Ka Oni Wiriki Agu Apai Nga Rengo Tipa Geyena, Wai Ka Si Undo Roni?

AGU aboro nayugo gupai nga, Geyena nga gu ba Mbori azo aboro rogoho nyeanye kindi, i nagumba bagbegberẽpai tipa Yekova Mbori na tipa asinoko. Ziazia Kekeapai nagumba gupai agumba tigu nga, Mbori nika imo gbegberẽ aboro. (2 ATesaroniko 1:6-9) Ono wa vura duhe nga Mbori naazinga azinga ho si aida ni ko zingi, anga zinga nga bangua sinoko te.

Anga Mbori nigu boro duna gbegberẽ ngbaduniyo nakpinyemu avurani kpiki te. Ko asanahe nitiko ki yaa: “Rago nangba tire mbiko kpio gbegberẽ boro?” (Yezekere 18:23) Ka si du nga rago angbanga ti Mbori mbiko kpio gbegberẽ boro te, wai rengbe rago ka ngba tiko ka bi aboro i nirungo rogo we yo nyeanye kindi?

Bangua sino Mbori nga nyemuse. (1 Yoane 4:8) Nirengo, “Yekova [Mbori] du ni wene ko fu aboro dũ, gako wene nunga aboro du ku ri agu ahe dunduko ko amangi he.” (Atambuahe 145:9) Mbori naida gupai berani a nga, ani kpinyemuko na ngbaduraniyo dunduko.—Matayo 22:35-38.

Ya Mo Gunde Be Geyena Du Nasa Roni Oni Mangi Gupai Mbori Akpinyemuhe?

Gu yugopai nga Mbori narungosi mbisimo aboro Geyena yo, si naba kina gunde ti aboro. Ono tipa gu boro wiriki rengo tipa Mbori na ki tona ka kpinyemuko, ní nagunde tiko, angianga ka gunde beko ya. Atambuahe 111:10 nayaa: “Gunde ti Yekova nga tonatona tatamana; agu yo namanga ha du na wene rugatinapai ti yo.” Gunde ti Mbori kia ti gunde beko. Gunde tiko nga kaa biko na kiki na kini fu irisa fuko wangia ko Bakusiahe. Si nasa rani ka ani mangingo gupai nafu gberarago fuko ya.

Oni bingo wai wirika rengo tipa Geyena aundo dee du rimori nga Kathleen du garãri 32, nga gu dee nanaadia kere angua mbata kutii kpotoriyo. Ri anaado agbere kini mbiri abuda, kini mangi zuũ, na kini ndu fuo dungu akumba na kini sogo tiri asoga a. Fugori nga: “Mi aningana tooni wire garãri adu sa, mi kini berẽ gupai ku kpotoreyo nga, ‘Mi namanga gu wire re gbegberẽe. Mi nika gbi agbi Geyena yo mbiko gipai mi amangaha re.’” Kathleen aʹasadi tiri ka mbu dia angua, ono ka ri ambunga ha ya. Ri ayaa: ‘Mi aaida kadu niwene boro, ono agu apai nadu dunduko rogo gimi raka gbiati rogo zegino, si aarungburasi re arungburasi. Mi aabingo gu ndupai ka mi asa sinore ti ni te.’

Ti kura regbo sa, Kathleen agbia aDezire Yekova. Fugori nga: ‘Mi awiriki gupai nga, he ho nga Geyena i arungosi aboro rogoho te. Agu agopai i afuhe fere rogo Ziazia Kekeapai yo, si aima ru bangire nzunzu. Pa ino mi gupai nga mi agbingo Geyena yo te afu wasa fere.’ Ri awirikipai a tipa gu ga Mbori kidohe nga, aboro rengbe arengba ka raka nyeanye kindi auru girisigirisi kpotosende. (Atambuahe 37:10, 11, 29; Ruka 23:43) Fugori nga: “Mi awere na ndikidi maabangirise, ka raka nyeanye kindi Paradizo yo!”

Ginipai nasa Kathleen ri mbu dia kere angua kutii kpotoriyo? Ri nagumba gupai namangi kini yaa: “Ti agu aregbo nyemu angua anaamanga re gbe, mi anikpari fu Yekova Mbori kakaka tipa ko undo re. Mi aniberẽ tipa wai ko abi gu bibiriko mangaapai re, na ka mi aidanga ka ba gberarago tiko ya. Ko aima karagapai kuti gimi akpee.” (2 AKorindo 7:1) Wa ri anaaidanga ka ba gberarago ti Mbori ya, si naundo ri ri mbu dia kere angua.

Nirengo, nyemu Mbori gbiati gunde tiko rengbe ka fõngbaduraniyo ani mangi gupai ko akpinyemuhe tipa ka gbia nyenye ngbarago, angianga gunde be Geyena ya. Bake apapara Atambuahe akepai ki yaa: “Aboro maku nga agu yo dunduko nagunde ti Yekova, nata ngba gako agene!”—Atambuahe 128:1.

Gini He Nga Adisi?

Gu fugo Giriki i asaha nga Geyena, si nafura tipa imo aboro nyeanye kindi ka gene adunga tipa zingisa yó berewe ya. Ono Ziazia Kekeapai nafura afura a tipa aboro ya i “Adisi” yo, watadu i nakura “Adisi” yo. Adisi nga gu fugo i asaha ti gu fugo Giriki nga haiʹdes. Anga Adisi kina sa na Geyena te, mbiko i azingisa agu aboro azingisa du Adisi yo.

Ho Yesu akpi ni na ki zingi bekpio, Petero afura tipa ko ya “i ambú nga ko ku Adisi yo te.” (Amokedi 2:27, 31, 32; Atambuahe 16:10) Adisi angia muro. Kura aboro kinaho Mbori nika kusa yó Adisi yo.

Ziazia Kekeapai nafura tipa zingabekpio niyaa: “Kpio na Adisi ki gasi agu akangba nadu rogo ho.” (Yugoti 20:13, 14) Gu fugo nga “Adisi ki gasi agu akangba nadu rogo ho,” rogoyo ngawee Mbori nika zingisa agu aboro dunduko ko nabi yó nga si daada i raki berewe. (Yoane 5:28, 29; Amokedi 24:15) Nangbaa gu maabangirise du tipa raka kumbatayo re, nga ka dungo abadiangbarani i nakuru muro yo! Yekova nika manga gipai re, nga gu Mbori adunga digido bakio gako nyemuse ti ni ya.