Ga Yekova Karagapai Kuti Gu Kpee Naye Ngbaduseyo
“I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.”—TAM. 83:18.
1, 2. Ginipai ninaamanga fu dungu aboro, na gini asanahe rengbe ani ka sanaha?
BETE agarã kusayo, rago agberẽ ti dee be gu gberango namangi pakpuri. Avunguri angia aKatoriko, sidu, rogo kura uru sa, ri kini mo ka ndu fuo bavugahe tipa undo, ono ko aidanga ka gumba kina kandara fugo furi te. Si atadu were, ri kini mo ka kpara fu Mbori ki yaa: “Mi ainongo da nga mo te, . . . ono gu ini mi nga mo kina ti ni. Mi nahõpai bero, mo yugu tiro fere mi ini ro!” Ngbutuko fuo gu regbo re, aDezire Yekova aye fuo ri ki fu wasa furi na ki yugupai furi tipa Mbori. Dagba gu dungu apai i ayuguhe furi, i ayugu gupai furi nga rimo Mbori kina ti ni nga Yekova. Rago aima ngba tiri bakere gbe na gupai ri ainihe re. Ri ayaa: ‘Oni berẽnga gipai re. Gi Mbori re nangia gu Mbori mi aima ida ka inoko mbu re kindi tooni!’
2 Dungu aboro apai amangi tipa yó wakina gure. Dedede, i abi rimo Yekova ti bambata regbo rogo Atambuahe 83:18 rogo Ziazia Kekeapai. Gu veresi re nayaa: “I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.” Ono tie, oni asananga tironi tipa ndu gupai i ake Atambuahe 83 ti ni? Ginipai si adu nga si nika manga aboro ngbaome i ini Yekova ya ko nga bangisa ndikidi Mbori? Ginipai rengbe ani areme ka wirikaha be gi bia Atambuahe re? Ani nika karagapai sa agu asanahe re rogo gi papara kekepai re.a
Burõ Kuti ga Yekova Aboro
3, 4. Da nasari gu bia nga Atambuahe 83, na gine ko afura tipaha?
3 Gu kekepai du barii Atambuahe 83 rogo gu bambata fugo i akehe rogoho, si nayugo Asafa nigu boro nakehe. Si nawiraha nga gu boro nasari gu bia re angia kumba ningbatunga Revi ti gu ngbadimo nangia ga Asafa, nangia bangbasia bataki woro ahe naraki ti rago Bakindo Davide. Gu boro nabi gu bia re ahõpai be Mbori ko guari ka songoda gako bakere pagbia na ki sa rimoko nga Yekova aboro inihe. Si nawira i asari gu bia re tingbafuo kpio Soromo. Tipagine? Mbiko ti rago Davide na rago Soromo, agu abakindo nangia ga Tura yó angia abakurea aYisaraere. Ti gu regbo i asari gu bia nga Atambuahe 83 re, avuru Tura asa tiyó ni akare kuti aYisaraere na kini ngbe na agu aboro nanaasoga aYisaraere.
4 Gu bake apapara Atambuahe re ayambu rimo arikaaboro bawe nga aguyo nataburõ tipa ka imo ga Mbori aboro. Agu arikaaboro re akepati aYisaraere kirikiri na i atangara rimoyo wa gere: “Ga aEdome abamburoko na aYisaraere [aYisamaere], Moaba, na aAgara, Gebara, na Amona, na Amareka, Feresete, na agu aboro naraka Tura yo; Asura akpamia tihe na yo a.” (Tam. 83:6-8) Gini kuru pangbangaa gu bia re afura tipaha? Gu kura aboro nayawee si nafura tipa gu zubo aYisaraere na vura aAmono na aMoabo gbiati agu aboro nanaaraka pavuru gu gangara nga Seira ti rago Yosefata akoditiyo ka ye nani. (2 Peka 20:1-26) Gu kurayo naya tigayo wee si nafura tipa gu mbaku sogote nadu dagba aYisaraere na gu rikaaboro nadu pati yo.
5. Gini undo aKristano agbiaha areme rogo Atambuahe 83?
5 Ka si vura du nga kina ginipai namangi, si ziazia nga Yekova Mbori nasa gupai nga i ke gi bia re ho gako aboro aduni ngba kerepai. Gu bia re nangarasa ga Mbori amoyambu areme, nga agu aboro naima digo nigbia tiyó na asogote be avurayo nanaaida ka imo yó. Na zanga kapa, si nika ngarasa rani barambeda kumbatayo ho Gogo boro Magogo nika dungura omeko ni niyangaraha ka zubo agu aboro nairisombori nitoro na rengo.—Oni gedi Yezekere 38:2, 8, 9, 16.
Gupai Paha Anyaki Gbe
6, 7. (a) Gine Asafa akparikpee tipaha rogo tonatona Atambuahe 83? (b) Gini banguapai Asafa aabakabangiriko tipaha?
6 Oni gedinga afugo Asafa wa ko aapeka agu apai nadu ngbadukoyo rogo kparakpee kini yaa: “Ako Mbori, ka mo ongo nga kii ya; Ako Mbori, ka mo sungu nga zezeredi ya, ki sungu zaa a ya! Bambiko, mo ngere, avuraro nata wawa; agu yo nasoga ro i tumba riyo ku ari. I nata bura dagba yo kuti gamo aboro; ki nigumba rondo dagba yo . . . Ii, bambiko i agumba rondo dagba yo wa boro sa; i naringbisa pa mokida kuti ro.”—Tam. 83:1-3, 5.
7 Ginipai Asafa aabakabangiriko tipaha gbe? Rengo ngaha nga, ko avura kaa bakabangiriko tipa gu kerepai narengbe ka ye sa ko na gako aborokporo. Ono wa si avura duwo, gu banguapai nadu rogo gako kpee angia gu gbarasarimo aboro aye nani kuti rimo Yekova na gu kerepai gu rikaaboro adu rogoho nadu na gu rimo re riyo. Ani dunga na bipai wakina gure wa ani ahi gu fudifudiapai du rogo gi yangara arame re.—Oni gedi Matayo 6:9, 10.
8. Gine nangia gu ndupai arikaaboro ataburõ ti ni kuti aYisaraere?
8 Asafa agumba gupai avura aYisaraere aapehe kini yaa: “Oni ye, ani gbarasi yo ka i adu nga ni rikaaboro berewe ya, ka i atingida nga pa rimo Yisaraere berewe a ya!” (Tam. 83:4) Nairiwo gu sogote gu rikaaboro re adu nani kuti ga Mbori siasia aboro! Ono gu kura ndupai adu kinaho beyo. I anaakpi aYisaraere akpi tipa gayó ringara na ki ta ngbaduyo ki yaa: “Ani rogo ga Mbori abaraka ni gaani.” (Tam. 83:12) Ya mo ngbatungapai wa gure mangingo ti gi gaani regbo re? Ii, si aima manga!
“Ga Kparakpara Ziazia Baraka”
9, 10. (a) Gine nangia ga Yekova baraka ti agu aregbo nadu bakuru kusayo? (b) Gini amaku yangara mbedimbedi aKristano gbiati “kura akandoro” agbia ngbarago areme behe?
9 Bakuru kusayo, aboro anaafura tipa Ringara Mokido niga Mbori kparakpara ziazia baraka. Oni tingidinga pa gu bia nangia ga diabese aYisaraere abihe ho Mbori abatasi yó ni Ezipeta yo. Papara gu bia re nayaa: “Mo angbe ku mbata yo fu agu aboro nga agu yo mo atumo yo ni ga inapai, mo agasi yo ku rogo ga kparakpara ziazia baraka ni ga ome.” (Gate 15:13) Kusa, gu “baraka” re adu na yekaru rogoho gbiati aboromotumo na bakere bagbata nangia Yerusarema, na abakindo ti ngbatunga Davide kini sungu rii ga Yekova mbatabakindo rogoho. (1 Peka 29:23) Si aruaru Yesu yambu Yerusarema nga “ga bakere Bakindo bakporo.”—Mt. 5:35.
10 Ginipai tipa areme? Rogo gu garã nangia 33 F.B.K., vovo rikaaboro nga “ga Mbori Yisaraere” akuru kuyangura. (Gara. 6:16) Gu rikaaboro nangia mbedimbedi aKristano re, i amangi gu sunge ndikidi aYisaraere akpa ti mangaha, nangia kadu niga Mbori adezire. (Yes. 43:10; 1 Pet. 2:9) Yekova agumba kina gu bangisa kidohe fuyó ko agumbaha fu agu aYisaraere nadumbata ki yaa: ‘Mi adu nigayo Mbori, i kidu nigimi aboro.’ (2 Kor. 6:16; Pa Mot. 26:12) Rogo 1919, Yekova aye na yangara “ga Mbori Yisaraere” kurogo pagume naako, na i ki di “ringara,” nga agu apai nga ga toro i agbia ngbarago behe rogo gu paradizo nga ga toro. (Yes. 66:8) Natona rogo gu garã nangia 1930, dungu “kura akandoro” ima tiria koyo du yó ni. (Yo. 10:16) Gu ngbarago nga ga agi aKristano du awere re, si nga wene gopai tipa paru ga Yekova bakere pagbia. (Oni gedi Atambuahe 91:1, 2.) Nairiwo wai gupai re afu gberarago fu Satana!
11. Gine ningia gu banguapai avura ga Mbori aboro naaida ka mangaha?
11 Tona ho yangara aregbo atona ni ka da ku awere, Satana nazingisa gako aboro kuti yangara mbedimbedi aKristano na kuti agu abadiangbayo nga kura akandoro. Gupai re amangi Putu yo ku dioyo tiibe gu zogarago nangia ga aNazi na ki mangi a tiibe gu zogarago nangia ga Soviet Union. Si aima manga a rogo dungu aringara, na si amanga amanga berewe, gbe, ti regbo gu zubo vura nikangia ga Gogo boro Magogo. Ti regbo gu zubo vura re, asogo ga Mbori aboro avura duadu na nyemu ka sa gayó ahe ningbaduse a wa aguyo aima mangaha mbata. Ono tie, gu banguapai Satana naaida ka mangaha ti aregbo dunduko nga ka gbarasapa ga Mbori aboro tipa gu rimo nga aDezire Yekova Mbori afuhe kuriyó go kusayo auru kpotosende. Ginipai Yekova naamangaha kuti gu kere bisirapa gako bakere pagbia re? Ani kparianga agu afugo berewe Asafa agumbaha re.
Kpiapai Tipa ga Yekova Diabe Vura
12-14. Gini adiabevura mbembedii na Megido Asafa afura tipaha?
12 Oni kparianga gu idapase Asafa adu nani kuti Yekova nga ko na tandu beko ka gbarasapa gu burõ avura gako aboro amangaha kutiyó. Ko agumbapa diabe avura ue rogo gako bia, nga gu diabese aYisaraere adu nani kuti avurayo mbembedii na gu bakporo nangia Megido, nadu na ngboongboorago nidabuke pati ni rimoho adu a nga kina Megido. Rogo agu adiwi mai anánga rogora yo ya rogo gu ngbii re, gu di nga Kisona nauguda kina kungbo ngboongboorago ki nye. Rogo agu adiwi mai aná rogora, gu di re nahi ki rengbe na gu dabuke re dunduko. Si nawira si nga ndu gupai i ayambu gu di re ti ni berewe nga “aime Megido.”—Abasa. 4:13; 5:19.
13 Mbiti gu ngboongboorago nga Megido re, wa amairo 10, gangara du yo du rimoho nga More, nga gu ba aMidiano, aMareko, gbiati aboro-ku-uroyo adunguratiyo kuho ni ka sovura kuti aYisaraere. (Abasa. 7:1, 12) Ga Gidiona aborovura adu nga 300, ono mbiko gu ome Yekova afuhe fuyó, si asa yó i dibe bazagino abanzengere. Wai si amangi? AYisaraere amangipai kuti agu arugute Mbori afuhe fuyó i ki runguru pati avurayo yuru na akambu beyo nadu na tigitigi abaro rogoho. Ho Gidiona azinahe ni fu gako akumba, i anakí vuru agu akambu re abaro ki tona kaa kí. Ti kina gu bangisa regbo re, i avudi gayó anambongo kini ta ngbayo niyaa: “Gu basape nga ga Yekova na ga Gidona!” Gipai re aye na vunduvundupai dagba avurayo, i ki tona ka imo tiyó dagbayó; aguyo nabati ki oro ki si Yaradene ku mbitiyo. Dungu aYisaraere kini mo ka do fuo yó. Agu avurayo i aimi yó, bangeyo adu dunduko nga 120,000.—Abasa. 7:19-25; 8:10.
14 Amairo wa 4 kugii gangara More yo, na gii gu ngboongboorago nga Megido, gangara du yo nga Tabora. Rogo gu ba re, gu basapungbanga nangia Baraka adungura aborovura bangeyo adu nga 10,000 i sovura na ga Yabina abanzengere tiibe gu barutiriivura nangia Sisera. Yabina angia bakindo Asora. Agi aborovura nangia ga aKanano yó re aduna angbagidavura beyo 900 nadu na asape ti anduhe nadewa rago ho si ake ni. Fuo ru aYisaraere rii gangara Tabora zanga wene aũvura beyo, si asa ga Sisera aborovura i zoro ku ngboongboorago yo ka ndu fuo yó. Fuo gure, “Yekova ki mangi Sisera, na gako angbagida vura dunduko, na gako rimbasa aborovura.” Si nawira wa gu mai naná, si asa ndu angbagida si naarindo ti dogoro bangiri gu di nga Kisona. AYisaraere aimi agu aborovura re naabayo dunduko.—Abasa. 4:13-16; 5:19-21.
15. (a) Gine Asafa akpari fu Yekova ko mangihe? (b) Gine rimo gu yangara vura Mbori nika soho atingida rani naapaha?
15 Asafa ahõpai be Yekova ko mangipai wakina gure fu agu aboro naaserekpo aYisaraere ti gu regbo re. Ko akparikpee ki yaa: “Mo mangi fu yo a wa mo amangi fu aMidiano, fu Sisera, fu Yabina, pati gu di nga Kisona, nga agu yo i agbarasi yo Enedoro yo, i adu wa mirĩahe auru sende.” (Tam. 83:9, 10) Gu yangara vura Mbori nika soho kuti ga Satana zegino, i nayambaha nga Aramegido, (du rogoyo nga “gu gangara nga Megido”). Gu rimo re natingida rani naapa gu kere avura i asoho pati Megido. Agu adiabese Yekova adu nani rogo agu avura re nakido rani na gupai ngawee ko nika dia adia be gu vura ko ka soho nga Aramegido re.—Yugo. 16:13-16.
Kparakpee Tipa Dia Gbarasarimo Kusayo
16. Wai ‘zee azio kpakpu’ avura ga Mbori aboro areme?
16 Rogo gi ‘kusa rago’ re, Yekova aima gbarasapa agu aʹasadatise dunduko aboro aamangaha tipa ka nyasa riipa gako aboro. (2 Tim. 3:1) Kina zee ninaazio agu asogo rani re. Atambuahe 83:16 aima fura tipa gipai re kumbatayo ki yaa: “Mo ba zee ku kpakpuyo yo, i gbata rimoro, Ako Yekova.” Rogo dungu aringara, asogo rani aima wo nikerehe rogo gayó asadatise ka sa rani ani mbu gaani asunge. Rogo agu aringara re, gu kakutipai gbiati hipai nangia ga airisi ndikidi Mbori, si adu nidezirepai fu dungu aboro nga agu aboro duna ruru ngbaduyó yo. Na si asa yó i ‘gbata rimo Yekova.’ Rogo gu dungu aringara i anaarungosi aDezire Yekova rogoho mbata nikerehe, badungu akutu aboro ima ye awere yo kurogo rengo yo kini taasirimo Yekova. Si nayugo gupai nga, Yekova nirengo na diabese! Nairiwo wai kina zee azio avurayo na gipai re!—Oni gedi Yeremaya 1:19.
17. Gini kerepai du aboro awere rogoho, na gini afugo ani ka tingidaha barambeda kumbatayo?
17 Ono tie, ani ima ino gupai nga, avura rani nikaa sovura aso kindi kuti rani. Na ani nandu kumbatayo kindi kaa tungusa wene pangbangaa fu asogo rani a. (Mt. 24:14, 21) Ono tie, gu momu du ngbadimoho nizazaha awere fu asogo rani tipa i sa gayó berã tipa ka gbia bata, si nika kiso akiso. Pa ziasi yó rimo Yekova nyakipaha kisusi pa batasa aboro. (Oni gedi Yezekere 38:23.) Ho arikaaboro dunduko nika kodatiyó ni ka imo ga Mbori aboro a wa i afura tipaha kumbatayo, si nika sa rani ani tingidi agu afugo nga: “Zee nimángi yo na rungo nye anye kindi; i nimúngosi yo i ki kpiki.”—Tam. 83:17.
18, 19. (a) Gine napido agu aboro diberã kaa bisirapa ga Yekova bakere pagbia? (b) Ginipai nika manga tipa roni ho Yekova nika dia gbarasarimo ni kusayo ti gako bakere pagbia?
18 Barambeda kumbatayo, i nika payasipa agu aboro nyakasi tiyó tipa kaa bisirapa ga Yekova bakere pagbia. Fugo Mbori nayugo gupai ngawee, agu aboro “agia nga sangba wene pangbanga” ya, i nika fu gu mbusa fuyó nga “nyenye gbarasa yo,” ti regbo Aramegido watadu ka imo yó. (2 Tesa. 1:7-9) Pa imo Yekova gbegberẽ aboro naapa batasa ko aguyo nairisoko nikangia gu wene gopai nadia gu kango kusayo ngba boro nga Yekova Mbori nga ndikidi Mbori te. Rogo ga Mbori vovo zegino, bangiri aboro agonga ti gi diabese re te. Gu “ruru aboro . . . [i ka zingisa yó] be kpio na iraira yo,” i awirikapai tipa gi ga Yekova bakere mangaapai re. (Amo. 24:15) Rogo vovo zegino, i nika bi gu wene ndupai duho tipa aboro naaraka tiibe ga Yekova bakere pagbia. Bayee aboro aruga tiyó na gupai nga, kina Yekova sa nga ndikidi Mbori.
19 Nangbaa gi mbakadapai tipa raka kumbatayo gu Barani nga boro nyemuse du ngbangbaturũ yo namangihe tipa airisiko re! Ya mo gipai re afõnga ngbaduroniyo oni kparikpee tipa Yekova karagapai niipo kuti gu kpee nangia ga Asafa tee? Ko akparikpee ki yaa: “Zee nimángi yo [avura Mbori] na rungo nye anye kindi; i nimúngosi yo i ki kpiki. I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.”—Tam. 83:17, 18.
[Gu rukutu kekeapai du bandu kpewaraga yo]
a Mbata fu oni wisigi gi papara kekepai re, si afu undo furoni ka oni gedi Atambuahe 83 tipa ka inido tironi naapa gu pangbangaa du rogoho.
Oni Rengbe ka Sakarogoyo?
• Ginipai aYisaraere adu rogoho ho i ake Atambuahe 83 ni?
• Gine nangia gu bambatapai bake Atambuahe 83 aabakabangiriko tipaha?
• Ada Satana asoga yó areme?
• Wai Yekova nika karagapai niyangaraha sa gu kpee du rogo Atambuahe 83:18?
[Gu kpiahe du ti kpewaraga 19]
Ginipai du dagba gu vura i asoho Megido yo na gupai nika manga kumbatayo?
[Gu kpiahe du ti kpewaraga 19]
Gu di nga Kisona
Arosete-a-goima
Gangara Karumera
Gu ngboongboorago nga Yizerere
Megido
Tanaka
Gangara Giriboa
Gu guga nga Aroda
More
Ene-doro
Gangara Tabora
Gu Baime nga Gariraya
Gu di nga Yaradene