Ya Mo Ani Rengbe ka Giarogo agu Apai Yo Du Rogo Ziazia Kekeapai?

Kumba nga Steven du ringara aNgirisi yo ayaa: “Ani anaageda Ziazia Kekeapai Rago aPoso dunduko kpurani yo. Gu gedapai re anaafunga ngbarago fere gbe te. Mi aima ida kuti gupai nga Ziazia Kekeapai nga Fugo Mbori, ono badungu agu apai mi anaagedaha mi anaagianga rogoyo wa gu tooni ya.”

Degude nga Valvanera du Spain yo ayaa: “Ho garãre aduni 17, mi aʹasaditire ka geda Ziazia Kekeapai. Ono mi aagianga rogo agu apai mi aagedaha te, sidu, mi kini mbu gedaha.”

Degude nga Jo-Anne du Australia yo ayaa: “Mi agedi Ziazia Kekeapai naabaha dunduko mbiko mi abi gupai nga wa mi angia boro Katoriko, si aidi aida mi gedihe. Mi agedihe tipa agarã biata mi ki nyasihe! Ono badungu agu apai mi agedihe mi aagianga rogoyo wa gu tooni ya.”

ZIAZIA KEKEAPAI nga gu kitabu naima ngba ti aboro rogo zegino. Si nga gu kitabu naima nge kisusi kura akitabu dunduko. Si rogo badungu afugo, na i nakehe ti awaraga na kini gedi afugoho kurogo akasete na kurogo gu kura ahe. Ono tie, badungu agu aboro duna Ziazia Kekeapai beyo agianga rogo agu pai du rogoho yo ya. Ya mo wo duhe tipa roni a?

Ya Mo Mbori, Nga Baira Ziazia Kekeapai Naida Aida Ani Girogoho?

Ziazia Kekeapai naya nitihe wee “si aye be ga Mbori Toro.” (2 Timoteo 3:16) Nirengo, Yekova Mbori nga baira Ziazia Kekeapai. Ya mo Mbori naida aida ani girogo Fugoko yo? Watadu ko asa Ziazia Kekeapai kina bete aboro gbua girogoyo, wa abarumbatayo rogo pambori watadu kpaya abawirikipai? Anga wo duhe te.

Oni wisigingo agu averesi du kusende re:

“Gi rugute mi aruga roni na ni ni gi uru re, si ni kpakarakpakara ha fu roni ki susi te, turũ nga ha a te.”—Pa Fu Rugute ni Ue he 30:11.

“Rima gamo apai ku kpoto yo si nafu imarago; si nafu rugatinapai fu azangainahe.”—Atambuahe 119:130.

“Ni kina gu rago re Yesu angi rogo Ziazia Toro, ki ya, ‘Mi natambua ro, Buba, Gbia ngbangbaturũ na sende, ya mo aoko agi apai re be airatatamana na airainahe, ki yugu he fu toni agude.’”—Ruka 10:21.

Mbori naida aida oni girogo Fugoko yo nga Ziazia Kekeapai! Ono tie, badungu aboro nageda Ziazia Kekeapai ka i agianga rogoyo ya. Ginipai rengbe ka undo roni oni girogoyo? Gu papara kekeapai naye fuo gere nika gumbapa apai biata rengbe ka undo roni oni girogo agu apai yo du rogo Ziazia Kekeapai.