Ya Mo Oni Nasongoda Ga Yekova Bakere Pagbia?

“Oni peke he dagba arikaaboro ki ya, ‘Yekova nazoga rago!’”​—ATAMBUAHE 96:10.

1, 2.(a) Gini baiiriwopai namangi rogo gu gara nangia 29 F.B.K.? (b) Ginipai si ayuguhe tipa Yesu?

BAIIRIWOPAI amangi auru kpotosende rogo Tanvuo rogo 29 F.B.K., nga gu naamanganga wa rago aenge ya. Gu bake buku Wene Pangbangaa nangia Matayo atingidipai ki yaa: “Ho i abapatizi [Yesu] ni, ko ki guari ime yo ni ba sa. Ngbangbaturũ ki za fu ko, [Yoane Bafu Bapatiza] ki bi ga Mbori Ziazia Toro . . . [si nizoro] wa mbipo ki ye ku ri ko; Oni ngére, fugo ki ta paa ngbangbaturũ yo, niya, ‘Wire du re, nyemuko namanga re, ngba ko ti re gbe.’” Gere nga pai sa dagba gu bete apai agu abakeke abuku Wene Pangbangaa nadu biama tibarayo dunduko akehe.​—Matayo 3:16, 17; Marako 1:9-11; Ruka 3:21, 22; Yoane 1:32-34.

² Gu ziazia toro nazoro kurii Yesu, si ayugu gupai nga ko du nangia ga Mbori Mbedimbedi Boro, nga rogo gu fugoyo nga Masiya, watadu Kristo. (Yoane 1:33) Niyangaraha, gu ‘tita dee’ i akidohe tipa ko kini da! Gu boro naru barabangiri Yoane Bafu Bapatiza re, ko nangia gu boro si adu nga Satana nika mbura gidoni na ní ki mburu rii Satana, nga gu boro nasovura kuti Yekova na Gako bakere pagbia. (Bambata Pai 3:15) Natona ti gu regbo re kaa ndu kumbatayo, Yesu aima inoho nga si naida ko mangi nyanyaki asadatise tipa ka digiso gu ringbisapai du tipa ga Bako bakere pagbia gbiati gako Kindo.

3. Wai Yesu ambakadi tiko tipa gupai si aaida ko mangihe tipa ka songoda ga Yekova bakere pagbia?

³ ‘Fuo hi [Yesu] be Ziazia Toro, ko atakaraga tiko Yaradene yo, Ziazia Toro kini ngbe mbatayo fuko ku ngbakungba yo’ tipa ka mbakada tiko yo tipa gako vovo sunge. (Ruka 4:1; Marako 1:12) Sidu, vuru agu arame nadu 40 Yesu adihe ku ngbakungba yo, ko aaberã nyanyakii kurii gu soapai Satana akusihe kuti ga Yekova bakere pagbia na ka berãkurii gu si adu nga ko nika tonaha rogo songodapai kubara ga Yekova bakere pagbia yo. Gu soapai re akodi gu tatamanatatamana aboro du ngbangbaturũ yo na aguyo du auru kpotosende ane. Si naida ani berẽkurii ga Yesu ruru gene mangapai na ki bi gupai rengbe ani a ka mangaha tipa ka yugo nani nga ani naida ka songoda ga Yekova bakere pagbia.​—Eyobo 1:6-12; 2:2-6.

Ga Satana Soapai Kuti ga Yekova Bakere Pagbia

4. Ginipai Satana amangihe nga gu nakusi gu ngbangaa nadu tipa ga Yekova bakere pagbia?

⁴ Rengo ngaha nga, dagba agu apai furayo tipaha re dunduko, anga guho Satana azanga inopai tipaha te. Ko azubo bambata ‘tita’ ga Mbori ‘dee’ nibasa. (Bambata Pai 3:15) Satana aʹasadi Yesu bara biata, na gu berã nga ko mangi gupai ngba bangiriko kuba manga gupai Bako akpinyemuhe. Gu biata asada nisaha nakusi gupai nadu tipa bakere pagbia. Satana ayugu “angbi fu ko zegino dunduko, na gaha taarimo,” fuoho, ko ki yaa: “Ka mo ti sande ki irisi re, agi ahe dunduko re mi afú he foro.” Pa ruga Yesu tiko wenengai na gupai nga Bakitingbanga na ome kurii agu ‘angbi dunduko du zegino,’ si asa Yesu ko yugu gako bangiriba nibipa gu ngbangaa nadu tipa ga Yekova bakere pagbia, na ki ya fu Satana wee: “Satana, mo gúari erẽ! bambiko si ni keke he ya, ‘Mo irisi Gbia nga gamo Mbori mo rá fu kina ko.’”​—Matayo 4:8-10.

5. Gini kpakarakpakara sunge si adu nga Yesu mangihe ki nyasihe?

⁵ Gu gene Yesu aaraka ngbaha, si ayugu gupai nga, pa songoda ko gu bakere pagbia nga ga Yekova nangia bambatapai rogo gako raka yo. Yesu aima inoho nga si naida ko du niruruko dati regbo kpioko be Satana mbiko wa sangbaanebi aima fura tipaha nga i ambura gido ‘tita dee’ ambura tipa ka yugo nani nga Mbori na rengo beko kadu nibazogo. (Matayo 16:21; 17:12) Si adu a nga ko duwa ka ko yugu nani nga ga Mbori Kindo nga gu bangisa gene Yekova nika mangasunge nani ka gbarasa gu basamungu nga Satana na ki ye na zereda gbiati ruru mangapai fu gako aboro dunduko. (Matayo 6:9, 10) Ginipai Yesu amangihe tipa ka manga gi kpakarakpakara sunge i afuhe fuko re na ki nyasihe?

‘Ga Mbori Ngbii Nika Ye’

6. Wai Yesu ayugu nani nga ga Mbori Kindo nga gu bangisa gene Mbori nika mangasunge nani tipa ka ‘gbarasa ga bakitingbanga mangaapai’?

⁶ Bambatapai nga, “Yesu . . . [a]ta ye ku Gariraya yo nitungusi gu wene pangbanga nga ga Mbori. Ko ki[ni] ya, ‘Ragoho da, ga Mbori ngbi nikaye.’” (Marako 1:14, 15) Nirengo, ko ayaa: “Mi nandu ka tungusa gu wene pangbanga nga ga ga Mbori ngbi rogo kura akporo a; bambiko si du i akedi re tipa ha.” (Ruka 4:18-21, 43) Ko ata rogo ringara naabaha dunduko “nitungusi pai ki niyugu gu wene pangbanga nga ga ga Mbori ngbi.” (Ruka 8:1) Yesu amangi badungu iiriwoapai, ko arigi rimbasa aboro, na ki zaa gu bayuge naaya, ko ahusi aborokaza, na ki zingisi aboro bekpio. Nibi gu iiriwoapai Yesu amangihe re, ko ayugu nani nga Mbori ima rengba ka dia sangbana gbegberẽ apai kusayo gbiati arungo nga gu naye mbiko gu samungu namangi Edene yo, si ki tadu were, ko kini “gbarasi ga bakitingbanga mangaapai.”​—1 Yoane 3:8.

7. Ginipai Yesu ayuguhe fu apefuoko i mangihe, na sangbanaha angia gine?

⁷ Tipa gupai nga Yesu tungusi wene pangbangaa nga ga Kindo rogo arago dunduko, ko asia apefuoko na ki yugu sunge tungusapai fuyó. Ti bambataha, ko asia amokedi 12 na ko ki “kedi yo . . . [i ndu] ka tungusa pa ga Mbori ngbi.” (Ruka 9:1, 2) Kusa, ko akedi gu kurayo 70 i ndu ka gumba gu pangbangaa nga: “Ga Mbori ngbi mbedi kono du oni ni.” (Ruka 10:1, 8, 9) Ho agu amokedi re akaragatiyo ni ka tingidapa gu diabese i adu nani tingba sunge tungusapa Kindo, Yesu akaragapai fuyó ki yaa: “Mi abi Satana [ko ni]ti wa kina we gumba ngbangbaturũ yo.”​—Ruka 10:17, 18.

8. Ginipai ga Yesu gene raka ayuguhe nzunzu?

⁸ Yesu anaatungusapai kakaka na ko anaambunga amomu si susi ki zanga manga dezirepai tipa Kindo te. Ko anaamangasunge uru na yuru kakaka zanga ongoda, na ki mbu raka gu dodoroma raka aboro naarakaha. Ko ayaa: “Anya nasunga rogo yaro, azire ari yo ki sungu rogo angua; ono ba adu nga be Wiri boro ka ko pi auru he wa sa te.” (Ruka 9:58; Marako 6:31; Yoane 4:31-34) Ngbutuko mbata fu kpio Yesu, ko aya fu Pondio Pirato wee: “Gi pai i avungu re sa ni re, gi pai mi aye sa ni re ku zegino, nga ka du ni dezire rengo.” (Yoane 18:37) Ga Yesu gene raka naabaha ayugupa gupai ko aye tipaha. Si ayugu gupai nga ko aayengo mbiko gupai gbua nga kadu nibawene bayugupai watadu bamangi iiriwoapai watadu nigu boro nafu tiní tipa ka batasa aboro sa te, ono ko aye tipa ka songoda ga Yekova bakere pagbia na tipa kadu nidezire gupai nga Mbori rengbe arengba ka manga gupai ko akpinyemuhe rogo gako Kindo yo.​—Yoane 14:6.

“Si Nyasi”

9. Wai Satana adu na diabese rogo mbura gido ‘tita’ ga Mbori dee?

⁹ Agu apai naabaha Yesu amangihe tipa Kindo, si angbanga ti vurako nga Satana Bakitingbanga te. Satana anaagbata gene dedede rogo gu riigbu nga ga birĩ zogarago gbiati ga pambori tipa ka nyasa riipa ‘tita’ ga Mbori dee. Tona ti gu regbo i abatika Yesu ka dati digido gako raka auru kpotosende ane, ko adu ngbapai be Satana na apefuoko. Niyangaraha tie, rogo gu garã nangia 33 F.B.K., regbo ada tipa i fu wiri boro kube vurako tipa ko mburu gidoko. (Matayo 20:18, 19; Ruka 18:31-33) Abuku Wene Pangbangaa nayugo gupai nga, tona ti Yuda Keriota ki dati agbiamotumo, abakeapai, aFarusi, na aRomo, i Satana amangisunge naayó i saringbangaa Yesu sa gu iigira kpio ko akpihe ti ngbunduru ngua.​—Amokedi 2:22, 23.

10. Gini nyanyakipa sunge Yesu anyasihe ho ko akpi ni ti ngbunduru ngua?

¹⁰ Ginipai ninaaye ku berã roni yo ho oni naaberã ni tipa gu kere rungosi Yesu agbiaha daho ko akpi ni? Isoke gupai ninaaye ku berã roni yo nga pa gu motumo tumorii Yesu afuhe tipa aboro ingapai. (Matayo 20:28; Yoane 15:13) Iriwo gu bakere nyemuse Yekova ayuguhe rogo fuuko motumo tipa aboro rengbe arengba ka ti tironi. (Yoane 3:16) Isoke iriwopai rengbe ka sa roni oni gumba kina gu bangisapai gu barukurii aborovura nangia ga aRomo ko apehe ki yaa: “Wiri Mbori nga ko ni rengo.” (Matayo 27:54) Agu apai re dunduko daada. Ono ani natingida gu yangara fugo Yesu agumbaha ti ngbunduru ngua. Ko ayaa: “Si nyasi.” (Yoane 19:30) Ginipai nanyasi? Wa vura duhe nga Yesu aini dungu apai rogo gako raka na ti kpioko, ya mo agu apai re aadunga tipa ka digiso gu ngbangaa nadu riipa ga Yekova bakere pagbia nga gu Yesu aye tipaha ku auru kpotosende ane tee? Na ya mo i aafuranga tipa gu ‘tita dee’ re nga ko agbiatiko na dungu arungosi be Satana tipa ka ruho ka dia gbarasarimo kusayo rii Yekova tee? (Yesaya 53:3-7) Nirengo, agi asunge re angia bakere asunge, ono Yesu aima mangaha ki nyasihe dunduko. Nairiwo gu nyanyakipa sunge ko amangihe re!

11. Ginipai Yesu nika mangaha tipa ka digiso gu sangbanebi i agumbaha Edene yo?

¹¹ Tipa padu Yesu niruruko, Mbori aazingisanga ko niboro te, ono “ni gu toro nafu unga.” (1 AKorindo 15:45; 1 Petero 3:18) Ga Yekova kidohe fu gu Wiriko pako akii gbe re adu nga: “Mo súngu ku kumbabere, daho mi ka sa avuraro ni ni gbada nduro.” (Atambuahe 110:1) Agu ‘avurako’ re nga gu bakere bamangi gbegberẽ apai nga Satana, kodihe na ‘atitako.’ Nidu Yesu Kristo nigu Bakindo nga ga ga Masiya Kindo, nga gudu Yekova kuriihe dunduko, ko nika ngbembatayo tipa ka gbarasa abasamungu naabayo dunduko ngbangbaturũ yo na auru kpotosende no a. (Yugoti 12:7-9; 19:11-16; 20:1-3, 10) Fuani, gu yangara digisidigisi gu sangbanebi nga gudu rogo Bambata Pai 3:15 kini digi, wa sa na gu kparakpee Yesu ayuguhe fu apefuoko niyaa: “Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.”​—Matayo 6:10; AFiripoio 2:8-11.

Yesu Ambu Kpiapai Furani Ani Pekefuoho

12, 13. (a) Wai du ga aboro karapai kuti gu wene pangbangaa nga ga Kindo areme? (b) Gini asanahe si aida ani sana tirani nani ka si du nga ani naida ka pekafuo Kristo?

¹² Areme, i natungusa gu wene pangbangaa nga ga Kindo rogo dungu aringara, a wa Yesu aima fura tipaha kumbatayo. (Matayo 24:14) Amirioni aboro ima kpara gayó raka fu Mbori nisangbana gipai re. I na ngbarago tipa agu amaku ga Mbori Kindo nika ye nani fu aboro. I nangera kumbatayo tipa ka raka rogo pazereda na ba yo ki ngba angba rogo paradizo kpotosende, na i na ngbarago tipa ka pepa gayó maabangirise fu kura aboro. (Atambuahe 37:11; 2 Petero 3:13) Ya mo oni dagba agu abatakipande Kindo re? Kangia wo duhe, ngbaha angba i tambua roni tipaha. Ono tie, gu kurapai kinaho si aida ani nibasasa wisigipai tipaha.

¹³ Gu mokedi nangia Petero akepai ki yaa: “Kristo ahi pai a tigako tipa roni, ki he kpia pai fu roni, oni peke fuo ko.” (1 Petero 2:21) Oni kparia gupai nga, rogo gipai re, Petero afuranga tipa ga Yesu kakaka tungusapai te, watadu gako birĩ yugopai a te, ono gako hipai. Wa duhe nga Petero aima bi gupai nibangiriko namangi, ko aima ino wai Yesu aidi ka rungo tipa ka fu tiko tipa ga Yekova bakere pagbia na ka sa Satana niʹiraziree. Rogo gini agene tie rengbe ani ka pekafuo Yesu? Si naida ani sana tirani na agu asanahe nga: ‘Wai rengbe ani ka ida ka rungo tipa ka songoda ga Yekova bakere pagbia na ka irisoho? Ya mo mi nayugo nani rogo gimi mangaapai na rogo gimi kakaka sunge tungusapai nga, gu bambatapai mi aida ka mangaha, si nga ka songoda ga Yekova bakere pagbia?’​—AKorosaio 3:17.

14, 15. (a) Ginipai Yesu akaragaha tipa gu rugute naarunga ya, na tipagine? (b) Ginipai si aida ani moihe ku berã rani yo? (Oni kodi gu sanduki nga “Oni Mbakadipai Kubara Yekova Yo.”)

¹⁴ Ani naagbiatirani na fudifudiapai gbiati adiaberã na aʹuru dunduko, toonihe na bakerehe. Ginipai si aida ani mangihe sa agu apai re? Nikpiapai, ginipai rengbe ani ka mangaha ho ani agbiatirani ni na gu asada naida ani mangi gupai rengbe ka gbarasapa gu sino rani nga ga aKristano? Ginipai Yesu amangihe ho Petero ayani fuko wee pakpioko turũ aturo tiko? Yesu akaragapai fuko ki yaa: “Mo ké ku gii re yo, Satana! . . . bambiko ga Mbori pai bangiro te, kina ga aboro apai du bangiro.” (Matayo 16:21-23) Ya mo ho ani agbia sunge-marã ni watadu gu sunge rengbe ka sa rani ani rugusi gu kura gaani asunge nga ga aKristano, ani namangapai wakina Yesu rogo gu bangiriba re? Ho Yesu abi gupai ni nga agu aboro naabiko ko nimangi iiriwoapai aaida “ka zia ko, ka sa ko ni bakindo,” ko aoro aora beyo.​—Yoane 6:15.

¹⁵ Tipagine Yesu aka gupai re ti ni na agu akuraha a? Bambiko ko aima ino gupai nga, nyanyakipa pai kinaho nga gu paha aima susa gupai ka ko aberẽhe nga si du niwenehe. Ko aida ka manga gupai Bako akpinyemuhe na ka songoda ga Bako bakere pagbia rogo agene dunduko. (Matayo 26:50-54) Ka si du nga pa ga Yekova bakere pagbia rirani yo ti aregbo dunduko wa si adu tipa Yesu te, ani rengbe arengba ka manga gbegberẽpai rogo gu kura uru sa. Tipagine duhe ti ni wo? Bambiko ani ima rengba ka zio taata ti ga Satana agbina, nga gu boro ini wai ka sa irairapai si duwa rurupai bangiri boro, a wa ko amangihe ti gu regbo ko aʹasadi Eva.​—2 AKorindo 11:14; 1 Timoteo 2:14.

16. Ginihe si aida si du nga gaani bambata sásá ho ani aundo gu kura aboro ni?

¹⁶ Ho ani atungusapai ni, ani naaʹasada tirani nyanyakii tipa ka fura na aboro tipa agu apai i baka bangiriyo nani na ka yugo agu apai Ziazia Kekeapai agumbaha tipa ngbatunga agu apai re. Gere nga gu bawene gene rengbe ani ngbaha ka sa yó i duna nyemu wisigo Ziazia Kekeapai. Ono tie, anga gaani banguapai gbua nga ka undo aboro i ini gupai Ziazia Kekeapai agumbaha watadu ka gumbapa agu amaku ga Mbori Kindo nika ye nani te. Si naida ani undoyo i rugutiyo na gu ngbangaa du tipa ga Yekova bakere pagbia. Ya mo i nakpinyemu ka da nindikidi aKristano ki di gayó “wagiwagi ngua” na ki idi ka gbiatiyo na fudifudiapai tipa Kindo? (Marako 8:34) Ya mo i naida ka kodatiyo na agu aboro nasongoda ga Yekova bakere pagbia na ki yugu nani nga Satana nga iraziree? (Asanza 27:11) Si nga wenepai furani tipa ani undo tirani na ki undo gu kura aboro a i songodi ga Yekova bakere pagbia.​—1 Timoteo 4:16.

Ho Mbori Nikadu Ni “Mbata yo Fu Ahe Dunduko”

17, 18. Gini baiiriwo regbo si aida ani ngere tipaha kumbatayo ka si du nga ani nasongoda ga Yekova bakere pagbia?

¹⁷ Wa ani amanga nyanyaki asadatise awere ka yugo nani rogo gaani mangapai na gaani sunge tungusapai nga ani nasongoda ga Yekova bakere pagbia, si naida ani ngere kumbatayo tipa gu regbo Yesu Kristo nika ‘fu ngbii fu Mbori nga kina Ba.’ Gini regbo gupai re nika manga? Gu mokedi nangia Pauro asakipai tipaha ki yaa: “Ko nadigisa ga abazogo apai dunduko na asia pai dunduko na tandu. Bambiko ko ka kindo, daho ko ka maa avurako ni dunduko ku tii nduko yo. . . . Wiri tigako tie ki moi tiko ku tii gu ko namoi ahe dunduko tii ko, [tipa] Mbori du adu mbata yo fu ahe dunduko.”​—1 AKorindo 15:24, 25, 28.

¹⁸ Nairiwo gu wenepai nikangiaha ka bi gupai nga Mbori “mbata yo fu ahe dunduko”! Gupai re nika manga baraho gu Kindo re naima digiso agu apai ni du tipaha dunduko. Ti gu regbo re, si aima gbarasa agu aboro dunduko nasovura kuti ga Yekova bakere pagbia. Na si naima karaga zereda gbiati ruru mangaapai kurogo zegino dunduko. Fugo bake papara Atambuahe nayawee kusikusi ahe dunduko abibia niyaa: “Oni fú taarimo fu Yekova a wa rengbe he na rimoko; . . . Oni peke he dagba arikaaboro ki[ni] ya, ‘Yekova nazoga rago!’”​—Atambuahe 96:8, 10.

• Wia Yesu ayugu nani nga gu ngbangaa nadu tipa ga Yekova bakere pagbia, si nangia bambatapai ko anaaberãpaha rogo gako raka yo?

• Ginipai Yesu anyasihe rogo gako sunge tungusapai na rogo kpioko?

• Ngba gini agene rengbe ani ka yugo nani nga ani nasongoda ga Yekova bakere pagbia a wa Yesu amangihe?

[Study Questions]

[Sanduki/​Sura du ti kpewaraga 12]

ONI MBAKADIPAI KUBARA YEKOVA YO

Ani ima rengba ka gbiatirani na fudifudiapai a wa si adu tipa agu awirinarani nadu Korea yo na rogo gu kura arago a. Ngbaha angba ani ini ndu gupai ngbatunga gu fudifudiapai re amangi yó ti ni.

Wirina sa nikumba nga guko nadu dagba agu aboro i azi yó ti regbo gu zogarago nangia ga aboro Soviet ayaa: ‘Guhe naundo rani tipa ani hipai angia pa gia ani rogo gu ngbangaa nakuru ati Edene yo nga gu nadu riipa gu rengo dube Yekova ka zogarago. Ani aima rugatirani nani nga si naida ani songodipai kubara ga Yekova zogarago yo. Gipai re anyakasi rani na si ki sa gupai nga ani kakuti gaani ruru mangapai.’

Gu kura wirina sa agumba gupai naundo ko na agu akurako nangia aidipase bambukiso yo. Ko ayaa: ‘Yekova aima undo rani. Wa ani avura du rogo fudifudiapai, ani ayukurongo rogo toroyo te. Ani anaangarasa tirani dagbarani dedede tipa ka songodapai koyo du ga Yekova bakere pagbia ni.’

[Gu sura du ti kpewaraga 8]

Wai Yesu asongodi ga Yekova bakere pagbia ho Satana aʹasadi ko ni?

[Gu sura du ti kpewaraga 10]

Gini sunge Yesu anyasihe nikpiko ti ngua?