Agu Apai Nika Manga Barambeda

HO GU mokedi nangia Petero aafura ni tipa raka kumbatayo auru kpotosende, ko akepai ki yaa: “Ani nangera tipa vovo angbangbaturũ na vovo kpotosende, nga gu ruru apai nikanye rogo ho.” (2 Petero 3:13) Gu nebi nangia Yesaya nangia gu bambata boro nafura tipa “vovo angbangbaturũ na vovo kpotosende.” (Yesaya 65:17; 66:22) Ho Petero afura ni tipa gi sangbanebi re, ko ayugu gupai nga gu sangbanebi re adigongo ti ragoko te.

Kusa, rogo gu garã nangia 96 F.B.K., Yoane afura tipa gu “vovo kpotosende” re rogo gu yuguyugupai ko abihe ya si nika ye na amaku ti regbo ga Mbori Kindo. (Yugoti 21:1-4) Agu afugo Yesu agumbaha gbiati ga Pauro tipa agu apai si adu nga si nikaa manga mbata fu ga Mbori Kindo ye, si namanga amanga wa du rago re. Sidu, ani namaabangirani nga, ga Mbori Kindo nika yeaye barambeda na vovo zegino. Wai raka nikadu rogo gu vovo zegino re? Gu kitabu nga Yesaya nagumbaha furani.

Agu Amaku Nikadu Rogo Vovo Zegino

Zereda Adu Rogo Zegino Dunduko Gbiati Bangisa Irisombori. “I atá gayo abasape ni marã sopabino, na gayo abaso ni marã kuya ngua; rikaaboro amófa nga basape kuti gu rikaaboro te, i awírika nga pa sovura berewe a te.”—Yesaya 2:2-4.

Zereda Dagba Aboro na Anyaa. “Waru asunga na wiri kandoro, mama api sande pati wiri meme, wiri bagara adu wa sa na wiri bahu na nzenze wiri nya a, kina wiri gude angbe fu ra ku mbata yo. Nabagara ari he wa sa na gu nya nga urusi; awira apika sande wa sa; bahu arí kazimorũ wa babagara. . . . I aímisa nga aboro watadu gbarasa yo ri gi kparakpara ziazia gangara wa sa te; bambiko kpotosende ahí be ina pa Yekova wa aime nahisa gango baime.”—Yesaya 11:6-9.

Aboro Dunduko Nikadu na Ariahe Beyo Sekpeese. “Yekova nga ga arimbasa ko amánga pumbo fu aboro dunduko nga agu ariahe du na kina ku nzeme ti ni, nga pumbo imekakue ri agbooro ho, na agu ariahe hi ahi be nzeme meme, na imekakue ri agbooro ho i atogosi he ziazia.”—Yesaya 25:6.

Kpio Adunga Berewe Te. “[Mbori] adígisa pa kpio nye anye kindi, Gbia Mbori awéga aume ti bangirise ku sa yo dunduko, na gu gbarasarimo nga ga gako aboro ko adía ha auru kpotosende ku sa yo dunduko; mbiko Yekova gumba ha.”—Yesaya 25:8.

Kpikpi Aboro Azinga Bekpio. “Kangba aboro adu ni ungayo, kangba yo azinga. Ako oni nga araki nvutu yo, oni zingi ki nibi bia ni ngbarago!”—Yesaya 26:19.

Masiya Nga Ruru Basapungbanga. “Ko asápa nga ngbanga kuti bi pai ni bangiriko te, watadu za pai mbiko gia pai ni tuko a te; ono ko asára ngbanga rungorungo aboro na rurupai, ka za pai nzunzu ni ruru sarangbanga fu bayee aboro auru kpotosende.”—Yesaya 11:3, 4.

I Ahusa Bangiri Airavurari na Tu Airangbiängä ki Ha. “Bangiri airavurari azá, tu airangbianga ki ha.”—Yesaya 35:5.

Gbegberẽ Sende Asatihe Nimbudusende. “Ngbakungba na gu rago ugu auga adu na ngbarago, ngbi ngume angi ki mbumba na mbumbuda ahe; si ambumba kpaima na mbumbuda ahe wa kundu badari, ki ningi na ngbarago na bibia.”—Yesaya 35:1, 2.

Vovo Kpotosende. “Mi mangi vovo angbangbaturũ [nga vovo zogarago du ngbangbaturũ yo] na vovo kpotosende [nga vovo riko nga ga ruru aboro] a; i atíngida nga pa gu bambata apai te si ayé nga ku berãyo yo a te. Ono oni dú na ngbarago ki ningi nye anye kindi tipa gu pai mangi mi he re; . . . I [agu aboro nikaa raka rogo ga Mbori vovo zegino] adúdua abambu ki niraki rogo; i arũka bakakue aati yo ki niri zuzuhe. I adúa nga bambu kura aboro ki raki rogo ho te; i arũ nga he kura aboro ki ri he te; bambiko wa gu rame nga ga ngua wo rame gimi aboro nikadu, gimi siasia aboro ará zezeredi tipa gbanga rago mbiko gu mangapai nga ga beyo. I amánga nga sunge gbua te, i abátika nga agude tipa tunguotunguo gbudagbuda te; mbiko i adú ni atita agu aboro maku nga ga Yekova yo, na awiriyo wa sa na yo. Ono si ayé ka du wa gere mbata i nikayamba he, mi akáraga pai, ho i nafura ni mi agía ha agia. Waru na wiri kandoro aríka wa sa, bahu ari kazimorũ wa babagara; nvutu nikangia ga wo riahe. Ami aímisa nga aboro ki nigbarasi yo ri gi kparakpara ziazia bagangara yo te, wo poi Yekova.” “Bambiko wa vovo angbangbaturũ na vovo kpotosende nga gu mi ka manga ha, nikanye anye ku bara bangire kindi, wo poi Yekova; wo angbatungaroni na rimoroni nikanye anye a.”—Yesaya 65:17-25; 66:22.

Gu Bakerepai Nika Manga Kumbatayo

Anga kina gu kitabu nga ga Yesaya sa fura tipa agu amaku nika ye kumbatayo te. Ziazia Kekeapai hi be badungu asangbaanebi nga gu nafura tipa gu dungu apai Mbori nika mangaha rogo gako Kindo du tiibe Kristo.a Ya mo oni naida ka raka wa gure rogo paradizo? Mbumbupai ngaha furoni te. Si naida oni ini gupai nzunzu Ziazia Kekeapai ayugoho tipa ga Mbori ringbisapai kumbatayo, na ki wiriki wai rengbe oni kadu yo. ADezire Yekova aduna ngbarago ka undo roni.

[Gu rukutu kekeapai du bandu kpewaraga yo]

[Gu kpiahe du ti kpewaraga 8]

Aboro araka na pazereda dagbayó na anyaa a

[Gu kpiahe du ti kpewaraga 9]

Kpikpi aboro araka araka berewe

[Gu kpiahe du ti kpewaraga 10]

Kpotosende naabaha dunduko nikangia paradizo