Da Nga Mbori?
WAI rengbe oni ka karagapai kuti gi sanahe re? Badungu aboro ima ida kuti gupai nga Mbori kina ti ni na i nakpinyemuko na kini gunde tiko. Ono badunguyo ini kina wiri bete apai gbua tipa ko. Kangia oni na idapase kuti Mbori nga ko kina ti ni, wai rengbe oni ka karagapai kuti agi asanahe du ku kumbabee kuari re?
1. Ya mo Mbori nga ndikidi boro?
2. Ya mo Mbori na rimoko ti ni?
3. Ya mo Yesu nga gu Mbori Duna Tanduapai Dũ?
4. Ya mo Mbori naberã pare aberã?
5. Ya mo airisombori dunduko Mbori aida nani?
Ka oni sasana aboro nibasasa na agi asanahe re, gayó akaragapai kuti ni nikadu nibakiakia. Sidu, anga iiriwopai ngaha ka bi gupai nga, apaturẽ gbiati iraira aberã ima nge be aboro tipa Mbori te.
Akaragapai Sa Agi Asanahe Re Ninyanyakipa Pai
Ho Yesu Kristo afura ni na gu dee ko agbia ri pati guga, nga gu dee nadu na idapase kuti Mbori, ko anyakasi gupai furi nga si naida ri inipai nzunzu tipa gu ngbatunga boro nga Mbori. Gi de-boro Somorona re aima ida kuti gupai nga Yesu angia nebi. Ono pai adu kinaho naafuda ri. Gu pambori nangia ga Yesu, si adukia ti gari. Ho ri asana Yesu ni tipa gipai re, ko aya furi wee: “Oni nairisa gu he oni aina nga ya.” (Yoane 4:19-22) Si ziazia tie nga, Yesu aabingo ho nga agu aboro du rogo apambori dunduko i ini Mbori te.
Ya mo fugo Yesu nayugo gupai nga, boro ho rengbe ka ino Mbori tee? Oó, wo duhe te. Yesu aya fu gu dee re wee: ‘Ndikidi aboro irisa nairisa Mbori nga Ba nitoro na rengo, bambiko Mbori nga Ba nakpinyemu kina yó i du nigako aboro irisa.’ (Yoane 4:23) Ya mo oni dagba agu aboro nairisombori “ni toro na rengo”?
Si ninyanyakipa pai furoni oni karagapai kuti agi asanahe re. Tipagine? Mbiko Yesu anyakasi padu boro na ndikidi inohe ho ko akpari ni ki yaa: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” (Yoane 17:3) Gu momu du beroni tipa ka raka kumbatayo, si nikodikodihe kuti ino oni gu rengo du tipa Mbori.
Ya mo si nitaatapai ka inopai tipa Mbori? Ii, si nitaataha! Wai tie rengbe oni ka inopai tipa Mbori? Yesu afura tipa tiko ki yaa: “Mi nga gene, nga rengo, nga unga a; a nga boro sa ka ye koyo du Buba ni gbua te, kina mbiko re.” (Yoane 14:6) Ko aya berewe wee: “Da nga Ba, kina Wiriko ini he, na gu ni Wiriko nakpi nyemu ka yugo ho fu ni.”—Ruka 10:22.
Agu apai Yesu Kristo ayuguhe, si rengbe ka sa rani ani inipai tipa Mbori mbiko ko nga Wiri Mbori. Nirengo, Yesu akido rani ki yaa: “Ka oni nye na gi pai, oni du adu tie ni gimi abawiriki ni rengo; oni aína rengo aina, ki ra ni rironi be rengo.”—Yoane 8:31, 32.
Wai rengbe Yesu ka karagapai sa agu asanahe bisue ani nisanaha sayo re?
[Gu kpiahe du ti kpewaraga 4]
Oni nairiso gu Mbori oni ainongo ko ya?