Oni Songodi ga Yekova Bakere Pagbia!

1, 2. Wadu ani ni basasa dũ, ginipai si aida ani idi kutini? (Oni bi gu sura duti tonatonaha.)

A WA ani asakihe rogo gu kekeapai gere nangbefuo ho, Bakitingbanga agumba gupai nga Yekova nazogarago ngba gbegberẽ gene na aboro rengbe kadu wenengai ka si du nga i nazoga tiyo. Ya mo ru ga Satana pai aru? Na ka i niya agu aboro naasia ka zoga tiyo arengbe ka raka nyeanye kindi. Ya mo ka i du wenengai zanga ga Mbori zogarago? Ya mo ka mo arengbe kadu na bakere ngbarago ka mo adu na ranirii ka manga ai pai na kini raki nyeanye kindi?

² Boro ho rengbe ka karagapai kuti agu asanahe re foro te. Boro na boro si aida ni berẽkurii gupai re. Ho mo amangaha ni wo, si naida si du ziazia nga ga Yekova bakere pagbia ni ruruhe. Si nga yangara bawene zogarago. Na si rẽarẽ ani songodihe na kpotoraniyo dũ. Gupai idi ani kutini re, mburuhe rii Ziazia Kekeapai. Ni kpiapai, oni bingo gupai Ziazia Kekeapai apehe furani nibipa gu rengo du Yekova na ni kadu na bakere pagbia beko.

YEKOVA NA RENGO BEKO KA ZOGARAGO

3. Tipagine kina Yekova narẽ ti ni ni Bakere Bakindo?

³ Yekova du du na rengo beko kadu ni gu Bakere Bakindo nga ga zegino dunduko biko ko nga gu Mbori du na tanduapai dũ na ni Bakusiahe. (1 Peka 29:11; Amo. 4:​24) Rogo Yugoti 4:​11, i yugu kpia agu aboro rogo yuguyugupai yo du bangeyo nga 144,000 nga aguyo nika zogarago na Kristo i ni ya: “Mo gaani Gbia nga gaani Mbori, re mo are na dia taarimo na irisa na tandu, bambiko mo nafu ahe dunduko, si adu ho mbiko sangbaro, ki du ni mangimangi he.” Nirengo, mbiko Yekova nakusi ahe dunduko, ko na rengo beko ka zoga aboro gbiati agu aboro nga atoro.

4. Tipagine du samungu kuti ga Yekova bakere pagbia ti ni nga gbegberẽ mangasunge na ranirii ka siapai?

⁴ He ho Satana akusihe te. Nibi gipai re, rengo beko ka zoga zegino te. Ho ko gbiati gu bambata aboro ue asamungu ni kuti ga Yekova bakere pagbia, gure nga i amangipai na rukö. (Yere. 10:23) Rengo du tigu nga, wa Mbori akusiyo na ranirii ka siapai, i aima rengba ka sia ka zanga du tii ga Mbori pagbia. Ono ya mo si afu rengo fuyo i mangihe wo? Wagusa te. Ranirii ka manga siapai naundo aboro i naamanga agu asiapai na aʹuru dunduko ruaru. Ono tie, si afunga rengo fuyo i samungu kuti Bakusiahe na Bafu-Unga te. Si tie ziazia nga, samungu kuti Yekova nga gbegberẽ mangasunge na ranirii ka siapai. Wangia ani aboro, tii ga Yekova ruru zogarago yo du du gaani bangiriba ni.

5. Tipagine rengbe ani kadu na gu kido ti ni nga ga Yekova adiaberã dũ ni ruruhe?

⁵ Kura ndupai kinaho berewe du Yekova ti ni na rengo beko kadu nga Bakere Bakindo. Ko nazogarago na ruru sarangbanga. Ko atakipande gupai nga: “Mi nga Yekova namanga weneringise, na sarangbanga, na rurupai auru kpotosende; bambiko rago angba ti re tipa agi apai re.” (Yere. 9:​24) Anga agu andiko du ni kekehe nga ga kpakpa aboro du ko amangasunge na ni ka diaberã tipa gupai du ni ruruhe na ni wenehe te. Padu ko na ruru sarangbanga naenga kina tiko, na ko afu andiko du ni kekehe fu aboro rii mburu gupai re. “Rurupai na ruru sarangbanga du ni mburu [gako] mbatabakindo,” sidu, ani ima rengba kadu na gu kido nga gako andiko, arugute na adiaberã dunduko du ni ruruhe. (Tam. 89:14; 119:128) Gu kparakparapai du dagbako na Satana nga, wa Satana avura gumba gupai nga ga Yekova zogarago ni gbegberẽhe, Satana arengbanga ka kusa gu zegino du na rurupai rogoho ti aregbo dunduko te.

6. Gini ndupai sa Yekova narẽ ti ni ka zoga zegino?

⁶ Kurigure, Yekova rẽ ni Bakere Bakindo mbiko ko du na gu inohe gbiati tatamana si aidaha tipa ka ngerafuo zegino. Ni kpiapai, oni berẽnga kuriipa gu rengo nga Mbori afu ome fu Wiriko ko husi agu akaza amunganga aarengbanga ka husaha ya. (Mt. 4:​23, 24; Mk. 5:​25-​29) Iʹiriwopai nangiaha bangiri Yekova te. Ko ima rugatiko na gupai namanga na ko gu duadu na ome ka mbakada guhe kubaha gberẽ. Gure nga kina gu ngisapai du nibipa gu ome du tiko ka zingisa aboro be kpio na ka rugusa agu agberãngo naye be gu mangaapai nga ga ome zegino.

7. Wai du ga Yekova tatamana nasusi gu nga ga gu zegino du kutiibe Satana?

⁷ Gu zegino du kutiibe Satana nagbata gene kindi ka mbakada agu atagbagapai nga ga ringara gbiati gu nga ga zegino. kina Yekova sa du na tatamana ka ye na zereda ku rogo zegino. (Yes. 2:​3, 4; 54:13) Wa ani kaa wirikapai tipa ga Yekova inohe gbiati gako tatamana, si nika sarani ani du wakina gu mokedi nangia Pauro nga guko ga Mbori toro adu kugiiko ko kepai ki ya: “Ako gu dungura nga ga gu ũkumuko nga ga Mbori tatamana na inahe! Na gasi wisiga gako andika, na gasi rugatise na gako mangaapai!”​—Rom. 11:33.

GA YEKOVA ZOGARAGO NGA YANGARA BAWENE ZOGARAGO

8. Ginipai nazio ngbaduroniyo nibipa gu gene Yekova azogarago ngbaha?

⁸ Anga kina ga Yekova rengo ka zogarago sa Ziazia Kekeapai afura tipaha te. Si nayugo ndu gupai a du gako bakere pagbia ti ni ni bawenehe kisusi ga kura aboro. Ndupai sa nga ko nazogarago na nyemuse. Nirengo, wai ko amangapai na gako bakere pagbia nazio ngbadurani yo azio. Ko na “nunga aboro na undahe ti ko, du ni bayee ko tipa zinga, ki du na inapai kpaima na rengo.” (Gate 34:6) Mbori namangapai na gu gako amoyambu nga aboro rogo pa irisa. Ko nangerafuo rani kisusi wai rengbe ani ka ngerafuo tirani. Gupai Bakitingbanga agumbaha nga ziree, Yekova akanga na wenepai be ruru airisiko te. Nirengo, zavura ko afu bawene Wiriko tipa wa ka ani du na maabangirise tipa nyenye raka!​—Oni gedi Atambuahe 84:11; ARomo 8:​32.

9. Wai du ani aino gupai nga Mbori naberãpa gako aboro aberã wa du yo ni basasa?

⁹ Yekova angeranga sa fuo gako aboro wa du yo ni badona te. Ko a na nyemu yo tiko wa du yo ni basasa dunduko. Ni kpiapai, oni berãnga pa agu agarã biata kama nga gu Yekova anaamaa abasapungbanga rogoho kini fu ome fuyo i nibatasi aYisaraere be avurayo. Ti gu kere regbo re, ko aazanganga gbe berãko fuo Ruta nga guri naadunga ni Yisaraere ya te. Ri ambupa kura apai ki aria tiri ku rogo ndikidi irisombori. Yekova afu maku fu Ruta, ri ki di kumba na ki vungu kumbagude. Gari amaku aarengbanga kina kuo te. Ho i nika zingisa Ruta ni, ri nika ye ka ino gupai nga wiiri angia tita Masiya. Na oni bingo gu bakere ngbarago ri nika du na ni ka ino gupai nga i aima banda gu pangbanga du tipa ri rogo gu kitabu yo nga ga Ziazia kekeapai du na rimori kuriihe!​—Ruta 4:​13; Mt. 1:​5, 16.

10. Tipagine adunga ga Yekova bakere pagbia ti ni ni kerehe ya?

¹⁰ Ga Yekova gene zogarago ni kerehe te na si arungosingo aboro te. Si nafu ranirii fu aboro na kini ye na ngbarago. (2 Kor. 3:​17) Davide afura tipaha ngba gi gene re: “Irisa du bara bangiriko [Mbori] na bairiwo; ome du rogo gako ba na ngbarago.” (1 Peka 16:​7, 27) Wakina gure a, gu bake papara Atambuahe nangia Etana akepai ki ya: “Aboro maku nga agu yo naina woro ngbiko ngbarago. Ako Yekova, i nata rogo ima kpakpuro. Nga agu yo nadu pusiapusia mbiko rimoro na uru pitipiti, i nakiisa pa tiyo na ga rurupai.”​—Tam. 89:15, 16.

11. Wai du rengbe ani ka nyakasa gaani ida kuti gupai nga ga Yekova bakere pagbia ni bawenehe kisusi?

¹¹ Berãkurii wai du Yekova ni wene ko ima rengba ka nyakasa gaani ida kuti gupai nga gako zogarago nga yangara bawene zogarago. Ani naye kadu na gu berã bake papara Atambuahe adu na ni, nga guko naya: “Uru sa rogo gamo avurukporo ngba susi 1,000 rogo kura ba!” (Tam. 84:10) Wai du duhe wo? Nidu Yekova ni gu Bakusiahe du na nyemuse, ko ima ino agu apai ani aidaha tipa kadu nzunzu na ngbarago, na ko namanga agu apai re amanga furani ni bakerehe. Ai gupai ko akpinyemuhe berani, si tipa kina gaani undo na si naye na bakere ngbarago furani. Gipai re nga rengo ka si vura du vurũ nga gupai ko aidaha berani naida ani mbupa kura gaani apai ambu.​—Oni gedi Yesaya 48:17.

12. Gini banguapai nafõrani ani songodi ga Yekova bakere pagbia?

¹² Ziazia Kekeapai nape gupai nga tingbafuo ga Kristo Zogarago Tipa Agarã Kutu, kura aboro kinaho nika sia ka samungu kuti ga Yekova bakere pagbia. (Yugo. 20:​7, 8) Ginipai si awira wa si nika sayo i mangipai wa gure? Zanga kapa, Satana i nika kusako bambukiso yo, nga guko naima du na nyemu nanga ngbatunga aboro dunduko nika mangasunge na gbangbati. A wa ko aima digo nimangihe. Si ima rengba kadu nga ko nika nanga aboro nga gene kinaho rengbe aboro ka raka nyeanye kindi ngbaha zanga giasangba Yekova. Rengo ngaha nga, ka gupai re dunga ni rengo te. Ono gupai duho berewe nga: Ya mo ngbatunga ziree wa gure angba tirani? Ka ani akpinyemu Yekova na kini mangisunge fuko mbiko padu ko ni wene ko na mbiko padu ko ni gu Bakere Bakindo rẽ tipa zegino, ani idinga na gu ngbatunga ga Bakitingbanga ziree re te. Ani idi ka raka kina tii ga Yekova ruru wene zogarago angianga kura zogarago ya.

ONI SONGODI GA MBORI BAKERE PAGBIA NI RURURONI

13. Wai du pa wirika ani Mbori ayugo gupai nga ani nasongoda gako bakere pagbia?

¹³ Nirengo, si rẽarẽ ani songodi ga Yekova bakere pagbia na kpotoraniyo dũ. Awa ani nabihe, ko na rengo beko ka zogarago, na gako gene zogarago ngba kisusi. Ani rengbe ka songoda ga Yekova bakere pagbia ni ka ani kuti gaani ruru mangaapai na ni manga ani sunge fu Mbori ni rururani. Gini kura gene berewe rengbe ani ka songodaha ngbaha? Ani rengbe ka mangaha wo ni manga ani apai wai Yekova amanga apai. Ho ani amanga apai ni kina wai ka Yekova ni mangihe, ani nayugo gupai nga ani ima kpinyemu gako gene zogarago na ani nasongodaha.​—Oni gedi AEfeso 5:​1, 2.

14. Wai rengbe abaakumba gbiati abariikporo ka wirika Yekova?

¹⁴ Ho ani awisigo Ziazia Kekeapai ni, ani nawirika gupai nga Yekova namangasunge na gako pagbia ni nyemuse. Na ngbanya kuti gipai re, si aidanga abariikporo gbiati abaakumba nga aguyo nakpinyemu gako bakere pagbia naamanga apai ngba ome, si ki du wa ka i ya i na kina gayo wiri umba bakere pagbia te. Kuba gure, si naida i wiriki ga Yekova kpiapai. Pauro angia gu boro naawirika Mbori na Wiriko. (1 Kor. 11:1) Pauro aabanga zee ti aboro watadu ka manga yo ngbaome i mangi gupai naadu ni wene te. Kuba gure, ko anaazungodi yo azungodi. (Rom. 12:1; Ef. 4:1; Frm. 8-​10) Gure nga gu gene Yekova amangaapai ngbaha. Sidu, agu aboro dunduko nakpinyemu gu gene ko azogarago ngbaha na kini songodihe, si naida i naamangapai wa kina gure.

15. Wai du yugo irisa tipa gu ngerakurii apai nga ga siokrasia ayugo gaani nyemuse tipa gu gene Yekova azogarago ngbaha?

¹⁵ Wai du ani amangapai kuti gu ngerakurii apai Mbori namoihe? Ani nasongoda ga Yekova bakere pagbia ho ani adia agu arugapai ni i afuhe furani kugume. Zavura ka si vura du vurũ nga ani aruganga tirani na gu diaberã i namangihe watadu ani adanga kutini te, si naida aida ani pekefuo gu rugapai nga ga siokrasia. Gipai re kia ti gu gene mangaapai nga ga zegino, ono si nga gu gene raka nga ga gu zogarago nga ga Yekova. (Ef. 5:​22, 23; 6:​1-3; Eb. 13:17) Ani nagbia undo ti mangaha wo, bambiko Mbori naida gupai du ni wenehe tipa rani.

16. Wai du agu aboro nasongoda ga Mbori bakere pagbia amanga gayo adiaberã?

¹⁶ Ani ima rengba a ka songoda ga Mbori bakere pagbia na agu adiaberã ani amangaha. Ga Yekova pai nga ka fu andiko tipa ngbatunga apai dunduko te. Kuba gure, ko nanungusa rani, si kini sarani ani ini gako aberã. Ni kpiapai, ko afunga dendekere andiko fu aKristano tipa vo roko te. Kuba gure, ko nayugo gupai ko aidaha nga ani sia gu ngbatunga vo roko na mbakadatise nayugo pa umbasitise na nga gu rẽ tipa agu aKristano namangasunge fu Mbori. (1 Tim. 2:​9, 10) Ko aidanga a ani kotosi kura aboro watadu ka mbusa sangbakpotoyo yo na gaani adiaberã te. (1 Kor. 10:31-​33) Ho ani amanganga pai ni mbiko gupai ngba tirani ya, ono gbe mbiko ga Yekova berãpai gbiati gupai ko aidaha, ani nayugo gupai nga ani nasongoda gako zogarago.

17, 18. Gini agene rengbe arogotise ka yugo gupai ngbaha nga i nasongoda ga Yekova bakere pagbia?

¹⁷ Oni bingo gu bangiriba rengbe agu arogotise nga aKristano ka songoda ga Yekova gene mangaapai gbiati gako bakere pagbia rogoho. Na ka si du nga gu raka nga ga rogatise ima kpakara kisusi wai oni aaberãha? Ka si du nga rogatise naye na kina gberãrago. Si adu ni wenepai ka oni ru ka berãkurii gu gene Yekova amangipai ngbaha na aYisaraere. Ko aya tipa tiko ko adu wa kina kumbaku gu rikaaboro naadu bakuru kusayo re. (Yes. 54:5; 62:4) Nairiwo gu ngbatunga kere “rogatise” naadu re! Ono wa si avura duwo, Yekova aadianga berã ni ipo ka mbuhe te. Ko anaahipai dedede fuyo na kini kakuti gako mozunga na yo. (Oni Atambuahe 106:43-​45.) Ya mo gu ngbatunga bangabanga nyemuse re ambedisanga rani na Yekova te?

¹⁸ Na ngbanya kuti gipai re, agu arogotise nakpinyemu gu gene Yekova amanga apai ngbaha nawirika gako kpiapai. Ho du kpakarapai ni rogo gayo rogatise, i agbatanga mbutise tipa gupai Ziazia Kekeapai apenga paha ya te. I natingida gupai nga Yekova ima kpamia yo sa na ko naida i “ka kuti” tiyo. Gupai sa Ziazia Kekeapai apepaha rengbe ka ye na mbutise na ki mbugene fu boro ni mangi rogatise berewe nga bäri. (Mt. 19:​5, 6, 9) Ho i amanga ome ni kaa gbia ngbarago kina rogo gayo rogatise na kini gbata agene ka mbakada gu kpakarapai du yo rogoho, gure nga i nasongoda gu gene zogarago nga ga Mbori.

19. Ka ani mangi ingahe, ginipai si aida ani mangihe?

¹⁹ Mbiko gupai nga ani nga kpakpa aboro, kura aregbo kinaho ani kaa manga agu apai amanga naba gberãrago ti Yekova. Ko ima ino gipai re na ko ima manga mbakadapai furani ni nyemuse vurube ga Kristo motumo tumorii. Sidu, ho ani amanga aingahe ni, si naida ani sana Yekova ko mbupai furani. (1 Yo. 2:​1, 2) Kuba gupai nga kaa kitangbanga tirani akita kindi, si naida ani mangi nyanyaki asadatise ka wirikapai ti gaani aingahe. Ka ani nye mbembedi na Yekova, ko nika mbupai furani na ki undo rani ani da kuba rani na ani mangipai ngba wene gene kumbatayo kuti ngbatunga agu apai re.​—Tam. 103:3.

20. Tipagine si aida ani songodi ga Yekova bakere pagbia ti ni awere?

²⁰ Rogo vovo zegino, aboro dunduko nika du tii gu bakere pagbia nga ga Yekova na ki wiriki gako ruru agene. (Yes. 11:9) Ono tie, ani nagbia bakere gu wirikapai re agbia awere. Na pa mbakada gupai du tipa ga Yekova bakere pagbia awere ngba gene. Awere nga regbo furani ani songodi ga Mbori bakere pagbia ni ka ani kuti gaani ruru mangaapai, ni manga ani sunge fu Mbori, na ni manga ani nyanyaki asadatise ka wirika ko rogo agu apai yo dunduko ani amangaha.