Gupai Rengbe Ani ka Mangaha Mbata fu ti Gberango

Wa duhe nga bange agu agberango namanga na wai si agberesapa ahe na kini imi aboro nasona kina kumbatayo, ginipai rengbe ani ka mangaha? Ani furanga tipa agu apai rengbe ani ka mangaha.

Oni guari rogo gu ba rengbe gberango arengba ka manga rogoho. Ziazia Kekeapai nayaa: “Ngangarã boro nabi kere pai, ki gbu; ono zangainahe nandu andu kindi, ki bi mbusa tipa ha.” (Asanza 22:3) Gere nga gu rugute rengbe arengba ka undo nibipa agberango. Ka si du nga i fu zahe nga mbia naida ka su, hihi ime mai naye, watadu bakere bavugumo naida ka manga, gu boro du na tatamana, ní naima guari rogo gu ba re ki ndu kurogo gu ba ka ba ní ngba angba rogoho. Unga nyakipaha kisusi bambu watadu aũzegino.

Gu kura aboro rengbe ka sia ka sungo rogo gu ba gberango arengbanga ka manga rogoho ya. Bangbasia bawisigipai sa agumba gupai nga: “Agu aba du nikerehe nga gu rengbe agu agberango re ka manga rogoho, si mbembedi na akuraha. Wiri papara kpotosende gbua tooni du agi aba re rogoho, na agu agberango nika manga kumbatayo, si nika manga kina rogo agi aba re.” Gipai re ima rengba kadu nirengo, nikpiapai rogo agu aba du nizorozoroho watadu agu aba sende narengbe ka sara rogoho ki mbiri aboro. Ka oni gauri kusayo rogo ngbatunga aba wa gure watadu ka oni ndu kaa raka rogo agu aba adunga wa gure ya, oni bandatironi abanda ti agu agberango re.

Oni mbakaditironi. Gu kura regbo kinaho si narengbe ka manga nga ka oni vura bandatironi abanda ti agu agberango re wai vurũ, si duwa ka si gbia roni. Ka si mangi wo, si adu furoni taata tipa oni di behe ka si du nga oni aima mbakadatironi tipaha. Gipai re na ngbanya na gu rugute du rogo Asanza 22:3 nga gu i nifura tipaha kuari. Ya mo oni mbakaditironi tipa gu tunguotunguopai ka mangi? Gu buku du rimoho nga 1-2-3 of Disaster Education nagumba pa agu ahe rengbe boro ka mbakada baraha tipa gu tunguotunguopai ka da. Si nagumba gupai nga boro rengbe ka mbakada bara angua, mbirimbiri ime, gu riahe paha agberãnga niipo ya, gbiati agu awaraga du na nyanyakipaha. Gu kurapai berewe rengbe oni ka mangaha nga ka sakapai na gaoni aborokporo tipa ngbatunga gu gberango rengbe ka manga rogo gaoni dagbarago na gupai rengbe oni ka mangaha ka si mangi.

Oni banda dawedawe pagume na Mbori. Pa banda ani dawedawe pagume na Mbori rengbe ka undo rani rogo dungu apai yo. Ziazia Kekeapai nafura tipa Mbori ya ko “nga Mbori wasa dunduko; nafu wasa fu rani rogo gaani gberãngbi yo dunduko.” Gu kura veresi nafura tipa ko ya ko nga gu Mbori “nafu wasa fu agu yo nga abayee” yó.—2 AKorindo 1:3, 4; 7:6.

Nirengo, Mbori ima inopai tipa agu apai dunduko nagbia agu aboro du na idapase kutiko. Ko nga Mbori nyemuse na ko nafu wasa fu gako aboro ngba dungu agene. (1 Yoane 4:8) Manga kparakpee tipa ga Mbori ziazia toro angianga tipa ko mangi iiriwopai ya rengbe arengba ka undo ti regbo agberango. Ziazia toro rengbe ka ye na agu apangbanga du rogo Ziazia Kekeapai ku berã boro yo nga gu rengbe ka fu wasa funi ti regbo gberango. Nirengo, ga Mbori amoyambu rengbe arengba ka gumba gupai Davide agumbaha ki yaa: “Ii, ka mi vura ka ta rogo ngbungumo kirima kpio, mi agunde nga be gbigbitapai te, bambiko mo du na mi; ga ngbondo na ga tepe, si ninangarãsi re.”—Atambuahe 23:4.

AKristano naundo akurayo aundo. Rogo bambata sa kama agarã, Kristano sa ni nebi rimoko angia Agabo agumba gupai nga “bakere gberãngbi amánga amanga rogo ngbi dũ. Si ki da ti rengo ni gu rago Kuraudio azogo rago ni.” Gu bakere gberãngbi re aima fuda dungu ga Yesu abawiriki Yuda yo. Ginipai agu aKristano naadu rogo kura arago amangihe ho i agi pa gu gberãngbi ni nati kurii akurayo? Ziazia Kekeapai nagumba gupai nga: “Abawiriki ki ya i nikakeda ũgomoro fu agu awirina nadu Yuda yo, gu ni ki niringbisi gani na kina omeni.” (Amokedi 11:28, 29) I aundo nikeda yó ariahe fu agu akurayo aidipase re.

Ho gberãngbi ati ni areme kurii rago, ga Mbori amoyambu namangapai wakina agu awirina naadu rogo bambata sa kama agarã re. ADezire Yekova ni agu aboro i aima inoyo rogo zegino dunduko mbiko gu undo i afuhe fu akurayo aidipase ti regbo agberango. Nikpiapai, ho bazigizo amangi ni rogo gu ringara nga Chile rogo Wegebe 27, 2010, aDezire Yekova andu niipo tipa ka undo agu aboro si agberesipa gayo ahe. Karla nga guri bakere sungburosungburo ime afu na gari bambu agumba gupai nga: “Si adu nibakere pa wasa na pa ngara ka bi gupai rogo gu uru nangbe fuo gu bakere sungburosungburo ime re nga, [akuare aidipase] aye nibasa rogo gu kura arago tipa ka undo. Zanga kapa, Yekova afu wasa furani vurube gu wene sino nga ga agu aboro nafu tiyo ka undo. Mi abi tire nga aboro ima kpinyemu re na mi nibanda banda re.” Titari angianga Dezire Yekova ya abi gu undo aDezire Yekova afuhe re ki gumba gupai nga: “Gi mangaapai re kia ti gu mangaapai mi aabihe rogo gaani kanisa tipa dungu agarã.” Gupai ko abihe re asako ko sana aDezire Yekova tipa i tona wisigo Ziazia Kekeapai naako.

Kodatise na agu aboro nakpinyemu Yekova rengbe ka undo gbe ti agu aregbo nga ga gberãngbi. Ono wa vura duhe wo, ya mo regbo aduho ngbatunga agu agberango re nikaa manganga ti ni ya? Ani bingo gupai Ziazia Kekeapai agumbaha tipa gu sanahe re.

[Gu sura du ti kpewaraga 6]

Ya mo oni mbakaditironi tipa gu tunguotunguopai ka mangi?

[Gu sura du ti kpewaraga 7]

Manga kparakpee tipa ga Mbori ziazia toro angianga tipa ko mangi iiriwopai ya rengbe arengba ka undo ti regbo agberango

[Gu sura du ti kpewaraga 7]

AKristano naundo akurayo aundo ho gberango nati ni kuriyo

[Gu sura du ti kpewaraga 7]

“Mi abi tire nga aboro ima kpinyemu re na mi nibanda banda re”