Oni Du Niruru Roni Na Kpamiakpamia Kpotoroniyo

“Mi . . . [ata] kina rogo ga rengo; mo kpámia kpotore yo si gunde ti rimoro.”—TAM. 86:11.

1, 2. (a) Ringbisihe kuti Atambuahe 86:2, 11, gine rengbe ka undo rani ani nye niruru rani fu Yekova ho du ani ni rogo asada? (b) Gini regbo si aida ani du niruru rani?

TIPAGINE duhe ti ni nga kura aKristano nanye niruruyo tipa dungu agarã i ki vura zio yó ku bambukiso yo watadu ki vura rungosi yó vurũ, ono kusa, i ki tona orafuo aũzegino? Gu karagapai du tipa gi sanahe re, si nabipa gupai du ngbaduraniyo, nga gupai nayugo da nzunzu nga ani. Atambuahe namba 86 nayawee gu boro nakakuti kurani, ní nga gu boro adunga ngbaduniyo nikparakakparakaha ya. Davide akparikpee ki yaa: “Mo banda ungare, bambiko mi du na sinombori; Ako, mo nga gi Mbori, mo batasi ga moyambu nakida kuti ro.” Davide akparikpee berewe ki yaa: “Ako Yekova, mo yúgu ga gene fere, mi nita kina rogo ga rengo; mo kpámia kpotore yo si gunde ti rimoro.”—Tam. 86:2, 11.

² Ka ani akidonga kuti Mbori na ngbaduraniyo dunduko ya, gu kura apai sa rani asa ka ani nyenga niruru rani fuko ya. Gu nyemuapai nga ga gbangbati, si wakina agu abundu i akpisidoho ku sende yo nga maini. Ka si vura du nga ani anye niruru rani fu Yekova ho ani aduni rogo akpakarapai, ani rengbe arengba ka ti kurogo ga Satana gbina. Nairiwo wai si aida ani du niruru rani fu Yekova awere mbata fu asada ye sa rani! Ziazia Kekeapai nayaa: “Mo nibánda kpotoro yo ngangarã; bambiko yo unga naye ni.” (Snz. 4:23) Ani rengbe ka wirika nyanyakipa pai tipa gipai re ti vuro gupai namangi gu nebi nadu Yuda yo Yekova akedi ko fuo gu Bakindo aYisaraere nangia Yerobama.

‘Mi Afu Mosoro Foro’

3. Ginipai Yerobama amangihe kuti gu sapangbangaa ga Mbori nebi agumbaha fuko?

³ Oni moinga kpia gipai re ku berãroni yo. Ga Mbori kumba gi nyasi anyasa na gu kere pangbangaa ko naagumbaha fu Bakindo Yerobama, nga guko nasigira iriso bagara rogo gu kindo du ku nodiyo du na angbatunga bawe. Ngbadu gu bakindo re imi na ko ki zingi. Ko zinahe fu gako akumba i zi gu mokedi re. Ono Yekova na kina gako kumba. Wakina ikpirogumba, gu be bakindo ko niyaha, si sonzora ngba iiriwo gene, na gako bamotumo ki gbataka. Yerobama kini aria sinoko nibasa, kini zungodi ga Mbori kumba niyaa: “Mo zungadi pa ga Yekova inapai nga gamo Mbori, ki kpari tipa re, ya bere hu berewe.” Gu nebi re akpari fu Yekova, be bakindo ki ima hu.—1 Aba. 13:1-6.

4. (a) Tipagine ga bakindo gamahe adu ti ni niasada fu ga Mbori nebi? (b) Ginipai ga Mbori nebi amangihe ho bakindo aidi ni ko ri riahe na ki di gamahe beko?

⁴ Fuo gure, Yerobama ya fu ga Mbori kumba wee: “Ani ndu na mo ku kpure yo, mo [ri riahe] ki ngarãsi tiro, mi ki fu mosoro foro.” (1 Aba. 13:7) Ginipai si aida ga Mbori kumba mangihe? Ya mo si naida ko idipa gu yamba ko bakindo nayambu ko nani re, fuo gumbako pa ga Mbori sapangbangaa fuko? (Tam. 119:113) Watadu si naida ko káha aká, wa si navura wira gupai nga, rago ima gberã ti bakindo mbiko gupai ko nimangihe re? Gene kina be Yerobama ka fuka kikindigipa ahe fu abakureako. Kangia gu nebi re aima duna nyemu aũzegino tiko, gi gamahe nga ga bakindo re rengbe arengba kadu fuko niʹasada. Ono tie, Yekova aima ruga gu nebi re ki yaa: “Ka mo ri nga riahe, watadu mbira ime ya, ka mo karaga nga tiro ngba gu gene mo niye ngba ha a ya.” Gu nebi re zungahe fu bakindo ki yaa: “Ka mo vura fu bebere ga ũkporo fere vurũ, ani andu nga na mo te. Mi ari nga riahe watadu mbira ime rogo gi rago te re.” Gu nebi re guari Betere yo ka ga ngba kura gene. (1 Aba. 13:8-10) Ginipai gu diaberã nga ga gu nebi re ayugoho furani tipa ndikidi du niruruse?—Rom. 15:4.

“Si Rengbe fu Rani”

5. Wai nyemu aũzegino abipa padu boro niruruni?

⁵ Si rengbe kadu nga padu boro niruru ní na wiripai dagbaha na aũzegino te, ono wo tie duhe. Ya mo ani naa kido kuti Yekova nga ko nika fuka agu ahe afuka du ani na zingoho? (Mt. 6:33; Eb. 13:5) Kuba gupai nga ani naamanga asadatise nyanyakii tipa ka gbia wene ahe rogo raka nga gu ani arengbanga ka gbiaha ya, ya mo ani rengbe kaa raka zangaha? (Oni gedi AFiripoio 4:11-13.) Ya mo ani na nyemu ka mbu agu apai nga ga toro tipa ka gbia agu ahe ani aidaha? Ya mo padu ani niruru rani nga gupai peresi ani he rogo gaani raka? Gaani karagapai nabipa ngbaduraniyo singia si naabaha dunduko kina kuti sunge fu Mbori. Gu mokedi nangia Pauro akepai ki yaa: “Sinombori gbia kuti zereda nga bakere mosoro. Bambiko ani arima nga na he ku rogo gi zegino te re ka ani kuru nga na he koyo a te. Ono wa du ani na riahe na roko si rengbe fu rani.”—1 Tim. 6:6-8.

6. Gini ahe rengbe yó ka gumbapa fuhe furani, na gine rengbe ka undo rani ani diberã singia ka diaha watadu ka káha?

⁶ Nikpiapai, gaani bairasunge rengbe ka fu kura sunge furani ani kaa zio bakere marã ti ni na kini gbia gu kura weneapai. Watadu ani rengbe ka bi gupai nga, ka ani ga kurogo kura ringara watadu kurogo kura rago, ani zi bakere marã azio. Ti bambata bibihe, ngbatunga agu amomu re nawira wa si naye kina be Yekova. Ono mbata fu ani mangipai tipaha, ya mo si aidanga ani wisigi gaani ndu mangapai tee? Gupai si aida ani wisigihe mbata nga, “Ya mo gu gimi diaberã re agberesapa gimi pagume na Yekova?”

7. Tipagine nyakipa gupai ti ni nga ani di nyemu aũzegino kusayo rogoraniyo?

⁷ Ga Satana zegino nasosoda aboro i naaora fuo aũzegino. (Oni gedi 1 Yoane 2:15, 16.) Gupai Bakitingbanga aida ka mangaha nga ka gberesa ngbaduraniyo. Sidu, si naida ani wisigi tirani ka ino singia nyemu aũzegino rogoraniyo tipa wa ka ani ruho ka diaha kusayo. (Yugo. 3:15-17) Si aadunga nimbumbupai fu Yesu ko ká agu akindo nga ga zegino Satana agumbapa fuhe fuko te. (Mt. 4:8-10) Yesu afu rugute ki yaa: “Oni gí he, ka oni dí nga ngbiti ahe ya; bambiko i aringbisa nga ungaboro na gani ahe te.” (Ruka 12:15) Padu ani niruru rani nika undo rani ani naakido kuti Yekova.

Gbinza Nebi “Agumba Kina Zire fu Ko”

8. Wai ga Mbori nebi adu ngba asada?

⁸ Ka apai andu andu wenengai kubara ga Mbori nebi yo wa ka ko asusi asusa na gako nunguro ku kpuko yo. Ono nikina ipo tie, ko agbiatiko na kura asada. Ziazia Kekeapai nayaa: “Gbinza nebi adu Betere yo. Awiriko ki ye koyo du ko ni ki pe pa agu apai” fuko namangi nigu uru re. Fuo gia ko ho, ko aya fu awiriko wee i moi basungo rii dongi fuko tipa ko do fuo ga Mbori nebi. Ko aaturongo te ko ki gbia gi nebi re ko niʹongodi tii bakere ngua na ko ki ya fuko: “Ani ndu na mo ku kpure yo, ka ri riahe.” Fuo gu ga Mbori nebi re ká gupai re aká, gu gbinza kumba re aya fuko wee: “Mi tigimi nga nebi a wa kina ro, maraika agumba pai fere kuti sangba Yekova, ki ya, ‘Mo yega na ko ku kpuro yo, ko ri riahe ki mbiri ime.’” Ono tie, Ziazia Kekeapai nayawee gu gbinza nebi re “agumba kina zire fu ko.”—1 Aba. 13:11-18.

9. Gine Ziazia Kekeapai agumbaha tipa airabiriki, na ada i aimisa yó?

⁹ Ani ainongo gupai gu gbinza nebi re amangipai ti ni wa gure te, ono gu ini ani he nga ko agumba ziree. Gu gbinza nebi re avurangia ruru nebi fu Yekova mbata. Ono tie, ko agumba ziree ti gi regbo re. Ziazia Kekeapai nasoga gumba ziree asoga nyanyakii. Si nayaa: “Irabiriki nga kere gbegberẽ boro bangiri Yekova, ono ruru aboro du ngbanyaa dagbako naayó.” (Snz. 3:32, NW) Anga airabiriki naimisa kina tiyó rogo toro yo sa te, ono i naimisa kura aboro aimisa.

‘Ko Andu na’ Gbinza Nebi

10. Ginipai ga Mbori nebi amangihe ho gbinza nebi ayambuko ni ku kpuko yo, na sangbanaha angia gine?

¹⁰ Si aidi gu nebi naye Yuda yo re ima ino ya ziree du gu gbinza nebi re agumbaha. Ka ko asana tiko ki yaa, ‘Tipagine ka Yekova nikedi maraika ti ni fuo kura boro kia ní gumba gu vovopai fere si aida mi mangihe?’ Ka ko asana Yekova tipa ka rugatiko nani nzunzu nga rengo du, ono Ziazia Kekeapai ayanga wee ko amangihe wo te. Kuba gure, ‘ko andu na gbinza nebi, ki ri riahe kpuko yo, ki mbiri ime.’ Rago aima gberã ti Yekova. Ho gu nebi re aaga ni ku Yuda yo, bahu aimiko gene. Nairiwo gu kere kpio gu nebi re akpihe!—1 Aba. 13:19-25.a

11. Gini wene kpiapai Aiya amoihe?

¹¹ Tipa Aiya tigako, nga gu nebi Yekova akediko ko ndu ka maa Yerobama nibakindo, ko anye kindi niruruko zavura ho ko agbinza ni. Ho Aiya agbinza ni na kingia iravurari, Yerobama akedi diako fuoko ri sanako tipa gu wiriyo naawoka singia ko abata. Aiya aokanga pai tiyó te, ko aya fuyó ziazia wee, wiriyo nika kpiakpi. (1 Aba. 14:1-18) Gu dungu amaku Aiya agbiaha, gu sa angia ko ake sangbanebi. Gini sangbanebi nangiaha? Si nga gu sangbanebi gu boromotumo nangia Ezara arogodi apai rogoho.—2 Peka 9:29.

12-14. (a) Ginipai rengbe ani ka wirikaha ti gupai namangi tipa paranga nebi? (b) Oni gumbanga pa agu apai rengbe ka manga si ki idi boro wisigi agu arugute wenengai bakumba nafuhe du mburuhe rii Ziazia Kekeapai.

¹² Ziazia Kekeapai agumbanga ndu gupai gu paranga nebi re aasananga Yekova ti ni mbata fu ko ndu ka ri riahe fuo gu gbinza nebi re na ki mbiri ime te. Ya mo si rengbe kadu nga gu gbinza nebi re agumba kina gupai gu paranga nebi re aaida ka giaha? Ginipai rengbe ani ka wirikaha be gupai re? Si naida gupai ru bangirani zanga kapa ngawee, ga Yekova andiko dunduko nikina ruruhe. Na si naida ani diberã kaa ndu kuti ni, ka kina ginipai vura manga amanga vurũ.

¹³ Kura aboro naagia kina agu apai i aida ka giaha ho boro afu rugute ni fuyó. Nikpiapai, si rengbe kadu nga i fu sunge fu wirina nga gu nika dia gu regbo beni ka ní nidihe na gani aborokporo na gu rengbe ní ka diaha ku gene agu apai yo nga ga toro. Si rengbe kadu nga ní nika sana bakumba tipa gipai re. Gu bakumba re rengbe ka tona gako fugo kini yawee anga ko nga gu boro si aida ní diberã fu gu wirina re tipa wai si aida ko ningere fuo gako aborokporo te. Fuo gure, gu bakumba re rengbe ka gumbapa gu kereapai rengbe ka gbia ko rogo toro yo ka ko idi pa gu sunge pe yó pa fuhe fuko re. Ya mo gu wirina re nikaa tingida kina gu bambatapai gu bakumba re nigumbaha nga, anga ko nga gu boro nadiaberã fu gu wirina re tipa wai si aida ko ningere fuo gako aborokporo tee? Watadu ko nika berãkurii gu kura afugo gu bakumba re nigumbaha tipa gu kereapai rengbe ka gbiako watadu gako aborokporo rogo toro yo? Si naida ko diberã tipa gupai kaa gberesanga pako rogo toro yo ya.

¹⁴ Ani bingo kurapai berewe rengbe arengba ka manga. Wirina sana bakumba ka bihe singia si naida ri kpakara na kumbaari adunga na ri ti idapase ya. Zanga kapa, gu bakumba re nika ya furi wee, anga ko nadiaberã furi tipa ri kparaka na kumbaari watadu ka sungo naako te. Fuo gure, ko rengbe ka wisigo agu arugute na ri du rogo Ziazia Kekeapai yo nafura tipa gipai re. (1 Kor. 7:10-16) Ya mo ri awisigo afugo gu bakumba re wenengai? Watadu ri ima diaberã tipa ka kparaka na kumbaari? Ho ri aida ka diaberã ni, si adu nipatatamana ka ri kpari fu Mbori na ki wisigi agu arugute du mburuhe rii Ziazia Kekeapai tipa gipai re.

Oni Duna Umbasitise

15. Ginipai ani awirikaha ti gu irairapai ga Mbori kumba amangihe?

¹⁵ Gini kurapai rengbe ani ka wirikaha ti gu irairapai ga Mbori kumba amangihe? Asanza 3:5 nayaa: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya.” Kuba gupai nga gu ga Mbori kumba re naakido kina kuti Yekova wa gu ko anaamangaha mbata, ko akido kina kuti tiko ti gu regbo re. Gu irairapai re aye na kpioko na si ki gberesi gako pagume na Mbori. Nairiwo wai gupai namangi gu nebi re anyakasa gupai nga, si naida ani naamangasunge fu Yekova niumbasitise na niruru rani!

16, 17. Gine rengbe ka undo rani ani nye niruru rani fu Yekova?

¹⁶ Gu nyemuapai du ngbaduraniyo rengbe arengba ka ingisa rani. “Kpotoboro yo nangi ahe ki susi ahe dunduko, si na kere kaza?” (Yere. 17:9) Tipa ani nye niruru rani fu Yekova, si naida ani mangi asadatise nyanyakii ka dia gu kuru asino rani kusayo nga gu rengbe ka sa rani ani naagusa-apai na kini kido kina kuti tirani. Na si naida ani ukadi vovo borose, ‘fu yó ho ku sangba Mbori yo na rurupai na ziaziapai nga ga rengo.’—Oni gedi AEfeso 4:22-24.

¹⁷ Asanza 11:2 nayaa: “Tatamana du fu agu yo du ni bayee yo.” Ka ani du nibayee rani kini kido kina kuti Yekova, si nika undo rani ani ne manga kere irairaapai. Nikpiapai, zerakpotoseyo rengbe ka sa rani ani mangi gupai arunga ya. (Snz. 24:10, NW) Si rengbe kadu nga, omerani ima bata be manga kura ga Mbori sunge na ani ki tona ka yawee ani mangihe gbe, si naida kura aboro susi nani kumbatayo. Watadu ani rengbe ka yawee ani naida kaa raka wakina gu kura aboro araka a. Ono tie, ka ani ‘aʹasada’ tirani nyanyakii na “[ki]nimángi ga Gbia sunge zaza dedede,” si nika banda kpotoraniyo.—Ruka 13:24; 1 Kor. 15:58.

18. Ginipai si aida ani mangihe ka si du nga ani ainongo gu diaberã si aida ani mangihe te?

¹⁸ Ti kura aregbo, si rengbe ka ida ani mangi nyanyakipa adiaberã, ono ka ani ainongo gupai nzunzu si aida ani mangihe ya. Fuo duhe were, ya mo si naida ani mangi kina gupai ani aberãha ya si ngbaa? Ho du ani ni rogo apai wa gure, si nipatatamana ani sana Yekova tipa undo. Yakoba 1:5 nayaa: “Ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko.” Barani du ngbangbaturũ yo nika fu ziazia toro furani tipa si undo rani ani mangi wene diaberã.—Oni gedi Ruka 11:9, 13.

Oni Diberã ka Nye Niruru Roni

19, 20. Ginipai si aida ani diberã ka mangaha?

¹⁹ Gu kere aregbo naye tingbafuo sa Soromo mungu, si aye na kere aʹasada fu ga Mbori amoyambu. Rengo du ngaha nga, badungu aboro aima ti rogo idapase yo. Ono wa si avura duwo, aguyo kinaho nanye niruruyo fu Yekova.

²⁰ Aʹuru dunduko si naaida ani mangi adiaberã riipa agu apai du niʹasada furani. Ani rengbe arengba a ka nye niruru rani. Ani nyenga anye kindi niruru rani fu Yekova na kpamiakpamia ngbaduraniyo, kini kido kutiko nga, ko nika fu maku afu fu gako ziazia aboro.—2 Sam. 22:26.

[Gu rukutu kekeapai du bandu kpewaraga yo]

Gaoni Karagapai Nga Gine?

• Tipagine si aida ti ni ani asadi tirani ka dia nyemu aũzegino kusayo rogoraniyo?

• Gine nika undo rani ani nye niruru rani fu Yekova?

• Wai rengbe umbasitise ka undo rani ani nye niruru rani fu Mbori?

[Gu kpiahe du ti kpewaraga 15]

Ya mo si nidu furoni nikpakarapai ka diabe asada?

[Gu kpiahe du ti kpewaraga 16]

Ya mo oni akpara fu Mbori na ki wisigi agu arugute du mburuhe rii Ziazia Kekeapai?