Ya Mo Oni Nabi Akuaroni Wagu Yekova Abiyo?
“Ka kparaka du nga rogo kpotoboro ya; ono apaha banda tihe abanda dagba ha wa sa.”—1 Kor. 12:25.
1. Wai oni adu ho oni arimi arimo ni kurogo gu paradizo nga ga toro?
HO ANI akuru akura ni rogo gi gbegberẽ zegino re kusayo ki tona kodatirani na ga Yekova aboro, si nawira ani aima du na bakere ngbarago tipa ka gbia gu dawedawe nyemuse du dagba ga Yekova aboro. Nga gupai du kia ti gu gbegberẽ sino nga ga sogote gbiati totoroto du dagba agu aboro du tiibe Satana! Ani aye kurogo gu paradizo nga ga toro, nga gu hi be zereda gbiati kodatise.—Yes. 48:17, 18; 60:18; 65:25.
2. (a) Gine rengbe ka sa gupai nga ka ani bingo akuarani wagu Yekova abiyo ya? (b) Gine rengbehe ka ida ani mangihe?
2 Ono tie, wa regbo nikaa ndu, ani rengbe ka tona ngana awirinarani na gu bangirise nga ga zangarengba. Gaani zangarengba rengbe ka sa rani ani kiisi gu wiri irairaapai awirinarani amangaha kuba gupai nga ani kparia gu wene asino i aʹasada ka wirika Yekova rogoho. Ka pepai niguruhe, ani abingo yó wagu Yekova abiyo te. Ka si du nga wo pai naamanga tipa rani, si naida ani wisigi wai ani naabi aboro na ki tona biyo wagu Yekova abiyo.—Gate 33:13.
Wai Yekova Abi Awirinarani
3. Ziazia Kekeapai naringbisa gu dungurati nga ga aKristano kuti gine?
3 A wa duhe nikekehe rogo 1 AKorindo 12:2-26, Pauro aringbisi gu dungurati nga ga mbedimbedi aKristano kuti kpotoboro duna “dungu apaha.” A wa du abarapa boro nibakiakia ti akuraha, agu aboro du rogo dungurati, i nibakiakia rogo asinoyo yo na rogo agu apai rengbeyó ka mangaha. Ono wa vura duhe wo, Yekova ima ida naayó dunduko. Ko nakpinyemu yó dunduko nibasasa na kini biyo na kikiipayo. Si du a fugo Pauro aruga rani ti ni kini yawee agu aboro du rogo dungurati, i ‘niibanda tiyó abanda dagbayó.’ Gipai re rengbe kadu nimbumbuhe bambiko asino akuarani kia ti gaani.
4. Tipagine si aida ti ni ani aria gani bipai tipa awirinani?
4 Si rengbe kadu nga gupai du rogoraniyo nga kaa kparia gu irairaapai awirinarani amangaha. Ka ani amangaha wo, gure wa ka i yawee ani namangasunge na gu ũdekpiaahe bangirihe akparia kina wiri tooni rago gbua. Ono gu bipai nga ga Yekova tigako, si wakina gu ũdekpiaahe rengbe ka dekpiahe na agu ahe dunduko du pati ni. Ani rengbe kaa kparia kina gupai angbanga tirani ya, ono Yekova tigako nabi boro naabani dunduko kodihe na asinoni. Kina wai ani aʹasada tirani bakere gbe ka wirika Yekova, kinawo a bakere gbe ani asa gupai nga nyemuse gbiati kodatise du rogo dungurati.—Ef. 4:1-3; 5:1, 2.
5. Tipagine arungaha ti ni boro nisapungbangaa akurani ya?
5 Yesu aima ino gupai wenengai nga, kpakpa aboro na gupai tiyó nga ga sapangbangaa akurayó. Ko afu rugute ki yaa: “Ka oni sápu nga ngbanga boro ya, i ka sapa ngbanga roni a.” (Mt. 7:1) Oni bi gupai nga, Yesu agumbaha agumba ziazia ki yaa: “Ka oni sápu nga ngbanga boro ya.” Ko aima ino gupai nga, badungu aboro dagba aguyo ko aafura fuyó re aima duna gu sino tiyó nga ga sapangbangaa akurayó. Ya mo gu sino re tirani? Ka si du nga ani na gupai rogoraniyo nga ga sapangbangaa akuarani, si naida ani asadi tirani nyanyakii ka mbuhe, Mbori andu ka sapangbangaa rani gbegberẽe. Da nga ani nzunzu kaa sapangbangaa gu boro Yekova namoi ní rogo kura bangiriba, watadu ka yawee si aidanga ní du rogo dungurati te? Wirinarani rengbe arengba kaa manga gu kura irairaapai, ono ka si du nga Yekova namangasunge kindi na ní, ya mo si ruaru furani ani ká ní? (Yo. 6:44) Ya mo ani idi kuti gupai nzunzu nga Yekova du nangbembatayo fu gako aboro rogo dungurati, na ka si du nga si naida ariapai mangi, ko mangihe amanga ti gu regbo daa bangiriko?—Oni gedi ARomo 14:1-4.
6. Wai Yekova abi gako amoyambu?
6 Iiriwopai du tipa Yekova nga, ko nakparia aKristano dunduko nibasasa ki ini gini ngbatunga aboro nikangia yó ho i nika dani nirengberengbeyo zanga ingaapai rogo vovo zegino. Ko ima inopa wai a i asona rogo toroyo. Si ki tadu were, ka ndupai adunga beko ko niiberẽpa gu wiri irairaapai dunduko i amangaha mbiko zangarengba ya. Ani nageda gupai rogo Atambuahe 103:12 nga: “Wa turũ ku uroyo na dioyo, wo ko naturũsa gaani tiandika ti rani a.” Nairiwo gu tambuahe si aida ani fuhe fu Yekova tipa gipai re!—Tam. 130:3.
7. Ginipai ani awirikaha ti gu gene Yekova aabi Davide ngbaha?
7 Ani nabi gopai rogo Ziazia Kekeapai nayugo gupai nga Yekova ima rengba gbe ka kparia wene asino boro. Mbori aya tipa Davide wee ‘gi moyambu nangia Davide, naaka kuti gimi arugute, nipeke re na kpotoko yo dunduko, ki nimangi kina gupai ngba bangire.’ (1 Aba. 14:8) Ono tie, ani ima ino gupai nga Davide aima manga aingapai. Ono wa si avura duwo, Yekova asiapai ka maaberã ko tipa kina wene asinoko, bambiko ko aini gupai nga, ngbadukoyo adu niruruhe.—1 Peka 29:17.
Oni Bi Awirinaroni Wagu Yekova Abiyo
8, 9. (a) Ngba gini gene rengbe ani kadu wa Yekova? (b) Gini kpiapai nandu na gipai re, na ginipai ani awirikaha ti gi kpiapai re?
8 Yekova naino gupai aino du kpoto boro yo. Gipai re nisaha nga wene ndupai furani tipa ka ani sapungo ngbaanga akuarani ya. Ani ainongo agu apai nasa boro ní niimangipai ti ni ngba gu gene ní amangaha rogoho te. Si naida ani asadi ka wirika Yekova nizanga maa ani berãrani tipa gu zangarengba nga ga aboro, nga gupai nika go ago kusayo barambeda. Anga si niwenepai ani moihe nigaani sásá kadu wa Yekova rogo gi bangiriba re tee? Ka ani mangihe wo, si nika sa gupai nga gaani pazereda na akuarani aidipase du nibawenehe gbe.—Ef. 4:23, 24.
9 Ani yugunga ha na kpiapai: Oni berẽnga pa gu degude nga vuru gbaria ainongo pai gbe tipa gu raka nga ga gbata ya. Ri ainongo manga gu riahe nga ga avuru gbata te, na ri ambakadanga tiri wa avuru gbata te. Aparanga gbata rengbe ka bi ri ki dakuti gupai nga, i arengbanga ka dia ngbatunga dee wa guri re te; si nga gu bipai nga ga bangirise gbua. Ono kura kumba rengbe ka kura du gako bipai kia ti ga aguyo re. Ko rengbe ka wisigo gu degude re angianga ti kpotori gbua ya. Sidu, ko ki bi gupai nga ka i di gu degude re ku gbata yo, ki yugu gu raka furi nga ga gbata, gbiati gu sino mbakadatise nga ga avuru gbata, ri mangi bakere ariapai amanga kisusi. Ko rengbe ka bi gu kura wene asino ri a, wa agu nga ngara gbiati irisa. Fuo biko ho were, ko kini sanangori, kini di ri, kini ga na ri ku gbata yo. Ko kini yugupai furi, na ri kini mangi bakere ariapai. Fuoho, gako amurakporo gbiati abakureako, kodihe na aguyo nanaabisirapa gi degude re abisira, kini kparia ri kini yaa, ‘Nga gu bawene dee ko nadi ri re!” Ya mo ani rengbe kadu wa gi kumba nadi gu degude nangia vuru gbaria re na ki undo ri tipa ri mangi ariapai? Kuba gupai nga ani naakparia kina gu wiri irairaapai ani abihe ti awirinarani, anga si naida ani inipa gu wene asinoyo du ti ni, na kini bi gupai nga i rengbe arengba ka sona kumbatayo rogo toro yo tee? Ka ani tona mangaha wo, ani nika tona kaa kpinyemu awirinarani mbiko gu wene asino nga ga toro du tiyó, a wa Yekova akpinyemuyo.—Oni gedi AEbere 6:10.
10. Wai rengbe gu rugute du rogo AFiripoio 2:3, 4 ka undo rani?
10 Gu mokedi nangia Pauro afu rugute rengbe ka undo rani rogo gaani pagume na agu awirina du rogo dungurati dunduko. Ko ayaa: “Ka oni mángi nga pai na vura na ruka wa sa ya, ono gu ni bérẽ pa kura ni rogo umbasi gani berã ya ni ngba susi ni. Ka oni bérẽ nga pa kina gaoni pai ya, ono oni bérẽ pa ga akuaroni apai.” (Frp. 2:3, 4) Umbasitise rengbe ka undo rani ani naabi akuarani wagu Yekova abiyo. Ka ani aberãpa akuarani na kini gbata gu weneapai du tiyó, si nika undo rani a ani naabiyo wagu Yekova abiyo.
11. Gini apai namanga rogo zegino dunduko nga gu namanga aʹariapai rogo kura adungurati?
11 Ti gi regbo ani araka ti ni re, agu aʹariapai namanga rogo zegino nasa gupai nga badungu aboro nindu kurogo kura aringara. Badungu abagbata hi awere be agu aboro naye rogo kura aringara. Gu kura aboro naye rogo kura aringara, i na nyemu gu rengo tiyó nga ga Ziazia Kekeapai, sidu, i kini koditiyo na ani ka iriso Yekova. Agi aboro re “dagba rika aboro dunduko, na angbatunga yo, na aboro, na angbatunga afugo dunduko.” (Yugo. 7:9) Nisangbana gipai re, badungu gaani adungurati awere du na aboro rogoho naye rogo kura aringara.
12. Gini bipai si aida ani du nani tipa akuarani, na tipagine rengbehe kadu ti ni ti kura aregbo nikpakarapai tipa ka mangaha wo?
12 Si rengbe kadu nga, rogo gaani dungurati, si naida ani moiberã rani berewe gbe tipa kaa bi aboro wagu Yekova abiyo. Gipai re naida gupai nga, ani tingidi gu rugute gu mokedi nangia Petero afuhe ki yawee ani ‘dati wene kpinyemu awirina,’ na kini ‘kpí nyemu akuarani akpi kakaka kpotoraniyo.’ (1 Pet. 1:22) Si rengbe arengba kadu nikpakarapai tipa kadu na ndikidi nyemuse rogo gu badona du aboro rogoho naye rogo dungu aringara. Si rengbe kadu nga gu sino mangaapai nga ga akuarani aidipase i avunguyo kurogoho, si ima dukia nibakerehe ti gaani, kinawo a rengbehe kadu tipa gayó wirikapai, gu sunge i amangaha, na ngbatungayo a. Ya mo oni naabihe nikpakarapai ka rugatironi naapa gayó aberã, watadu gayó mangaapai? I rengbe kaa bi roni wakina gure a. Ono tie, ani dunduko i afu rugute furani kini yaa: “Oni kpí nyemu awirina.”—1 Pet. 2:17.
13. Gini aʹariapai si aida ani mangihe rogo gaani aberã?
13 Si rengbe kadu nga si naida ani mangi ariapai rogo gaani berã tipa ka za ngbadurani fu awirinarani, du rogoyo nga ka kiiso gaani nyemuse si dati agu aboro si atadanga tiyó ya. (Oni gedi 2 AKorindo 6:12, 13.) Ya mo ani abingo tirani ani nipe ngbatunga gu fugo nga, ‘Mi aberãnga gbegberẽ berã kuti boro te, ono . . .’ fuoho, ani kini tona ka tangara gu kura apai ani abihe nga si nge ti aboro kura ngbatunga? Ngbatunga gu sino re naida ani do gu gbegberẽ berã ado kusayo du ngbaduraniyo. Si naida ani sana tirani na gu sanahe nga, ‘Ya mo mi naaʹasada tire dedede ka ino agu aboro du ngbatungayo kia ti gimi?’ Ngbatunga gu wisigotise re rengbe ka undo rani ani mbu gu gbegberẽ sino du tirani ki tona ka kpinyemu gu gaani riigbu nga ga awirina duna angbatunga aboro rogoho dunduko.
14, 15. (a) Oni gumbanga pa bete agu aboro namangi ariapai rogo gu gene i aabi kura aboro mbata ngbaha. (b) Wai rengbe ani ka manga wa yó?
14 Ziazia Kekeapai nafu akpiapai furani nga ga agu aboro namangi ariapai rogo gayó bipai tipa kura aboro. Boro sa dagbayó nga gu mokedi nangia Petero. Wa Petero angia Yuda, ko anaandunga kurogo gu kporo nga ga Gendiria te. Oni bingo kina wai ko adu ho i asanako ni ko ndu kua gu boro zanga yeratise nangia Korunerio! Petero amangi ariapai niipo, bambiko ko aini gupai nga, ga Mbori ringbisapai du nangia aboro dagba arikaaboro dunduko ye kurogo gu dungurati nga ga aKristano. (Amo. 10:9-35) Saura a, nga gu kumba nada kusa nigu mokedi nangia Pauro, si aidi ko mangi ariapai amanga a rogo gako bipai tipa kura aboro. Ko agumbaha ningbako ki yawee ko aasoga aKristano ki dati gupai nga ko tona ‘rungosi ga Mbori akanisa susi, kini asadi ka nyasaha.’ Wa si avura duwo, ho Gbia Yesu aruguko ni, ko amangi bakere ariapai na ki tona ka ida na agu arugute agu aboro ko anaarungosi yó mbata aafuhe fuko.—Gara. 1:13-20.
15 Zanga kapa, ani rengbe arengba ka manga aʹariapai rogo gaani aberã nigu undohe nga ga ga Yekova toro. Ka ani bi gupai nga sogote watadu iraira bipai tipa kura aboro kindi rogoraniyo, si naida ani asadi tirani nyanyakii ka diaha kusayo na ki “nike na ka kuti gu du sa nga ga Toro zikazika, ni gu ũkpamiatise nga zereda.” (Ef. 4:3-6) Ziazia Kekeapai naya furani wee ani “úkadi nyemuse, nga gu ũvodatise nga ga ziaziapai, [“nga wene dada tipa kpamiatise,” NW].”—Koro. 3:14.
Ani Wiriki Yekova Ba Gaani Sunge Tungusapai Yo
16. Ginipai Mbori akpinyemuhe tipa aboro?
16 Gu mokedi nangia Pauro akepai ki yaa: “Aboro bangiri Mbori sa.” (Rom. 2:11) Ga Yekova ringbisapai du nga ka koda ngbatunga aboro dunduko kurogo gu gako mbakadapai du tipa irisoko. (Oni gedi 1 Timoteo 2:3, 4.) Tipa ka sa gupai re si mangi, ko mbakadipai tipa i tungusi “nyenye [wene] pangbanga” fu “agu yo dunduko naraka auru kpotosende.” (Yugo. 14:6) Yesu ayaa: ‘Ati nga zegino.’ (Mt. 13:38) Wai nyakipa gupai re furoni na fu mbembedi agumeroni?
17. Wai rengbe ani ka undo ngbatunga aboro dunduko?
17 Anga aboro dunduko rengbe ka ndu kurogo kura aringara tipa ka tungusa gu pangbangaa nga ga Kindo fu kura aboro yo te. Ono ka si vura duwo tipa rani, ani rengbe arengba ka tungusa gi pangbangaa re fu agu aboro naye rogo kura aringara du kina rogo gu rago ani atungusapai rogoho. Ya mo ani naamangasunge na agu amomu ninaamanga tipa ka tungusapai fu ngbatunga aboro dunduko, angianga fu kina aguyo ani naima tungusapai fuyó awere tipa dungu agarã ya? Tipagine ka oni adianga berã ti ni ka tungusapai sirisiri fu gu kura aboro wene pangbangaa atagbianga yó ya?—Rom. 15:20, 21.
18. Wai Yesu anaaberãpa aboro?
18 Yesu aima ino gupai nzunzu nga si naida i undo aboro aundo dunduko. Ko anaatungusanga pai kina rogo bangisa rago te. Ziazia Kekeapai naya furani wee ko “ata dagba abaakporo na akporo dunduko.” Na fuoho, “ho ko abi arimbasa ni, nungayo ki mangi ko,” ko ki gumba gupai nayugo gupai nga si aidi i undoyo aundo.—Mt. 9:35-37.
19, 20. Gini bete agene rengbe ani ngbaha ka yugo gupai nga ani na kina gu bipai nga ga Yekova gbiati Yesu tipa ngbatunga aboro dunduko?
19 Gini bete agene rengbe oni kadu na kina gu bangisa sino Yesu adu nani re rogoho? Gu kura awirina adi berã ka tungusapai rogo gu rago i atatungusanga pai rogoho wenengai ya. Agi aba re rengbe kadu nga babagaahe, ba-ongoda, ba atarambiri, watadu ngbadimo agu akporo nga ga irangbii ka boro agumbanga ka rimo koyo ya. Gu kura awirina aima asadatiyo ka wirika kura fugo tipa ka tungusapai fu kura ngbatunga aboro naraka dagbayó, watadu fu agu aboro awirina atungusanga pai fuyó gbe ya. Ka oni wiriki wai ka fu sene fu aboro rogo gayó fugo, si rengbe ka yugo gupai nga oni naberã payó aberã gbe. Ka si du nga gene berani wa ka ani wiriki kura fugo te, si naida ani ngarasi agu aboro namangaha wo. Si aidanga ani zeresi kpoto agu aboro yó nawirika kura afugo te, watadu ka yawee tipagine i ambusa tiyó ti ni wa gure tipa ka tungusapai fu agu aboro naye rogo kura ringara te. Unga nga ga aboro dunduko nyakipaha bangiri Mbori, na si naida paha nyaki kinawo a bangirani.—Koro. 3:10, 11.
20 Ka ani duna gu bipai nga ga Mbori tipa aboro, si nika sa rani ani naatungusapai fu aboro dunduko, ka apai vura du tipa yó kina wai vurũ. Aguyo rengbe kaa raka bau zanga kporo, aguyo kidu nibibiriko yó, na aguyo kini raki wasiwasi raka. Ka si du nga boro amanganga rani wenengai te, si aidanga ani tona soga gu ngbatunga du ní rogoho te. Kura aboro amangi Pauro amanga gbegberẽe, ono gupai re aasanga ko ko mbu tungusapai fu agu aboro nadu rogo gu ngbatunga re te. (Amo. 14:5-7, 19-22) Ko adu na gu kido nga, kura aboro kinaho nika gia wene pangbangaa agia ngbako.
21. Ka oni du na gu bipai nga ga Yekova tipa aboro, wai ka si undo roni?
21 Ani ima rugatirani tie na gupai wenengai nga, si naida ani duna gu bipai nga Yekova tipa awirinarani, tipa gu gaani riigbu nga ga awirina duna ngbatunga aboro dunduko rogoho, na tipa agu aboro du ba tungusapai yo. Kina wai a bakere gbe ani adu na ga Yekova bipai, kinawo a bakere gbe ani asa gupai nga zereda du dagbarani na aboro gbiati kodatise. Na ka ani amangaha wo, ani rengbe arengba ka undo kura aboro i kpinyemu Yekova, nga gu Mbori ‘amanganga pai kia’ fu kura aboro ya, ono nakpinyemu aboro dunduko, “bambiko wa du yo dunduko nga gu sunge beko amangi he.”—Eyo. 34:19.
Oni Rengbe ka Karagapai Sa Agi Asanahe Re?
• Gini bipai si aidanga ani du nani tipa awirinarani ya?
• Wai rengbe ani ka wirika Yekova rogo gu gene ani abi awirinarani?
• Giniapai wiriki oni he nibipa gu gaani riigbu nga ga awirina duna ngbatunga aboro dunduko rogoho?
• Wai rengbe ani kadu na ga Yekova bipai tipa aboro rogo gaani sunge tungusapai?