Oni Rengbe Arengba ka Giarogo agu Apai Yo Du Rogo Ziazia Kekeapai?

3. Oni Idi Na Gu Rugute Aboro Afuhe

Ho gu kumba nga Edward John Eyre amangi nunguro ni rogo gu rago nga Nullarbor Plain, aboro gu rago re ayugu wai fuko i age ime rogo ngume na wai ka kusaha a ti kura ngbatunga ngua sa. Pa diako agu arugute kugume agi aboro re afuhe fuko asa gupai nga ko bati be gu gomoro-ime ka imiko.

GU KPIAPAI re naundo rani ani rugutirani na gupai nga, tipa boro rengbe ka manga gupai du nikpakarakpakaraha, si naida ní gbia rugute agbia be agu aboro duna inohe tipaha. Kina gu bangisapai re a du tipa Ziazia Kekeapai ho ani aida ka tona gedaha ni.

Yesu aadunga na gu berã nga apefuoko nika giarogo Ziazia Kekeapai zanga boro duho nga guni ka rengbe ka undo yo te. Ti kura regbo, ‘ko aʹuru gayo berã, i ki rugutiyo na rogo Ziazia Kekeapai.’ (Ruka 24:45) Yesu aima rugatiko na gupai nga, tipa aboro rugutiyó na gu yugopai nga ga Ziazia Kekeapai, si naida undo tipa i girogoyo.

Da Rengbe ka Fu gu Undo Re?

Yesu afu gi sunge re fu ndikidi apefuoko. Mbata fu ko dakpa ku ngbangbaturũ yo, ko azinahe ki yaa: “Oni ndú tie, ki sa arikaaboro dunduko ni abawiriki, . . . ki nirugu yo a i niká kuti agu apai dunduko mi arugu roni kuti ni.” (Matayo 28:19, 20) Ga aKristano bambata sunge nga yugopai, na si nakoda sakarogo wai rengbe ani ka manga gu bangua arugute nga ga Ziazia Kekeapai rogo gaani raka. Ndikidi aKristano naundo aboro i girogo Ziazia Kekeapai yo.

Ngbutuko fuo Yesu fu gu sunge re fu apefuoko, bawenepai amangi. Ziazia Kekeapai nagumbapa banyaki niboro Etiopia nga guko naageda gu sangbanebi du rogo Yesaya. Ono ko akurubara gu ba ko aagianga rogoyo ya. Ringbisihe kuti Ziazia Kekeapai, agu averesi ko aagianga rogoyo re ya nayaa: “I aye na ko wa kandoro sa imo ru; wa wiri kandoro nakpara nga barangba gu boro nakpe mangeru ya, wo ko aza nga ngbako a ya. Rago payasi pa ko i aida nga pa ruru sarangbanga fu ko te. Da ka yugu ngbatungako? Bambiko i adi ungako ti kpotosende.”—Amokedi 8:32, 33; Yesaya 53:7, 8.

Gu banyaki re asana Firipo nangia gu Kristano nadu na inohe rogo Ziazia Kekeapai. Ko ayaa: “Mo gúmba ha fere, nebi nagumba gere tipa da? Watadu ko na kura boro, da du?” (Amokedi 8:34) Gu boro Etiopia re andu ku Yerusarema yo tipa ka irisombori yo, sidu, si nawira ko aima kpara fu Mbori tipa ko undoko ko girogoyo. Si ziazia tie nga, ko aduna nyemu gupai tiko ko aagedaha. Wa si avura duwo, gu banyaki re arengbanga ka giarogo agu apai yo ko agedaha te. Ko asana Firipo niumbasitise tipa ko undoko. Ho Firipo asaki rogo agu apai re ni fuko, si afu ngbarago fuko na si ki fõngbadukoyo ko ki da ni Kristano.—Amokedi 8:35-39.

ADezire Yekova areme a nandu kumbatayo na kina gu bangisa sunge Firipo na agu aKristano nadumbata anaamangaha. Rogo aringara susi 230, aDezire naafu tiyó tipa ka undo aboro i girogo gupai yo Ziazia Kekeapai ayugoho nzunzu. I namangaha wo niwisigo yó Ziazia Kekeapai na aboro. Gi wisigo Ziazia Kekeapai nandu kina kumbatayo re nakoda sakarogo agu apai yo si agumbaha tipa kura apai.a—Oni bi gu sanduki du riihe nga, “Wene Akaragapai Kuti agu Asanahe Nga ga Ziazia Kekeapai.”

“Mi Agbia Akaragapai Kuti Gimi Asanahe Dunduko”

Agu aboro nga Steven, Valvanera, na Jo-Anne, ani adi afugoyo ki gumbaha rogo bambata kekepai, i atona wisigo Ziazia Kekeapai na aDezire Yekova. Steven ayaa: ‘Kina ngbare nazere ka bi gupai nga, pa ringbisa mi gu bangua arugute nga ga Ziazia Kekeapai na akuraha watadu agu apangbanga du rogo Ziazia Kekeapai asa gupai nga mi gbia akaragapai sa gimi asanahe. Mbata fu mi tona wisigo Ziazia Kekeapai, anga boro ho nayugu wai fere rengbe mi ka mangaha te. Kina omere naye kutire ka ino gupai nga Ziazia Kekeapai agumbanga kungboapai ka katanga mange tu aboro yo ya te.”

Valvanera ayaa: ‘Agu apai dũ mi awirikihe, si aatagbaganga tihe te. Si dunduko nangia kina arengo angianga mbiko ‘gu Kanisa nga ga aDezire Yekova’ nayugoho wo ya, ono mbiko agu asakarogopaiyo re aruaru.’ Jo-Anne ayaa: “Mi aduna bakere irisa fu gu boro nga Baira Ziazia Kekeapai wa mi agbia akaragapai dunduko kuti gimi asanahe rogo Ziazia Kekeapai, mbiko ko aima duna inohe kumbatayo ki ima fuka akaragapai kuti gimi asanahe.”

Ya mo oni ini boro sa dagba aDezire Yekova? Oni sana ní tipa ní yugu wai furoni ani naawisigo Ziazia Kekeapai na aboro. Ka si du nga oni ainongo boro dagbayó te, oni ke waraga tie fuyó ti adresi sa dagba agu du ti kpewaraga 4 rogo gi magazini re. Ka oni gbia ga Mbori ziazia toro, kidu na berãroni nizakizakihe, na ki gbia gu boro nika yugo Ziazia Kekeapai furoni, si kpakaranga furoni te, oni girogoho yo agia.

[Gu rukutu kekeapai du bandu kpewaraga yo]

[Gu kpiahe du ti kpewaraga 8]

Wene Akaragapai Kuti agu Asanahe Nga ga Ziazia Kekeapai

Bete agu apai aDezire Yekova naayugoho rogo Ziazia Kekeapai gere:

• Gine nga ga Mbori ringbisapai tipa kpotosende?

• Wari du kpikpi aboro ni?

• Ya mo ani naraka rogo “kusa rago” watadu yangara arame?

• Tipagine Mbori ambu aboro ti ni i niirungo?

• Wai rengbe mi ka sa gimi ramukporo si du na ngbarago?

[Gu kpiahe du ti kpewaraga 7]

Tipa oni rengbe ka giarogo Ziazia Kekeapai yo, oni kpari fu Mbori tipa gako toro, fuo gure, oni ki tona geda Ziazia Kekeapai na berã roni nizakizakihe, na ki idihe kura aboro undo roni