Ga Yekova Bakere Pagbia Na Gako Kindo

“Ako Yekova, ga pai du ni bahe, na tandu, na taarimo, na diabese, na irisa . . . ngbi nga gamo a.”​—1 PEKAPAI 29:11.

1. Tipagine rẽ Yekova ti ni kadu nigu Bakerepa Bakindo nga ga haurago ko?

“YEKOVA anyakasi gako mbatabakindo rogo angbangbaturũ yo, gako ngbi nazoga aboro dunduko.” (Atambuahe 103:19) Agi afugo bake apapara Atambuahe agumbaha re nayugo gu bangua rengo du tipa ga Yekova zogarago. Nidu Yekova Mbori nga Bakusiahe, rẽ ko arẽ tipa kadu nigu Bakerepa Bakindo nga ga haurago ko.

2. Wai Daniere afura tipa Yekova na agu awiriko nga atoro?

² Rengo ngaha, tipa bazogo zogorago, aboro duwa ka i duho tipa ní zogo yó. Bambatapai nga, Yekova atona gako zogarago kurii agu aboro nga atoro ko akusiyo. Ko aazogarago kurii bangisa Wiriko nga Yesu, fuoho, kurii rimbasa amaraika. (AKorosaio 1:15-17) Fuo gbanga regbo kusa, Mbori ayugu mboimboi gako zogarago ngbangbaturũ yo fu gu nebi nangia Daniere. Daniere agumba gupai ko abihe ki yaa: “Wa mi angera, i amoi ambatabakindo gu ko nga Bakuru Ko du ho kindi, asungu ri gako basunga . . . Aboro wa kutu akutu naamanga pa ko, aboro wa kutu bawe bara kutu bawe ki ru bara bangiriko.” (Daniere 7:9, 10) Yekova nga gu “Bakuru Ko du ho kindi,” ko aima digo nizogorago ni Bakerepa Bakindo tipa badungu abirioni agarã kurii gu rimbasa awiriko nga atoro du nimbakadimbakadiyo tipa mangaapai ti genehe, nga aguyo namangasunge nigako “amoyambu” na kini mangi agu apai ko akpinyemuhe.​—Atambuahe 103:20, 21.

3. Wai Yekova azogarago kurii gu zegino ani abihe abi?

³ Niyangaraha, Yekova akiisi gako zogarago nimbakada ko zegino duna dendekere apai rogoho wa tarã nvuranvura kodihe na kpotosende a. (Eyobo 38:4, 7) Tipa gu boro ru auru kpotosende kaa bi aũngbangbaturũ, ní nabihe nga si namangasunge kuti andiko zukazuka si ki wirihe wa si aidanga boro duho kaa rugaha te. Wa vura duhe wo, bake papara Atambuahe ayaa: “[Yekova] arugu pai, si ki du ni mangimangi he! Ko anyakasi he nye anye kindi; ko afu gu rugapai ka adiga nga a ya.” (Atambuahe 148:5, 6) Ti aregbo dunduko, Yekova naamangasunge na gako bakere pagbia rogo gu ngbii nga ga atoro kaa yugo gene fu amaraika, kini fu arugute fuyó, na kini zogorago yo na kini ngerafuo gu mangaapai nga ga gu zegino ani abihe abi.​—Nemaya 9:6.

4. Wai Yekova amangasunge na gako bakere pagbia kurii aboro?

⁴ Ho Mbori akusi bambata aboro ni, ko amangisunge na gako bakere pagbia rogo gu kura gene yo. Kupati gupai nga ka fu ahe dunduko fu aboro nga gu i aidaha tipa ka raka gu raka du na rogoyo ti ni, Yekova afu pagbia fuyó kurii agu ahe ko akusihe du auru kpotosende. (Bambata Pai 1:26-28; 2:8, 9) Sidu, si tie ziazia nga, anga gupai sa Mbori amangaha nga ka zogarago niwenehe na kini fu undo fu aboro te, ono ko nafu irisa afu a gbiati taarimo fu agu aboro ko amangiyó. Ka Adamu na Eva ara nigoyo fu ga Yekova bakere pagbia, ka i adu na gu maabangirise nga ga raka rogo gu kpuyo nangia paradizo nyeanye kindi.​—Bambata Pai 2:15-17.

5. Wai rengbe oni ka sakapai tipa gu gene Yekova amangasunge na gako bakere pagbia ngbaha?

⁵ Gini digisopai rengbe ani ka da kuti ni? Bambataha nga, Yekova aima digo nimangisunge na gako bakere pagbia kurii agu ahe dunduko ko akusihe. Uehe nga, ga Mbori zogarago nibawenehe na si nafu irisa afu fu aboro. Niyangaraha, ka ani agiasangba Mbori na kini songodi gako zogarago, si nika ye na nyenye ngbarago furani. Anga iiriwopai ngaha te ka bi wai ngbadu Davide nangia Bakindo agu aYisaraere nadumbata afõko ko yaa: “Ako Yekova, ga pai du ni bahe, na tandu, na taarimo, na diabese, na irisa; bambiko agu ahe du ngbangbaturũ yo na auru kpotosende no dunduko nga gamo; ngbi nga gamo a, Ako Yekova, mo ni kiisikiisi pa ro ku ri ahe dũ.”​—1 Pekapai 29:11.

Tipagine Ani Aida ga Mbori Kindo ti Ni

6. Gini ngbanyaa du dagba ga Mbori bakere pagbia na gako Kindo?

⁶ Wa duhe nga Yekova nga Bakindo Zegino dunduko na ki ima digo nimangisunge na gako tandu gbiati ome, tipagine tie si aida gako Kindo duadu ti ni berewe? Bazogo naamangasunge dedede na gani pagbia vurube agu aboro ní asia yó i du kurii avuru ní. Sidu, ga Mbori Kindo nga gu gene Mbori ayugo gako pagbia nga ga haurago rogoho kurii agu aboro ko akusi yó. Si nga gu gene ko azoga aboro ngbaha.

7. Tipagine Yekova akusi vovo zogarago ti ni berewe?

⁷ Yekova aima digo nizogorago ngba dungu agene na ti aregbo nibakiakia. Ko asigira vovo gene zogarago mbiko gu vovopai nakuru. Gipai re aduwo ho gu zingizingi wiri Mbori nitoro nga Satana aduni na diabese rogo biriko Adamu na Eva i samungu kuti ga Yekova zogarago. Gu samungu re angia zubo ga Mbori bakere pagbia. Rogo gini gene? Ho Satana ape gupai ni fu Eva nga ka ri ri gu zuzu ngua Mbori aya ka ri ringa ha ya, ‘ri akpinga wa sa te,’ ko ayugu nani nga Mbori nga iraziree, sidu kungbopai du gbua nangia gupai Mbori agumbaha re. Satana ape gupai berewe fu Eva nga: “Mbori ini ya ni gu rago ka oni ri zuzuhe bangironi azá aza, oni ki du wa kina Mbori, niini wenepai na gbegberẽpai.” Satana afu gu berãpai fu Adamu na Eva nga i ima rengba kadu wenengai ka i basa ga Mbori arugute na ki zanga ngera koyo du ko ni tipa ko yugu gene fuyó rogo gayó raka. (Bambata Pai 3:1-6) Gure angia kere soapai kuti ga Mbori bakere pagbia tipa ka zogarago. Ginipai Yekova amangihe?

8, 9. (a) Wai rengbe gu bazogo nga boro ka mangapai kuti gu samungu rengbe ka kura rogo gani ngbii? (b) Ginipai Yekova amangihe nibipa gu samungu nadu Edene yo?

⁸ Ginipai ani aberãha nga bazogo rengbe ka mangaha ka si du nga boro samungu kuti gani zogarago wa gu aSatana amangihe re? Agu aboro duna inohe rogo kuru apangbangaa, i ima rengba ka tingida agu apai namangi wa ngbatunga gure. Ka si vurangia kina gini ngbatunga wene bazogo du nga ní vurũ, kuba gupai nga ka basa gupai re abasa gbua, gupai ní nimangihe nga ka sarangbangaa kuti agu abasamungu re, ki peke payo nga ima kuo andiko. Fuani, gu bazogo re rengbe ka zinahe fu kura aboro i zi gu boro-mungu re tipa ka ye na zereda kubaha. Teketeke a, Yekova ayugu gupai nga, agu apai namangi re adu kina kutii gako ome ti gu regbo ko aguari niipo ka mangapai na ki saringbangaa kuti agu aboro nasamungu re. Ko asaringbangaa Adamu na Eva nga i arẽnga na nyenye unga te, na Ko ki kusiyó kusayo ati Edene yo.​—Bambata Pai 3:16-19, 22-24.

⁹ Ho Yekova asaringbangaa Satana ni, ko ayugupa gako vovo zogarago, nga gu gene zogarago nika ye na zereda gbiati rugapai fu aboro dunduko rogo gako ngbii. Mbori aya fu Satana wee: “Mi amáa sogote dagba roni na de, dagba atitaro na atitari a; ko ki mburu riro, mo ki mburu gidako.” (Bambata Pai 3:15) Yekova ayugu gupai nani nga gako ringbisapai du nga ka fu ‘tita dee’ ko gbarasi Satana na gako ome na ki yugu nani nga kina gako zogarago du niruruhe.​—Atambuahe 2:7-9; 110:1, 2.

10. (a)Da naye kadu nga gu ‘tita dee’ i agumba pako? (b) Ginipai Pauro agumbaha tipa pa digo bambata sangbanebi?

¹⁰ Gu ‘tita dee’ re angia Yesu Kristo kodihe na gu badona aboro nga gako abadia zogarago. I dunduko nakodatiyo ka kusa ga Masiya Kindo. (Daniere 7:13, 14, 27; Matayo 19:28; Ruka 12:32; 22:28-30) Ono tie, agi apai naabaha dunduko re, i aayugongo ho nibasa te. Nirengo, gu bambata sangbanebi re anye nigu ‘gbugbupai i aokoho tipa gbanga rago.’ (ARomo 16:25) Tipa dungu akama agarã, agu akumba nadu na idapase tiyó akpinyemu ka bi gu regbo gu “gbugbu pai” re kadu niyuguyuguhe ti ni naapa digo gu bambata sangbanebi du tipa dia gu gbarasarimo kusayo du ti ga Yekova bakere pagbia.​—ARomo 8:19-21.

Mbori Atona Yugo “Gbugbu Pai” Tooni Tooni

11. Ginipai Yekova ayuguhe fu Abarayama?

¹¹ A wa regbo aasusa, Yekova atona yugo gu ‘gbugbupai nga ga gako ngbii’ tooni tooni. (Marako 4:11) Boro sa dagba agu aboro yo Yekova ayugu gi gako gbugbupai re fuyo angia Abarayama, i aayamba ko nga “badiangba Mbori.” (Yakoba 2:23) Yekova amangi mokido na Abarayama ki ya Ko nika sa ngbatunga ko “ni bakere rikaaboro.” Berewe kusa, Mbori aya fu Abarayama wee: ‘Abakindo akura rogo ro yo’ na “rogo ngbatunga ro i ka fu maku ni fu arikaaboro zegino dunduko.”​—Bambata Pai 12:2, 3; 17:6; 22:17, 18.

12. Wai atita Satana akuru tingbafuo Ime Akangbii?

¹² Ti rago Abarayama, aboro anaaʹasada ka zogarago na kidu kurii akurayo. Nikpiapai, Ziazia Kekeapai nafura tipa Nimeroda nangia tita tita tita Noa ki yaa: ‘Ko adu nibambata iranyaka auru kpotosende. Ko adu ninyanyaki bamangianyaa barabangiri Yekova [“na kidu niboro sogote kuti Yekova,” NW ].’ (Bambata Pai 10:8, 9) Ziazia tie, Nimeroda gbiati gu kura abazogo namoi tiyó nisayo ni abazogo, i adu kutiibe Satana. Agu abazogo re gbiati agu aboro naasongoda yó akuru ni atita Satana.​—1 Yoane 5:19.

13. Ginipai Yekova agumbaha kumbatayo rogo Yakobo yo?

¹³ Wa vura duhe nga Satana amoi aboro ni abazogo, Yekova aandu kindi kumbatayo na gako ringbisapai. Yekova ayugupai rogo gu tita Abarayama yo nangia Yakobo ki yaa: “Ngau bakindo agúari nga be Yuda te, ka ko azánga nga bafurugute dagba ngbatungako ya, daho gu ko ka ye ni ku Siro yo [“daho Siro ka ye ni,” NW ]; angbatunga aboro agía sangbako.” (Bambata Pai 49:10) Gu fugo nga “Siro,” rogoyo nga “Guko Duhe Nigako; Iraha.” Rogo gi gene re, gu sangbanebi re ayugu gupai ngawee regbo kinaho gu boro ka ye duna rengo beni tipa ka dia “ngau bakindo,” watadu ka zogarago kurii “angbatunga aboro,” watadu arikaaboro dunduko. Da si adu nga ní nikangia gi Boro re?

“Daho Siro ka Ye Ni”

14. Gini ngbatunga mozunga Yekova amangihe na Davide?

¹⁴ Gu bambata boro Yekova asia ní rogo ngbatunga Yuda ní du nibakindo kurii aboro angia gu babanda akandoro nangia Davide, wiri Yisai.a (1 Samuere 16:1-13) Zavura gupai nga ko anaamanga ingapai amanga gbiati irairaapai, Yekova ainipai fuko mbikopa ra ko nigoko fu ga Yekova bakere pagbia. Nibi gu bambata sangbanebi nga gu nadu Edene yo, Yekova amangi mozunga na Davide ki yaa: “Mi amáa wiro fuo ro nga gu ko enge ti kina ro, ki nyakasi gako ngbi.” Gupai re aabingo kina boro gu wiri Davide nadibako rimoko angia Soromo te, mbiko gu mozunga re ayaa: ‘Mi anyakasa gako ngbii nyeanye kindi.’ Gu mozunga Yekova amangihe na Davide re ayugupa gu ‘tita dee’ i akidohe tipa ko, ya ko nika ye rogo ngbatunga Davide yo.​—2 Samuere 7:12, 13.

15. Tipagine si arengbe ti ni i niibi gu kindo nga ga Yuda nikpia ga Mbori Kindo?

¹⁵ Davide nangia bambata tita agu bakindo naabayo agbiamotumo anaambeda yó niziazia nzeme tipa i tona zogarago. I anaayamba agi abakindo re naabayo dunduko nga mbedimbedi aboro, watadu amasiya. (1 Samuere 16:13; 2 Samuere 2:4; 5:3; 1 Abakindo 1:39) Si adu nga i niisungu auru gu mbatabakindo nga ga Yekova na kini zogorago kuba Yekova ni abakindo Yerusarema yo. (2 Pekapai 9:8) Rogo gu gene re, gu kindo nga ga Yuda arukuba ga Mbori Kindo, nga gu naayugopa ga Yekova bakere pagbia.

16. Giniapai gu zogarago nangia ga agu abazogo nangia ga Yuda yo akusihe?

¹⁶ Ho aboro anaara ni fu ga Yekova bakere pagbia, Yekova anaabanda yó na kini fu maku fuyó. Gu zogarago nangia ga Soromo angia regbo zereda gbiati kumuko nga gu kura zereda na kumuko aadunga wo mbata fuhe na tingbafuoho ya. Si ayugukpia gu zogarago nga ga ga Mbori Kindo nikadu ho i nika dia gu gbegberẽ mangaapai ni nga ga Satana kusayo na ki di gbarasarimo kusayo ti ga Yekova bakere pagbia. (1 Abakindo 4:20, 25) Si nafu kina rungo tie nga, dungu agu abakindo naye rogo ngbatunga Davide yo aarakanga ringbisihe kuti gupai Yekova akpinyemuhe te, ono i atona kina irisokpiaahe na kini mangi wasiwasi apai. Niyangaraha, Yekova ambu gu kindo re aBabero gbarasihe rogo gu garã nangia 607 M.B.K. Si ki duwa Satana ima duna diabese rogo gu bangiriba re bambiko ko asa aboro i ariatiyo ti ga Yekova bakere pagbia.

17. Ginihe nayugo nani nga Yekova adu kindi na ome beko wa si avura du vurũ nga gu mokido ko mangihe na Davide tipa kindo aima gberã?

¹⁷ Pa gbarasa yó gu kindo nangia ga Davide gbiati gu kindo nangia ga aYisaraere nadu ku nodiyo angia gopai tipa sangbana ga Satana maapai kurii aboro na sangbana ra aboro niriyo zanga Mbori, ono si aayugongo gupai nga, ga Yekova zogarago nadu nigbegberẽhe te. (Asanza 16:25; Yeremaya 10:23) Tipa ka yugo nani nga Yekova aazogarago azoga kindi, ko atakipandehe rogo gu gako nebi nangia Yezekere ki yaa: “Mo dí kpakpari riro yo, ki di kpakpari bakindo ku sa yo . . . Mi amánga ha ni gbarasigbarasi he, ni gbarasigbarasi he, ni gbarasigbarasi he, wiri fuoho adú nga ho te daho gu ko ka ye ni du he ni gako, ko mi ka fu he fu ko.” (Yezekere 21:26, 27) Agi afugo re ayugu gupai ngawee gu ‘tita dee’ i akido pako re, nga gu boro kindo ‘adu nigako,’ ko atayengo te.

18. Ginipai gu maraika nga Gaburere agumbaha fu Maria?

¹⁸ Ani gbisinga awere kumbatayo kurogo gu garã nangia 2 M.B.K. Mbori akedi gu maraika nga Gaburere fuo gu ngasu dee nangia Maria naaraka Nazareta yo, nga gu gbata nadu Gariraya yo, Paresitina yo ku nodiyo. Gaburere aya furi wee: “Mo ngere, mo nikadu na mobara rukumburo yo, ki batika gude, ki yambu rimoko nga Yesu. Ko adú ni bahe, i ayá ti ko Wiri Mbori nga Bahe; Gbia Mbori amáa ko ni bakindo a wa titako adu nangia Dawidi, ko ki zogo ngbatunga Yakoba azoga kindi; gako ngbi adíga nga te.”​—Ruka 1:31-33.

19. Fuo gumbayo pa vunga Yesu, regbo gini nyanyakipa pai naambeda kada?

¹⁹ Niyangaraha, regbo yugo “gbugbu pai” aambeda. Gu bangbasia ‘tita dee’ i akidohe tipa ko aambeda tipa i batika ko. (AGaratio 4:4; 1 Timoteo 3:16) Si adu nga Satana nika mbura gidoko. Ono gu ‘tita dee’ re tigako ki mburu Satana ti riko, na ki nyasi rii pako gbiati gako mangaapai na gu nga ga apefuoko. Si adu nga ko nika digiso gu gbegberẽ apai naabaha nga ga Satana tipa ka dia gbarasarimo kusayo ti ga Yekova bakere pagbia. (AEbere 2:14; 1 Yoane 3:8) Wai Yesu arengbe ka manga gipai re? Gini kpiapai ko ambuhe furani ani pekefuoho? Ani nika gbia karagapai kuti agi asasanahe re rogo gu papara kekepai naye fuo gere.

[Gu rukutu kekepai du bandu waraga yo]

Oni Rengbe ka Sakarogoyo?

• Gine nasa Yekova ko rẽ nigu Bakerepa Bakindo nga ga haurago ko?

• Tipagine Yekova adiberã ti ni ka karaga gako Kindo berewe?

• Wai Yekova atona yugo gako “gbugbu pai” tooni tooni?

• Gine nayugo nani nga Yekova adu kindi na ome beko wa si avura du nga ga Davide kindo aima ti?

[Gu sura du ti kpewaraga 5]

Ginipai Yekova aima gumbaha kumbatayo rogo Abarayama yo?

[Gu sura du ti kpewaraga 7]

Tipagine pa gbarasa gu kindo nangia ga Davide aayugongo gupai ti ni nga Yekova arengbanga ka zogarago berewe te ya?