2 Oni Mangi Asadatise ka Gbia Ndikidi Inohe Tipa Mbori
“Nyenye unga nga gere, nga i ini ro nga bangisa ndikidi Mbori.”—Yoane 17:3.
GINIPAI NAKISO GENE? Kura aboro nayawee Mbori ti ni te. Aguyo kini yawee Mbori nga bakere ome angianga boro ya. Ono tipa aguyo tigayo idi kuti gupai nga ko kina ti ni, i nayugo agu apai tipa ko na tipa asinoko natagbagatihe atagbaga.
WAI RENGBE ONI KA DIABE GUPAI RE? Gene sa dagba agu akuraha tipa boro gbia inohe tipa Mbori, si nga ka wisigo agu ahe ko amangihe. Gu mokedi nangia Pauro ayaa: “[Gu ga Mbori] apai ka i abi nga ya nga gako nyenye tandu na sino Mbori i nabi he abi ziazia, tona kina ho rago aenge ni. I nabi he kina rogo agu ahe yo ko amangi.” (ARomo 1:20) Ka ani wisigi agu ahe wenengai Mbori amangihe, ani rengbe arengba ka wirikapai tipa gako tatamana na gako ome.—Atambuahe 104:24; Yesaya 40:26.
Ono tie, tipa ani gbia ndikidi inohe tipa asino Mbori, si naida ani zara Fugoko nga Ziazia Kekeapai wa du ani nibasasa na kini wisigihe. Ka oni mbunga kura aboro i diberã tipa roni ya. Kuba gure, oni naamanga agu arugute nga ga Ziazia Kekeapai nayaa: “Ka oni ríngbisi nga tironi na gi zegino re ya, ono oni sá tironi asa ni mbakada berãroni berewe, oni kpária pa gu he nga ga Mbori nyemu he du ni wene he, nzunzu, ni ziazia ha.” (ARomo 12:2) Nikpiapai, ani wisigingo agu apai naye re nga gu Ziazia Kekeapai agumbaha tipa Mbori.
Mbori na rimoko ti ni. Ndikidi rimo Mbori nibadunguhe rogo Ziazia Kekeapai. Si rogo dungu asasa-fugo Ziazia Kekeapai rogo Atambuahe 83:18, yo si ayani wee: “I ki ini he ya kina ro sa, du rimoro nga Yekova, nga gu Ko nga Bahe ki susi auru kpotosende dunduko.”
Apai kinaho nafõ Yekova Mbori ngbadukoyo, na agu apai aboro amangaha, si namangapai amanga naako. Tingbafuo kusa Yekova gako aboro be sunge akanga Ezipeta yo, i anaabasa gako arugute abasa ti kura aregbo. Gi gayó samungu re ‘azingisi [Yekova nangia] ga aYisaraere Ziazia Ko.’—Atambuahe 78:40, 41.
Yekova nangera angera fuo rani wa du ani nibasasa. Yesu aya fu gako abawiriki wee: “I nabaga[nga] abavurukporo ue tipa rukutu marã sa, te? a nga gu ru sa dagba ra ka ti nga ku sande gi bangiri Baroni te. Ono mangerironi tigaha ni gedigedi he dunduko. Were ka oni gúnde nga ya; genoroni susi geno dungu abavurukporo.”—Matayo 10:29-31.
Mbori angbanga na kina kura aboro ki mbu aguyo te. Gu mokedi nangia Pauro agumbapai fu aGiriki Atenai yo ki yawee Mbori ‘amangi arikaaboro dunduko wa sa i ima auru kpotosende dunduko.’ Ko aya berewe wee Mbori ‘aturãnga na ani wa sa te.’ (Amokedi 17:26, 27) Gu mokedi nangia Petero ayaa: “Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.”—Amokedi 10:34, 35.
GINI MOSORO DUHO? Kura aboro na kina “nyemu Mbori ti yo ono ku sangba [ruru] inahe yo te.” (ARomo 10:2) Kangia oni ima ino gupai Ziazia Kekeapai ayugoho nzunzu tipa Mbori, boro ho nika ingisa roni te, ono gu inohe re nika sa roni oni “mbedi na Mbori.”—Yakoba 4:8.
Ka oni aida ka ino kura apai tipa gipai re, oni zara gu buku nga What Does the Bible Really Teach? kuti kapita 1, du riihe nga, “What Is the Truth About God?”a
[Gu rukutu kekeapai du bandu kpewaraga yo]
a Si nga gu buku aDezire Yekova akusihe.
[Gu kpiahe du ti kpewaraga 6]
Gene sa dagba agu akuraha tipa boro gbia inohe tipa Mbori nga ka ngana agu ahe ko amangihe