Agu Awirina Du ni Kodikodi Yo

TIPA agarã wa 1,500, Yekova Mbori anaamanga apai na gu rikaaboro nangia aYisaraere ni gako aboro. Fuo gure, Yekova “andu [watadu agbe berãko] koyo du aGendiria ni . . . , ka roga aboro dagba yo sa rimoko.” (Amo. 15:14) Agu aboro naadu na rimo Yekova re angia gako adezire, i adu ni kodikodi yo rogo gayo aberãpai na mangapai i ki vura kaa raka kina wari vurũ auru kpotosende. Padu aboro ni kodikodi yo tipa rimo Mbori arengbe ka manga ringbisihe kuti gu zinahe Yesu afuhe fu apefuoko nga: “Oni ndú tie, ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na Wiri na Ziazia Toro; ki nirugu yo a i niká kuti agu apai dunduko mi arugu roni kuti ni.”​—Mt. 28:19, 20.

² Pa kpara gamo raka fu Yekova na ki zi bapatiza, mo ima da ni ga Yesu Kristo bawiriki. Mo awere nga papara agu awirina nga aKristano du ni kodikodi yo rogo zegino dũ, nga aguyo ambunga agu atagbagapai nga ga aringara, angbatunga, na kumuko si kparaka yo ya. (Tam. 133:1) Ni sangbana gipai re, mo na nyemuse koyo du akuaro ni nga aKristano rogo dungurati na kini irisi yo. Aguyo dagbayo na rangi kpotoyo, ngbatunga yo, wai i awirikipai, agu aba i asono rogoho kia, na si rengbe kadu nga mbata kusayo mo arengbanga ka koda tiro na yo mbiko agi apai re te. Mo awere na gu pagume nga ga awirina dagbaroni na yo niima nyaka gbe kisusi gu kura apagume du dagbaro na akuaro, pambori, gbiati aborokporo.​—Mk. 10:29, 30; Koro. 3:14; 1 Pet. 1:22.

RUGA GAANI ABERÃPAI

³ Kangia si ima kpakara fu gu kura aboro i mbu iraira bipai tipa ngbatunga aboro, kumukokumuko yo watadu airarungo, watadu tipa gu kura nduapai, si naida i berẽpa gu kpiapai nga ga agu aYudo nangia aKristano naambu gu iraira bipai gu pambori nga ga aYudo adu na ni kuti aGendiria. Ho Yekova aya ni fu Petero ko ndu kua Korunerio yo nangia gu banzengere nga ga aRomo, Yekova ambakadi berãko mbata fu ko kedi ko koyo.​—Amokedi, kapita 10.

⁴ Rogo gu yuguyugupai yo Petero abihe, i aya fuko ko imi anya ki rira nga agu anya gu pambori nga ga aYudo anaabi ra ni bibiriko ra. Ho Petero akaha ni, fugo apoi ngbangbaturũ yo fuko nga: “Gu girisi Mbori ka mo sà nga ha ni nyakorokpa ya.” (Amo. 10:15) Mbori amangihe tipa ka mbakada berã Petero tipa gu sunge ko andu ka fuhe fuko, nga ka ndu ka bi gu boro nangia Gendiria. Ho Petero amangipai ni kuti gupai Yekova agumbaha fuko, ko ape gupai fu agu aboro nadunguratiyo kua Korunerio yo nga: “Oni ini tigaoni ya ru nga kpamiati kuti gu boro nga kura rika aboro na ndu koyo du ni ni fu gu boro nga Yudo te; ono Mbori ayugu gu pai fere nga ka mi ya nga ti boro wa sa nyakorokpa nga ni nga birikobiriko he ya. Si du mi aye ti ni a ka pai adu nga ya ho i akedi sunge fuo re ni.” (Amo. 10:28, 29) Fuo gure ngbutuko, Petero abi gu gopai naayugo na ni nga Yekova ima ida na Korunerio na gako aborokporo dunduko.

⁵ Saura nangia boro Taruseu, nangia wene bawirikipai ni Farusi, si aidi ko umbasipa tiko tipa ka koda tiko na agu aboro ko anaakodanga tiko nayo mbata ya. Si ada nga agu aboro re ni fu arugapai fuko. (Amo. 4:13; Gara. 1:13-20; Frp. 3:4-11) Ani berẽnga kina pa gu ariapai rogo aberãpai yo aboro wa Serugio Pauro, Dionusio, Damari, Firemona, Onesimo na gu kura aboro amangihe tipa ka dia wene pangbanga kugume na ki da ni ga Yesu Kristo abawiriki.​—Amo. 13:6-12; 17:22, 33, 34; Frm. 8-20.

BANDA GU GAANI KODATISE DU ROGO ZEGINO DUNDUKO

⁶ Zanga kapa gu nyemuse nga ga awirina du rogo dungurati naundo ro mo mbedi na Yekova gbiati gako riigbu. Mo ima bi gu ndikidi kpiapai nga ga nyemuse nayugo ga Yesu Kristo ndikidi abawiriki wa ko agumbaha nga: “Vovo rugute fu mi fu roni nga, oni kpi nyemu akuaroni akpi; a wa mi akpi nyemu roni, oni kpi nyemu akuaroni a wo. Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:34, 35) Mo na ngbarago na Yekova ni bakerehe gbiati gako riigbu, gu susi asusa gbe nga gu nyemuse mo abihe rogo dungurati nayugopa gu nyemuse du dagba awirina rogo zegino dunduko. Mo nabi wai abi gu sangbanebi nga ga Baibiri adigisotihe du tipa dungura aboro rogo gi yangara arame re i niye ka iriso Yekova rogo zereda na kodatise.​—Mika 4:1-5.

⁷ Nibi agu atagbagapai nakparaka aboro areme rogo zegino, da naini gupai nga si adu taata tipa aboro “dagba rika aboro dunduko, na angbatunga yo, na aboro, na angbatunga afugo dunduko” koditiyo? (Yugo. 7:9) Mo bingo gu kparakparapai du dagba agu aboro naraka rogo agu aba birĩ-inohe nasono rogoho na aguyo kakuti sino atitase kindi. Mo bingo agu asovura nga ga pambori du dagba agu aboro du ngbatungayo kina sa na du rogo bangisa ringara. Wa duhe nga birĩ-zogarago nakparaka aboro kina kumbatayo, aboro nakpi kina nyemu ngbatungayo watadu gayo ringara kisusi. Nibi gu kparakaro du dagba agu aboro du na marã beyo, gbiati gu kura apai nakparaka aboro, si ima kpakara ka ida kuti gupai nga angbatunga aboro, afugoyo, abadona, kumukokumuko yo na airarungo rengbe kadu na nyanyaki pagume wa gure nga ga nyemuse kini raki rogo zereda. Kina gu Mbori Duna Tanduapai Dũ rengbe ka manga gu iiriwopai re.​—Zek. 4:6.

⁸ Gi ngbatunga kodatise re nga ndikidipai, na ho mo akpara gamo raka ni fu Yekova na ki zi bapatiza, mo nada ni paparaha. Wa duhe nga mo nagbia undo ti gu kodatise re, si naida mo mangi ome amanga tipa ka bandaha. Mo rengbe ka manga gupai re ni dega mo turo kuti ga gu mokedi nangia Pauro rugute du rogo AGaratio 6:10 naya: “Momu nimángi rani tie, ani ki mangi gu pai amanga ngba angba fu aboro dunduko, fu kina agu yo gbe du ku idapase yo.” Ani napekafuo gu gako rugute a naya: “Ka oni mángi nga pai na vura na ruka wa sa ya, ono gu ni bérẽ pa kura ni rogo umbasi gani berã ya ni ngba susi ni. Ka oni bérẽ nga pa kina gaoni pai ya, ono oni bérẽ pa ga akuaroni apai.” (Frp. 2:3, 4) Ka ani mangi ome tipa ka bi awirinarani wai Yekova abiyo angianga ka biyo kuti wai du yo ti kpotoyo ya, ani nika gbia zereda na gaani pagume na yo kidu ni wenehe.​—Ef. 4:23, 24.

BERÃPA AKUARANI

⁹ A wa gu mokedi nangia Pauro ayugu kpiapai furani, dungurati ni kparakakparakaha te agu aboro du rogoho dũ naberã aberã tipa akurayo. (1 Kor. 12:14-26) Ka baturõ rago vura kparaka rani na awirinarani rogo zegino dunduko, ani naberã aberã tipa padu yo wenengai. Ka i arungosi gu kura awirinarani, ani dunduko si afuda rani ni bakerehe. Ka aguyo du rogo azingo watadu gberãngo gbarasipa gayo ahe na avura, agurani du wenengai namanga ome tipa ka fu undo fuyo rogo toro na rogo borose yo.​—2 Kor. 1:8-11.

¹⁰ Ani dunduko si aida ani kpari tipa awirinarani na aregbo dunduko. Aguyo nagbiatiyo na asada tipa ka manga gbegberẽpai. Aguyo kini rungo be agu apai rengbe aboro arengba ka inopai tipaha. Aguyo kinaho gayo abadiasunge asoga yo gbiati gu gayo aborokporo adunga na yo rogo idapase yo ya zanga kura aboro inipai tipaha. (Mt. 10:35, 36; 1 Tesa. 2:14) Ani nabakabangirani abaka tipa yo mbiko ani nga agu awirina du rogo zegino dunduko. (1 Pet. 5:9) Gu kura aboro kina dagbarani namanga ga Yekova sunge nyanyaki, i nangbembatayo rogo sunge tungusapai na rogo dungurati. Aguyo kinaho a i nafu gu sunge fuyo nga ka ngerakurii gu sunge tungusapai namanga rogo zegino dunduko. I dunduko naida na gaani kparakpee, si nga gu gene rengbe ani ka yugo gaani ndikidi nyemuse tipa yo ngbaha, ka si vura du vurũ nga gu kurapai ho berewe rengbe ani ka mangaha tipa ka undo yo te.​—Ef. 1:16; 1 Tesa. 1:2, 3; 5:25.

¹¹ Nibi gu fudifudiapai dunduko du auru kpotosende rogo gi yangara arame re, si naida ga Yekova aboro mbakaditiyo tipa ka undo akurayo. Ho agberãngo amanga ni wa bazigizo na ikiiki-aime, si naida bakere mbakadapai tipa fu undo mangi, na mbakadapai namanga ni bakerehe tipa fu undo. Agu aKristano naadu rogo sa kama agarã aima maa wene kpiapai furani rogo gi bangiriba re. Agu aKristano naadu Andiokia yo atingidipa ga Yesu rugute na ki kedi aũborose fu awirinayo ku Yuda yo na ngbarago. (Amo. 11:27-30; 20:35) Kusa gu mokedi nangia Pauro angarasi agu aKristano naadu Korinda yo i songodi gu sunge fu undo naamanga ti genehe. (2 Kor. 9:1-15) Ti gi gaani regbo re, ho kpakarapai amanga awirinarani ni i kini idi na undo, riigbu na gu kura aKristano namangapai ni ipo tipa ka fu undo fuyo.

I SIA RANI ANI MANGI GUPAI YEKOVA AKPINYEMUHE

¹² Awirinarani rogo zegino dunduko ima mbakadatiyo tipa ka manga gupai Yekova akpinyemuhe. Ti gi regbo re, gupai Mbori akpinyemuhe nga ani tungusi gu wene pangbanga nga ga Kindo auru kpotosende dunduko fu rikaaboro dunduko. (Mt. 24:14) Wa ani amanga gi sunge re, gupai Yekova akpinyemuhe nga ani mangi apai ringbisihe kuti gako arugute du tipa ruru mangapai. (1 Pet. 1:14-16) Si naida ani du na umbasitise dagbarani na awirinarani na kini mangi ome sunge tungusa wene pangbanga ndu kumbatayo. (Ef. 5:21) Awere nga gu regbo si aida ani gbata kina agu apai ngba tirani te, ono ka peresapa ga Mbori Kindo mbatayo rogo gaani raka yo. (Mt. 6:33) Ka ani moi gipai re ku berãraniyo wa ani amanga ome kina sa tipa wene pangbanga, ani nika du na ngbarago awere na ki gbia nyenye amaku kumbatayo.

¹³ Wangia ani aDezire Yekova, ani kia ti kura aboro, Mbori sia rani dagba gu kura aboro re ani du ni gigiri aboro tipa ka mangasunge fuko. (Tito 2:14) Wai ani airiso Yekova nasarani ani du kia. Ani namanga apai kina kubani sa na awirinarani rogo zegino dunduko na kini pe kina bangisa fugo sa nga ga rengo na kini mangipai ringbisihe na kina gupai ani agumbaha. Yekova aima fura tipa gipai re kumbatayo vurube gu nebi nangia Zefania nga: “Mi asá gu fugo nga ga aboro ni nzunzu fugo, ya i dunduko ki yambu he ti rimo Yekova ki nimangi pako kina ku bani sa.”​—Zef. 3:9.

¹⁴ Ga Yekova toro adu kugii Zefania ko fura tipa gu pagume nika du dagba awirina rogo zegino dunduko areme nga: “Agu yo i ambu yo ku Yisaraere yo; i amánga nga irairapai te, ki nigumba azire a te, i abí nga mirãse nga ga biriki ngbayo yo a te. Bambiko i abí riahe ki piki sande rogo banambu, ka boro agúndesi nga yo wa sa ya.” (Zef. 3:13) Ani namanga apai kina kubani sa rogo kodatise mbiko ani ima rugatirani na Fugo Yekova nga rengo na ki aria aberã rani na gaani gene raka kuti ga Yekova arugute. Ani ima manga gupai agu aboro nangana apai ni gu bangirise nga ga wiri aboro aya si ima kpakara tipa ka mangaha. Nirengo, ani nzunzu nga kparakpara aboro, ga Mbori aboro, nafu irisa fuko auru kpotosende dũ.​—Mika 2:12.