Oni Ima Dia ‘Gu Toro Nga Ga Rengo’?
‘Buba afu kura Mounda fu roni, si nye anye na oni kindi, nga gu toro nga ga rengo.’—YOANE 14:16, 17.
1. Gini nyanyakipa pai Yesu atingidihe fu gako abawiriki rogo gu yangara asaa ko adihe na yo rogo gu vurubambu nadu kuari yo Yerusarema yo?
“GBIA, mo nandu ku wari?” Gure nga gu sanahe sa dagba agu asanahe ga Yesu abawiriki asana ko nani rogo gu yangara asaa ko adu na yo rogo gu vurubambu nadu kuari yo Yerusarema yo. (Yoane 13:36) Wa Yesu aafura ni gbangaha na gako abawiriki, ko atingidi yo na gupai nga regbo ima da fuko ko mbu yo ka karaga tiko fuo Bako. (Yoane 14:28; 16:28) Si adu nga ko anyenga anye kindi na yo rogo gu kpotoko nga ga boro kaa fu rugute fuyo na kini karagapai sa gayo asanahe te. Ono tie, ko akido yo ki yaa: “Mi akpara fu Buba, ko fu kura Mounda fu roni [watadu bafu wasa], . . . [si] nye anye na oni kindi.”—Yoane 14:16.
2. Gine Yesu akidohe tipa ka kedaha fu gako abawiriki fuo da ko ngbangbaturũ yo?
2 Yesu aringbisipa guhe nikangia gu moundo re na ki sakirogo wai gu moundo re nika undo gako abawiriki. Ko ayaa fuyo: “Agi apai re, mi agumba nga ha fu roni mbata te bambiko ani adu na oni. Mi nandu koyo du gu ko ni awere nakedi re . . . ndu mi ngba fu roni; bambiko ka mi andu nga ya, Mounda ye nga kono du oni ni te; ka mi ndu mi kedi . . . [he] akeda kono du oni ni. Ho . . . [si] ka ye ni, . . . [si] angbe fu roni mbata yo sa [a]rengo dunduko.”—Yoane 16:4, 5, 7, 13.
3. (a) Ti gini regbo Mbori akedi ‘gu toro nga ga rengo’ fu bambata aKristano? (b) Gine nangia gu nyanyakipa gene sa toro adu fuyo rogoho ni “mounda”?
3 Gi mokido re aduni digisidigisihe rago Pendekote rogo gu garã nangia 33 ti Gaani Regbo ku bangiri gu mokedi nangia Petero nga guko nayaa: “Gi Yesu re Mbori azingisi ko, ani nga adezire gere dunduko. Kumbabe Mbori amoi irisa riko, Bako ki kido ko tipa Ziazia Toro, si ki ta du wa gere ko ki uka gi pai oni ata bi[he] re [ki] nigi he.” (Amokedi 2:32, 33) A wa ani ka bihe kusa, gu ziazia toro Mbori aukaha kurii aboro rago Pendekote amangi dungu apai tipa bambata aKristano. Ono Yesu akidohe ki ya ‘gu toro nga ga rengo’ asa yo ‘i tingidi agu apai dunduko ko agumbaha fuyo.’ (Yoane 14:26) Si adu nga si aundo yo i tingidipa ga Yesu sunge tungusapai na agu apai ko anayugoho, zavura kina boro agu afugo nzunzu ko agumbaha na ki sa yo i kehe. Gere afu bakere undo gbe fu gu gbinza mokedi nangia Yoane ti digido bambata sa kama agarã ti Gaani Regbo ho ko atona ka ke gako buku Wene Pangbanga ni. Gu pangbanga re na gu nyanyakipa rugute rogoho Yesu afuhe ho ko asigira Tingidapa Kpioko ni.—Yoane, kapita 13 da kuti digido kapita 17.
4. Waigu ‘gu toro nga ga rengo’ aundo bambata mbedimbedi aKristano?
4 Yesu akido gu bambata abawiriki re berewe ya gu toro re nika ‘yugo apai dunduko fuyo’ na ki ‘yugu agene fuyo kurogo arengo dunduko.’ Si adu nga gu toro re nika undo yo i girogo gu dudunguro apai yo nga ga Ziazia Kekeapai na ka banda gayo berã, gayo rugatinapai, na gayo sogimaapai si du kina sa. (1 AKorindo 2:10; AEfeso 4:3) Si adu nga, rogo gi gene re, gu ziazia toro re afu ome fu gu bambata aKristano re wa i adu ni gu riko nga ‘ruru kangara moyambu’ i fu ‘gu riahe nga ga toro ti ragoho’ fu mbedimbedi aKristano nibasasa.—Matayo 24:45.
Toro Nga Dezire
5. (a) Gini vovo maabangirise Yesu afuhe fu gako abawiriki rogo gu yuru nangia ga Nisana ti rameru 14, rogo gu garã nangia 33 ti Gaani Regbo? (b) Gini sunge si adu nga ziazia toro nika mangaha rogo digiso ga Yesu mokido?
5 Rogo gu yuru nangia ga Nisana ti rameru 14, rogo gu garã nangia 33 ti Gaani Regbo, Yesu agumbapai ni rondo fu gako abawiriki ya ko adia yo adia kugume kurogo ga Bako kporo du ngbangbaturũ yo na ki ra kporo na yo yo. Ko ayaa fuyo: “Rogo ga Buba bambu dungu banye du yo; ka si nadu nga wo ya, ka mi agumba ha fu roni; bambiko mi nandu ka mbakada ba fu roni. Ka mi ndu ka mbakada ba fu roni, mi ayé [aye] berewe, ki rogo roni fuo re; ho du mi ni, oni du a ho.” (Yoane 13:36; 14:2, 3) Si adu nga i azogarago na ko rogo gako Kindo. (Ruka 22:28-30) Tipa i duna gi maabangirise nga ga raka ngbangbaturũ yo re, si aidi i “vungu yo be toro” ni agu awiri Mbori nga atoro na i ki mbedi yo tipa i mangisunge ni abakindo na ni aboromotumo na Kristo ngbangbaturũ yo.—Yoane 3:5-8; 2 AKorindo 1:21, 22; Tito 3:5-7; 1 Petero 1:3, 4; Yugoti 20:6.
6. (a) Ti gini regbo i atona ka yamba agu aboro ku ngbangbaturũ yo i aida yo, na bange aboro wai nagi gi yambahe re? (b) Agu aboro i ayambu yo, i abapatizi yo kurogo gine?
6 Gi “yambahe nga ga ngbangbaturũ” re atona ti rago Pendekote rogo gu garã nangia 33 ti Gaani Regbo, na gbe, si nawira si adigi rogo bebere agu agarã nga ga 1930. (AEbere 3:1) Bange agu aboro ziazia toro asigira rimo yo tipa i duni papara agu aYisaraere nga ga toro yo nga 144,000, nga aguyo i ‘angbe yo dagba ngbatunga aboro.’ (Yugoti 7:4; 14:1-4) I abapatizi agiyo re kurogo gu kpoto Yesu nga ga toro, kurogo gako dungurati, na kurogo kpioko. (ARomo 6:3; 1 AKorindo 12:12, 13, 27; AEfeso 1:22, 23) Fuo i zi bapatiza na fuo i mbedi yo ni ziazia toro, i arimi gu raka nasa yo i mbupa gayo apai na ki kakuti ruru mangapai da ti kpio yo.—ARomo 6:4, 5.
7. Tipagine rẽ kina mbedimbedi aKristano tini ka ri gu kpakuto na ka mbira gu imekakue du tipa Tingidapa Kpio Yesu?
7 Ni du yo ni agu aYisaraere nga ga toro yo, gi mbedimbedi aKristano re adu rogo gu vovo mokido Yekova amangihe dagba ko na ‘agu aYisaraere nga ga Mbori yo.’ (AGaratio 6:16; Yeremaya 31:31-34) Kure Kristo nasa gu vovo mokido re si duni guhe rengbe aboro ka kido kuti ni. Yesu afura tipa gipai re ho ko asigira Tingidapa Kpioko ni. Gu Ruka akehe tigako nayaa: “Ko ki di kpokuta, ho ko afu tambuahe ni tipa ha, ko ki kuadi he, ki fu he fu yo, niya, ‘Borore nga gere du ni fufu he tipa roni. Oni mangi gere nitingidi pa re.’ Ko ki di inga kina wo fuo riahe, niya, ‘Gi inga re, si nga vovo ndika rogo kurere, nga kina gu nauka tipa roni.’ ” (Ruka 22:19, 20) Gu yangara mbedimbedi aKristano, watadu gu yangara aboro du dagba aguyo du bangeyo nga 144,000 du kindi auru kpotosende, i nga agu aboro rẽ ka ri gu kpakuto na ka mbira gu imekakue du tipa Tingidapa Kpio Yesu.
8. Waigu mbedimbedi aKristano aino gupai nga i yambu yo tipa nduge ku ngbangbaturũ yo?
8 Waigu gu mbedimbedi aKristano aino gupai nga i yambu yo tipa pa nduge ku ngbangbaturũ yo? Mbiko i gbia gu dezirepai nga ga ziazia toro adunga ba tikangoho tini ya. Gu mokedi nangia Pauro akepai fu ngbatunga agu aboro re ki ya: “Agu yo ga Mbori Toro angbe fu yo mbata yo, agi yo [re] nga awiri Mbori . . . Toro nga dezire ni[tihe] . . . na tororani ya awiri Mbori nga ani. Ka ani du ni awiriko, ani du adu ni adikumbo, ni ga Mbori adikumbo, ki gbia tirani ni adikumbo na Kristo; ka si du wa ani nahi pai na ko ani amongo du ni taasitaasi rani a na ko.” (ARomo 8:14-17) Gi dezirepai nga ga toro re na ome tini ni bakerehe gbe ki da ti gupai nga, agu aboro duna wiri kapa ya i ayambanga yo te, ruhe aru fuyo i idi gupai nga, i ayambanga yo te, sidu si ki sa yo ka i ringa gu kpakuto na ki mbiri gu imekakue du tipa Tingidapa Kpio Yesu ya.
Ziazia Toro na gu Kura Avusende
9. Gini ariko ue duni bakiakia gumba yo paha rogo abuku Wene Pangbanga na rogo Yugoti?
9 Nibipa umba bange agu aKristano i nayambu yo i duni agu aYisaraere nga ga toro yo, Yesu afura tipa yo ya i nga ‘umba rimbasa avusende.’ I, i nadiyo kurogo gu “ndugu” nga ga vovo mokido, du kia ti ga gu ‘kura avusende’ nga aguyo i ayugonga bangeyo ya, nga aguyo Yesu aya wee ko nika dungura yo adungura a. (Ruka 12:32; Yoane 10:16, NW ) Gu kura avusende nga aguyo i adungura yo rogo yangara arame nika dani “bakere rimbasa aboro” nga aguyo nika bata rogo “bakere gberãngbi,” ki duna gu maabangirise nga ga raka nyeanye kindi auru kpotosende nga ga paradiso. Gu yuguyugupai Yoane abihe ti digido bambata sa kama agarã ti Gaani Regbo nakpara gi bakere rimbasa re kusayo ti agu aYisaraere nga ga toro yo du bange yo nga 144,000. (Yugoti 7:4, 9, 14) Ya mo gu kura avusende nagbia undo be ziazia toro a, na ka si du wo, gine si amangaha rogo gayo raka?
10. Waigu i abapatizi gu kura avusende ti “rimo Mbori nga Ba na [ti rimo] Wiri na [ti rimo] Ziazia Toro”?
10 Rengo ngaha, ziazia toro namanga nyanyakipa sunge amanga rogo gu raka nga ga gu kura avusende. I nayugo kpia gayo kparatise fu Mbori ni zio yo bapatiza ti “rimo Mbori nga Ba na [ti rimo] Wiri na [ti rimo] Ziazia Toro.” (Matayo 28:19) I idipa ga Yekova bakere pagbia, kini rafu Kristo ni gayo Bakindo na ni Batumo riyo, na kini mbu ga Mbori toro watadu gako zaaza ome si mangisunge rogo gayo raka yo. Na auru nibasasa, i na’asada ka sonosa “zuzu toro” rogo gayo raka yo, nga “nyemuse, ngbarago, zereda, gbanga hipai, weneringise, wene sino, idapase, zera, rugatise.”—AGaratio 5:22, 23, NW.
11, 12. (a) Waigu i agiriso mbedimbedi aKristano rogo kparakpara gene? (b) Rogo gini gene i agiriso gu kura avusende na ki sa yo ni ziazia yo?
11 Si naida gu kura avusende mbu Fugo Mbori a na gako ziazia toro si girisi yo. I aima giriso mbedimbedi aKristano rogo kparakpara gene, nga ka takapande yo niruru aboro na ni ziazia yo ni gu dee Kristo nika dia ri. (Yoane 17:17; 1 AKorindo 6:11; AEfeso 5:23-27) Gu nebi nangia Daniere afura tipa yo ni “gu ziazia yo nga ga gu Ko nga Bahe ki susi,” nga agu aboro i ka fu Kindo fuyo tiibe “wiri boro,” nga Kristo Yesu. (Daniere 7:13, 14, 18, 27) Mbata kusayo, Yekova afura fu gu rikaaboro nangia aYisaraere rogo aMose yo na Arona ki ya: “Mi nga Yekova nga gaoni Mbori; oni kpára tironi tie, ki du ni kparakpara roni ziazia bambiko mi ni kparakpara re ziazia.”—Pa Amotumo 11:44.
12 Gu fugo nga “ka kparahe,” bambata rogoyo nga ‘ka sa he si du ziazia, ka kpara he kusayo si du nisaha, watadu ka kpara he tipa ka mangasunge Yekova Mbori nani; watadu padu he ziazia, ni girisigirisihe, watadu giangiri.’ Natona bakuru kusayo rogo 1938, Ngbaõbambu Sinziri agumba gupai nga, agu aboro i ayamba yo nga aYonadaba, watadu gu kura avusende, ‘du wa ka i ini gupai nga, pa kpara boro ti ni fu Mbori na kini raki ziazia raka nga gupai i aidaha be agu aboro nibasasa nika dani papara bakere rimbasa aboro na nikaa raka auru kpotosende.’ Rogo gu yuguyugupai nadu tipa bakere rimbasa aboro, nga gu ke yo payo rogo Yugoti, i nafura yo tipa yo ya “i azundu gayo aremu, ki vurusi he ni kure Wiri [Vusende]. Si du i adu ti ni barangba gu mbatabakindo nga ga Mbori, i namanga pa ko uru na yuru rogo gako yekaru.” (Yugoti 7:9, 14, 15) Be gu undo nga ga ziazia toro, gu kura avusende na’asada tiyo nyanyakii ka manga gupai Yekova aidaha tipa boro du ziazia.—2 AKorindo 7:1.
Manga Wenepai fu Awirina Yesu
13, 14. (a) Kuti gu ga Yesu sanza du tipa avusende na ameme, gu bata nga ga avusende naruriipa gine? (b) Ti gi yangara regbo re, waigu gu kura avusende amangi weneapai fu awirina Kristo?
13 Yesu anyakasipa gu mbembedi kodatise du dagba gu kura avusende na umba rimbasa avusende ho ko ape gu sanza ni du tipa avusende na ameme, nga gu du rogo gu gako sangbanebi du tipa “pa digida rago.” Rogo gu sanza re, Kristo agumba gupai ziazia nga, pa gu bata nga ga gu kura avusende naruriipa gupai i amangaha fu mbedimbedi aKristano nga aguyo ko ayamba yo nga “awirinami.” Ko ayaa: “Gbia ki ya fu agu yo du ku kumbabeko yo, ‘Ga Buba aboro maku oni yé, oni dí kumbo gu ngbi du ni mbakadimbakadi he tipa roni ho rago aenge ni da awere. . . . Ya mi fu roni ni rengo, wa oni anamanga ha fu agi awirinami re ka ni vura du sa dagba gi payapaya yo re vurũ, oni amangi he fere.’ ”—Matayo 24:3; 25:31-34, 40.
14 Gu gumbapai nga, “wa oni anamanga ha,” nafura tipa gu mangaapai nga ga nyemuse aboro amangihe fu agu awirina Yesu i avungu yo be toro, nga aguyo ga Satana zegino amanga fuyo wa kungbo aboro na kini bafu bete yo ku bambukiso yo. I nidu na zingo riahe, zingo arokoo, na kini idi i ngere fuo kpoto yo. (Matayo 25:35, 36) Ti gi yangara regbo re, natona rogo 1914, dungu mbedimbedi aKristano nabi tiyo rogo ngbatunga agu apai re. Gu vovo pangbanga du tipa aDezire Yekova nayugo gupai nga, gu ndikidi abakurea yo nga gu kura avusende nazitiyo kuti yo, naasongoda yo asongoda wa toro afõngbaduyo yo i mangihe.
15, 16. (a) Gini sunge gbe gu kura avusende aundo mbedimbedi aKristano nga awirina Kristo rogo? (b) Waigu mbedimbedi aKristano ayugu gayo tambuahe fu gu kura avusende?
15 Rogo gi yangara areme re, gu kura avusende aima digo ni songodi agu awirina Kristo du auru kpotosende i mangi gu gayo sunge Mbori afuhe fuyo nga ga ‘tungusa gi wene pangbanga nga ga kindo re rogo zegino dunduko fu rikaaboro dunduko.’ (Matayo 24:14; Yoane 14:12) Wa vura duhe nga bange mbedimbedi aKristano auru kpotosende aima digo ni umba vuru agu agarã susi re, ono bange gu kura avusende tigaha naakio kina kumbatayo na ki da awere nzunzu ti amirioni. Dungu akutu aguyo dagba agi aboro re aima digo nimangisunge ti aregbo dunduko ni abatungusi wene pangbanga, ni abazakigene, na ni amokedi, kini gbaragi gu wene pangbanga nga ga Kindo ku “digida [kpoto]sende yo.” (Amokedi 1:8) Gu kurayo namanga gi sunge dezirepai re a wa rengbe ome yo nani na kini songodi gi nyanyakipa sunge re na gayo mosoro na ki duna ngbarago rogo mangaha.
16 Nairiwo wai du awirina Kristo na tambuahe tipa gi undo gu kura avusende amangaha fuyo re nga agu abadiangbayo nazitiyo kutiyo! Agi awirina Kristo re ayugu gayo berã tipa gipai re rogo gu buku nga Worldwide Security Under the “Prince of Peace,” nga gu gu riko nga ga ruru kangara moyambu akusihe rogo gu garã nangia 1986. Si nayaa: “Natona ti regbo Ue Vura nga ga Zegino, digisidigisi ga Yesu sangbanebi tipa ‘digido gi zegino’ re namanga gbe mbiko gu sunge ‘bakere rimbasa aboro’ nga ga ‘kura vusende’ amangaha. . . . Sidu, bakere tambuahe fu gu ‘bakere rimbasa aboro’ nape dungu afugo du rogo dungu aringara tipa gu kodabee mangi yo ho rogo digiso gu [ga Yesu] sangbanebi du rogo Matayo 24:14!”
‘I Asanga Yo Ni Rengberengbeyo ki He Rani Te’
17. Rogo gini gene i ka ‘sanga gu ruru aboro nadu mbata’ nga aguyo i ka zingisa yo bekpio tini ‘nirengberengbeyo ki he’ mbedimbedi aKristano ya?
17 Ho gu mokedi nangia Pauro aafura ni wa guni sa dagba mbedimbedi aKristano na kini fura tipa gu ruru akumba na adee nga aguyo naraki mbata fu Kristo, ko akepai ki ya: ‘Agiyo re dunduko, wa i aduna adezire tipa yo mbiko gayo idapase, i aroganga kidohe te, bambiko Mbori ambakadi kura pai niwenehe susi tipa rani [nga mbedimbedi aKristano], ya i asanga yo nirengberengbeyo ki he rani te.’ (AEbere 11:35, 39, 40) Ti regbo zogarago nga ga Agarã Kutu ngbangbaturũ yo, Kristo kodihe na agu awirinako nga mbedimbedi aKristano du bange yo nga 144,000 nika mangasunge ni abakindo na ni aboromotumo na kini gamu agu amamu nga ga ga Kristo motumo tumorii auru kpotosende. Rogo gi gene re, i kini sa gu kura avusende ‘nirengberengbeyo’ ti kpotoyo na rogo berã yo.—Yugoti 22:1, 2.
18. (a) Gine si aida gu rengo du rogo Ziazia Kekeapai undo gu kura avusende i duna tambuahe tipaha? (b) Rogo gini maabangirise gu kura avusende apido gu regbo i ka ‘yugo awiri Mbori’ tini?
18 Si naida agi apai re dunduko nyakasi ndu gupai ku berã gu kura avusende yo gu ga aKristano Ziazia Kekeapai i akehe rogo pa-Giriki yo agbeberã aboro tini gbe kuti Kristo na kuti mbedimbedi awirinako na kuriipa gu bangua sunge du rogo manga ga Yekova aringbisapai. Sidu, gu kura avusende nabi pa songoda gu riko nga ga mbedimbedi aKristano rogo ngbatunga agene dunduko ni mamu wa i apido pa “yugo awiri Mbori” ti regbo Aramegido na ti regbo gu zogarago nga ga Agarã Kutu. I rengbe ka ngera kumbatayo tipa gu regbo i ka ‘batasa yo be duni akanga fu zirã na ki gbia gu taarimo nga ga awiri Mbori.’—ARomo 8:19-21.
Oni Duni Kpamiakpamia Roni Rogo Toroyo ti Regbo Tingidapa Kpio Yesu
19. Gine gu ‘toro nga ga rengo’ namangihe fu mbedimbedi aKristano na fu abadiangbayo, na waigu i ka manga kparakpara kpamiatise rogo gu nyemu nga ga Marungu ti rameru 28?
19 Rogo gu gako yangara kparakpee rogo gu yuru nangia ga Nisana ti rameru 14, rogo gu garã nangia 33 ti Gaani Regbo, Yesu ayaa: “[Mi nakpara tipa] . . . i du adu sa dunduko; wa kina ro, Buba, du rogo re yo, mi ki du rogo ro yo, i du rogo rani yo a; aboro zegino idi pa re ya mo kedi re.” (Yoane 17:20, 21) Mbiko nyemuse, Mbori akedi Wiriko ko fu unga ko tipa ka batasa mbedimbedi aKristano na agu aboro zegino nga agisangbaa. (1 Yoane 2:2) ‘Gu toro nga ga rengo’ ima kpamia awirina Kristo na abadiangbayo i du sa. Rogo gu vuronyemu nikangia ga Marungu ti rameru 28, fuo ti uru, agu ariko dunduko ue re nika dungura tiyo kurogo ba sa ka tingidapa kpio Kristo na ka tingida agu apai dunduko Yekova namangihe tipa yo mbiko ga Wiriko motumo, nga gu Wiriko ko akpinyemu ko gbe nga Kristo Yesu. Pa gayo kodatise ti gu nyanyakipa regbo re nyakasinga gayo kpamiatise na ki zambuasi gayo diaberã kaa manga gupai nyanyakii kindi Mbori akpinyemuhe, were, i kini yugu gu gopai nga i na ngbarago ka du dagba agu aboro Yekova akpinyemu yo.
Fugöpai
• Gini regbo i akedi gu ‘toro nga ga rengo’ fu bambata aKristano, na waigu si adu nirengo ni “mounda”?
• Waigu mbedimbedi aKristano aino gupai nga i yambu yo tipa nduge ku ngbangbaturũ yo?
• Rogo gini agene ga Mbori toro amangasunge na gu kura avusende?
• Waigu gu kura avusende amangi wene apai fu awirina Kristo, na waigu duhe nga i ‘asanga yo nirengberengbeyo’ ki he mbedimbedi aKristano te?
[Gu kpiahe du ti kpewaraga 29]
I auka gu ‘toro nga ga rengo’ kurii abawiriki ti regbo Pendekote rogo gu garã nangia 33 ti Gaani Regbo
[Gu kpiahe du ti kpewaraga 31]
Gu kura avusende ima manga wene apai fu awirina Kristo ni songoda yo yo i mangi gu sunge tungusapai Mbori afuhe fuyo