Ruru Aboro Atambua Yekova Nyeanye Kindi
“Ruru boro awó nga wa sa te; i atíngida pa ni nye anye kindi. . . . Gani rurupai nye anye kindi.”—TAM. 112:6, 9.
1. (a) Gini weneapai napido agu aboro dunduko Mbori abiyo niruruyo? (b) Gini sanahe duho si aida ani gbia karagapai tipaha?
NAIRIWO gu bawenepai nasungudo agu aboro dunduko Mbori abiyo niruruyo! I nikaa wirikapai tipa asino Yekova nyeanye kindi. I nikaa tambua Yekova bakere gbe wa i nikaa wirika badungu apai a tipa agu ahe ko akusihe. Pai sa dagba agu apai rengbe ka sa rani ani gbia gu raka re nga, “rurupai,” nga guhe Atambuahe 112 nafura tipaha gbe. Ono wai rengbe ziazia Mbori nga Yekova ka bi aboro-ingapai niruru aboro? Ka ani vura kaa asada tirani kina wai vurũ tipa ka manga rurupai, ani namanga irairaapai amanga, na agu akerehe a.—Rom. 3:23; Yak. 3:2.
2. Gini iiriwoapai ue Yekova amangihe mbiko nyemuse?
2 Yekova amangi gupai ninyemuse narengbe ka sa gupai nga ko nibi aboro niruruyo. Ginipai du ko amangihe? Bambatapai nga, ko adi unga nga ga Wiriko ko akpinyemuko gbe ki moihe ku rukumbu ngasu dee yo ri ki vunguko nirengberengbe boro zanga ko du na ingapai tiko. (Ruka 1:30-35) Fuo avura Yesu imiko, Yekova amangi gu kura iiriwopai berewe. Ko azingisi Yesu bekpio, Yesu kidu nigu boro nga toro.—1 Pet. 3:18.
3. Tipagine Yekova adu ti ni na ngbarago ka fu mosoro fu gu Wiriko nga ga raka ngbangbaturũ yo?
3 Yekova afu guhe fu Yesu naadunga beko mbata fu yeko ku auru kpotosende no ya. Guhe re nga gu unga kaa kpiko ya du ko nani ngbangbaturũ yo. (Eb. 7:15-17, 28, NW) Yekova adu na ngbarago ka manga gipai re, bambiko Yesu anye niruruko zavura ti regbo kere aʹasada vurũ. Gure nga Yesu afu bawene karagapai fu Yekova tipa Yekova fuhe fu Satana nibi gu ziree Satana agumbaha tipa aboro ki yawee i nandusunge Mbori mbiko ka gbia weneapai tipa tiyó angianga mbiko ndikidi nyemuse ya.—Snz. 27:11.
4. (a) Fuo ga Yesu ku ngbangbaturũ yo, ginipai ko amangihe tipa rani, na ginipai Yekova amangihe tipa gipai re? (b) Wai oni abi gupai Yekova na Yesu namangihe tipa roni?
4 Ho Yesu aga ni ku ngbangbaturũ yo, ko ‘andu ku barabangiri Mbori tipa rani’ ka yugopa gu motumo fuko ko afuhe ‘nikureko.’ Gu Barani nga boro nyemuse du ngbangbaturũ yo, ko aima ida na gi ga Yesu motumo re nigu motumo narẽarẽ tipa “gaani ingaapai.” Sidu, ani rengbe arengba ka ‘mangasunge fu unga Mbori’ na ‘gigiri sangbakpotoraniyo.’ Gipai re nga gu kura ndupai si aida ti ni ani mangi gupai bambata gu veresi nga ga Atambuahe 112 agumbaha kini yaa: “Oni támbua Yekova.”—Eb. 9:12-14, 24; 1 Yo. 2:2.
5. (a) Ginipai si aida ani mangihe tipa kadu niruru aboro bangiri Mbori? (b) Gini apai duho nayugo gupai nga, Atambuahe 111 na Atambuahe 112, si nandu kina sa?
5 Tipa ani rengbe kadu niruru aboro bangiri Mbori, si naida ani du na idapase kuti gu kure Yesu nauka, na si aidanga gu idapase re guari kusayo tirani te. Si naida ani naatambua Yekova na aʹuru dunduko tipa pa kpiko nyemu rani bakere gbe. (Yo. 3:16) Si naida ani naawisigo Fugo Mbori kindi na kini raki ringbisihe kuti agu apai ani awirikaha. Atambuahe 112 na bawene arugute rogoho fu agu aboro dunduko naida ka nye na gigirii sangbakpotoseyo barabangiri Mbori. Gi bia Atambuahe re nga papara Atambuahe 111. Si dunduko ue natona na gu fugo nga “Oni támbua Yekova,” watadu “Areruya.”a
Gupai Naye na Ngbarago
6. Gu “boro” nagunde ti Mbori gumbayo pani rogo Atambuahe 112, wai du ní niboro maku?
6 “Boro maku [“boro ngbarago,” NW] nga gu ni nagunde ti Yekova, ngba sangbako angba ti ni gbe! Ngbatungani adú ni airanyaka rogo zegino; i afu maku fu rika ngbatunga ruru aboro.” (Tam. 112:1, 2) Oni kparia gupai nga, gi bake Atambuahe re afura mbata tipa bangisa “boro,” fuoho, ko kini fura tipa dungu aboro kini yawee “ruru aboro.” Gipai re nayugo gupai nga, gi bia re nafura tipa badona aboro. Ziazia toro aundo gu mokedi nangia Pauro ko mangisunge na Atambuahe 112:9 nibipa agu aKristano nadu rogo bambata sa kama agarã. (Oni gedi 2 AKorindo 9:8, 9.) Nangba wai gi bia tambuahe re aringbisapa wai rengbe agu apefuo Kristo du auru kpotosende awere kadu na ngbarago!
7. Tipagine si aida ti ni ga Mbori amoyambu nigunde tiko, na wai si aida oni naabi gako arugute?
7 A wa Atambuahe 112:1 ayugoho, ndikidi aKristano nagbia bakere ngbarago wa i ‘agunde ti Yekova.’ Wa i agunde ti ba gberarago ti Yekova, si naundo yó i sovura kuti gu sino mangaapai nga ga gi zegino re. I nagbia bakere ngbarago mbiko wisigo yó “sangbako” na kini ndu kuti gako arugute. Rugute sa dagba agi arugute re nga gudu tipa tungusa gu wene pangbanga nga ga Kindo auru kpotosende dunduko. I naʹasada tiyó ka sa aboro ni abawiriki dagba arikaaboro yo dunduko, kini gumbapa ga Yekova uru sapangbanga fu gbegberẽ aboro.—Yeze. 3:17, 18; Mt. 28:19, 20.
8. (a) Wai Mbori nafu mosoro fu gako aboro areme mbikopa mangayó sunge kakaka? (b) Gini amaku napido agu aboro duna maabangirise ka raka auru kpotosende?
8 Wa ga Mbori amoyambu amanga gu sunge i afu fuyó re, bangeyo ima nge awere ki susi amirioni saba. Da rengbe ka tikango ki yawee i adanga ‘ni airanyaka rogo zegino’ te? (Yo. 10:16; Yugo. 7:9, 14) I nika gbia bakere “maku” agbia berewe ho Mbori nika manga gako ringbisapai ni. Agu aboro duna maabangirise ka raka auru kpotosende, wa du yó nibadona, Mbori nika banda yó abanda ti regbo gu “bakere gberãngbi” naye, tipa i duni aboro “vovo kpotosende” nga gu “ruru apai nika nye rogo ho.” Fuo gure, agu aboro nika bata ti regbo Aramegido, i nika gbia “maku” berewe susi. I nika dia gu badungu amirioni aboro kugume nika zinga bekpio. Nairiwo gu bawenepai nika manga kumbatayo re! Niyangaraha tie, agu aboro ‘rago angba tiyó gbe’ mbiko ga Mbori arugute, i nika da nirengberengbeyo zanga ingapai, na i ki gbia “gu taarimo nga ga [duni] awiri Mbori” nyeanye kindi.—2 Pet. 3:13; Rom. 8:21.
Mangasunge na Aũkumuko Nitatamana
9, 10. Wai ndikidi aKristano amangasunge na agu aũkumuko du beyo nga ga toro, na wai gayó rurupai nika nyeanye kindi?
9 “Wenepia du kpuni yo na ũkumuko; gani rurupai nye anye kindi. Imarago nakura bitimo yo tipa ruru aboro; i du na inapai, ki hi ahi be nunga aboro, ni ruru yo a.” (Tam. 112:3, 4) Ti agu aregbo i aake Ziazia Kekeapai, badungu ga Yekova amoyambu nangia airakumuko. Agu aboro Mbori aida na gayó pai, i nadu adu nikumukokumuko aboro, angianga na kina aũzegino ya. Gupai nga rengo nga, badungu agu aboro naumbasipa tiyó barabangiri Mbori, i rengbe kadu ni airarungo watadu ni agu aboro akurayó aberãnga payo ya, a wa si adu ti rago Yesu. (Ruka 4:18; 7:22; Yo. 7:49) Ono ka si vura du nga boro na aũzegino beni tooni gbua, ní rengbe arengba ka kumuko rogo toro yo.—Mt. 6:20; 1 Tim. 6:18, 19; oni gedi Yakoba 2:5.
10 Mbedimbedi aKristano gbiati abadiangbayo nga kura akandoro, i akánga na agu aũkumuko nga ga toro du beyo tipa kina tiyó te. Kuba gure, i nasa ‘imarago si kuru’ fu “ruru aboro” rogo gi ga Satana zegino duna kina bitimo re. I namanga gipai re niʹundo yó kura aboro i gbia undo be ga Mbori tatamana gbiati inohe. Agu aboro nasoga ga Mbori aboro, i aima digo niʹasadi tiyó ka rugusa sunge tungusapa Kindo, ono ka i adunga na diabese ya. Ono kuba gure, sangbana gi sunge re nika “nye anye kindi.” Ka ga Mbori amoyambu aru nyanyakii kindi ti regbo aʹasada, Mbori sa yó asa i raki “nye anye kindi.”
11, 12. Gine nga bete agu agene ga Mbori aboro amangasunge ngbaha na agu ahe du beyo?
11 Mbedimbedi aKristano gbiati “bakere rimbasa aboro” nagama aũzegino agama fu aboro. Atambuahe 112:9 nayaa: “Ni agagamu ahe, ni afuku ahe fu airazingoahe.” Ndikidi aKristano naagama ahe agama fu akurayó aKristano gbiati gu kura aboro a duna zingo. I naafuka agu ahe a du beyo tipa si undo agu aboro gberãngbii nati kuriyó. A wa Yesu agumbaha nga, gamahe fu aboro naye na ngbarago, i nagbia ngbarago agbia.—Oni gedi Amokedi 20:35; 2 AKorindo 9:7.
12 Kurigure, oni berãnga pa gu marã i namangisunge nani tipa ka kusa gi magazini re rogo afugo nga 172, na badungu agu aboro nagumba agu fugo re nga airarungo. Oni makianga gupai a nga, i nakusa gi magazini re akusa a rogo agu afugo du tipa airangbiängä na gudu tipa airavurari.
Inapai na Ruru Sarangbanga
13. Ada namoi bawene kpiapai rogo fu gamahe, na wai rengbe ani ka pekafuo gayó kpiapai?
13 “Si ni wenepai fu gu boro nayugo inapai ki niunda pai.” (Tam. 112:5) Zanga kapa, oni aima rugatironi na gupai nga, anga agu aboro ninaagama ahe fu aboro nga kina airainapai dunduko te. Gu kurayo nagama ahe mbiko gupai nga, i naida ka sa aboro i ini gupai nga ahe kina beyo, watadu aboro nibiyo niwene sino aboro. Boro naadunga na ngbarago ka dia he be gu boro nabi pani kusende watadu nabi ní niboro totoroto te. Ono tie, boro nidu na ngbarago ho gu boro nga boro inapai agamahe ni funi. Yekova nga bawene kpiapai rogo fu gamahe. (1 Tim. 1:11; Yak. 1:5, 17) Yesu Kristo aduna kina sino Bako nzunzu nibipa inapai fu aboro. (Mk.1:40-42) Sidu, tipa Mbori bi rani niruru aboro, si naida ani naainapai fu aboro esuesu, gbe, ho ani atungusapai ni fu akuarani.
14. Gini bete agene rengbe ani ngbaha ka ‘ruga gaani apai na ruru sarangbanga’?
14 “[Ní] naruga gani apai ni ruru sarangbanga.” (Tam. 112:5) A wa i agumbaha, ruru kangara buruku nangerafuo ga bairani ahe na ngbanya kuti ga Yekova ruru sarangbanga. (Oni gedi Ruka 12:42-44.) Ani naino gipai re ti agu arugute i naafuhe fu abaakumba nibipa sara angbanga rogo dungurati. Gu riko nga ga buruku re namanga apai ngba ruru gene. Ani nabihe rogo agu arugute si afuhe tipa wai si aida adungurati naamangasunge, na wai si aida awirina naamangaapai rogo agu akporo nga ga amokedi na Betere yo. Anga kina abaakumba si aida i naamangapai niruruhe te, ono aKristano dunduko si aida i naamangapai niruruhe na akurayó aidipase, na rogo sunge bagaahe a.—Oni gedi Mika 6:8, 11.
Agu Amaku Du Tipa Ruru Aboro
15, 16. (a) Ginipai gu gbegberẽ apangbanga du rogo zegino amangaha na ruru aboro? (b) Ginipai ga Mbori amoyambu nadiberã kaa mangaha amanga kindi?
15 “Ruru boro awó nga wa sa te; i atíngida pa ni nye anye kindi. Ni agunde nga be gbigbita pangbanga te; kpotoni yo du nyanyaki, nikida kuti Yekova. Kpotoni yo du ni nyakasinyakasi he, ni agúnde nga te, daho ni ka bi gu pai ni ni akpi nyemu he kuti agu yo nafuda ni.” (Tam. 112:6-8) Anga regbo aduho mbata ome aboro abati be gia gbegberẽ apangbanga te, wa apangbanga avura, gu vura nga ga abamoi, vovo akaza na agu akuruhe, kuondiko, rungo, na birikosi wege, ime, gbiati sende na gbegberẽ ahe. Zavura agu aboro Mbori abiyo niruruyo, gi gbegberẽ apangbanga re nafu gberarago afu fuyó, ono i na maabangirise tipa weneapai kumbatayo. Kpotoyo yo “du nyanyaki” na “ni nyakasinyakasi he” wa i angera naa kido tipa agu apai nika manga kumbatayo, ki ini gupai nga, ga Mbori ruru vovo zegino ima mbeda. Ka gberango mangi nisangbana gu mangaapai nga ga ome zegino, i nasovura kuti ni na diabese niipo mbiko i nakido kuti Yekova. Ko naambunga gako ruru aboro i ‘wo’ te, ono ko naafu ome afu fuyó i hipai.—Frp. 4:13.
16 Ga Mbori ruru aboro naahi asogote ahi gbiati agu aziree asogoyo agumbaha ti rimoyo, ono gipai re arugusanga yó ti sunge tungusapai te. I ru nyanyakii kini mangi gu sunge kindi Mbori afuhe fuyó, nga sunge tungusa gu wene pangbanga nga ga Kindo na kini sa agu aboro ni abawiriki naida na gu pangbanga re. Zanga kapa, wa digido gi zegino re nikaa mbeda, ruru aboro nikaa gbiatiyo na kere asogote susi gu nidumbata. Gu sogote re nika igirã gbe ho Gogo boro Magogo, nga Satana Bakitingbanga, nika zubo ga Mbori aboro ni rogo zegino dunduko. Niyangaraha tie, ani nika bi ‘agu aboro nafuda rani’ Mbori niʹimi yó. Si nikadu nibawenepai ka bi Yekova ko naziasi rimoko.—Yeze. 38:18, 22, 23.
“I Nakiisa Pa Gani Ome na Irisa”
17. Wai Mbori nika ‘kiisapa ga ruru boro ome na irisa’?
17 Nairiwo wai rago nika ngba ti ga Yekova amoyambu ka kodatiyo kaa tambua Yekova, zanga Bakitingbanga duho berewe na gi gako zegino re kaa manga yó gbegberẽe! Gu ngbarago re nikangia nyenye mosoro fu agu aboro nika nye niruruyo barabangiri Mbori. Bakitingbanga adianga beyo te, bambiko Yekova akidohe ki yawee i ‘akiisapa ga ruru boro ome na irisa.’ (Tam. 112:9) Ga Yekova ruru aboro nika ngi na gu ngbarago nga ga diabese ho i nika bi avura Yekova ni dunduko Ko naimi yó.
18. Wai gu yangara veresi nga ga Atambuahe 112 nika digo?
18 “Gbegberẽ boro abi he, si ki rungosi ni; ni ari ngba rindini, ki zirĩ ku sa yo; gu nyemuhe nga ga gbigbita boro si ago ago.” (Tam. 112:10) Agu aboro dunduko nasoga ga Mbori aboro, regbo ima mbeda tipa i “zirĩ ku sa yo” na gayó sogote. I nika kpiko na gayó gbegberẽ aberã ti regbo “bakere gberãngbi.”—Mt. 24:21.
19. Ginipai si aida ani duna kido tipaha?
19 Ya mo oni adu dagba agu aboro nika bata ti regbo gu bakere gberãngbii re? Na ka si du nga oni nika kpi mbata fu gu regbo re, ya mo oni adu dagba gu “ruru aboro” Mbori nika zingisa yó bekpio? (Amo. 24:15) Karagapai rengbe kadu nga ‘ii’ ka oni duna idapase kindi kuti Yesu Kristo na kini wiriki Yekova, a wa gu ruru “boro” Atambuahe 112 afura tipa ní amangaha. (Oni gedi AEfeso 5:1, 2.) Yekova nika ‘tingidapa’ agu aboro re atingida, na ko ahenga berãpa gayó ruru mangaapai te. Yekova nika tingida payo na kini kpinyemu yó nyeanye kindi.—Tam. 112:3, 6, 9.
[Gu rukutu kekeapai du bandu kpewaraga yo]
a Agu apai nayugo gupai nga agi abia du ue re si nandu kina sa, si nga, gu gene i akehe ngbaha gbiati agu afugo du rogoho. Agu asino Mbori furayo tipaha rogo Atambuahe 111, i ima fura a tipaha rogo Atambuahe 112, a wa agu averesi nga Atambuahe 111:3, 4 na Atambuahe 112:3, 4 ayugoho.
Asanahe Tipa Berãkuriihe
• Gini bete nduapai duho si aida ti ni ani naata ngbarani na gu fugo nga “Areruya”?
• Gini apai namanga ti gi gaani regbo re nga gu nafu ngbarago fu ndikidi aKristano?
• Gini ngbatunga boro gamahe Yekova akpinyemuni?
[Gu kpiahe du ti kpewaraga 25]
Tipa ani du gigirii barabangiri Mbori, ani duwa ka ani duna idapase kuti kure Yesu
[Gu kpiahe du ti kpewaraga 26]
Agu agamahe aboro afuhe, si naundo agu aboro gberãngbii nati kuriyó na kini undo sunge kusa awaraga