Agu Aboro Rẽ Na Ga Mbori Ngbii

“Si nga dezire ga Mbori ruru sapangbanga; ya i bi roni oni re na ga Mbori ngbi.”—2 TESA. 1:5.

1, 2. Gini ga Mbori ringbisapai duho tipa sapangbangaa, na da i nafu gu sunge re funi?

BARA rogo gu garã nangia 50 Fuo Batikayo Kristo, gu mokedi nangia Pauro adu Atenai yo. Ho rago agberẽ ni tiko mbiko gu irisokpiaahe namoipai rogo gu ringara re, si asa gupai nga ko mangi fofoi dezirepai fu aboro. Ko adigisi fugoko na gupai si awiraha nga si aima gbeberã agu aboro naagiaha nangia apagano. Ko ayaa: “Awere [Mbori] naruga aboro ya i sa gayo berã dunduko rogo kpotosende dũ; bambiko ko aringbisi rame, ko nikasapa ngbanga zegino ni rurupai rogo yo be gu kumba ko aasia paha fu ko. Ko . . . [afu gopai tipa gipai re] fu aboro dunduko i ini gere ti ni, wa ko azingisi ko be kpio dagba akangba.”—Amo. 17:30, 31.

² Nairiwo wai gupai re asa boro ní berẽ nga, Mbori ima ringbisa gu regbo ko nika sapangbangaa aboro ti ni! Gu boro Mbori nafu gu sunge nga ga sapangbangaa aboro funi re nga gu kumba Pauro afura tipa ko rogo gu gako tungusapai nadu Atenai yo re, ono ka ko ayambanga rimoko ya. Ono ani ima ino nga Yesu Kristo du ko aafura tipa ko. Yesu nika sapangbangaa aboro tipa unga, ki sapungbangaa aguyo sa kpio.

3. Tipagine Yekova amangi mozunga ti ni na Abarayama, na da namanga kparakpara sunge areme tipa ka sa ga Mbori mozunga si mangi gupai ko akpinyemuhe?

³ Gu rame sapangbangaa re, si nikadu nga agarã 1,000. Yesu nikaa ngerakuriihe nirimo Yekova ni Bakindo ga Mbori Kindo, ono ko adunga nisako te. Yekova ima sia kura aboro auru kpotosende tipa i zogorago na Yesu na kini sapungbangaa aboro vuru agu agarã 1,000 duwa rame sa re. (Oni ringbisinga ha na Ruka 22:29, 30.) Agarã wa 4,000 kusayo, Yekova amoimburu gu Regbo Sapangbangaa re ho ko amangi mozunga ni na Abarayama. (Oni gedi Bambata Pai 22:17, 18.) Gu mozunga re atona mangasunge rogo gu garã nangia 1943 M.B.K. Nirengo, Abarayama aarengbanga ka ino gupai nzunzu gu mozunga re nika mangaha fu ngbatunga aboro te. Ono areme, ani nabi gupai nga wa du ngbatunga Abarayama tii gu mozunga re, i namanga kparakpara sunge tipa ka manga gu ga Mbori ringbisapai du tipa sapangbangaa aboro.

4, 5. (a) Da nga gu bambata ngbatunga Abarayama pani nanyaki gbe, na ginipai ní agumbaha tipa ga Mbori Kindo? (b) Ti gini regbo i afu gu maabangirise fu aboro nga ga rimo ga Mbori ngbii?

⁴ Gu bambata ngbatunga Abarayama pani anyaki gbe angia Yesu, i ambedi ko niziazia toro rogo gu garã nangia 29 F.B.K., ko ki da nigu Masiya i akido pako, watadu Kristo. (Gara. 3:16) Agu agarã biata na beberehe naye tifuoho, Yesu adihe kuti tungusa gu wene pangbangaa nga ga Kindo fu gu rikaaboro nangia aYuda. Fuo zioyo Yoane Babapatiza, Yesu ayugu gupai nga kura aboro kinaho nika rimo ga Mbori ngbii ho ko ayani wee: “Tona ti rago Yoane Babapatiza, gu ngbi nga ga ngbangbaturũ nahi vura da ku awere, aboro vura nadia ha bambiko gbe he.”—Mt. 11:12.

⁵ Mbata fu Yesu fura tipa agu aboro nika ‘dia’ gu ngbii nga ga ngbangbaturũ, ko ayaa: “Ya mi fu roni ni rengo, dagba agu yo ade avunga yo, a nga gu ni sa susi Yoane Babapatiza te. Ono gu ni du ni umba pa aboro rogo gu ngbi nga ga ngbangbaturũ ni susi ko.” (Mt. 11:11) Tipagine ko agumba gupai re ti ni? Ko agumbaha wo bambiko gu maabangirise du tipa kadu rogo ga Mbori Kindo, i aayugongo ho fu ruru aboro te daho i auka ziazia toro ni kurii abawiriki rago Pendekote rogo gu garã nangia 33 F.B.K. Ti gu regbo re, Yoane Babapatiza aima kpi.—Amo. 2:1-4.

I Abi Ngbatunga Abarayama Niruru Aboro

6, 7. (a) Ngba gini gene ngbatunga Abarayama ange kidu “wa kina akerekuru ngbangbaturũ yo”? (b) Gini maku Abarayama agbiaha, na gini maku a du wakina ha ngbatungako agbiaha?

⁶ Mbori aya fu Abarayama wee ngbatungako nika nge “wa kina akerekuru ngbangbaturũ yo” na wakina ngume pangba baime. (Bam. P. 13:16; 22:17) Ka gumbaha ngba kura agene, ti regbo Abarayama, boro ho narengbe ka ino aboro wai nikadu rogo gi ngbatunga ko re te. Ono tie, ndikidi bange agu awiriko angianga ga borose yó ya, i aye ka kusaha kusa. Bangeyo nga 144,000 gbiakuti Yesu.—Yugo. 7:4; 14:1.

⁷ Ziazia Kekeapai nafura tipa ga Abarayama idapase kini yaa: ‘Abarayama aidi pa Yekova, Yekova ki gedihe fuko nirurupai.’ (Bam. P. 15:5, 6) Ka gumba rengo nzunzu, boro ho namanga rurupai zanga manga irairapai te. (Yak. 3:2) Ono mbiko gu bakere idapase nangia ga Abarayama, Yekova amangipai naako si kidu wa ko angia ruru boro, na ko kini yambu ko a nga badiangbako. (Yes. 41:8) Agu aboro du rogo ngbatunga Abarayama kodihe na Yesu, Yekova nabiyo a ya i niruruyo, na si nasa gupai nga i gbia bakere amaku kisusi gu nangia ga Abarayama.

8. Gini amaku du tipa agu aboro du rogo ngbatunga Abarayama?

⁸ I nabi mbedimbedi aKristano niruru aboro mbiko i na idapase kuti gu motumo tumorii nga ga Yesu. (Rom. 3:24, 28) Yekova nabiyo wa ingaapai tiyó te, na ko nambeda yó niziazia toro i dani agu aboro nada ni awiri Mbori mbiko ziazia toro, na i kingia awirina Yesu. (Yo. 1:12, 13) I naye kurogo vovo mokido na ki da nivovo rikaaboro, nga “ga Mbori Yisaraere.” (Gara. 6:16; Ruka 22:20) Nairiwo gu bakere momu i agbiaha re! Mbiko agi apai Mbori namangihe tipa mbedimbedi aKristano re, i amaanga bangiriyo tipa ka raka nyeanye kindi auru kpotosende ane te. I namaabangiriyo tigayo tipa ka gbia gu ngbarago ani arengbanga ka fura tipaha ya, bambiko i nikadu na Yesu ti Regbo Sapangbangaa na kini zogorago naako ngbangbaturũ yo.—Oni gedi ARomo 8:17.

9, 10. (a) Ti gini regbo i ambedi aKristano niziazia toro nibambataha, na si aidi ginipai beyo? (b) Gini undo mbedimbedi aKristano agbiaha rogo bambata sa kama agarã?

⁹ Ti rago Pendekote rogo gu garã nangia 33 F.B.K., badona nga ga ruru aboro agbia gu momu nga ka du dagba agu aboro nika zogarago na Yesu ti Regbo Sapangbangaa. Ga Yesu abawiriki bangeyo aduwa 120 i abapatiza yó niziazia toro, i kini da nibambata mbedimbedi aKristano. Ono tie, gure angia tonatonapai fuyó gbua. Si aidi gupai nga, tona ti gu regbo re ka ndu kumbatayo, si naida i nye niruruyo fu Yekova ka Satana vura ye na aʹasada kutiyo kina wai vurũ. Tipa i gbia kpakpari gu unga du ngbangbaturũ yo, si aidi i nye niruruyo dati kpio.—Yugo. 2:10.

¹⁰ Mbiko gipai re, Yekova azungodi mbedimbedi aKristano na kini ngarasi yó rogo Fugoko yo na rogo gu dungurati nga ga aKristano ho si aniidi ni ko mangihe wo. Nikpiapai, gu mokedi nangia Pauro akepai fu gu mbedimbedi aKristano nadu Tesaronike yo ki yaa: “Wa ini oni gu pai ani amangi fu roni dunduko ni ba sa sa, a wa ba nimangi fu awirini, ki ta zungadi roni, ningarasi roni, nigumba pai fu roni, ya oni nita wa rengbe he ku bangiri Mbori, nayamba roni ku rogo gako ngbi yo na gako taarimo.”—1 Tesa. 2:11, 12.

11. Giniapai Yekova akehe tipa “ga Mbori Yisaraere”?

¹¹ Fuo susa agarã wa 60 tingbafuo sia yó avuru gu dungurati nga ga mbedimbedi aKristano, Yekova abi gupai nga si daada i kepa agu apai Yesu amangihe auru kpotosende na wai ko aamangasunge na gu mbedimbedi aKristano nadu rogo bambata sa kama agarã. Rogo gi gene re, Yekova kini gbia gu papara Ziazia Kekeapai i naayambaha nga Vovo Ndika kuti gu naima duho mbata nga Kuru Ndika. Gu bambata aboro i ake Kuru Ndika tipa yó angia gu rikaaboro nangia aYisaraere ti gu regbo i adu na kparakpara pagume dagbayo na Mbori. Gu bambata aboro i ake Vovo Ndika tipa yó angia “ga Mbori Yisaraere,” nga agu aboro i ambedi yó niziazia toro i kini da ni awiri Mbori mbiko toro na ni awirina Yesu. Ono gure aayugonga gupai nga gu boro naangianga wiri Yisaraere ya, ní aarengbanga ka gbia bakere undo behe te te. Wakina gure a, agu aKristano adunga nimbedimbedi yó niziazia toro ya, i nagbia bakere undo kisusi mbiko geda yó Vovo Ndika na kini raki ringbisihe kuti agu apai du rogoho.—Oni gedi 2 Timoteo 3:15-17.

12. Ginipai Pauro atingidi mbedimbedi aKristano nani?

¹² Yekova abi agu aKristano nadu rogo bambata sa kama agarã niruru aboro na ki mbedi yó niziazia toro na gu nduhe nga ka sa yó i di gayo ũkumbo ngbangbaturũ yo. Pa mbeda ko yó niziazia toro aatumbasingo payo kuari ni abakindo kurii akurayo mbedimbedi aKristano ho i adu ní kindi auru kpotosende te. Ono gopai nayugo gupai nga, kura aKristano kinaho dagba aguyo nadumbata naagbata gene ka tumbasi tiyó kuari kurii agu awirinayo nadu rogo dungurati. Si ki tadu wo, Pauro kini mo ka sanahe ki yaa: “Ya oni oni aima mbika, oni aima kumuko, oni ada rogo gaoni ngbi he rani. Ii, ka oni ye ku rogo gaoni ngbi ka si angba ti re; ani du rogo ho na oni.” (1 Kor. 4:8) Sidu tie, Pauro atingidi gu mbedimbedi aKristano nadu ti ragoko ki yaa: “A nga ani du na pa zoga gaoni idapase te, ono ani nga amounda gaoni ngbarago.”—2 Kor. 1:24.

Si Naida Bangeyo Rengbe

13. Wai pa siaka mbedimbedi aKristano andu kumbatayo tingbafuo gu garã nangia 33 F.B.K.?

¹³ Mbori aasianga mbedimbedi aKristano dunduko kina rogo bambata sa kama agarã te. Mbori aasia mbedimbedi aKristano asia kindi ti regbo amokedi, na rogo agu agarã naye tifuoho, ono ko kini sia kina bete yó gbua. Ono tie, ko aasia yó kindi vuru agu agarã naye tifuoho ki da ku areme. (Mt. 28:20) Fuo tona Yesu ka zogarago ngbangbaturũ yo rogo 1914, apai atona ka ndu kumbatayo niipo.

14, 15. Ginipai namanga ti gi gaani regbo re nibipa siaka mbedimbedi aKristano?

¹⁴ Gu bambatapai Yesu amangihe nga, ko agirisi ngbangbaturũ ki di gu sogote nadu yo kuti ga Yekova zogarago kusayo. (Oni gedi Yugoti 12:10, 12) Fuoho, ko ki moiberãko tie tipa ka dungura yangara avuru ga Mbori Kindo tipa bangeyo rengbe nga 144,000. Bara rogo gu garã nangia 1935, bange mbedimbedi aKristano aima mbeda ka rengba, na badungu agu aboro naaida na wene pangbangaa, i aadunga na nyemu ka ndu ku ngbangbaturũ yo te. Toro aamanganga dezirepai fuyó ki ya i nga awiri Mbori te. (Oni ringbisinga ha na ARomo 8:16.) Ono i abi tiyó nga i dagba gu “kura akandoro,” du tigayo na maabangirise ka raka nyeanye kindi auru paradizo kpotosende. (Yo. 10:16) Sidu, tingbafuo 1935, sunge tungusapai adu gbe tipa ka dungura “bakere rimbasa aboro,” nga aguyo gu mokedi nangia Yoane abiyo rogo yuguyugupai yo, nga agu aboro nika bata ti regbo “bakere gberãngbi.”—Yugo. 7:9, 10, 14.

¹⁵ Ono wa vura duhe wo, bete aboro kinaho i asiayo tona bara rogo gu garã nga 1935 kada ku areme tipa i ndu ku ngbangbaturũ yo. Tipagine? Si rengbe kadu nga kura aboro kinaho dagba gu vovo yó i asia yó re i amaa yó kuba aguyo naduho mbata niruru aboro, ono i ki ima ti. (Oni ringbisinga ha na Yugoti 3:16.) Pauro aima fura a tipa agu aboro ko aima inoyo nambu rengo. (Frp. 3:17-19) Ono ada rengbe Yekova ka sia yó i du kuba aguyo nati? Kina ko ini gu ngbatunga aboro ko aida ka sia yó. Ono si nawira gupai gbe nga ko arengbanga ka siaka kina agu aboro da ni aidipase bambeda te, ono kina aguyo naima du niruruyo tipa gbanga regbo tooni, wa agu abawiriki Yesu agumba apai fuyó ho ko asigira Tingida Pakpioko ni.a—Ruka 22:28.

16. Ginipai ani afu tambuahe fu Yekova mbikoho nibipa mbedimbedi aKristano, na ginipai si aida ani idi kuti ni?

¹⁶ Ono si nawira gupai tie nga, anga agu aboro dunduko i atona siaka yó i ndu ku ngbangbaturũ yo tona bara rogo 1935, i asiaka yó dunduko i du kuba aguyo naima ti te. Yekova ima mangaha nga ani nika duadu na mbedimbedi aKristano dagbarani rogo gi yangara arame re ki dati kina regbo gbarasa ‘Babera Duna Bakere Ome Ti Ni.’b (Yugo. 17:5) Na ani rengbe kadu naa kido nga bange mbedimbedi aKristano nika rengba arengba nga 144,000 ti gu regbo daa bangiri Yekova, na i ki ga ku ngbangbaturũ yo ki tona zogarago. Si naida ani idi kuti gupai a i agumbaha nga, bakere rimbasa aboro bangeyo ange kina kumbatayo kindi, i nika nyeanye a niruruyo wadu yó nibadona. Fuo regbo tooni, gu bakere rimbasa aboro re ‘nika kura rogo gu bakere gberãngbii’ Mbori nika ye nani kurii ga Satana zegino, na i kini rimi kurogo ga Mbori vovo zegino na bakere ngbarago.

Bange Mbedimbedi AKristano Ima Mbeda ka Rengba!

17. Ringbisihe kuti 1 ATesaroniko 4:15-17 na Yugoti 6:9-11, ginipai ninaamanga tipa gu mbedimbedi aKristano nakpiko niruruyo?

¹⁷ Tona rogo gu garã nangia 33 F.B.K., badungu akutu mbedimbedi aKristano naima duna nyanyaki idapase na ki hipai dati kpioyo. Mbori aima biyo ya i rẽarẽ na gako Ngbii, na a wa gopai ayugoho, i aima gbia gayo mosoro tona kinaho Kristo atona zogarago ni.—Oni gedi 1 ATesaroniko 4:15-17; Yugoti 6:9-11.

18. (a) Gini kido du gu mbedimbedi aKristano du kindi auru kpotosende nani? (b) Wai gu kura akandoro abi agu awirinayo du nimbedimbedi yó?

¹⁸ Gu mbedimbedi aKristano du kindi auru kpotosende, i naa kido a nga, ka i nye niruruyo, i nika gbia gayo mosoro agbia bambeda. Ho gu kura akandoro aberã ni kurii gu idapase nga ga agu awirinayo du nimbedimbedi yó, i naida na agu apai Pauro agumbaha fu gu mbedimbedi aKristano nadu Tesaronike yo ki yaa: ‘Ani natakapande roni tigaani fu ga Mbori akanisa tipa gaoni hipai na idapase rogo gaoni arungosi dunduko na rogo gu gberãngbi oni nahi. Si nga dezire ga Mbori ruru sapangbangaa; ya i bi roni oni narẽ na ga Mbori ngbii, nga gu oni nahipai tipaha a.’ (2 Tesa. 1:3-5) Ho yangara mbedimbedi Kristano nika kpi ni, gure nga bange avuru ga Mbori kindo nika rengba. Nairiwo gu ngbarago gupai re nika mangaha ngbangbaturũ yo na sende no a!

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Ginipai Mbori ayuguhe fu Abarayama nga gu nabipa Regbo Sapangbangaa

• Tipagine Mbori abi Abarayama ti ni niruru boro?

• Pa takapande ngbatunga Abarayama ya i niruruyo nandu naayó kuari?

• Gini kido du aKristano dunduko nani?

[Gu kpiahe du ti kpewaraga 24]

Yesu angarasi apefuoko i gbatagene ka rẽ na ga Mbori Ngbii

[Gu kpiahe du ti kpewaraga 25]

Ti regbo Pendekote 33 F.B.K., Yekova atona ka dungura gu ue ngbatunga Abarayama

[Gu kpiahe du ti kpewaraga 26]

Gu kura akandoro na ngbarago mbiko gupai nga mbedimbedi aKristano kina dagbayo rogo gi yangara arame re