2 Mbori Aberãnga pa Aboro Te Ya Mo Rengo Du?
Gupai aboro agumbaha furoni: “Ka si nidu nirengo nga Mbori naberãpa aboro aberã, ka ko ima dia gbegberẽ apai na arungo kusayo rogo zegino. Na ka si vura du nga ko naberãpa aboro aberã, ko aberãnga pa yó wa du yó nibasasa te.”
Gupai Ziazia Kekeapai ayugoho: Anga Yekova Mbori nasa gbegberẽ apai watadu arungo si nimangi te. (Yakoba 1:13) Wa vura duhe nga ko ima rengba ka dia agi apai re ti ai regbo, ko mbugene fu gbegberẽ apai si niimangi awere tipa ka rugusa gupai nakuru nibipa gako pagbia. Niyangaraha, ko nika mangapai tipa ka digiso gu kpakaraapai naye be agu aboro naká gako zogarago.—Bambata Pai 3:1-6; Yesaya 65:17.a
Kupati gupai nga Mbori naberãpa rani aberã dunduko, ko nayugu ndikidi nyemuse tipa rani nibasasa dunduko. Matayo 10:29-31 nayugo gupai nga, ko nabi gu futufutuapai naabaha du tipa rani zavura gu ani ainongaha ya, si nayaa: “I nabaga abavurukporo ue tipa rukutu marã sa, te? a nga gu ru sa dagba ra ka ti nga ku sande gi bangiri Baroni te. Ono mangerironi tigaha ni gedigedi he dunduko. Were ka oni gúnde nga ya; genoroni susi geno dungu abavurukporo.”
Wai ino rengo narengbe ka undo roni: Ani naane agu aboro ane du kpasiaka watadu abakanga bangiriyo tipa rani ya. Sidu tie, gu ziree aboro agumbaha nga Mbori aberãnga pa aboro te, si nasa aboro i ká ka inopai tipa ko watadu i sia ka inopai tipa ko sa kinaho adunga kura gene ni beyo ya. Pa ino oni gupai nga Yekova Mbori naberãpa roni aberã rengbe ka sa roni oni idi ka inopai tipa ko nibakerehe na ki sonosi pagume naako.
Nikpiapai, oni avura kpara fu Mbori ono ki berẽ gupai nga ko adeganga tuko kuti gaoni kpee te watadu ko akaragapai sani te. Ziazia Kekeapai nakido rani nga “gu ko ninagia kpetambuahe,” ko nambugene nizazaha ti aregbo dũ fu aguyo nakpara fuko ngbaduyo yo.—Atambuahe 65:2.
Mbori nayamba rani ani ‘bá agu apai nafuda rani ku auru ko yo; mbiko ko naberã pa rani.’ (1 Petero 5:7) Ani rengbe ka kido kutiko zavura ti agu aregbo du ani nifudifudi rani, bambiko Fugoko nayaa: “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.”—Atambuahe 34:18.
[Gu rukutu kekeapai du bandu kpewaraga yo]
a Ka oni aida ka ino kura apai tipa ndu gupai Mbori ambugene ti ni fu arungo, oni bi kapita 11 nga ga gu buku nga Gini Apai Nzunzu Ziazia Kekeapai Ayugoho?
[Gu sura du ti kpewaraga 5]
Ka si nidu nga Mbori aberãnga parani te, ya mo ka ko naayamba rani ani kpari fuko?