Asanahe Be Agedihe

Ya Mo Agu Agberango Naye Nisaha, Si Nga Mbusa Be Mbori?

Mbori amanganga sunge na agu agberango naye nisaha tipa ka mbusa agu aboro amanganga gbegberẽpai ya te. Ko amanganga pai wa gure mbata te, na ko amanganga ha a te. Tipagine? Bambiko Ziazia Kekeapai nayaa: “Mbori nga nyemuse.”—1 Yoane 4:8.

Nyemuse nga mburu agu apai dunduko Mbori amangaha. Nyemuse arengbanga ka manga gbegberẽpai fu gu boro amanganga gbegberẽpai ya te, mbiko Ziazia Kekeapai nayawee “nyemuse amanga nga gbegberẽpai fu kurani te.” (ARomo 13:10) Eyobo 34:12 nayaa: “Ni rengo Mbori amanga nga gbegberẽ te.”

Rengo ngaha nga, Ziazia Kekeapai aima gumbaha ki yawee agberango aduadu ti gaani regbo, ngbatunga gu nga bakere ‘abazigizo.’ (Ruka 21:11) Ono anga Yekova ninaasa gu gbarasahe ninaaye be agberango te, a wa duhe nga, anga gu boro ninaafura tipa bakere bavugumo nga si nika ye, ní ninaasaha si mangi te. Ka si du tie nga, anga Mbori naye na agu agberango naye nisaha ka rungosi aboro nani te, ginihe tie ninaasaha si niimangi?

Ziazia Kekeapai nayawee “zegino dunduko du ni zogozogo ho be gbegberẽ ko” nga Satana Bakitingbanga. (1 Yoane 5:19) Ko aima du nibaimiaboro tona kinaho aboro asamungu ni dati gaani regbo areme. (Yoane 8:44) Satana nabi gu unga nga ga aboro niguhe adunga sunge ti ni ya. Kina gbangbati du rogoko yo, sidu, anga iiriwopai ngaha ka bi gupai nga ko ima sa zegino dunduko si niimangi apai kina rogo gbangbati yo te. Areme rogo zegino, aboro gbangbati namanga aboro-wenesa ngbaome i niraki rogo agu arago du gayó raka rogoho ngbapai be agu agberango naye nisaha, watadu agu agberango naye mbiko gu mangapai nga ga aboro. (AEfeso 2:2; 1 Yoane 2:16) Rogo gi gene re, agu airagbangbati re du si aida ani bira yó tipa bete agu agberangbii aboro agbiatiyo nani areme. (Batungusipai 8:9) Wai duhe wo?

Gu badungu agberango namanga, si nayeaye a mbiko gu mangaapai nga ga aboro. Nikpiapai, oni makianga gu kerepai namangi agu aboro naaraka rogo gu ba nga New Orleans, U.S.A. bakere bavugumo amangi rogoho, watadu gu mai nagara dogoro rii gu gangara nga Venezuela ki ndu nani ku dagba akporo si ki gbarasi akporo. Ti regbo agu agberango re na agu akuraha a, mai na wege aye na bakere gberango mbiko ga aboro zanga inohe tipa agu apai du tipa gu rago re, dudua abambu regeteregete, zanga degatue kuti gu zahe i afuhe, na gu iraira mangapai nga ga abazogo.

Oni kparianga gu gberango namangi ti agu aregbo i aakeka Ziazia Kekeapai ti ni. Ti gu regbo Yesu adu auru kpotosende ane, gbanga bambu ati ki imi aboro nga 18. (Ruka 13:4) Gi gberango re arengbe kadu nisangbana ingapai nga ga aboro, singia “rago gbia kuti mamu,” watadu si dunduko ue naye nani, ono si angianga ga Mbori sarangbangaa te.—Batungusipai 9:11.

Ya mo gberango ho namangi mbiko Mbori naye nani? Ii, ono angianga wa agu agberango namanga areme ya. Yekova asia agu aboro asia ko aida i raki na aguyo ko aida ka imoyo na gberango, na nduhe adu kina ti ni, na wo si anaamanga dedede te. Gu Ime Akangbii nadu ti rago Noa naapa gbarasa Sodomo na Amora ti rago Roto nga agu akpiapai ue duho. (Bambata Pai 6:7-9, 13; 18:20-32; 19:24) Agu asapangbangaa re awege gu gbegberẽ rikaaboro kusayo naaidanga ka sa gayó berã ya na ki banda agu aboro nadu niruruyo bangiri Mbori.

Ka pepai nirengo, Yekova Mbori na kina gene beko ka nyasa riipa arungo dunduko na ka batasa aboro be agu agberango naye nisaha, na ko na nyemu ka mangaha wo. Atambuahe 72:12 nafura tipa ga Mbori Bakindo ko namoiko nga Yesu Kristo niyaa: “Ko nabatasa irazingo ahe ho ni nakpara ni ku ari; na irarungo na gu ni adu nga mounda ti ni ya.”