Ya Mo Mbori Du Nafu Mbusa Furani?

Boro birĩ-zogarago sa Japan yo ayaa: “Mi nabihe nga Mbori du nafu mbusa fu agu aboro gberango nati kuriyo wa vura duhe nga rungoyo namanga re amanga,” ko ape gipai re tifuo gu bazigizo namangi gbiati bakere sungburosungburo baime rogo Marungu 2011.

Ho aboro akpi ni nga 220,000 be gu bazigizo namangi Haiti yo rogo Ngi 2010, boro pambori sa ninaafura rogo terevizioni aya, si amangi wo bambiko i “asatiyo fuo bakitingbanga” si naida i “karagatiyo fuo mbori.”

Ho aboro akpi ni 79 be gu waawaa namangi rogo gu ringara nga Manila, du Philippines yo, bavugahe nga ga aKatoriko ayawee, “Mbori du naida ka zingisa gu sangbakpotoraniyo du nikpikpihe na nikparakakparakaha.” Waraga apangbanga atingidi gupai nga “ue bawe na sa rii kama nga ga sosono aboro idi kuti gupai nga Mbori du naba gako zinga rogo abazigizo, kere bavugumo gbiati gu kura agberango naye be gu mangapai nga ga ome zegino” nga gu namanga dedede rogo gu ringara re.

GU BIPAI nga Mbori du naye na agu agberango naye be gu mangapai nga ga ome zegino ka fu mbusa fu gbegberẽ aboro, anga vovo pai ngaha te. Rogo gu garã nangia 1755, tifuo aboro kpi nga 60,000 be bazigizo, we, na gu bakere sungburosungburo ime namangi rogo gu gbata nga Lisbon, Portugal yo, bawisigipai dudunguroo tipa raka nangia Voltaire asanahe nga: “Ya mo gu kere gbegberẽ mangaapai watadu kuo andiko nga ga Lisbon, si ima susa ga Paris du zereda rogo kpaima?” Nirengo, amirioni aboro ainongo gupai nzunzu namanga te, i naberãha nga Mbori du namangasunge na gu gberango naye be gu mangapai nga ga ome zegino ka fu mbusa fu aboro. Rogo dungu aringara i nayamba ngbatunga agu agberango re nga ga Mbori mangapai.

Nibi gipai re, si naida ani sana tirani nga: Ya mo Mbori du nzunzu namangasunge na agberango ka fu mbusa fu aboro? Ya mo agu agberango namanga awere, si nga mbusa be Mbori?

Aboro nagu sa bira Mbori niipo nigumbayo gu pangbanga du rogo Ziazia Kekeapai nga gu nafura tipa wai Mbori agburuwa zegino na ime akangbii. (Bambata Pai 7:17-22; 18:20; 19:24, 25; Pa Geda Aboro 16:31-35) Ono wisigo ani agu apangbanga du rogo Ziazia Kekeapai nasa rani ani bi agu agene biata du ga Mbori gbarasahe rogoho kia. Bambataha nga, mbata fu Mbori ye na gbarasahe, ko anaafu zahe afu. Uehe nga, gu gberango du areme naimo wene aboro na gbegberẽyo, ono gu nangia ga Mbori, si anaaimo kina gbegberẽyo sa, kina agu aboro naanika ka gia gako zahe ko anigbarasiyo. Biataha nga, Mbori anaabatasa aboro-wenesa abatasa.—Bambata Pai 7:1, 23; 19:15-17; Pa Geda Aboro 16:23-27.

Gu badungu agberango dunduko namanga kini imi dungu amirioni aboro areme, gopai ho nayugoho nga Mbori du nasaha si niimangi te. Ginipai tie nasa gupai nga agberango nimangi kina kumbatayo? Wai rengbe ani ka sovura kutini? Ya mo regbo aduho agberango nikaa manganga berewe ya? Oni nika gbia karagapai kuti agi asanahe re rogo gu kekeapai naye fuo gere.