Gupai Aboro Naidi Kuti Ni Rogo Zegino Dunduko
Dee du rimori nga Arline du awere ni Dezire Yekova ayaa: “Mi anaarara gbegberẽ amusumo mi nigbi Geyena yo! Mi anirari musumo i naba re kurogo ngariangaria we, mi kini gu rameyo kini ongo vorokovoroko. Gipai re asa re mi niiʹasadi tire ka he manga ingapai.”
YA MO oni naberãha nga Geyena watadu iferno nga gu ba du tipa aboro ingapai? Wo badungu aboro aberãha. Nikpiapai, rogo 2005, wene bawirikipai sa Scotland yo abi gupai nga, badungu abarumbatayo rogo pambori rogo gu ringara re idi kuti gupai nga, agu aboro kparatiyo ti Mbori, i nika gbia “nyenye mbusa berãyo yo Geyena yo.” Dungu aguyo aidi kuti gupai a nga, Geyena, watadu iferno, nga gu ba gbegberẽ aboro andu kurogoho tipa ka igirã yo ti kpotoyo.
Rogo dungu aringara, badungu aboro idi kuti gupai nga, Geyena nga gu ba aboro agbi rogoho. Nikpiapai, i asasana dungu aboro Amerika yo rogo gu garã nangia 2007 i gumba agu apai i aberãha tipa Geyena. Saba-bawe rii kama nga ga bange agu aboro i asasana yó re ayawee Geyena nga gu ba aboro agbi rogoho nyeanye kindi. Zavura rogo agu aringara angenga agu aboro rogoho nairiso Mbori ya, aboro kina yó idi kuti pa Geyena. I asasana aboro Canada yo rogo 2004 ki bi gupai nga, 42 rii kama nga ga bange agu aboro du yó idi kuti gupai nga, Geyena nga ba zo aboro. Ringara aNgirisi yo, 32 rii kama nga ga bange agu aboro naidi kuti gupai nga, ba kinaho nga Geyena Mbori azo aboro rogoho.
Gupai Abarumbatayo Rogo Pambori Ayugoho
Dungu abarumbatayo rogo pambori ima tona ka mbu yugo gupai nga, Geyena, watadu iferno, nga ndikidi ba Mbori azo aboro rogoho. Ono tie, i tona fura tipaha ngba kura gene nga gu nawira kina gu du rogo gu Katekisimo nga ga Katoriko i akehe rogo 1994. Gu katekisimo re nayaa: ‘Gu bangua mbusa boro agbiaha iferno yo, si nga ní nakpara tiní ti Mbori nyeanye kindi.’
Wa vura duhe wo, dungu aboro kindi du na gu ida nga, Geyena nga gu ba boro agbia mbusa rogoho berãni yo watadu ti kpotoni. Agu aboro nayugo gipai re, i nayawee kina Ziazia Kekeapai nagumbaha wo. Albert Mohler, nga bangerekurii gu sukuru nga ga asiminario rogo gu pambori nga Baptist, ko agumbapa gako ida ziazia ki yaa: ‘Kina Ziazia Kekeapai nayugo gupai nga, Geyena nga ba nyenye mbusa.’
Ginipai Oni Naidi Kuti ni Tigaoni?
Ka si du nzunzu nga Geyena nga ba rungosi aboro, si naida oni nigunde agunde behe nirengo. Ono tie, ka singia ziree du nga gipai re, gure nga agu abarumbatayo rogo pambori nayugo gipai re, i navundo apai kini sa agu aboro idi kuti ni i du nifudifudiyo berãyo yo zanga nduhe. Gure a nga i nagbarasa rimo Mbori.
Ginipai Fugo Mbori nga Ziazia Kekeapai agumbaha tipa Geyena? Agu apapara kekeapai naye fuo gere, si nika karagapai sa agu asanahe nga: (1) Ginipai nzunzu nimangi tipa boro ho ní akpi ni? (2) Ginipai Yesu ayuguhe tipa Geyena? (3) Ka oni wiriki agu apai nga rengo tipa Geyena, wai ka si undo roni?