“Oni Rúgu Gaoni Aberã Ki Niso Gima Kpe”

1, 2. (a) Tipagine nyakipa ‘so gima kpee’ ti ni? (b) Gini asanahe nga ga wisigotise nibipa kparakpee si aida ani sana tirani na ni?

KUMBA sa nanaamangasunge yuru aya: “Gu regbo kpakara gbe tipa boro naangera ti ni nga pangbanangbawiso.” Si nawira wa agu aboro nangere yuru sasasa ima rengba ka ida kuti gipai re. Agu aKristano du areme nagbiatiyo na pai wakina gure mbiko i naraka ti digido ga Satana zegino du wa kina kere bitimo yuru si aida i ningere angera ti ni kindi. (Rom. 13:12) Si ima rengba kadu furani ni kerepai ka ani ti ni rame ti gi regbo re. Si ni nyanyakipa pai ani ‘rúgu gaani aberã’ na ki gi gu rugute du rogo Ziazia Kekeapai nga ka ‘so gima kpee.’​—1 Pet. 4:7.

² Bambiko wa ani araka ti digido gi ga Satana zegino re, si ni patatamana ka sana tirani nga: ‘Mi naaso gima kpee wai? Ya mo mi naamanga ngbatunga akpee dũ zanga piriga? Ya mo sino re du nga kaa kpara tipa kura aboro, watadu gimi akpee naafura gbe tipa kina agu apai nabi re? Ya mo kparakpee tipa bata na nyanyakipa ha?’

ONI NI MANGI NGBATUNGA AKPEE DŨ

3. Gini bete ngbatunga akpee duho?

³ Rogo gu waraga Pauro akehe fu AEfeso, ko afura tipa ngbatunga “akpe” dunduko. (Ef. 6:18) Rogo gaani akpee, ani ima rengba ka sana Yekova tipa ko undo rani ani gbia agu ahe du ani na zingoho na ki di be akpakarapai. “Gu ko ninagia kpetambuahe” ko nadegatuko adega kuti gaani zungodihe tipa undo. (Tam. 65:2) Ono tie, si naida ani asaditirani ka maaberã rani tipa kura ngbatunga akpee. Agi akpee re nakoda sambuohe, tambuahe, na zungaditise.

4. Tipagine si ida ani tambua Yekova ti ni dedede rogo gaani akpee yo?

⁴ Dungu nduapai duho si aida ani sambuo Yekova ti ni watadu ka tambuako rogo gaani akpee yo. Ni kpiapai, ngbaduraniyo nafõ rani ani tambuako watadu ka sambuoko ho ani aberãpa “gako kangarã mangaapai” ni na “gako ziazia iiriwo bahe,” watadu padu ko ni Bahe. (Oni gedi Atambuahe 150:1-6.) Atambuahe kapita 150 veresi 1-6 fura tipa tambua Yekova bara 13! Kura bake papara Atambuahe ayugu gako nyemuse tipa Yekova ho ko abibia ni ki ya: “Mi natambua ro bara saba na uru tipa gamo ruru asarangbanga.” (Tam. 119:164) Nirengo, Yekova ima rẽ tipa i tambuako. Sidu, ya mo si aidanga ani tambuako rogo gaani akpee yo wa “bara saba” du rogoyo nga dedede te?

5. Wai rengbe kparakpee ki ni tambuahe kadu ni bandahe furani?

⁵ Tambuahe nga gu kura ngbatunga nyanyakipa kparakpee. Pauro angarasi agu aKristano naadu rogo gu gbata nangia Firipoi ki ya: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe.” (Frp. 4:6) Ho ani atambua Yekova ni kina boro ngbaduraniyo rogo kpee, si nga bandahe furani. Gipai re nga rengo mbiko ani naraka rogo kusa rago aboro “atambua nga he” rogoho ya. (2 Tim. 3:1, 2) Zegino ima hi be gu toro nga ga zanga tambuahe. Ka ani aadunga na rubangirise ya, ani ima rengba ka tona du na gu toro re tirani. Tambua Mbori rogo gaani akpee yo nafu ngbarago furani na kini banda rani ka ani ‘kpakananga he’ tipa agu apai nabipa gaani raka ya. (Yuda 16) Kurigure, ho abariikporo akoda atambuahe ni rogo gayo akpee, i na ngarasa adiayo gbiati awiriyo i nitambuahe.

6, 7. Zungadi Mbori rogo kpee yo nga gine, na gini apai rengbe ani ka zungadi ko tipaha?

⁶ Zungaditise nga gu kpee boro amangaha fu Mbori kini zungadi tiní rogoho kakaka. Gini apai rengbe ani ka zungadi tirani fu Mbori tipaha? Ani rengbe ka zungadi ko ka si du nga i narungosi rani watadu ka kere kaza amaa gaani raka ngbapai. Ti ngbatunga gi regbo re, ani nazungadi Mbori tipa undo. Ono ya mo gere nga gu yangara regbo rengbe ani ka zungadi Yekova ti ni?

⁷ Mo bingo ga Yesu kpia kparakpee, na ki bingo gupai ko aapehe tipa rimo Mbori, gako Kindo, na gupai ko akpinyemuhe. (Oni gedi Matayo 6:9, 10.) Gi zegino re ima hi be gbegberẽ apai, na gene be abazogo ka fu agu ahe fu aboro i azingo tipaha te. Nirengo, si naida ani kpari tipa rimo gu Barani du ngbangbaturũ yo du ni irisi irisihe na gako Kindo ye ka dia ga Satana zogarago kusayo. Gere a nga gu regbo si aida ani sana Yekova tipa gupai ko akpinyemuhe mangi auru kpotosende wa duhe ngbangbaturũ yo. Sidu tie, ani nye nga anye ngangara, na kini kpari ngbatunga akpee dũ.

‘ONI NIKPARI’ AKPARA KINDI

8, 9. Tipagine si aidanga ani saringbanga Petero na kura abawiriki ti ni tipa tiyo ni rame Getesemane yo ya?

⁸ Wa vura duhe nga gu mokedi nangia Petero angarasi aKristano i “niso gima kpe,” regbo adu kinaho ko aamanganga ha wo ya. Ko adu dagba agu abawiriki naati ni rame bara ho Yesu aakpara ni Getesemane yo. Zavura fuo ya Yesu fuyo wẽ ‘i ni ngére ki nikpari,’ i aamanganga ha wo te.​—Oni gedi Matayo 26:40-45.

⁹ Ono tie, kuba gupai nga ani saringbanga Petero na kura abawiriki mbiko wa i ati ni rame, si naida ani tingidi gupai nga i aima mbu be agu apai i amangihe rogo gu uru re. I ambakadi tiyo tipa Pumbo Susiri na ki mangihe rogo gu nyemu re. Fuo gure, Yesu asigira Tingida Pakpioko na ki yugu wai fuyo i nikaa mangaha ku mbatayo. (1 Kor. 11:23-25) “Fuo bi yo bia tambuahe, i ki ndu ku bagangara Aeraya yo,” na i andu gbanga nduge ngba gu umba agene naandu ku Yerusarema yo. (Mt. 26:30, 36) Si nawira wa bebere yuru aima susa ti gu regbo re. Ka ani adu Getesemane yo ni gu yuru re, kinawo ka ani ati ni rame a. Kuba gupai nga Yesu bira gako abawiriki, ko aima ino gupai nga ‘mbisimoyo nakpinyemuhe, boroyo naanyakanga ya.’

10, 11. (a) Ginipai Petero awirikihe ti gupai namangiko Getesemane yo? (b) Gini ome du gupai namangi Petero re na ni kuriro?

¹⁰ Petero aima wirika nyanyakipa pai ti gupai namangiyo Getesemane yo re. Pa tiko ni rame asako ko wiriki nyanyakipa pai. Mbata kusayo, Yesu aya: “I amánga roni oni koto akota dunduko tipa re ni gi yuru re.” Petero akaragapai ki ya: ‘Ka i mangi agu yo i koto akota dunduko tipa ro, mi akótanga te.’ Yesu aya fu Petero ko aora rimoko bara biata. Ono Petero aya: “Ka ani vura kpi akpi na mo mi óro nga rimoro te.” (Mt. 26:31-35) Ono tie, ko aima kota a wa Yesu apehe. Rago agberẽ ti Petero ni kerehe mbiko wa ko aoro rimo Yesu, ko ki “kpari akpara ni aume gbe.”​—Ruka 22:60-62.

¹¹ Petero aima wirikapai ti gipai namangiko re na si asako ka ko nikidongo kuti tiko ya. Kparakpee naundoko rogo gipai re. Nirengo, Petero du nafu rugute nga ani “niso gima kpe.” Ya mo ani namangapai kuti gi rugute re? Kurigure, ya mo ani ‘naakpara’ akpara kindi na kini yugu gupai nga ani nakido kuti Yekova? Si naida ani moi gu ga Pauro rugute ku berãrani yo naya: “Gu ni naberã ha ya ni ru, ni bánda tini, ni ka ti.”​—1 Kor. 10:12.

I AKARAGAPAI KUTI GA NEMAYA KPARAKPEE

12. Tipagine du Nemaya ti ni ni wene kpiapai furani?

¹² Mo berẽnga pa Nemaya nangia bafuinga fu Bakindo Parasa nangia Arutasasata rogo bisue kama agarã Mbata fu Batikayo Kristo. Nemaya nga wene kpiapai mbiko ko akpari fu Yekova na ngbadukoyo dũ. Tipa dungu arame, ko ‘agina riahe kindi ki nikpari ku bangiri Mbori’ tipa gu kerepai aYudo agbiatiyo na ni Yerusarema yo. (Nem. 1:4) Ho Arutasasata asanako ni tipa ndu gupai kpakpuko yo adu ti ni na rungo, ko ‘akpari fu Mbori nga ga ngbangbaturũ ko.’ (Nem 2:2-4) Sangbana gipai re angia gine? Yekova akaragapai kuti gako kpee na ki mangipai ngba gu gene naundo gako aboro. (Nem. 2:5, 6) Nairiwo wai gipai re anyakasi ga Nemaya idapase!

13, 14. Ginipai si aida ani mangihe tipa ka kakuti gaani idapase nyanyaki na ki dibe agu apai Satana aye na ni tipa rago gberẽ tirani?

¹³ Ka ani akpara akpara kindi a wa Nemaya amangihe, si nika undo rani gaani idapase du nyanyaki. Satana na nunga tiko te na ko naazubo rani ho du ani ni na rungbura. Ka si du nga ani nasovura na akaza watadu bakere gberãrago, ani ima rengba ka tona bihe nga gu regbo ani adiaha ku gene tungusapai yo rogo diwi, Mbori abingo ho na kikiipaha te. Si rengbe kadu nga agu apai naamangi rani rogo gaani raka yo naye na gbegberẽ aberã furani. Satana ima rengba ka sarani ani dakuti gupai nga sunge tirani te. Ko nazubo rani tipa ka ba gberãrago tirani na ka rungburasi gaani idapase. Nirengo, gu ‘vurakube nga idapase rengbe ka sa rani ani bisi gu siida we nga ga gbegberẽ ko.’​—Ef. 6:16.

¹⁴ Ka ani ‘aso gima kpee,’ asada agbianga rani zanga ani inihe te na ani ambunga pa gaani idapase ho ani nagbiatirani ni na ni te. Ho ani agbiatirani ni na aʹasada gbiati kpakaraapai, si naida ani tingidi gu kpiapai nangia ga Nemaya na ki kpari fu Yekova nibasa. Kina Yekova sa rengbe ka undo rani ani dibe aʹasada na kini hi agu apai rengbe ka gbia rani tipa gaani idapase.

ONI KPARI TIPA KURA ABORO

15. Gini asanahe si aida ani sana tirani na ni nibipa kpee tipa akuarani?

¹⁵ Yesu asana Mbori tipa ka ga Petero idapase zerenga ya. (Ruka 22:32) Gu ruru Kristano naadu rogo bambata sa kama agarã nangia Epafura awiriki ga Yesu kpiapai ni fuko tiko ka kpara kakaka tipa agu awirinako naadu Korosai yo. Pauro akepai fuyo ki ya: ‘Epafura azungadi he ni gako kpee tipa roni gbe, ya oni ru ziazia teketeke rogo gupai Mbori akpinyemuhe.’ (Koro. 4:12) Si naida ani sana tirani nga: ‘Ya mo mi naakpara nyanyaki tipa awirinami rogo zegino dunduko? Mi naakpara bara wai tipa agu awirinami narungo be agberango? Gini yangara regbo mi akpari tipa abaakumba rogo dungurati? Ya mo mi akparingo barambeda tipa agu awirina du na fudifudiapai rogo dungurati?’

16. Ya mo gaani kparakpee tipa akuarani na nyanyakipa ha? Oni sakinga rogoyo.

¹⁶ Gaani akpee tipa akuarani rengbe arengba ka undoyo. (Oni gedi 2 AKorindo 1:11.) Wa vura duhe nga Yekova ni ziziko tipa ka karagapai kuti akpee mbiko gupai nga airisiko ni dunguyo namangaha te, ko nabi gu bakere nyemupai abi du yó na ni tipa akurayo na kini karagapai kuti gayo akpee. Sidu, si naida ani bi gu momu du berani nga ga kpara tipa akuarani na nyanyakipa ha. Wakina Epafura, si naida ani yugu gaani nyemuse fu awirinarani na kini berẽ payo rogo gaani akpee yo. Manga ani wo nika fu ngbarago furani mbiko “fu he ngba ti dia ha.”​—Amo. 20:35.

“GAANI BATA MBEMBEDI”

17, 18. Wai ‘so gima kpee’ nika undo rani?

¹⁷ Pauro akepai ki ya: “Wa ini oni ragoho, ya ragoho da awere oni zingi rame yo; bambiko gaani bata mbembedi awere susi ho ani aidipase ni mbata.” (Rom. 13:11, 12) Ga Mbori vovo zegino ima mbeda, na gaani bata ima mbeda susi gu ani aberãha. Si aidanga ani ra rogo toro yo te, na si aidanga ani mbu gi zegino re si di gu regbo si aida ani kpari fu Yekova ti ni te. Kuba gure, si naida ani “niso gima kpe.” Manga ani he wo nika undo rani ani du ni agu aboro nikaa “manga ziazia apai na sinombori” wa ani asungudo ga Yekova uru. (2 Pet. 3:11, 12) Gu gene ani araka ngbaha nika yugo gupai nga ani aranga rogo toro yo te, na ani ima ida kuti gupai nzunzu nga digido gi gbegberẽ sino raka re ima mbeda ka da. Sidu tie, ka ani “pirigi nga ti kpara kpe ya.” (1 Tesa. 5:17) Si naida ani wiriki Yesu a ni gbata ani gu ba ngbaangba tipa ka kpara fu Yekova nisarani. Ka ani di regbo tipa ka kpara fu Yekova ni gbangaha, ani nika mbeda na ko gbe. (Yak. 4:7, 8) Gure nika ngia pa maku gbe!

¹⁸ Ziazia Kekeapai naya: ‘Yesu ho ko adu ni ni boroboro, ko afu akpe na asarawati na nyanyaki akpe du na aume fu gu ko rengbe na batasa ko be kpio, ko ki gi pako bambiko gako gunde ti Mbori.’ (Eb. 5:7) Yesu asana Mbori rogo kpee yo na ki zungodi tiko na ki nye ni ruruko fu Mbori da ti digido gako raka. Ni sangbana gipai re, Yekova azingisiko be kpio na ki fu nyenye raka fuko ngbangbaturũ yo. Ani ima rengba kadu ni ruru rani a fu gu Barani du ngbangbaturũ yo ka ani vura ka gbiatirani na kina gini aʹasada na kpakaraapai vurũ. Nirengo, ani ima rengba ka gbia gu mosoro nga nyenye unga ka ani ‘aso gima kpee.’