“Digida Apai Dunduko Nambeda”
“Digida apai dunduko nambeda. Wa du he were tie oni rúgu gaoni aberã ki niso gima kpe.”—1 PET. 4:7.
1. Ga Yesu bangua yugopai angia gine?
HO Yesu aduni auru kpotosende, gako bangua yugopai adu tipa ga Mbori Kindo. Vurube gu ga Yekova Kindo re, ko nika dia gu gbarasarimo kusayo duti gako bakere pagbia, na ki ziasi rimoko. Si du Yesu ayugupai ti ni fu gako abawiriki tipa i niikpari wa gere: “Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.” (Mt. 4:17; 6:9, 10) Ga Mbori Kindo ima mbeda ka ye ka dia ga Satana zogarago kusayo auru kpotosende, na ki sa gupai nga aboro rogo kpotosende dunduko naamanga gupai Mbori akpinyemuhe. A wa Daniere agumbaha, ga Mbori Kindo “akúadi agi angbi re rukutu ki digisi he dunduko, si ki nye anye kindi.”—Dan. 2:44.
2. (a) Wai ga Yesu abawiriki arengbe ka ino gupai nga, ko ima tona zogarago? (b) Si adu nga gu regbo Yesu nika tona zogarago nikangia tonatona gini regbo?
2 Wa si adu nga paye ga Mbori Kindo aima nyaka bangiri ga Yesu abawiriki, si du i asanako ti ni ki yaa: “Ni gini rago agi apai ka manga re? gine i ka ina pa ga ye ti ni, na pa digida rago?” (Mt. 24:3) Si adu nga, apai nikadu kinaho i nika ino paye Yesu ti ni, nga padu ko ho na ome kindo beko, bambiko si adu nga aboro abingo ko abi nibangiriyo te. Si adu nga, agu apai i ainopa apai ti ni re, si nikadu nibadunguhe. Si adu nga gu ga Yesu abawiriki nikaa raka ti gu regbo re, i nika ino gupai aino nga ko ima tona zogarago ngbangbaturũ yo. Si adu a nga si nikangia tonatona gu regbo Ziazia Kekeapai ayambaha nga “kusa rago” watadu yangara arame nga ga gi gbegberẽ zegino du awere re.—2 Tim. 3:1-5, 13; Mt. 24:7-14.
Oni Duna Rubangirise Rogo Yangara Arame
3. Tipagine si aidi ti ni aKristano duna rubangirise?
3 Pauro akepai ki yaa: “Digida apai dunduko nambeda. Wa du he were tie oni rúgu gaoni aberã ki niso gima kpe.” (1 Pet. 4:7) Si aidi apefuo Yesu du na rubangirise, kini ngere angera tipa agu apai nika yugo nani nga, ko ima tona ka zogarago. Si adu nga i nikadu na rubangirise na kini ipisi apai wa digido zegino ambeda. Yesu aya fu gako abawiriki wee: “Oni ngére a wo, bambiko oni aina nga ni gu rago irakporo ka yega [ka sapangbanga ga Satana zegino] te.”—Mk. 13:35, 36.
4. Oni gumbanga gu kparakparapai du dagba gupai aboro zegino aberã na gu nga ga ga Yekova aboro. (Oni bi sanduki.)
4 Aboro tiibe gu zogarago nga ga Satana, sidu, i aruganga tiyó naapa agu apai namanga rogo zegino te. I ainongo gupai nga Kristo nazogarago te. Ono apefuo Kristo aima du na rubangirise na ki ima kparia agu apai wenengai namangi vuru gu kama agarã susi. Natona rogo gu garã nangia 1925, aDezire Yekova akparia gupai ziazia nga, Bambata Vura Nga ga Zegino gbiati agu apai namangi tingbafuoho ayugu gupai zanga kapa nga, Kristo aima tona zogarago ngbangbaturũ yo rogo 1914. Si atadu were, ga Satana zegino kini rimi yangara aramehe. Dungu agu aboro nakparia apai, i ima ino gu kparakparapai nadu dagba agu apai nanaamanga mbata fu Bambata Vura Nga ga Zegino na agu natona ka manga tingbafuoho wa i avuranga ino ndu gupai si amanga ti ni ya.—Oni bi gu sanduki du riihe nga, “Vunduvunduapai Atona.”
5. Tipagine si aida ti ni ani naangera angera kindi?
5 Tipa agarã awere wa kama sa, gu kereapai namanga rogo zegino, si nga gopai ya ani naraka rogo yangara arame. Kina bete regbo gbua nye koyo Yekova kini zinahe fu Kristo ko ngbembatayo fu amaraika ka sovura kuti ga Satana zegino. (Yugo. 19:11-21) I nangarasa ndikidi aKristano i naasungo kini sinziri apai. Sidu, si naida ani naasinziri apai wa ani apido digido gi zegino re. (Mt. 24:42) Si naida ani naangera angera kindi, na kini mangi gu sunge Kristo angerakuriihe.
Gu Sunge I Amangaha Rogo Zegino Dunduko
6, 7. Wai sunge tungusa wene pangbanga namangi rogo gi yangara arame re?
6 Gu sunge si aida ga Yekova amoyambu nimangihe, i aima gumbapaha ku dagba agu apai nika yugo gupai nga, yangara arame ima da. Yesu agumbapa gi sunge re ho ko agumba gu dungu apai ni si adu nga si nikaa manga ti digido rago. Yesu agumbapa kurapai berewe si adu nga si nika manga ki yaa: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga [watadu digido zegino ki da].”—Mt. 24:14.
7 Oni bingo bete agu apai du tipa gupai Yesu agumbaha re. Bange agu aboro naatungusa wene pangbanga ho yangara arame atona ni rogo 1914 adu gbua tooni. Ono awere, bangeyo ima kio kisusi. Bange aDezire Yekova awere ima susa 7,000,000 natungusapai rogo zegino dunduko, na i rogo adungurati susi 100,000. Aboro berewe bangeyo adu nga 10,000,000 nadunguratiyo kurogo aba na aDezire Yekova rogo 2008 tipa ka tingida pakpio Kristo naayó. Gu bangeyo re aima susa gu nadu rogo 2007.
8. Tipagine Satana arengbanga ka rugusa gaani sunge tungusapai ti ni ya?
8 Nairiwo gu bakere dezirepai ga Yekova aboro amangaha tipa gako Kindo rogo aringara dunduko mbata fu digo gi zegino re! Wa vura duhe nga Satana nga “mbori gi zegino re,” gipai re namanga amanga. (2 Kor. 4:4) Satana ima maapai kurii aboro birĩ-zogarago yo, kurii aboro pambori yo, kurii ababagiahe yo, na kurii agu aboro yo nagbandaka apangbanga. Ono da du tie nasongoda aDezire Yekova kuti gi sunge du yó na diabese rogoho re? Yekova du nasongoda yó, Satana ki vura niʹasadi tiko ka rugusaha vurũ.
9. Tipagine rengbe ani ka ya ti ni wee, iiriwopai du nga pa zugo ani rogo toro yo?
9 Pa ndu gu sunge kumbatayo nga ga Kindo re gbiati pa zugo ga Yekova aboro rogo toro yo, si nga iiriwopai nirengo. Ka Mbori naasongodanga gi sunge re ya, zanga ruga gako aboro na kini banda yó, ka i naamanganga gi sunge re te. (Oni gedi Matayo 19:26.) Si naida ani duna gu kido nga, wa ga Mbori ziazia toro amangasunge na ngbadu agu aboro yo duna nyemu sunge tiyó, i nika manga gi sunge re amanga si ki nyasi, “ragoho ki digi adiga [watadu digido zegino ki da].” Gu regbo re nambeda nikina ipo.
“Bakere Gberãngbi”
10. Wai Yesu aringbisipa gu bakere gberãngbii naye?
10 Gi zegino re nika digo rogo gupai Ziazia Kekeapai ayambaha nga “bakere gberãngbi.” (Yugo. 7:14) Ziazia Kekeapai agumbanga pa bagizo gu regbo gu bakere gberãngbii re nika diaha te, ono gupai ini ani he nga Yesu ayaa: “Ni gu rago re bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.” (Mt. 24:21) Gi gberãngbii re nika susa gu namangi ti regbo Ue Vura Nga ga Zegino nga gu gberãngbii aboro akpiki rogoho wa 50 amirioni watadu 60 amirioni. Si nika digo na gu vura i ayambaha nga Aramegido. Gu regbo re Yekova nika zinahe fu gako aborovura i gbarasi yangara ga Satana zegino.—Yugo. 16:14, 16.
11, 12. Ginipai i nika inopa tona bakere gberãngbii ti ni?
11 Ziazia Kekeapai agumbanga pa gu uru bakere gberãngbii nika tona ti ni te, ono si ima gumbapa gu iiriwopai nika yugopa tonaha. Gu iiriwopai re nikangia wee, aboro birĩ-zogarago nika gbarasa zire apambori naabaha dunduko. Rogo agu asangbanebi du rogo Yugoti kapita 17 na 18, i naringbisa zire pambori kuti debäri namanga bäri na aboro birĩ-zogarago. Yugoti 17:16 nayugo gupai furani nga, regbo ima mbeda tipa agi aboro birĩ-zogarago re ‘sogo gu debäri re, ki gbarasi ri ki mbu ri nikundiriri, ki riti pasiori, ki zokodi ri niwe dunduko.’
12 Ho regbo nika da ni tipa gupai re mangi, Mbori nika maa “sangbako ku kpotoyo yo [nga abazogo zegino] i mangi he,” ki gbarasi zire apambori dunduko. (Yugo. 17:17) Gure nga kina Mbori du nika gbarasa zire apambori. Gure nikangia gako sapangbanga kurii agu apambori nga ga biriki, nga gu naima digo niyugu agu apai nga ziree, na kini rungosi gako amoyambu. Badungu aboro ainongo nga Mbori nika gbarasa zire apambori agbarasa te. Ono ga Yekova ruru amoyambu ima inoho. Na i aima digo nigumbapaha fu aboro rogo gi yangara arame re.
13. Wai ani aino ya, Mbori nika gbarasa zire apambori vuru kẽ yo?
13 Kina hee nika ma aboro ho i nika bi zire apambori ni i nagbarasihe. Ziazia Kekeapai nayawee aboro kinaho dagba “abakindo zegino” nikaa kpara tipa zire apambori kini yaa: “Ako! ako! . . . Gamo sapangbanga da rogo saa sa.” (Yugo. 18:9, 10, 16, 19) Wa Ziazia Kekeapai ayawee gipai re nika manga “rogo saa sa,” si nayugo gupai nga, Mbori nika gbarasaha vuru kẽ yo.
14. Ho avura Yekova nika zubo gako amoyambu ni, ginipai Yekova nika mangaha?
14 Ani ima ino gupai a nga, tingbafuo gbarasa zire apambori, aboro nika zubo ga Yekova amoyambu azubo, nga aguyo naima digo nitungusipa ga Mbori sapangbanga. (Yeze. 38:14-16) Ho aboro nika zubo ga Yekova amoyambu ni re, Yekova nika guari aguari kutiyó, bambiko ko aima kidohe nga ko nika banda gako ruru aboro abanda. Yekova ayaa: ‘Mi atakapande pai rogo gi deringo na rogo gi dingidingi ngbaduse, I aína ha ya mi nga Yekova.’ (Oni gedi Yezekere 38:18-23.) Mbori ayaa: ‘Guni nazada roni [nga gimi amoyambu] ní nazada kina rindi bangire.’ (Zek. 2:8) Sidu, ho avura Yekova nika zubo gako amoyambu ni rogo zegino dunduko, gu regbo re gu ko nika guari kutiyó. Ko nika guari ka mangapai nga gu nika ye na bakere gberãngbii kuti digidoho, nga Aramegido. Gu regbo re Yesu nika zinahe fu amaraika i gbarasi gi ga Satana zegino re kusayo kpäkäyä.
Gupai Si Aida Ani Mangihe
15. Ginipai si aida ani mangihe wa ini ani gupai nga, digido gi zegino re nambeda?
15 Ginipai si aida ani mangihe fuo ino ani gupai nga, gi zegino re nambeda ka digo? Petero akepai ki yaa: “Wa du agi ahe re nikadu ni gbandakagbandaka ha oni ka du ni gini ngbatunga aboro tipa manga ziazia apai na sinombori?” (2 Pet. 3:11) Agu afugo re nanyakasa gupai furani nga, ka ani kuonga ga Mbori andiko ya, ono ani naamanga agu apai duna sinombori, si kini yugupa gu nyemuse du ani nani tipa ko. Agu apai re nakoda tungusa gu wene pangbanga nga ga Kindo mbata fu digido zegino da. Petero akepai berewe ki yaa: “Digida apai dunduko nambeda. Wa du he were tie oni rúgu gaoni aberã ki niso gima kpe.” (1 Pet. 4:7) Ho ani akpara ni fu Yekova dedede kini sanako ko niirugu rani na gako ziazia toro gbiati gako dungurati, gure nga ani nambeda naako na kini yugupa gaani nyemuse fuko.
16. Tipagine si aida ti ni ani kakuti ga Mbori arugute?
16 Rogo gi kere aregbo ani araka ti ni re, si naida ani kakuti agu arugute du rogo Fugo Mbori nayaa: ‘Oni naangéra angera wenengaĩ wa oni ata, wa azanga tatamana te, ono wakina airatatamana. Oni ki banda gaoni saa tipa manga apai, bambiko rago gbegberẽe.’ (Ef. 5:15, 16) Gbegberẽ mangimangiapai ima maapai awere kisusi wa zegino aenge aenga kindi. Satana ima sanga dungu apai tipa ka sa aboro ka i mangingo gupai Mbori akpinyemuhe ya, watadu ka sa yó i du nifudifudiyo ka regbo adunga beyo tipa ka mangaha ya. Wangia ani ga Yekova amoyambu, ani ima ino gi ga Satana abirĩ re, sidu, ani aidanga ka mbu kurapai si sa rani ani he manga gupai Mbori akpinyemuhe te. Ani ima inopa gupai a nika manga bambeda, na ani nakido kuti Yekova na kuti gako aringbisapai.—Oni gedi 1 Yoane 2:15-17.
17. Oni gumbanga pa gupai agu aboro nika bata be Aramegido nika mangaha ho i nika zingisa abadiangbayo ni bekpio.
17 Fuo nyasa agi apai re, Mbori amanga gupai ko akidohe tipaha ki yawee “ruru aboro azinga [azinga] be kpio na iraira yo a.” (Amo. 24:15) Oni kparianga wai nyakasiyo gupai re kini yaa: “Aboro azinga [azinga] be kpio”! Si aidanga ani kapa kuti gupai re te, bambiko Yekova du nagumbaha! Yesaya 26:19 nayaa: “Gamo kangba aboro adu ni ungayo. . . . Ako oni nga araki nvutu yo, oni zingi ki nibi bia ni ngbarago! Mbiko ga ndomo adu wa ndomo imarago, mo aída ha si ti ku ri ringara kangba aboro.” Agu afugo re ada ti rengo ho i akaraga ga Yekova aboro ni ku ringara kpuyo yo, na si nafu gu kido furani a nga, si nika manga amanga wo nzunzu rogo vovo zegino. Nairiwo gu ngbarago nikangiaha ho i nika zingisa agu abadiangbarani ni naima kpiko ani ki biyo berewe! Nirengo, digido ga Satana zegino ima mbeda kada, na ga Mbori vovo zegino ima mbeda kada a. Nairiwo wai nyakipa gupai nga, ani naangera angera kindi!
Oni Natingidaha?
• Ga Yesu bangua yugopai angia gine?
• Wai sunge tungusapa Kindo namoipai awere?
• Tipagine nyakipa gupai ti ni nga, ani naangera angera kindi?
• Ginipai nafu wasa furoni rogo Amokedi 24:15?
[Box/Gu sura du ti kpewaraga 16, 17]
Vunduvunduapai Atona
Kumba nga Alan Greenspan ake buku rogo gu garã nangia 2007 (The Age of Turbulence: Adventures in a New World ). Gu buku re nafura tipa vunduvunduapai ya si atona. Tipa agarã wa 20, ko angia bangerekurii riigbu sa Amerika yo. Ngerafuo sunge-igo-marã nga gu sunge gu riigbu re amangaha. Greenspan afura tipa gu kparakparapai nadu dagba gu sunge bagaahe nadumbata fu 1914 na gu naye tingbafuoho. Ko ayaa:
“Kuti agu apai aboro anaagumbaha mbata fu 1914, i anaayawee raka aasona asona wenengai kumbatayo apai kini wiri wa si nika rengba arengba ka gu adunga ho kpa kusayo ya. Sunge baga aboro ni akanga aima digo rogo gu 19 kama agarã. Si awiri wa zuũ aima go kusayo a. . . . Gu 19 kama agarã re angia regbo sangisangiapai, nga gu regbo aboro akusi agatara, aterefuni, karaba, asinima, atarambiri na gu kura aũkporo nasa raka si doroma. Birĩ-inohe nga ga husa kaza, wene ariahe, na wene mbirimbiri ime aima sa gupai nga aboro naaraka nigbangaha. . . . Aboro dunduko naaberã gupai nga, agi apai re nikaa ndu kina kumbatayo kindi zanga pai duho nika wo ti ni.”
Ono . . . “Bambata Vura Nga ga Zegino agbarasi apai naabaha dunduko rogo zegino. Si aima susa Ue Vura Nga ga Zegino nga gu naimi aboro kisusi bambataha: Bambata Vura Nga ga Zegino agbarasipa agu apai aboro aamaabangiriyo tipaha. Ka bangirise gonga ti gu bawene apai nanaamanga ti agu aregbo nadumbata fu Bambata Vura Nga ga Zegino te, nga agu aregbo aboro aasona rogo apai yo dunduko. Areme, apai kia ti gu nadumbata fu kama agarã kusayo. Ya mo gu vura nga ga abamoi, gu faarago rengbe na arago dunduko, watadu agu apai nga ga aboro, si aʹaria gi zegino du awere re gbegberẽe susi gu gu Bambata Vura Nga ga Zegino amangihe na gu zegino nadumbata fuhe? Ako tee, anga boro ho ini karagapai sa gi sanahe re nzunzu te.”
Greenspan atingidi gupai gako bayugupai nangia Benjamin M. Anderson (1886-1949) agumbaha ki yaa: “Gu sosono aboro duho awere tiunga natingidapa agu apai nadumbata fu Bambata Vura Nga ga Zegino, i nayawee agu aregbo re angia regbo weneapai. Aboro dunduko bayo angbaki angbaka, ono si wo awere te.”—Economics and the Public Welfare.
Kumba nga G. J. Meyer, agumbapai wakina gure rogo gako buku ko akusihe rogo 2006. Ko ayaa: “Ho pai nimangi ni, aboro naayawee si ‘niʹaria apai dunduko.’ Gu Bakere Vura i asoho [tona rogo 1914 ki da kurogo 1918], si nzunzu naʹaria apai. Si aʹaria apai dunduko: angianga kina angbandarago, azogarago, na agu apai nangia ga arikaaboro sa ya, ono si aʹaria gu gene a aboro abi zegino ngbaha na wai i abi tiyó. Si angia guhe nakpara gu zegino nadumbata fuhe kusayo nyeanye kindi ti gu naye fuoho.”—A World Undone.
[Gu kpiahe du ti kpewaraga 18]
Ti regbo Aramegido, Yekova nika keda rimbasa amaraika i ye ka sovura