Oni Duwa Yesu Rogo Sunge Sa Aboro Ni Abawiriki
“Oni degeturoni wenengai.”—RUKA 8:18, NW.
1, 2. Tipagine si aida oni degeturoni ti ni kuti wai Yesu aamangapai na aboro ti regbo gako sunge auru kpotosende?
YESU KRISTO aamanga gako sunge ni Bawene Bayugupai na kini sa aboro ni abawiriki ho ko ayani fu apefuoko wee: “Oni degeturoni wenengai.” (Ruka 8:16-18, NW) Gupai ko agumbaha re, si nabipa gaoni sunge abi a wangia oni Kristano. Ka oni adegaturoni kuti agu arugute nga ga Mbori, si nika sa gupai nga oni naandu kuti ni, na oni kidu nigu batakipande Kindo duna diabese rogo gani sunge. Nirengo, oni arengbanga ka gia fugo Yesu areme te, ono oni rengbe arengba ka gedapai tipa agu apai ko agumbaha na agu ko amangihe, a wa duhe nikekehe rogo Ziazia Kekeapai. Giniapai si ayugoho nibipa wai Yesu aamangapai na aboro ti regbo gako sunge auru kpotosende?
2 Yesu angia bawene batungusi wene pangbangaa kisusi, na bawene bayugu Ziazia Kekeapai. (Ruka 8:1; Yoane 8:28) Sunge sa aboro ni abawiriki nakoda tungusapai na yugopai, ono tie, gu kura aKristano kinaho naima ino tungusapai wenengai ono si kidu fuyó nikpakarapai ka yugopai fu aboro wenengai. Baraho duhe ni nga tungusapai nakoda takapande pangbangaa, yugopai fu aboro tipa Yekova na tipa gako aringbisapai naida gupai nga batungusipai zi pagume azio na agu aboro re. (Matayo 28:19, 20) Ani rengbe ka mangaha wo ka ani apekafuo gu bakere kpiapai nga ga Yesu Kristo, nangia Bawene Bayugupai na kingia gu boro nanaasa aboro ni abawiriki.—Yoane 13:13.
3. Ka oni aawirika ga Yesu kpiapai, ginipai si nika undo roni nani rogo gaoni asadatise ka sa aboro ni abawiriki?
3 Ka oni aawirika ga Yesu agene yugopai, gure nga oni nandu kuti gu rugute gu mokedi nangia Pauro afuhe ki yaa: “Oni tá ni tatamana pati agu yo du zegi yo, nidungura rago tipa mangapai. Oni fúra na undahe dedede, si ki hii na tikpo, si du oni ka ina ti ni ya wãi oni ka karaga ha fu akuaroni.” (AKorosaio 4:5, 6) Tipa ka pekafuo ga Yesu kpiapai rogo sunge sa aboro ni abawiriki, si naida oni mangi bakere asadatise amanga, ono ka oni mangihe wo, si nika sa gupai nga gaoni yugopai du niwenehe bambiko si nika undo roni oni ‘karagapai fu boro’ ringbisihe kuti agu apai du tipa ní.
Yesu Anaangarasa Kura Aboro I Fura
4. Tipagine rengbe ani ka ya ti ni wee Yesu anaadegatuko adega wenengai ho aboro anaafura ni?
4 Tona ti kina gu regbo Yesu adu nigude, ko aduna gu sino tiko nga ga degatue ka gia gupai aboro agumbaha, na kini ngarasi aboro i gumba agu apai i aberãha tipa apai. Nikpiapai, ho garãko aduni 12, avunguko agbiako ko nasungu dagba abayugupai yekaru yo, “ki ta gia gayo pai nisana yo tipa apai.” (Ruka 2:46) Yesu aandunga ku yekaru yo ka bazee ti abayugupai na gako inohe te. Ko andu koyo ka gia apai, wa vura duhe vurũ nga ko asasanahe asasana a. Padu ko nigu boro nanaamaaberã ní wenengai ka gia gupai aboro agumbaha, si nga pai sa dagba agu akuraha nasako ko ngba bangiri Mbori na bangiri aboro.—Ruka 2:52.
5, 6. Wai ini ani gupai nga, Yesu anaadegatuko adega ka gia agu apai agu aboro ko ayugupai fuyó agumbaha?
5 Fuo i bapatizi Yesu ki mbedi ko nitoro ko ki da ni Masiya, ko anaadegatuko adega kindi ka gia gupai aboro anaagumbaha. Ko aarimisongo tiko kurogo gupai ko aayugoho si ki sa gupai nga bangiriko go ti degatuko fu agu aboro naaye fuoko te. Ko aniongo, ki sana yó i gumba gupai i aberãha, na ki moiberãko ka gia gupai i nika gumbaha. (Matayo 16:13-15) Nikpiapai, tingbafuo kpio kawiri Marata nangia Razaro, Yesu aya furi wee: “Gu ni ka du ni ungani ki idi pa re ni [a]kpi nga te.” Fuo gure, ko asana ri ki yaa: “Mo idi pa gere?” Na si nirengo nga Yesu amoiberãko amaa ho Marata akaragapai ni ki yaa: “Ii, Gbia; mi idi pa ro ya Kristo nga mo, nga Wiri Mbori.” (Yoane 11:26, 27) Yesu aima gbia ngbarago nirengo ho ko abi Marata ni ri nakaragapai wa gure.
6 Ho ga Yesu abawiriki agindigo ko ni, ko aduna nyemu ka ino gu bipai a gako amokedi adu nani. Sidu, ko asana yó ki yaa: “Oni naguari a tigaoni?” Simona Petero ki karagapai fuko ki yaa: “Gbia, ani andú koyo du da ni? Wa du mo du agu apai be ro nga ga nyenye unga. Ani idi pa ro ki ini ya mo nga gu Ziazia Ko nga ga Mbori ko.” (Yoane 6:66-69) Nairiwo wai agu afugo re avura sa ngbarago ti Yesu! Ka gu boro oni awisigo Ziazia Kekeapai na ní kusipa gani idapase wa gure, si asa bakere ngbarago asa tironi.
Yesu anaadegatuko Niʹirisa
7. Tipagine dungu aboro Somorona aidi pa Yesu ti ni?
7 Gu kurapai berewe nasa Yesu ko du na diabese rogo sunge sa aboro ni abawiriki angia, ko anaaberãpa aboro na kini degetuko niʹirisa. Ti kura regbo sa, Yesu amangi dezirepai fu dee Somorona barii gu guga Yakobo agehe Sukara yo. Ho ko aafura ni na gu dee re, ko aadianga ngbiti fugo te; ko ambu regbo a furi tipa ri gumba agu apai nadu ngbari, na ko adegetuko ka giaha. Ho Yesu amoiberãko ni ka gia agu apai ri agumbaha, ko abi gupai nga ri aduna nyemu irisombori, na ko ki ya furi wee Mbori nagbata agu aboro nika irisoko nitoro na rengo. Yesu afu irisa fu gi dee re, na kidu na nyemu ri, si ki sa gupai nga ri ndu ka gumba pako fu gu kura aboro na “dungu aSomorono . . . [ki idi] pa ko rogo gu bakporo re bambiko gu pai nga ga de.”—Yoane 4:5-29, 39-42.
8. Aboro nidu na nyemu ka gumba gayo aberãpai tipa apai, wai rengbe pa ino oni gipai re ka undo roni oni tona fugo na aboro ba tungusapai yo?
8 Aboro nidu na nyemu ka gumba agu apai i aberãha tipa apai. Nikpiapai, aboro Atenai adu na nyemu gumba gayo aberãpai fu kura aboro, na kini gi gu vovo apai a aboro agumbaha. Si nasa gupai nga, ga Pauro tungusapai du nibawenehe, nga gu ko amangihe rii Areopaga yo rogo gu bakporo re. (Amokedi 17:18-34) Ho oni atona fugo ni na irakporo ba gaoni sunge tungusapai yo, oni rengbe ka yaa, “Mi niye ka bi roni bambiko mi na nyemu ka ino gaoni bipai tipa [oni gumba gupai ngaha].” Oni degeturoni ka gia agu apai gu boro re nika gumbaha, na oni ki fura tipaha, watadu ka sanahe riipaha. Fuoho, oni yugu gupai funi nizera Ziazia Kekeapai agumbaha tipa gupai re.
Yesu Aima Ino Wai ka Tona Fugo
9. Ginipai Yesu amangihe mbata fu ko yugu apai fu Kereopa na gako badianunguro rogo “Ziazia Kekeapai” dunduko?
9 Zingo fugo aamanganga Yesu te. Kurii gupai nga Yesu anaadegatuko wenengai, ko aima ino agu apai aboro aberãha, na ko ki ima ino gupai nzunzu si aida ko gumbaha. (Matayo 9:4; 12:22-30; Ruka 9:46, 47) Nikpiapai: Ngbutuko fuo zinga Yesu bekpio, gako abawiriki ue aguari Yerusarema yo ka ndu ku Emau yo. Buku Wene Pangbangaa nayaa: “Wa i afura nibaki bangiriyo, Yesu ki mbedi na yo tigako, ki mongo nindu na yo. Ono i aina nga ko te bangiriyo adu ni kina tataita ha. Ko ki ya fu yo, ‘Gini pai oni . . . [agumbaha] dagba roni, wa oni andu?’ I ki ru, ki nirungo. Gu ni sa, rimoko nangia Kereopa ki karaga ha niya fu ko, ‘Mo nata ni sa ro rogo Yerusarema mo ata na ina nga agu apai i amangi yo re ni gu rago te re?’ Ko ki ya fu yo, ‘Gini pai?’” Bawene Bayugupai adegetuko ka gia agu abawiriki re wa i agumba gupai fuko nga, Yesu boro Nazareta ayugupai fu aboro, ki mangi iiriwoapai, na i ki saringbangaa ko sa kpio. Ti gu regbo re, kura aboro ayawee ko ima zinga bekpio. Yesu ambu Kereopa na gako badianunguro i gumba agu apai nadu ngbayo dunduko. Fuoho, ko asakirogo agu apai yo fuyó si aidi i inihe rogo “Ziazia Kekeapai” dunduko.—Ruka 24:13-27, 32.
10. Wai rengbe oni ka ino agu aberã du gu boro nani oni nagbia ní batungusapai yo?
10 Si rengbe kadu nga oni ainongo wiripai kandara tooni tipa gu bipai du gu boro nani oni nagbia ní te. Tipa ka inopai tipa ní, oni rengbe ka ya funi wee oni na nyemu ka ino gupai aboro aberãha tipa kparakpee. Fuoho, oni ki sana ní ki yaa, “Ya mo oni naberãha nga boro ho nirengo nagia akparakpee?” Gupai ní nika gumbaha, si nika yugo badungu apai tipa gu berãpai du ní nani, na gini pambori du ní rogoho. Ka si du nga ní na nyemu agu apai nga ga Mbori ti ni, oni rengbe ka gbisa na ní kumbatayo berewe ki yaa, “Ya mo oni naberãha nga Mbori nagia akpee dunduko, watadu agu akuraha kinaho ko aidanga nani ya?” Ngbatunga agu asanahe re rengbe ka sa gupai nga oni fura na ní wa bakure. Ho daha adani nga oni yugu gupai Ziazia Kekeapai agumbaha fu boro, si naida oni mangihe wo nibirĩ, angianga ka tikango na gupai gu boro re naidi kuti ni ya. Ka rago ngba tiní mbiko fura oni na ní, ní rengbe arengba ka idaha furoni oni ye berewe ka bi ní. Ono na ka si du nga ní sana gu sanahe oni ainongo karagapai sani ya? Oni rengbe ka ndu ki wetekeapai, ki mbakaditironi berewe ka ye fuo ní tipa ka gumba “gu pai du maabangirise ti roni mbiko ho, ono ni zera na irisa.”—1 Petero 3:15.
Yesu Ayugupai fu agu Aboro Narẽ I Yugupai Fuyó
11. Gine rengbe ka undo rani ani gbia agu aboro rẽ ani yugupai fuyó?
11 Gu rengberengbe boro nangia Yesu aduna rugatinapai nga gu naundo ko tipa ko ini agu aboro narẽ i yugupai fuyó. Si nikpakarapai furani ani ini agu aboro ‘duna nyemu gbia nyenye unga.’ (Amokedi 13:48, NW) Si nga gupai agu amokedi amangihe Yesu aya fuyó wee: “Gu bakporo na gu kporo oni ka rima ku rogo, oni gbáta gu boro du ho rengbe na dia roni ku gume.” (Matayo 10:11) Si naida ani du wakina ga Yesu amokedi, kini gbata agu aboro rengbe ka gia gupai ani agumbaha, na ki idi ka wirika gu rengo du rogo Ziazia Kekeapai. Oni rengbe ka gbia agu aboro rẽ i yugupai fuyó nimaa oni berãroni wenengai ka gia agu apai agu aboro oni afura naayó agumbaha, kini ini agu aberã nga ga agu aboro re dunduko nibasasa.
12. Wai rengbe oni kaa undo gu boro kindi duna nyemu wene pangbangaa?
12 Fuo mbu oni gu boro duna nyemu gu pangbangaa tiní nga ga Kindo, si naida oni naaberã aberã kindi tipa gu gani azingo nga ga toro. Ka oni keke agu apai oni nainihe tipa boro fuo gumba oni wene pangbangaa funi, si nika undo roni oni niundo gu boro re kindi rogo toroyo. Ho oni ka ndu ni berewe fuo ní ka bi ní, si naida oni degeturoni wenengai ka oni aida ka ino kura apai berewe tipa gani aida, gani asino berã, watadu agu apai du tipa ní.
13. Gine rengbe ka undo roni oni ini gu berã du boro nani tipa Ziazia Kekeapai?
13 Wai rengbe oni ka ngarasa aboro i gumbapa wai furoni i aberã tipa Fugo Mbori? Rogo kura arago, si ngba angba boro sanahe ki yaa, “Ya mo si furoni nikpakarapai tipa ka giarogo agu apai du rogo Ziazia Kekeapai?” Gu karagapai gu boro re nika fuhe, si nika yugo gani bipai tipa agu apai nga ga toro. Gu kura gene berewe a nga ka geda veresi na ki sana ní ki yaa, “Gaoni bipai nga gine tipa gupai gi veresi re apehe?” Ka oni amangaha wo, si nika sa gupai nga oni mangi badungu apai gene tungusapai yo nisasana oni asanahe, a wa si adu tipa Yesu. Ono tie, si naida oni duadu na rugatise.
Yesu Amangisunge na Asanahe Ngba Wene Gene
14. Wai rengbe oni kadu na nyemu ino ga aboro bipai ono zanga oni batasi omeyo na asanahe?
14 Oni duna nyemu ka ino agu apai du berã aboro yo, ono zanga bazee tiyó. Oni pekefuo ga Yesu kpiapai. Ko anaabanga zee ti aboro na asasanahe te, ono ko anaasana kina agu asanahe nasa boro ní berẽkuriipai. Yesu anaamaa berãko a wenengai tipa ka gia gupai aboro agumbaha, na aboro kini gbia ongoda mbiko ko. (Matayo 11:28) Ngbatunga aboro dunduko nanaagundenga ti nduge fuoko ka gumba agu apai fuko nanaafuda yó ya. (Marako 1:40; 5:35, 36; 10:13, 17, 46, 47) Ka si du nga aboro nazereda ka gumba gayo bipai furoni tipa Ziazia Kekeapai gbiati agu apai si ayugoho, si aidanga oni batasi omeyo na badungu asanahe te.
15, 16. Wai rengbe oni ka tona fugo na aboro riipa agu apai nga ga pambori?
15 Gu kurapai berewe rengbe oni ka mangaha tipa ka fura na boro nga, ka gumba gupai nika fõngbaduniyo, fuoho, oni ki ongo tipa ka gia gupai ní nika gumbaha. Nikpiapai, Yesu aya fu Nikodemo wee: “Ka boro bi nga ga Mbori ngbi te kina gu ka i vungu ni avunga berewe.” (Yoane 3:3) Gupai re aima iriwo ti Nikodemo, ka gene adunga wa ka ko ongo aonga ki zanga sana Yesu ko sakirogoyo ya. (Yoane 3:4-20) Oni rengbe ka tona fugo na aboro na ki ndu nani kumbatayo kina ngba gu gene re a.
16 Areme, rogo Afirika, Putu yo ku Uroyo, gbiati Latin America yo, badungu aboro nafura tipa wai vovo apambori akura areme rogo zegino. Rogo ngbatunga arago wa gure, oni rengbe ka tona fugo na boro ki yaa: “Si nairiwo airiwo tire ka bi wai nge apambori areme rogo zegino. Ono mi namaabangire nga fuo bete regbo, aboro dunduko rogo zegino nika kodatiyo sa rogo bangisa ndikidi irisombori. Ya mo oni nabihe wo tigaoni?” Ka oni gumba iiriwopai tipa gaoni maabangirise, oni rengbe arengba ka sa aboro i gumba gayo bipai. Asanahe nadu taata tipa ka karagapai kuti ni ho duhe ni nga akaragapai ue tipaha nga gu si aida boro sia gu sa dagbaha. (Matayo 17:25) Fuo gu boro re karagapai kuti gaoni sanahe, oni karagapai a kuti ni nigeda oni veresi sa watadu ue. (Yesaya 11:9; Zefania 3:9) Ka oni moiberã roni wenengai ho gu boro re akaragapai ni, oni ini gupai aino si aida oni fura tipaha ho oni ka ndu ni berewe fuoni.
Yesu Anaadegatuko Adega Kuti Agude
17. Gine nayugoho nga Yesu aduna nyemu agude tiko?
17 Anga Yesu aduna nyemu kina kuru aboro sa te, ono agude a. Ko aima ino agu ambaro agude anaangihe, na agu apai i anaagumbaha. Ti kura aregbo, ko anaayamba agude i ye koyo du ko ni. (Ruka 7:31, 32; 18:15-17) Badungu agude nadu dagba gu rimbasa aboro naye ka gia gupai Yesu agumbaha. Ho agude aatambua Masiya ni na woro fugoyo kuari, ko aima biyo, na ki yawee Ziazia Kekeapai aima gumbaha ki ya si nika manga amanga wo. (Matayo 14:21; 15:38; 21:15, 16) Areme, badungu agude nada niga Yesu abawiriki. Sidu, wai rengbe oni ka undoyo?
18, 19. Wai rengbe oni ka undo wironi u da niga Yesu bawiriki?
18 Tipa oni rengbe ka undo wironi u da nibawiriki, si naida oni moiberã roni ka gia gupai u agumbaha. Si naida oni rugutironi naapa agu apai du berãru yo nga gu dukia ti agu aberã nga ga Yekova. Ka si vura du nga gupai gude nagumbaha runga ha te, si nipatatamana oni idi aida nani mbata. Fuoho, oni ki gedi agu averesi daada tipa ka undo gu gude re u rugutiru naapa wai Yekova abi apai.
19 Asanahe naundo aundo a. Ono Agude wakina kuru aboro a. I akpinga nyemu oni sasana yó na badungu asanahe te. Kuba gupai nga oni nisasana wironi na kpakarakpakara asanahe, tipagine ka oni agumbanga kina wiri gurupai ti ni tipa tironi ya? Oni rengbe ka fura tipa wai oni abi kurapai sa, na ki gumba ndu gupai oni abihe ti ni wo. Fuoho, oni ki sana ru ki yaa, “Ya mo mo nabihe wo tigamo?” Gupai ka wironi gumbaha, si rengbe ka sa gupai nga oni gbisi kumbatayo na wene sakaapai riipa Ziazia Kekeapai.
Oni Niwiriki ga Yesu Bawene Kpiapai Kindi
20, 21. Tipagine si aida ti ni oni nimoiberã roni wenengai wa oni amangasunge sa aboro ni abawiriki?
20 Singia oni nasakapai na wironi watadu kura boro, si naida oni du nigu boro namaaberã ní wenengai ka gia gupai boro agumbaha. Nirengo, si nga gupai nayugopa ga boro nyemuse. Ho oni amaaberã roni ni ka gia gupai boro agumbaha, si nayugo gupai nga oni na umbasitise, na si kini yugupa gaoni irisa gbiati nyemuse koyo du gu boro ni nafura na oni. Rengo ngaha nga, maaberãse naida gupai nga oni degeturoni ka gia agu apai dunduko boro agumbaha.
21 Wa oni kaa manga gu sunge tungusapai nga ga aKristano, oni naamaaberã roni kindi ka gia agu apai agu aboro oni atungusapai fuyó agumbaha. Ka oni moiberã roni wenengai ka gia gupai i agumbaha, oni rengbe arengba ka ino gu papara rengo nga ga Ziazia Kekeapai rengbe ka ngbatiyo gbe. Fuoho, oni ki asadi tironi ka undoyo, kini ndu kuti ga Yesu agene yugopai. Ka oni amangaha wo, oni gbia ngbarago agbia gbiati wasa bambiko gure nga oni napekafuo gu kpiapai nga ga Yesu Kristo, nga gu boro nadu na diabese kisusi rogo sunge sa aboro ni abawiriki.
Gaoni Karagapai Nga Gine?
• Wai Yesu angarasi aboro i gumba agu apai i aberãha?
• Tipagine Yesu anaadegatuko ti ni koyo du agu aboro ni ko anaayugopai fuyó?
• Wai rengbe oni ka mangasunge na asanahe ba gaoni sunge tungusapai yo?
• Wai rengbe oni ka undo agude i da niga Yesu abawiriki?
[Gu kpiahe du ti kpewaraga 26]
Ho oni atungusapai ni, oni degeturoni