Kindo Akparaka

YA MO mo ini gupai gu kumba re asipo gako roko ti ni? Yekova du ya fuko ko mangihe wo. Gi kumba re nga ga Mbori nebi nangia Aiya. Mo ini nebi nga gini boro? Nebi nga gu boro Mbori agumba agu apai funi nika manga ku mbatayo.

Aiya nafura ane na Yerobama ko nagbia ko gene. Yerobama angia kikiipa boro nanaangera kurii kura asunge nga ga Soromo. Ho Aiya agbia Yerobama ni gene, Aiya amangi gupai du wakina pa popo. Ko auru gako vovo roko tiko ki sipihe ku rogoho 12. Ko ki ya fu Yerobama: ‘Mo di apaparaha 10 tipa tiro.’ Mo ini ndu gupai Aiya afu apapara gu roko re ti ni fu Yerobama 10?

Aiya agumba gupai nga Yekova nika dia kindo kusayo be Soromo. Na Yekova nika fu atunga 10 fu Yerobama. Gere ayugu gupai nga atunga ue gbua nika nye fu wiri Soromo nangia Rabama.

Ho Soromo agi gupai ni Aiya apehe fu Yerobama, ko azingi ni kerehe. Ko kini idi ka imo Yerobama. Ono Yerobama aoro ku Ezipeta yo. Fuo bete regbo, Soromo ki kpi. Ko azogorago tipa agarã 40. Wiriko nangia Rabama ki du ni bakindo kubako. Ho Yerobama agi gupai ni Ezipeta yo nga Soromo ima kpi, ko akaragatiko ku Yisaraere yo.

Rabama aangianga wene bakindo te. Sinoko agberẽ fu aboro susi wai ga bako aye ka da. Yerobama na kura kikindigi pa aboro andu fuo Bakindo Rabama ki ya fuko si naida ko mbakadi sinoko fu aboro. Ono ka Rabama agianga pai ngbayo ya. Ko ki gberesi sinoko susi gu naadu mbata. Sidu, aboro ki moi Yerobama ni bakindo kurii atunga 10, ono agu atunga nangia ga Benyamina na Yuda kidu kindi na Rabama ni gayo bakindo.

Yerobama aaidanga gako aboro nindu ku Yerusarema yo kaa irisombori tii ga Yekova yekaru yo te. Sidu, ko ki mbakadi kpia awiri bagara ue ki sa agu atunga 10 naadu tii gako kindo i niirisihe. Fuo regbo tooni, ringara ki hi be gbegberẽ mangaapai na zuu.

Fudifudiapai aamanga amanga a rogo gu kindo naadu na atunga rogoho ue. Mbata fu agarã da ti bisue fuo tona Rabama zogarago, bakindo Ezipeta aye ka sovura kuti Yerusarema. Ko arogodi dungu nyanyakipa ahe rogo ga Yekova yekaru yo ki ga na ni. Gu yekaru re anye wai i aduaha tipa kina bete regbo gbua apai ki sakitihe tipaha.