Yesu Nga Bawene Kpiapai Furani

YA MO oni naida kadu nigu boro duna bakere ngbarago? Gu mokedi nangia Petero agumbapa wai rengbe ani ka gbia bakere ngbarago. Ko akepai ki yaa: “Kristo ahi pai a tigako tipa roni, ki he kpia pai fu roni, oni peke fuo ko.” (1 Petero 2:21) Wa Yesu Kristo araki iiriwo raka, badungu apai duho ko amangihe rengbe ani ka wirikapai ti ni. Ka ani wirikipai tipa Yesu, na ki aria gaani raka si duwa gako, ani duadu na bakere ngbarago nirengo. Ani wisigingo bete agu asino nadu ti Yesu ka bingo wai rengbe ani ka gbia undo be gu kpiapai ko amoihe furani.

Yesu aangianga kere boro te. Wa Yesu avura yawee ‘ba aadunga beko ka maa riko ku auru he te,’ ko anaayanga wee aboro dunduko niraki wakina ko te. (Matayo 8:20) Ko anaandu andu ku kporo apumbo yo. (Ruka 5:29) Gu bambata iiriwopai ko amangihe du paha nikekehe, nangia ka sa ime kurogo imekakue kporo pumbo diadee yo, si nayugo gupai nga ko anaakoda tiko akoda na aboro. (Yoane 2:1-11) Ono tie, Yesu aima gumbapa gupai ziazia paha anyaki bangiriko gbe. Ko ayaa: “Gi riahe nga manga kina gu pai gu ko akpi nyemu he nakedi re, mi nyasi gako sunge.”—Yoane 4:34.

❑ Ya mo oni wisigi gaoni raka ka bihe singia oni naberãpa agu apai nga ga borose susi gu nga ga toro?

Yesu aduna aboro zaaza. Ziazia Kekeapai nayugopa Yesu furani ya ko adu zaaza na aboro. Ko anaazinganga ti agu aregbo aboro anaaye fuoko na gayó apai na kini sasana ko na agu asanahe nanaarunga bangiriko ya te. Ti kura regbo sa rimbasa aboro adunguratiyo kupati Yesu, dee sa kere kaza amangi ri tipa agarã 12 azadi gako remu, kidu naa kido nga ri nika hu ahu be gari kaza. Ko aazinganga kuti ri mbiko gupai ri amangihe re te. Ono ko aya furi ninunga wee: “Vungu, ga idapase batasi ro.” (Marako 5:25-34) Agude anaagundenga a ti nduge fuoko te, bambiko ko adu naayó wenengai. (Marako 10:13-16) Ko anaafura a na gako abawiriki wa ka boro afura na abakureani. I anaamanganga ndundu ti mbeda naako te.—Marako 6:30-32.

❑ Ya mo oni nigu boro aboro naagunde agunde ti mbeda na ní?

Yesu angia boro nunga. Bawene sino sa dagba agu akuraha nadu ti Yesu angia, ko anaainopa agu arungo aino aboro anaarungoho, kini moi tiko kubayo si kidu wa kina ko du naarungo. Ko anaaundo yó aundo a. Fugo gu mokedi nangia Yoane naya furani wee, ho Yesu abi Maria ni ri nikpari kawiiri nakpi nangia Razaro, ‘nunga azi ko toroko yo, ko kini rungo,’ na “ki nikpari ni aume.” Agu aboro naduho aima bi gu bakere nunga nadu ti Yesu, nga gu nunga zee aamanganga ko ti yugoho gbaiga ya. Ko ayugu gako bakere nunga berewe ho ko azingisi gu bakureako ni nangia Razaro re bekpio.—Yoane 11:33-44.

Ti kura regbo sa, kumba naawoka be ngbataka ka si aidanga ko naasungo dagba aboro ya, ko ahõpai be Yesu ki yaa: “Gbia, ka mo kpi nyemu he, mo rengbe arengba ka husa re.” Gu karagapai Yesu afuhe fuko, si ayugupa gako bakere nunga. Gu pangbanga re nayaa: “[Yesu] ki ta tãa beko nizadi ko, ki ya, ‘Mi nakpi nyemu he; mo hu.’” (Matayo 8:2, 3) Yesu anaahusanga aboro gbua na gu nduhe nga ka sa asangbaanebi si da ti rengo te. Ko anaaida ka wega aume kusayo bangiriyo yo. Agu apai dunduko ko anaamangaha, ko anaamangaha ringbisihe kuti gupai ko agumbaha ki yaa: “Wa oni akpi nyemu aboro nimangi fu roni, oni mángi he fu yo kina wo a.”—Ruka 6:31.

❑ Ya mo oni rengbe ka yugo gaoni nunga rogo mangaapai yo?

Yesu adu na giarogopaiyo gbiati rugatinapai. Wa Yesu avurangia gu boro naamanganga irairapai wagu tooni ya, ko anaayanga wee si naida aboro du wakina ko zanga manga wiri irairapai te, na ko anaabingo tiko nga ko nadu kurii aboro te; ko anaamanganga pai a zanga giarogopaiyo te. Ti kura regbo sa, “de nadu bakporo yo, nangia boro ingapai” ayugu gari idapase gbiati tambuahe nizunda ri ndu Yesu nigari aume. Yesu amburi ambu ri mangi gipai re, ono tipa gu kumba nayambu Yesu ku kpuko yo, ko abi gupai re tigako nikere gbegberẽpai. Wa duhe nga Yesu aima inopa gupai ri aamangaha, si du ko aazanga ri ti ni mbiko gari ingapai ya. Ono ko aya furi wee: “Ga idapase batasi ro, mo ndú zezeredi.” Si nawira gupai gbe nga, gupai Yesu agumbaha re aima fõngbadu gu dee yo re ri mbu gari gbegberẽ mangaapai.—Ruka 7:37-50.

❑ Ya mo oni nigu boro ninaatambua aboro niipo angianga kaa bisirapa aboro niipo ya?

Yesu anaakparakanga aboro te, na ko angia boro irisa. Si nawira gupai nga wiri sino Yoane adu kinaho nangba ti Yesu, si du ko anaakpinyemu ko ti ni nibeedihe gbe. Na kurapai berewe nga, i angia agume.a Ono wa si avura duwo, ko anaangbanga na kina Yoane susi kura gako abawiriki te. (Yoane 13:23) Ho Yoane na wirinako nangia Yakobo asana Yesu ni ko moiyo patiko rogo ga Mbori Kindo, Yesu akaragapai fuyó ki yaa: “Sunga ku kumbabere na garebere gi gamahe nga ha te; si fu agu yo mbakadi yo ho tipa yo.”—Marako 10:35-40.

Yesu anaaʹirisa aboro airisa. Ko anaadunga na iraira berã tipa kura aboro wagu gu badungu aboro nadu ti ragoko adu nani te. Nikpiapai, aboro anaabi adee ni agu aboro payo adu kusende. Ono tipa Yesu, ko anaafu irisa afu fuyó. Gu bambata boro ko agumba gupai funi ziazia ya ko nga gu Masiya i aya ko nika ye, ní angia dee niboro Somorona, nga gu boro ka badungu aYuda aafunga kandara gayó sene funi ya. (Yoane 4:7-26) Na kina adee a Yesu ayugu tiko fuyó mbata fuo zingako bekpio.—Matayo 28:9, 10.

❑ Ya mo oni nidu na kparakaro ho oni amangapai ni na agu aboro du ngbatungayo kia, nga akumba watadu adee, du fugoyo kia, watadu du gayó ringara kia?

Yesu amangi agu asunge dunduko si aidi ko mangihe. Si ziazia nga, bambuti Yesu nangia Yosefa, ko akpi Yesu kidu kindi niwiri paranga. Si nawira gupai gbe nga, Yesu anaamangasunge kindi nibasekungua tipa kaa ngerafuo nako na rukutu atameko na adawiriko. (Marako 6:3) Ho i abanga Yesu ni kuti ngua, ko aaberãpa nako kindi, sidu, ko ki aya fu Yoane wee ko niingerefuo ri.—Yoane 19:26, 27.

❑ Ya mo oni rengbe ka wirika Yesu nimanga oni agu asunge nga ga kporo si aida oni mangihe?

Yesu angia ndikidi bakure. Yesu angia gu bakure naima ngba kisusi. Ani naino gipai re mbiko gupai nga, ko anaambunga abakureako mbiko gupai nga i anaamanga irairaapai te, zavura ho i anaamanga bangisa irairapai ni bara dunguhe vurũ. Gako abawiriki anaamanganga apai ti aregbo dunduko kina ngba gu gene ko anaaidaha te. Ono wa si avura duwo, ko anaamaaberãko gbe tipa kina gu wene asino nadu tiyó, angianga ka yawee i na gbegberẽ ngbaduyó yo ya. (Marako 9:33-35; Ruka 22:24-27) Ko anaarimisongo apai kuriyó yo ngbaome te, ono ko animbu yó i fura nitiyo tipa apai.—Matayo 16:13-15.

Nibambatapai, Yesu anaakpinyemu abakureako akpi. (Yoane 13:1) Bakio gako nyemuse adu wai? Ko nitiko ayaa: “A nga boro sa du na bakere nyemuse susi gi nga, boro bagi . . . [ungani] tipa abadiangbani te.” (Yoane 15:13) Ya mo he ho ka boro fuhe fu abakureani paha ki kii kisusi ungani?

❑ Ya mo oni naanye kindi nibakure zavura ho akuaroni aimisa ngbaduroni ni?

Yesu aduna wingbaduse. Yesu aima du kia gbe ti wai aboro naakeka kpiako areme nikungbo zirĩ boro. Ziazia Kekeapai nayawee ko angia nyanyaki boro, na kingia boro ome. Yesu ado ababagiahe na gayó ahe bara ue yekaru yo. (Marako 11:15-17; Yoane 2:14-17) Ho ndurumo aboro-zuũ ayeni ka zio ‘Yesu boro Nazareta,’ ko akusi tiko fuyó niwingbaduse tipa ka banda gako abawiriki. Ko ayaa: “Mi nga ko. Si ngia mi oni agbata re, agi yo guari re [tie].” (Yoane 18:4-9) Ho Pondio Pirato abi ga Yesu wingbaduse ni ti gu regbo i aziko na kini rungosiko, si airiwo airiwo tiko. Si du ko aya ti ni wee: “Oni ngẽre, gi boro re!”—Yoane 19:4, 5.

❑ Ya mo oni naamangapai ningara na niwingbaduse ho si aidaha ni wo?

Agi apai ani nawisigihe re gbiati gu kura asino Yesu a, si nasako ko du nibawene kpiapai furani. Na ka ani awirika mangapai wa ko, ani duadu na bakere ngbarago tirani. Si nga ndu gupai Petero aya ti ni fu aKristano wee i niipekefuo Yesu wenengai gbe. Ya mo oni naasada tironi kaa pekafuo Yesu wenengai gbe?

Anga Yesu Nga Kina Kpiapai Sa Te

Anga Yesu nga kina kpiapai sa furani te. Ko ayaa: “Mi nga gene, nga rengo, nga unga a; a nga boro sa ka ye koyo du Buba ni gbua te, kina mbiko re.” (Yoane 14:6) Kurii gupai nga Yesu ayugu rengo fu aboro tipa Mbori, si kini zaki gene fuyó i duna ngbanya naako, ko a nazakigene tipa ruru aboro gbia nyenye unga.—Yoane 3:16.

Yesu afura tipa gipai re ki yaa: “Wiri boro aye nga i nimangi pa ko te, ko naye ka manga pa aboro, ka tumo dungu yo ni ungako.” (Matayo 20:28) Wa Yesu afu ungako nimotumo, gure nga ko azakigene tipa aboro rengbe ka gbia nyenye unga. Ginipai tie si aidaha berani wadu ani nibasasa ka ani aida ka gbia nyenye unga? Yesu agumba gupai si aidaha ki yaa: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.”—Yoane 17:3.

Nirengo, ka ani ini Yesu, kini raki ngba gu gene ko anaaraka ngbaha, na kidu na idapase kuti gako motumo tumorii, si rengbe ka sa rani ani gbia nyeanye unga. Ani nahõpai beroni oni di regbo kaa wisigo Ziazia Kekeapai tipa ka gbia gu inohe re, kini mangi agu apai si agumbaha, a wa Yesu anaamangaha.b

Ga Yesu gene raka nayugopa gini ngbatunga aboro si aida ani du nga yó. Kpioko rengbe ka batasa rani be ingapai na bekpio. (ARomo 6:23) Nairiwo wai ka apai nigberẽ tipa rani wa ka si nidu nga, Yesu Kristo aafunga tiko nimotumo te! Sidu tie, ka oni rimisingo tironi gbe kurogo agu apai nga ga raka si ki sa gupai nga ka gene dunga beroni oni wisigi gu kpiapai nga ga Yesu Kristo na kini pekefuoko wenengai ya.

[Gu rukutu kekeapai du bandu kpewaraga yo]

[Gu kpiahe du ti kpewaraga 7]

Ya mo oni naasada tironi kaa pekafuo Yesu wenengai gbe?

[Gu kpiahe du ti kpewaraga 5]

Yesu aangianga kere boro te . . .

ko adu zaaza na aboro . . .

ko angia boro nunga

[Gu kpiahe du ti kpewaraga 7]

◼ Yesu anaakparakanga aboro te, na ko anaairisa aboro dũ

◼ Ko angia ndikidi bakure dati kpio

◼ Ko angia boro wingbaduse