Ga Mbori Nyemuse Niyuguyuguhe Rogo Gu Nyemuse Nga Ga Nagude

“Ka bangiri de go ti gari gude ngbamai, ya ka nunga gu wiriri nga ga rukumburi du nga ti ri ya? Ii, bangiri agi yo re rengbe na go, ono bangire nga Gbia agó nga ti ro te.”—YESAYA 49:15.

FOGOGUDE nidu rogo fiõfiõ ba wa nai nitindiru ki dungo ru na kini agi ru. Gupai re nayugopa nunga na wesewese nyemuse. Nagude du rimori nga Pam ayaa: ‘Ho mi atindi wire ni bere nibambataha, nyemu gu gude re azire nibakerehe na nyemu kaa ngerafuo ru.’

Wa vura du gipai re ziazia nga dee nakpinyemu wiriri akpi, abawetekepai aima manga wisigopai berewe tipaha na ki bi gupai ngawee gu nyemuse nga ga nagude, si nasa gupai nga wiriri naasona. Riigbu sa akusi waraga, nga gu riigbu nafura tipa agu apai du tipa agu apai nga ga berã niyaa: “Gu wisigopai mangiyo ho, si nayugo gupai ngawee agu agude avunguyo agindigo yó watadu i arogoda yó be anayo, i naadunga na ngbarago te, ono i nidu na kina bakere gberarago, na ti kura aregbo kini mangi mbangirimbangiri.” (World Health Organization Programme) Gu bangisa waraga re afura tipa gu kura wisigopai nayugo gupai ngawee, agu agude i naasonosa yó na nyemuse na kini ngerefuo yó wenengai tona kinaho i aduni nirukutu yó, i nidu na tatamana susi agu agude i naagindigo yó.

Nibipa nyakapa gu nyemuse nga ga nagude, bakere bayugupai sa nga Alan Schore rogo gu sukuru nakusa angua tipa kaza berã, ayaa: “Gu pagume du dagba gude na nai, si nga gu kpiapai ní nikaa mangaha gizo na kura aboro.”—UCLA School of Medicine in the United States.

Si nafu kina gberarago nga, gberaragotise, kaza, watadu gu kura fudifudiapai rengbe arengba ka sa gupai nga nagude gindigo wiriri watadu bangiiri “go ti gari gude.” (Yesaya 49:15) Ono tie, gupai re naamanganga dedede te. Nirengo, si nawira gupai nga Mbori aima maa gupai kurogo anaagude yo nga i nikpinyemu awiriyo akpi. Abawisigipai bi gupai ngawee, ti regbo batika, anaagude na hee tiikpotoyo yó nasa rukumbu yó si ndukunya na kini sa gupai nga mamu ní kusi ime-mai fu gude. Gi bangisa hee du adu a rogo akumba na adee re, si nasa dee ri naamangapai ninyemuse na kini kpinyemu wiriri.

Wari Nyemuse Aenge Ni?

Agu aboro nayugo gupai nga ahe akuru nisaha, i nayawee gu nyemuse angianga ga gbangbati ya du dagba nagude na wiriri, si aenge nisaha na mamu kini bandaha mbiko si na undo ti ni. Nikpiapai, magazini sa nayawee dudu rani aenge ti ga anya-ire na gu bambatapai si amangihe ti gu regbo dudu aasona nga ka kusa gu paparaha naye na nunga. (Mothering Magazine) Gi magazini re naya berewe wee “gi hee nakusa nunga re du nasa nagude na gude i zi bakure dagbayó. Wa vura duhe nga kina rengo du nga gi papara dudu re nasa boro ní du na nyemuse, ya mo ruhe aru bangironi ya gu nyemuse nga ga nagude si akuru nisaha?”

Oni kparianga gu kura sakarogopai du re. Ziazia Kekeapai nayawee Mbori ambakadi aboro rogo kpiako yo, na asino nawira kina ga Mbori. (Bambata Pai 1:27) Bangua sino Mbori nga nyemuse. Gu mokedi nangia Yoane akepai ki yaa: “Gu ni adu nga na nyemuse ya, ni aina nga Mbori te.” Tipagine? “Bambiko Mbori nga nyemuse.” (1 Yoane 4:8) Oni kparia gupai nga, Ziazia Kekeapai apenga gupai gbua nga Mbori na nyemuse te. Kuba gure, si nayawee Mbori nga nyemuse. Ko nyemuse aenga tiko.

Ziazia Kekeapai naringbisapa nyemuse rogo gi gene re: “Nyemuse nahi pai ni gbanga ha, ki du na weneringise; nyemuse akpi nga he te; nyemuse aabia nga tihe te, azaraga nga tihe te. Si amanga nga gu pai angba nga ya te, agbata nga gaha pai te, si aerã nga te, si aberã nga gbegberẽpai kuti boro te. Si angi nga mbiko irairapai te, ono si nangi mbiko rengo; Si nambu pa apai dunduko, si du gaha idapase, na gaha maabangirise na gaha hi pa apai anyasa nga te. Nyemuse adíga nga te.” (1 AKorindo 13:4-8) Ya mo si nawiraha bangironi nga gi wene sino re aenge gbua mbiko kungbo mamu?

Wai Si Abironi?

Wa oni naagedapai tipa guhe nga nyemuse rogo gu genewaraga ye mbata fu gere, ya mo oni naadunga na nyemu gupai nga boro yugu ngbatunga gu nyemuse re furoni tee? Si nga sino aboro i berẽ wa gure. Tipagine? Bambiko ‘ani aenge ti Mbori.’ (Amokedi 17:29) I ambakadi rani aboro kpinyemu rani na ani kini kpinyemu kura aboro a. Na ani rengbe kadu naa kido nga Mbori na bakere nyemu rani tiko. (Yoane 3:16; 1 Petero 5:6, 7) Gu veresi nidu ti tonatona gi papara kekeapai re nayugo gupai ngawee ga Mbori nyemuse tipa rani nibabakerehe kisusi gu nyemuse nidu ti nagude koyo du wiriri ni!

Wa vura duhe wo, oni rengbe arengba kaa baka kina bangironi kini yaa: ‘Ka si du nga Mbori nga iratatamana, kidu na ome gbiati nyemuse, tipagine ko anyasanga ti ni riipa arungo ya? Tipagine ko ambu rukutu agude ti ni ami nikpiki, ki mbu arungosi si nindu kina kumbatayo, na ki mbu zegino aboro gbarasihe na gu gayó mangimangiapai nga ga ngbaduse?’ Gere nga gu wene asanahe naida ani gbia wene akaragapai agbia kuti ni.

Wa kura aboro avura niyawee anga boro ho ini pai tipa Mbori te, watadu ya ka i ininga pai tipa ko te, ani kindi rengbe arengba ka gbia wene akaragapai kuti agi asanahe re. Amirioni aboro rogo badungu aringara aima gbia akaragapai kuti ngbatunga agi asasanahe re niwisigo yo Ziazia Kekeapai na aDezire Yekova. Agu aboro ninaakusa gi waraga re nayamba roni oni mangi kina gu bangisapai re a. Wa gaoni inohe nikaa sona mbiko wisigo Fugo Mbori na wisigo agu ahe ko akusihe, oni nika kparia gupai nga ko aturõngo na aboro te na aboro rengbe arengba ka inopai tipa ko. Kuba gu nga turuko atura, oni nika bi gupai nga Mbori “aturã nga na ani wa sa te.”—Amokedi 17:27.

[Gu kpiahe du ti kpewaraga 8]

Ga Mbori nyemuse tipa rani ima kio kisusi gu nyemuse nagude nidu nani koyo du wiriri ni