Si Naida Oni Mangisunge Fu Yekova Ho Du Oni Ni Kindi Ni Aparanga
“Mo nyé rogo agu apai mo awiriki ki ini he ni rengo.”—2 TIM. 3:14.
1. Wai Yekova abi gu sunge agu aDezire nga aparanga amangaha fuko?
GU ZIAZIA sunge paranga aboro amangaha fu Yekova, ko nabihe na nyanyakipaha na si nasako ko gumba sangbanebi tipa yó. Bake apapara Atambuahe abibia ki yaa: “Gamo aboro afú tiyo foro zaza rago ngbe mo ku mbata yo fu gamo rimbasa aborosovura, ni ukadiukadi tiyo na kparakpara ziazia roko. Pa parangaro adu wa uru ho uru nakura ni wiso.” (Tam. 110:3) Ii, Yekova nabi aparanga na kikii payo, nga agu aparanga duna nyemu ka mangasunge fuko.
2. Gini apai aboro asosoda paranga aboro areme i guari sani nibipa gayó raka kumbatayo?
2 Gu paranga aboro nga oni du rogo gu dungurati nga ga aKristano, oni aima kpara gaoni raka fu Yekova? Si rengbe kadu nga badungu aboro nabipa mangasunge fu Yekova nimbumbupai. Agu abarumbatayo du rogo sunge bagaahe, abayugupai, na agume gbiati abakure ti kura aregbo nangarasa aparanga i oro fuo aũzegino. Ho aparanga amaa agu asásá ni nga ga toro, aboro zegino dedede nasawia yó asawia. Ono tie, gupai nga rengo nga, mangasunge fu ndikidi Mbori nga gu bawene sunge kisusi rengbe boro ka mangaha rogo gani raka. (Tam. 27:4) Nibi gipai re, ani bingo asanahe biata, nga: Tipagine si aida ti ni oni mangisunge fu Mbori? Wai rengbe oni kadu na diabese rogo gu raka nga ga kparatise fu Mbori aboro ki vura kaa gumba kina gini apai furoni vurũ? Gini iiriwo amamu nga ga sunge rengbe ngbadimoho ka zaka furoni?
Mangasunge fu Yekova Nga gu Rurupai Si Aida Boro Mangihe
3. Gine si aida agu ahe Mbori akusihe sa rani ani mangihe?
3 Tipagine si aida ti ni oni mangisunge fu ndikidi Mbori du niungako? Yugoti 4:11 nafu bangua nduhe kini yawee: “Mo gaani Gbia nga gaani Mbori, re mo are na dia taarimo na irisa na tandu, bambiko mo nafu ahe dunduko, si adu ho mbiko sangbaro, ki du ni mangimangi he.” Yekova nga Bakusi agu ahe dunduko du ti ni. Kpotosende nga bawene he! Yekova namangi angua, anyaa, na bariwara-abaime, abaagangara, na agu aime nayuro ti ngbadu ambia. Atambuahe 104:24 nayawee “kpotosende hi be gamo ũkumuko.” Nairiwo wai si aida ani fu tambuahe fu Yekova tipa wa ko ambakadi rani wenengai ani rengbe ka gbia ngbarago be kpotosende na be agu ahe du auruhe! Ya mo si aidanga gaani tambuahe tipa gi iiriwo ahe Mbori amangihe re sa rani ani mangisunge fuko tee?
4, 5. Gini apai Yekova amangihe nasa Yosua ko mbedi naako?
4 Ani nabi kura ndupai tipa mangasunge fu Yekova rogo agu afugo gu barumbatayo fu aYisaraere nangia Yosua agumbaha. Ho Yosua aambeda ni na kpio, ko aya fu ga Mbori aboro wee: “Oni dunduko ini he kpotoroni yo na mbisimoroni, ya a nga wenepai nakpa sa dagba agu apai dunduko Yekova gaoni Mbori akido pa ha fu roni te; si amangi dunduko fu roni, a nga pai sa nakpa te.” Tipagine Yosua agumba agu afugo re ti ni?—Yos. 23:14.
5 Ho Yosua aduni nigude kini sono Ezipeta yo, ko avura rugatiko naapa ga Yekova kidohe ka fu ringara fu aYisaraere nigayo. (Bam. P. 12:7; 50:24, 25; Gate 3:8) Fuo gure, Yosua abi gupai nga Yekova atona ka digiso agu akidohe re niye ko na agberãngbii bawe kurii ringara Ezipeta na ki mangi gu iranyakarii nangia Faro ngbaome ko zabee ti aYisaraere i ga. Yosua adu dagba agu aboro nabati bangiri Zamba Baime na ki bi wai gu ime re afu rii Faro na gako aborovura. Wa i aandu rogo “bakere iiriwo ngbakungba” rogo gu ugu-ngbii-ngume nangia ga Sinai, Yosua abi wai Yekova afuku agu ahe dunduko aYisaraere aduna azingoho tiyó. Anga boro kandara sa nakpi be gomoro ime watadu be gomoro te. (Pa Rug. 8:3-5, 14-16; Yos. 24:5-7) Ho regbo adani fu aYisaraere i tona vura na gu nyanyaki rikaaboro nangia aKanano tipa ka dia Ringara Mokido, Yosua abi wai gu Mbori ko anaairisoko gbiati gu kura aYisaraere asongodi yó rogo gi sunge re.—Yos. 10:14, 42.
6. Gine nika undo roni oni sonosi nyemu mangasunge fu Mbori?
6 Yosua aima ino gupai ngawee Yekova aima manga agu apai ko akidopaha. Si du Yosua aya ti ni wee: “Ono mi ni tire na gimi aborokporo, ani amánga kina pa Yekova.” (Yos. 24:15) Ginipai du tipa roni tigaoni? Ho oni aberãpa agu akidohe ni ndikidi Mbori namangihe na gu ko ka mangaha gizo, ya mo si nasa roni oni duna nyemu ka mangasunge fuko wa gu Yosua amangihe?
7. Tipagine du gu bapatiza nga ga ime ti ni na nyanyakipaha?
7 Ka oni aaberãkurii gu mangaapai nga ga Yekova nga ga kusa ahe na kurii gako akidohe, anga si rengbe ka fõ kina ngbaduroniyo oni kpara gaoni raka fu ko sa te, ono si nika sa gupai a nga oni zi bapatiza. Bapatiza nga nyanyakipa pai fu agu aboro naida ka mangasunge fu Mbori. Si nga gupai Yesu amangihe nga gaani bayugupai nayugo kpiapai furani. Ngbutuko mbata fu ko tona gako sunge ni Masiya, ko andu fuo Yoane Bafu Bapatiza tipa ka zio bapatiza. Tipagine Yesu amangi gupai re ti ni? Ko ape nduhe kusa ki yaa: “Mi aye nga ngbangbaturũ yo ka manga wa mi akpi nyemu he te, ono wa kina gu ko akpi nyemu he nakedi re.” (Yo. 6:38) Sidu, Yesu azi bapatiza tipa ka yugo gupai nani nga ko ima fu gako raka fu Bako ka manga gupai Bako akpinyemuhe.—Mt. 3:13-17.
8. Tipagine Timoteo asia gupai ti ni nga ka mangasunge fu Mbori, na ginipai si aida oni mangihe?
8 Ani wisiginga gupai a nadu tipa Timoteo, nangia paranga Kristano Yekova afuku dungu asunge gbiati kura kparakpara asunge fuko. Tipagine Timoteo adiberã ti ni ka tona iriso ndikidi Mbori? Ziazia Kekeapai naya furani wee ‘ko awiriki apai ki inihe nirengo.’ (2 Tim. 3:14) Kangia oni awisigi fugo Mbori na i ki rugusihe bangironi oni ki idi kuti gupai ngawee agu apai oni awirikihe re si angia rengo, gupai du tipa roni, si wakinagu nadu tipa Timoteo. Si naida oni diberã awere. Tipagine ka oni afuranga ti ni fu avunguroni tipa gupai oni aida ka mangaha ya? Avunguroni gbiati agu abaakumba du rogo dungurati nika undo roni oni girogo agu apai Ziazia Kekeapai aida boro mangihe tipa ka rẽ na bapatiza.—Oni gedi Amokedi 8:12.
9. Ho oni adiaberã ni tipa ka zio bapatiza, ginipai si amanga kura aboro nani?
9 Ka si du nga oni ima zio bapatiza, si nga wene tonatonapai rogo mangasunge fu Mbori. Wa oni atona gipai re, gure nga oni tona gbanga oto-abaangira du mosoro tipaha nga nyenye unga gbiati gu ngbarago naye fu boro tipa manga ní gupai Mbori akpinyemuhe. (Eb. 12:2, 3) Oni ayeaye a na ngbarago fu gaoni aborokporo nga aguyo naima tona gu oto-abaangira re na fu abakurearoni nga aguyo du rogo dungurati. Gu nyakipaha kisusi nga, oni nika fu ngbarago fu Yekova. (Oni gedi Asanza 23:15.) Si rengbe arengba kadu nirengo nga gu kura aboro kinaho aruganga tiyó na ndu gupai oni nasia gupai ti ni nga ga mangasunge fu Yekova ya, sidu, i ki tona kaa kapa akapa kuti gu gaoni diaberã re. I rengbe arengba a ka tona sogote roni. Ono oni rengbe arengba ka diabe agi apai re.
Ho Kura Aboro Asogote Roni Ni
10, 11. (a) Gini asanahe rengbe aboro ka sana roni nani tipa gaoni diaberã ka mangasunge fu Mbori? (b) Ginipai rengbe oni ka wirikaha be gu ga Yesu karagapai nadu tipa ndikidi irisombori?
10 Ho oni adiaberã ni tipa kaa mangasunge fu Yekova, si rengbe ka zeresa ngbaa agu akuaroni du oni naayó sukuru yo, gaoni amurakporo na agumeroni. I rengbe ka sana roni tipa ndu gupai oni nasia gipai re ti ni na ki sana roni tipa gaoni ida. Gine kangia gaoni karagapai? Rengo ngaha nga, si naida oni wisigi gaoni berã na ndu gupai mangi oni gu gaoni diaberã re ti ni. Ya mo kura wene kpiapai ho susi gu nga ga Yesu rogo karagapai fu aboro tipa gaoni ida?
11 Ho abarumbatayo rogo pambori asana Yesu ni tipa zingabekpio, ko agbeberã yó kuti gu veresi i aberãnga pai tipaha ya. (Gate 3:6; Mt. 22:23, 31-33) Ho bakeapai asana Yesu ni tipa gu rugute nga bakumbaha, ko adi gu veresi naadada rogo Ziazia Kekeapai ki gumbaha fuko. Gu kumba re aduna tambuahe fu Yesu tipa gu karagapai re. (Pa Mot. 19:18; Pa Rug. 6:5; Mk. 12:28-34) Gu gene Yesu amangisunge ngbaha na gu veresi re na gu gene ko afura ngbaha, si asa gupai nga ‘rimbasa kparaka,’ na ka asogoko amanganga gbegberẽpai naako ya. (Yo. 7:32-46) Ho oni akaragapai ni sa agu asanahe du tipa gaoni idapase, oni mangisunge na Ziazia Kekeapai “ni zera na irisa.” (1 Pet. 3:15) Ka oni ainongo karagapai kuti sanahe ya, oni gumbaha fu gu boro re nga oni ainongo karagapai sa gani sanahe te, ono oni nandu ka gbata karagapai sani. Kusa, oni gbata gupai re tii gu riipai nga, Riiapai Tipa Yugobaraapai Kurogo ANgbaõbambu Sinziri du rogo agu ANgbaõbambu Sinziri dunduko nibasasa nga ga Banduru. Watadu kangia Watch Tower Publications Index watadu Watchtower Library on CD-ROM ho rogo gu fugo ini oni he, oni rengbe arengba ka gbataha rogoho. Ka oni mbakaditironi wenengai, si nika sa gupai nga oni ‘ini wãi ka karagapai’ kuti asanahe.—Koro. 4:6.
12. Tipagine si aidanga ti ni oni mbu arungosi si fu gberarago furoni ya?
12 Aboro rengbe arengba ka sana roni na asanahe kupati gu du tipa gaoni diaberã na tipa gaoni aida. Nirengo, gu vura Mbori nga Satana Bakitingbanga, ko du zegino kutii beko. (Oni gedi 1 Yoane 5:19.) Sidu, si arunga oni berẽ gupai nga aboro dunduko nika tambua roni watadu nika ida na oni te, sidu, asogote nika gbia roni agbia. Kura aboro rengbe ka ‘gbera ngbayo yo furoni,’ na i rengbe arengba ka nye kuti mangaha wo. (1 Pet. 4:4) Ono oni tingidi gupai nga, oni nisaroni te. Yesu Kristo aima mbu a be arungosi. Kina gu bangisapai re a nadu tipa gu mokedi nangia Petero, na ko akepai ki yaa: “Abadiangba, ka si iriwo nga ti roni ya asada naye fuo roni wa we, nga gu naye ka asada gaoni apai, ya vovo pai du mangi roni, ya. Ono ngbarago du ti roni mbiko oni nahi apai na Kristo.”—1 Pet. 4:12, 13.
13. Tipagine rengbe aKristano ti ni kadu na ngbarago mbiko aboro narungosi yó?
13 Hi arungosi watadu sogote wangia oni aKristano nga ndu gupai naye na ngbarago furoni. Wai duhe wo? Mbiko ka agu aboro du rogo zegino idi naa agu apai oni amangaha, si nayugo gupai ngawee oni naraka ringbisihe kuti ga Satana andiko angianga ga Mbori ya. Yesu ayaa: “Na gberẽ he fu . . . roni ho aboro dunduko ka tambua roni ni, bambiko abayo amangi kina wo a fu airazire anebi.” (Ruka 6:26) Arungosi nayugo gupai ngawee Satana gbiati gako zegino na zinga kuti roni mbiko oni namangasunge fu Yekova. (Oni gedi Matayo 5:11, 12.) Ka aboro ‘agbarasa rimoroni mbiko rimo Kristo,’ si nga ndupai tipa oni du na ngbarago.—1 Pet. 4:14.
14. Gini wenepai rengbe ka manga ka boro nye niruru ní fu Yekova aboro ki vura nirungosi ní vurũ?
14 Ho oni anye ni niruru roni fu Yekova arungosi ki vura nimangi roni vurũ, si naye na wene asangbanaha kandara biama. Bambataha nga oni namanga dezirepai tipa Mbori na tipa Wiriko. Uehe nga gaoni hipai nangarasa akuaroni aKristano. Biataha nga agu aboro nabi roni ainongo Yekova ya, si rengbe ka sa yó i gbata Yekova. (Oni gedi AFiripoio 1:12-14.) Biamaha nga, wa oni abi wai Yekova afu ome furoni tipa oni hi aʹasada, gaoni nyemuse tipa ko nika sona.
“Bakere Ngbadimo” Nizazaha Furoni
15. Gini “bakere ngbadimo” nadu nizazaha fu gu mokedi nangia Pauro?
15 Gu mokedi nangia Pauro akepai tipa gu gako sunge ko amangihe Efesa yo ki yaa: “Bakere ngbadimo ni zaza ha fere na bakere sunge.” (1 Kor. 16:8, 9) Si angia ngbadimo sunge tungusa wene pangbangaa gbiati sunge sa aboro ni abawiriki rogo gu bakporo re. Ho Pauro arimi ni rogo gu ngbadimo re, ko aundo dungu aboro i wirikipai tipa Yekova na tipa irisoko.
16. Wai yangara mbedimbedi aKristano arimi gu “ngbadimo [nadu] . . . ni zaza ha” rogo gu garã angia 1919?
16 Rogo gu garã nangia 1919, Yesu Kristo amoi “ngbadimo . . . ni zaza ha” fu yangara mbedimbedi aKristano. (Yugo. 3:8) I arimi gu ngbadimo re na ki tona ka tungusa wene pangbangaa, na kini yugu gu rengo nga ga Ziazia Kekeapai kakaka susi gu nadumbata. Gine ningia sangbana gayó sunge tungusapai? Wene pangbangaa ima da awere digido kpotosende yo, na aboro bangeyo nambedi kuti amirioni saba duna maabangirise ka raka nyeanye kindi rogo ga Mbori vovo zegino.
17. Wai rengbe oni ka rimo gu “bakere ngbadimo [du] ni zaza ha . . . na bakere sunge”?
17 Gu “bakere ngbadimo [du] ni zaza ha . . . na bakere sunge,” si kindi nizazaha tipa ga Yekova amoyambu dunduko. Agu aboro narimoho nagbia ngbarago wa i atungusa wene pangbangaa bakere gbe. Nidu oni ni agu aparanga nga ga Yekova amoyambu , ya mo oni nabi gu mamu na kikiipaha nga ga undo aboro i “idi pa wene pangbanga” te? (Mk. 1:14, 15) Ya mo oni aberẽnga pa mangasunge nibazakigene watadu nimoundo bazakigene? Sunge Dudua ABambu Kindo, sunge Betere, sunge tungusapai ni amokedi gbiati gu kura asunge, si ni agu asunge rengbe ngbadimoho ka zaka fu dungu roni. Wa duhe nga regbo nandu ka digo rogo gi ga Satana zegino re, pa tona oni sunge sa dagba agi asunge nga ga Kindo re nigupai si aida oni ipisihe na aʹuru dunduko. Ya mo oni arimo gu “bakere ngbadimo” re mbu regbo koyo kindi?
“Oni Ía Yekova ka Bi Ko Ko Du Ni Wene Ko”
18, 19. (a) Gine naundo Davide ko du na nyanyaki nyemu mangasunge fu Yekova? (b) Gine nayugo gupai ngawee Davide aabiranga tiko tipa manga ko sunge fu Yekova te?
18 Bake apapara Atambuahe aya fu aboro wee i ye ka “ía Yekova ka bi ko ko du ni wene ko.” (Tam. 34:8) Ho Bakindo Davide nazogo gu ringara aYisaraere nadumbata aduni nigude kini ngerefuo akandoro, Yekova abandako be anya-rinde. Mbori asongodi ko rogo gu vura ko asoho na Goriata na ki batasi ko be dungu kura agberãngbii a. (1 Sam. 17:32-51; Tam. 18) Mbiko ga Mbori weneringise nga ga nyemuse, Davide akepai ki yaa: “Ako Yekova gi Mbori, mo angeesi gamo iiriwo mangaapai na gamo aberã du kono du ani ni; i arengba nga na ringbisa ha na mo te!”—Tam. 40:5.
19 Davide akpinyemu Yekova bakere gbe na kini idi ka taasarimoko na ngbadukoyo dunduko na gako berã dunduko. (Oni gedi Atambuahe 40:8-10.) Wa agarã aasusa, Davide aabiranga tiko tipa dia ko gako regbo naabaha dunduko kuti iriso Mbori te. Kakuti sinombori nangia sinoko, nigupai nanaafu ngbarago fuko zanga gu duho waha. Ho Davide aagbinza ni, ko ayaa: “Ako Gbia, bambiko mo nga gi maabangirise, Ako Yekova, mo nga gu ko mi atona kida kuti ro mi du ni parangare. Ako Mbori, ho mi ka gbinza ni, mangerire ki du na nvue, ka mo mbú nga re ya.” (Tam. 71:5, 18) Ga Davide kido kuti Yekova na gako pagume naako anyaki, wa si avura du nga ko aima daputa ti kpotoko vurũ.
20. Tipagine du mangasunge fu Mbori ti ni nigupai ngbaa kisusi rengbe oni ka mangaha rogo gaoni raka?
20 Gu raka nangia ga Yosua, ga Davide, na ga Timoteo nga gopai ya pa manga oni sunge fu Yekova nga bawenepai kisusi. Gu weneapai aũzegino aye nani du gbua tipa guru regbo arengbanga na gu bawene amaku naye nisangbana ‘manga oni sunge fu Yekova na ngbaduroniyo dunduko na mbisimoro dunduko’ te. (Yos. 22:5) Kangia oni atakparanga gaoni raka fu Yekova rogo kparakpee te, oni sananga tironi na gi sanahe re nga, ‘Gine nasa gupai nga ka mi sanga tire nidezire Yekova ya?’ Kangia oni nigu irisi Yekova naima zio bapatiza, ya mo oni naida ka kiiso gaoni ngbarago rogo raka yo? Sidu, si naida oni kiisi gaoni sunge tungusapai na kini sono kumbatayo rogo toro yo. Gu papara kekeapai naye fuo gere, si nika yugo wai rengbe oni ka sona rogo toro yo nipe oni fuo gu kpiapai nangia ga Pauro.
Gaoni Karagapai Nga Gine?
• Oni funga nduapai ue si aida ti ni ani naamangasunge fu Mbori.
• Gine naundo Timoteo ko diberã ka tona mangasunge fu Mbori?
• Tipagine si aida ti ni oni ru ngutete ti regbo arungosi?
• Gini amamu nga ga sunge rengbe ngbadimoho ka zaka furoni?
[Gu kpiahe du ti kpewaraga 22]
Mangasunge fu Yekova nga bawenepai kisusi rogo raka
[Gu kpiahe du ti kpewaraga 23]
Ya mo oni rengbe ka karagapai kuti agu asanahe du tipa gaoni ida?