yo. Baraho bakamikami dubo aza aEzipeto ni ti dofuo aYisaraere, Moize atumba gako ngbondo ki nari Zamba Baime si ki kparaka ki zaki gene fu aYisaraere i si ku mbitiyo, ono si ki rẽ gbina fu aEzipeto i ti kurogoho. Yekova aimi ga Faro nyanyaki rikavura re na gayó angbagida avura na ki banda gako aboro ka avurayo adianga beyo ya.—Gate 14:19-28.

8. Gini bandahe aYisaraere agbiaha (a) ngbakungba yo? (b) ho i arimi ni kurogo Ringara Mokido?

⁸ Fuo aYisaraere si Zamba Baime, i angbuo rogo “bakere iiriwo ngbakungba, yo kere awo wa we adu ni na angerembia, ni ngbi gomoro ime, yo ime adu nga ni ya.” (Pa Fu Rugute ni Ue he 8:15) Yekova aima banda gako aboro rogo gu kere ba re a. Na ginipai tigaha du tipa pa rimo yó kurugo Ringara Mokido? Gu kere ariivura nangia ga aKanano aima mbakadatiyo ka sovura kutiyo. Wa si avura duwo, Yekova aya fu Yosua wee: “Mo guari awere tie, ki si gi Yaradene re ku mbiti yo, mo, na agi aboro dunduko re, ku rogo gu ringara nga gu fu mi he fu yo, nga awiri aYisaraere. A nga boro sa nikarengba ka ru ku bara bangiro wa du mo ni ungaro te, wa mi adu na Mose, kina wo mi ka du na mo. Mi ahe nga ro te, bangire ago nga ti ro a te.” (Yosua 1:2, 5) Agu afugo Yekova re, si azanganga manga te. Vuru agarã wa sita, Yosua adi be abakindo nga 31 na ki zi dungu arago rogo Ringara Mokido. (Yosua 12:7-24) Ka Yekova aabandanga yó ya, ka i azingo agu arago re te.

Yekova Asongodi Gako Aboro

9, 10. Wai Yekova asongodi gako aboro ngbakungba yo?

⁹ Oni makianga gu biata kidohe Yekova akido gako aboro nani nga ko asongoda yó asongoda. Ngbutuko fuo kusa Mbori aYisaraere Ezipeta yo, ko akido yó ki yaa: “Mo ngére, mi akéda riahe ngbangbaturũ yo fu roni; aboro akúra ka ndu ka rogoda ha tipa kina ga uru sa.” Mbori amangihe fuyó kina wai ko agumbaha, nikeda ko ‘kpakuto ngbangbaturũ fuyó.’ “Ho awiri aYisaraere abi he ni, i ki ya dagba yo, ‘Gini he nga gere?’” Manu nadu, nga gu kpakuto Yekova akido yó tipaha.—Gate 16:4, 13-15.

¹⁰ Yekova angerefuo aYisaraere tipa agarã 40 ngbakungba yo, kini fu riahe gbiati ime fuyó. Na ko abanda gayó arokoo a ka si sipingo ya, na ka nduyo hikingo ya. (Pa Fu Rugute ni Ue he 8:3, 4) Yosua aima bi agi apai re dunduko nibangiriko. Yekova abatasi gako aboro na ki banda yó na ki songodi yó, a kina wai ko akido yó.

Bata ti Gi Gaani Regbo Re

11. Gini tingidapai i amangihe rogo Tanvuo 1914 Brooklyn yo, na regbo ginihe nadigi?

¹¹ Na ginipai tigaha du tipa gi gaani regbo re? Rogo gu garã nangia 1914 rogo Tanvuo ti rameru 2 Rago Bisue wiso, Charles Taze Russell, nga guko naangbembatayo fu agu abawiriki Ziazia Kekeapai nadu ti gu regbo re, ko aguari kuari na ki tona nduge vuru gu bambu i anaaririahe rogoho Beteere yo Brooklyn, New York yo, kini fura na ngbarago niyaa: “Wene wiso fu aboro dunduko.” Mbata fu sungo ko rii ba, ko atingidipai na ngbarago niyaa: “Regbo aGendiria ima digo; gu zogarago nga ga gayo abakindo ima digo.” Regbo aima da berewe fu Yekova nga Bakerepa Bakindo nga ga haurago ko tipa ko mangipai tipa gako aboro. Nirengo, ko aima mangaha!

12. Gini ngbatunga bata namangi rogo gu garã nangia 1919, na sangbanaha angia gine?

¹² Fuo susa agarã bisue kusa, Yekova abatasi gako aboro be ‘Babera Duna Bakere Ome Ti Ni,’ nga bariwara ngbii zire pambori. (Yugoti 18:2) Ngenga agurani duho ti ni nabi gu bawene gene batasa aboro re si nimangi te. Ono wa vura duhe wo, ani nabi sangbanaha abi. Yekova asigira ziazia irisombori na ki kodi agu aboro nakpinyemu ka irisoko i du sa. Gu nebi nangia Yesaya aima fura tipa gipai re kumbatayo ki yaa: “Si aye ka du rogo yangara arame ya i ambákada gu bagangara nga ga Yekova bambu ni bagbanga ha ki susi abaagangara dunduko, si adú ni tumbatumba ha ku ari ki susi agangara; arikaaboro dunduko andú koyo.”—Yesaya 2:2.

13. Wai ga Yekova aboro nazugo areme?

¹³ Sangba Yesaya aima manga nirengo. Rogo gu garã nangia 1919, yangara mbedimbedi aKristano atona gu kakaka tua nga ga manga dezirepai rogo zegino dunduko nga gu natumbapa iriso ndikidi Mbori kuari gbe. Bara rogo agu agarã nangia ga 1930, si adu gbaiga nga i aima tona dungura “kura akandoro” ku dagbayo. (Yoane 10:16) I aenge mbata ti akutu, ki dati akama akutu. Awere tie, i dati amirioni nga aguyo nasongoda ziazia irisombori! Rogo gu yuguyugupai gu mokedi nangia Yoane abihe, i afura tipa yó ya i nga gu “bakere rimbasa aboro, ka boro ageda nga yo wa sa ya, dagba rika aboro dunduko, na angbatunga yo, na aboro, na angbatunga afugo dunduko.” (Yugoti 7:9) Na ginipai bingo oni he tigaoni rogo gaoni raka yo? Bange aDezire Yekova adu nga wai ti gu regbo oni atona wirika gu rengo nga ga Ziazia Kekeapai? Areme, agu aboro nairiso Yekova, bangeyo ima susa 6,700,000. Ho Yekova abatasi gako aboro ni be Babera Duna Bakere Ome Ti Ni, si azaki gene tipa i tona kaa zugo nga gu ani abihe areme rogo zegino dunduko.

14. Gini bata naye kindi kumbatayo?

¹⁴ Gu kura bata naye kumbatayo kindi nga gu nika koda agu aboro dunduko du auru kpotosende ane. Yekova nika mangasunge na gako bakere ome ka rogoda agu aboro kusayo nasogote ko, na kini batasi gako aboro kini rimisi yó kurogo vovo zegino nga gu ruru mangapai nikadu rogoho. Nairiwo gu ngbarago nikangiaha ka bi gbegberẽ apai naabaha dunduko si nidigi na ki bi weneapai si nitona, nga gu naamanganga mbata ya!—Yugoti 21:1-4.

Ga Yekova Bandahe ti gi Gaani Regbo Re

15. Tipagine si aida ga Yekova bandahe ti ni ti gi gaani regbo re?

¹⁵ A wa bi ani he, agu aYisaraere nadu ti rago Yosua, i aaida na ga Yekova bandahe. Ya mo gu ga Yekova aboro du ti gi gaani regbo re, i tigayo kia? Oó, wo duhe te! Yesu aya fu gako bawiriki wee: ‘I afuka roni sa gberãngbii; ki iimi roni. Rika aboro asóga roni asoga dunduko tipa rimore.’ (Matayo 24:9) Vuru agu agarã nasusi, aDezire Yekova aima hi dungu arungosi na agu akerehe a rogo dungu aringara. Wa vura duhe wo, Yekova kindi nabatasa gako aboro abatasa. (ARomo 8:31) Fugoko nakido rani kini yawee ‘agu aũvura ka i mbakadihe kuti rani si adianga berani wa sa te,’ na si arugusanga gaani sunge tungusapa Kindo na yugopai a te.—Yesaya 54:17.

16. Gini gopai duho nayugo nani nga Yekova nabanda gako aboro abanda?

¹⁶ Zavura gupai nga zegino na sogote ga Yekova aboro asogote, i nange kina kumbatayo. ADezire Yekova nange kina kumbatayo rogo aringara nga 236, nga gu bakere gopai nayugo gupai nga, Yekova na kina rani tipa ka banda rani be agu aboro naida ka nyasa riipa rani watadu aguyo naida ka ká na ani ti tungusapai. Ya mo oni rengbe ka tingida rimo gu kere abazogo watadu abarumbatayo rogo pambori nga aguyo narungosi ga Mbori aboro ti gaoni regbo nikerehe? Ginipai namangi tipa yó? Wari du yó ni areme? Badunguyo areme ti ni te, wakina gupai nadu tipa Faro ti rago Moize na Yosua. Na ginipai tigaha du tipa ga Mbori amoyambu nga aguyo nakpi niruruyo? I nibandabanda yó rogo ga Yekova tingidapai yo. Gu kura wene ba ho fuyó rengbe yó kadu rogoho susi gure te. Si tie ziazia nga, nibipa bandahe, fugo Yekova aima da nirengo.

Yekova Nasongoda Gako Aboro Asongoda Areme

17. Gini kidohe Yekova afuhe tipa gu riahe nga ga toro?

¹⁷ Yekova asongodi gako aboro ngbakungba yo, na kinawo ko asongoda yó areme a. ‘Ruru kangara Moyambu’ nariga rani areme rogo toroyo. (Matayo 24:45) Ani nagbia gu inohe nga ga rengo du tipa Mbori nga gu naima du niigiigihe tipa dungu akama agarã. Maraika agumbapai fu Daniere ki yaa: “Mo kísi agu apai re ki dika he ti gu kitabu re, dati digida ragoho. Dungu aboro nikaora koyo na kono, inahe amáa pai.”—Daniere 12:4.

18. Tipagine rengbe ani ti ni ka ya ndikidi inohe areme kpaima?

¹⁸ Ani naraka awere ti yangara aregbo, na ndikidi inohe nga ga Mbori ho kpaima. Rogo zegino dunduko, ziazia toro ima ngbembatayo fu agu aboro nakpinyemu rengo kurogo gu ndikidi inohe du tipa ga Mbori ringbisapai. Ziazia Kekeapai ima nge areme auru kpotosende, na kinawo nge agu abuku a naundo rani ani gi rogo gu rengo du rogo Ziazia Kekeapai. Nikpiapai, oni kparianga gu riiapai du rogo gu buku nga What Does the Bible Really Teach? a Dagba agu akapita du rogoho, agu akuraha nayaa: “What Is the Truth About God? (Gini Rengo Duho Tipa Mbori?),” “Where Are the Dead? (Wari Du Kpikpi Aboro Ni?),” “What Is Gos’s Kingdom? (Ga Mbori Kindo Nga Gine?),” na “Why Does God Allow Suffering? (Tipagine Mbori Ambu Arungo ti ni Si Niimangi Aboro?).” Aboro aima digo nisasana agu asanahe re tipa akutu agarã. Ono karagapai kinaho awere tipaha. Zavura gupai nga aboro aadunga na inohe riipa Ziazia Kekeapai te, na wa vura duhe nga agu akanisa i aya tipaha wee si nga ga aKristano, si anaayugo kina agu apai andunga nzunzu na Ziazia Kekeapai ya, Fugo Mbori aima du nibandabandaha na kini songodi agu aboro nakpinyemu ka irisoko.

19. Gini akidohe bi oni he si niringbisitihe, na ginipai da oni kuti ni?

¹⁹ Nirengo, mbiko agu apai bi ani he nibangirani, ani rengbe ka yaa: ‘Anga wenepai ho sa nakpa dagba agu apai dunduko Yekova gaani Mbori akidopaha furani te; si amangi dunduko furani, anga pai ho sa nakpa te.’ (Yosua 23:14) Yekova nabatasa gako amoyambu, kini banda yó, na kini songodi yo. Ya mo oni rengbe ka ringbisapa gu ga Yekova kidohe naamanganga a wa ko agumbaha ya? Si ti ni te. Ani nakido nitatamana kuti Fugo Mbori.

20. Tipagine si aida ani ngere ti ni naa kido kumbatayo?

²⁰ Na ginipai tigaha du tipa raka kumbatayo? Yekova ima tingida rani na gupai nga, badungu rani rengbe arengba kadu na maabangirise tipa raka rogo gu kpotosende ko nika ariaha kurogo bawene paradizo. Kina bete aboro gbua dagbarani duna maabangirise tipa ka zogarago na Kristo ngbangbaturũ yo. Ka si vura du nga gaani maabangirise nga ka raka auru kpotosende watadu ka ga ku ngbangbaturũ yo, si naida ani nye niruru rani a wa Yosua amangihe. Uru adaada ho gaani maabangirise nika dani ti rengo. Ani dunduko nika ngera kusayo ka bi agu akidohe Yekova akido rani nani, na ani ki yaa: ‘Si mangi dunduko.’

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Gini akidohe nga ga Yekova Yosua abihe si nada ti rengo?

• Gini ga Mbori kidohe bi oni he si niringbisitihe?

• Tipagine si aida ti ni ani kido kuti fugo Mbori?

[Gu kpiahe du ti kpewaraga 23]

Yekova arimisi tiko tipa ka batasa gako aboro

[Gu kpiahe du ti kpewaraga 23]

Wai Yekova abanda gako aboro Zamba Baime yo?

[Gu kpiahe du ti kpewaraga 24]

Wai Yekova asongodi gako aboro ngbakungba yo?

[Gu kpiahe du ti kpewaraga 25]

Yekova nangera angera fuo gako aboro areme