Mo Gbia Bakere Undo ti Gamo Geda Baibiri

1. Ginipai nayugo gupai nga Ziazia Kekeapai adu na nyanyakipaha fu Yesu?

ONI berẽnga pa wai si adu ka degatue kuti ga Yesu yugopai. Ko anadia apai dedede rogo Ziazia Kekeapai yo na kini mangi gipai re ngbariko! Ni rengo, gu bambata afugo Yesu ko apehe tifuo zioko bapatiza na gu yangara afugoko ko apehe tifuo kpioko, ko adi apai rogo Ziazia Kekeapai yo.b (Pa Rug. 8:3; Tam. 31:5; Rk. 4:4; 23:46) Na bangbanda agu apai ue re ti regbo agu agarã biata na beberehe Yesu adihe ku auru kpotosende, ko anaageda Ziazia Kekeapai fu aboro gbaiga, kini di apai rogoho, na kini sakirogoyo.—Mt. 5:17, 18, 21, 22, 27, 28; Rk. 4:16-20.

2. Ginipai naundo Yesu ko ini Ziazia Kekeapai wenengai ho ko aasona ni? (Oni bi gu sura duti kpotoho.)

² Dungu agarã mbata fu Yesu tona gako sunge tungusapai, ko aima geda Fugo Mbori na ki gihe bara dunguhe. Zanga kapa, kporo yo, ko aima gia aMaria na Yosefa i ni di apai rogo Ziazia Kekeapai yo rogo gu gayo fugoyo i anaapehe dagbatiyo wa aborokporo na aˈuru dunduko.c (Pa Rug. 6:6, 7) Ani ima rengba kadu na gu kido nga, Yesu anaandu na aRago Sabiti dunduko ku bambutiria yo na gako aborokporo. (Rk. 4:16) Ho ko anidu ni yo, ko anaadegatuko wenengai ho i anaageda Ziazia Kekeapai ni. Tifuo bete aregbo kusa, Yesu awiriki wai ka geda Ziazia Kekeapai nitiko. Ni sangbanaha, Yesu aainongo kina ini ini Ziazia Kekeapai wenengai sa te, ono ko aima kpinyemuhe a na ki mbuhe si du na maapai kurii gako mangaapai. Ni kpiapai, oni tingidi nga pa gupai namangi yekaru yo ho garã Yesu adu ni gbua nga 12. Kina ngba agu abayugupai nga aguyo naima ino ga Moize aNdiko wenengai nazere be ‘ga Yesu rugatinapai si ki iriwo ti agu yo dunduko nagi pa ko na gako karagapai.’—Rk. 2:46, 47, 52.

3. Gini apai ani nika sakapai tipaha rogo gi kekeapai re?

³ Ani ima rengba a ka ino Fugo Mbori na kini kpinyemuhe wa ani nikaa geda Ziazia Kekeapai dedede. Ono waigu tie rengbe ani ka gbia bakere undo ti gupai ani agedaha? Ani ima rengbe ka wirikapai ti agu apai Yesu apehe tipa agu aboro naini aNdiko, kodihe na abakeapai, aFarusi, na aSadoke. Agu abarumbatayo rogo pambori re anaageda Ziazia Kekeapai dedede, ono i anaagbia nga undo ti agu apai i anaagedaha te. Yesu afura tipa apai biata si aaida agu akumba re mangihe tipa ka gbia bakere undo ti gayo geda Ziazia Kekeapai. Agu afugo ko apehe fuyo nika undo rani ani mbakadi gaani abirĩ (1) tipa ka giarogo gupai yo ani agedaha, (2) ka gbia gu nyanyakipa ahe nga ga toro na (3) ka mbu Fugo Mbori si du na maapai kurirani.

ONI GEDIPAI TIPA KA GIAROGOYO

4. Ginipai Ruka 10:25-29 ayugoho furani nibipa geda Fugo Mbori?

⁴ Ani nakpinyemu ka giarogo gupai yo ani agedaha rogo Fugo Mbori yo. Ka si aadunga wo ya, ani gbianga bakere undo ti gupai ani agedaha te. Ni kpiapai, oni bingo gu fugodagbase naadu dagba Yesu na “bainiparugute.” (Oni gedi Ruka 10:25-29.) Ho gu kumba nangia bainiparugute re asanahe ni tipa gupai si aida ko mangihe tipa ka gbia nyenye unga, Yesu aundo ko ko gbia karagapai rogo Fugo Mbori yo. Yesu asana ko nga: ‘I ake gini pai rogo rugute? Mo nageda ha wãi?’ Gu kumba re aima du na rengba ka fu gu karagapai naadu ni ruruhe ni dia ko pai rogo Ziazia Kekeapai yo tipa kpinyemu Mbori na kpinyemu akuarani. (Pa Mot. 19:18; Pa Rug. 6:5) Ono mo bingo gupai ko apehe fuo gure: “Da nga kuare?” Gu kumba re ayugu gupai nga, ko aagianga tiko na rogo gupai yo ko agedihe te. Ni sangbanaha, ko aainongo wai ka mangapai kuti agu apai du rogo agu averesi yo re ngba ruru gene rogo gako raka yo te.

5. Waigu rengbe kparakpee na gedapai zezeredi ka undo rani ani girogo gupai yo ni bakerehe ani agedaha?

⁵ Ani rengbe ka giatirani na rogo Fugo Mbori yo wenengai ka ani sonosi wene gene gedapai. Bete aberãpai gere nga gu rengbe ka undo ro. Mo mangi kparakpee mbata fu mo tona gedapai. Ani naida na gu undo nga ga Yekova tipa ka giarogo Ziazia Kekeapai yo, sidu, si naida ani nasako tipa gako ziazia toro si undo rani wa ka ani moiberãrani kuti gupai ani agedaha. Na mo gedipai zezeredi. Gipai re nika undo ro mo rugutiro na rogo gupai yo mo agedaha. Mo ima rengba ka bihe ni pa undo kaa gedaha na fugoro kuari watadu kaa pekafuo dede-fugo Ziazia Kekeapai ka si du nga si ho rogo gaoni fugo. Ka mo aadegaturo kuti dede-afugoho na kini bi kekehe ti waraga, gipai re ima rengba ka undo ro mo girogo gupai yo mo agedaha, kini tingidihe, na kini wirikipai ni bakerehe ti gupai mo agedaha rogo Fugo Mbori yo. (Yos. 1:8) Ho mo nanyasi gedapai ni, mo mangi kparakpee berewe fu Yekova ka tambuako tipa gu gamahe nga ga Fugoko, na ka sanako tipa ko undo ro mo mangipai kuti gupai mo nagedihe.

6. Waigu rengbe mo ka gbia undo ho mo asana tiro ni na asanahe na kini keke wiri apai sande ho mo agedapai ni? (Oni bi sura a.)

⁶ Aberãpai gere ue rengbe ka undo ro mo gi rogo Baibiri yo wenengai. Mo sana tiro na asanahe nibipa gupai mo agedaha. Wa mo nikaa gedapai rogo Baibiri yo, mo ngere tipa akaragapai kuti agi asanahe re: ‘Ada i afura ane gbe tipa yo? Da du na fura? Ni nafura fu da, na tipagine? Wari na ti gini regbo gipai re amanga ti ni?’ Ngbatunga agi asanahe re nika undo ro mo berẽkurii gupai mo agedaha. Na berewe, wa mo nikaa gedapai, mo naake wiri apai sande. Ho mo nake gupai ni sande mo nagedihe, mo nika berãkuriihe ni bakerehe na si nika undo ro mo girogo gupai yo mo agedaha ni bakerehe. Keka wiri apai sande nika undo ro a mo tingidi gupai mo nagedihe. Mo rengbe ka ke gamo asanahe sande na ki ke agu apai mo nagbiaha rogo gamo wetekapai, mo kepai tipa wai mo narengbe ka mangasunge na gupai mo nagedihe, watadu mo ke gamo bipai tipa gupai mo nagedihe. Keka ngbatunga apai wa gure sande nika undo ro mo naabi Fugo Mbori nga si nga gako gamahe foro nitiro.

7. Gini sino si aidaha ho ani agedapai ni, na tipagine? (Matayo 24:15)

⁷ Yesu apepa gu nyanyakipa sino si aidaha ka ani aaida ka giarogo gupai yo ani agedaha rogo Fugo Mbori yo—gu sino re nga rugatinapai. (Oni gedi Matayo 24:15.) Ginihe nga rugatinapai? Si nga gu tandu nga ga rugatise na gu ngbanya du dagba kurapai na gu kuraha na ka rugatise na wai gu kurapai na kpara ti gu kuraha na ka rugatise na gupai i apenga ha gbaiga ya. Yesu ayugu gupai a nga, ani naida aida na rugatinapai tipa ka ino pa agu apai nga gu nadigiso agu asangbanebi nga ga Baibiri. Ani naida aida a na gi sino re tipa wa ka ani gbia bakere undo ti agu apai ani agedaha rogo Baibiri yo.

8. Waigu rengbe ani kaa gedapai na rugatinapai?

⁸ Yekova nafu rugatinapai fu gako amoyambu. Sidu, mo mangi kparakpee fuko, na ki sanako ko undo ro mo sonosi gi sino re. (Snz. 2:6) Waigu rengbe mo ka mangapai ringbisihe kuti gamo kparakpee? Mo wisigi gupai sirisiri mo agedaha na ki bi wai duhe na ngbanya dagbaha na gu kuraapai mo nainihe. Mo mangisunge na agu awaraga du mburuhe rii Baibiri tipa si undo ro mo mangi gipai re, ni kpiapai, mo ima rengba ka mangasunge na gu waraga nga Research Guide for Jehovah’s Witnesses. Agi aũsunge re nika undo ro mo rugutiro na rogo agu apai yo du rogo Baibiri yo na ki bi agu agene rengbe mo ka manga agu apai re ngbaha rogo gamo raka yo. (Eb. 5:14) Ka mo aagedapai na rugatinapai, gamo giarogo Ziazia Kekeapai yo nika kio gbe.

MO NAAGEDAPAI TIPA KA GBIA GU NYANYAKIPA AHE NGA GA TORO

9. Gini nyanyakipa rengo nga ga Ziazia Kekeapai aSadoke aamaanga berã yo kuti ni ya?

⁹ ASadoke aima ino gu bambata abuku du bisue nga ga Kuru Ndiko wenengai, ono i aaidanga kuti gu nyanyakipa arengo nga gu naadu rogo gu ziazia abuku re te. Ni kpiapai, oni bingo wai Yesu akaragapai ho aSadoke asanako ni tipa zingabekpio. Ko asana yo nga: ‘Oni ageda nga ha rogo ga Mose kitabu yo dagba agu apai nga ga zigidiri ngua, wa Mbori agumba ha fu ko, ki ya, ‘Mi nga ga Abarayama Mbori, nga ga Yisaka Mbori, nga ga Yakoba Mbori te’?’ (Mk. 12:18, 26) Wa vura duhe nga aSadoke aima geda gu pangbanga re bara dunguhe, ga Yesu sanahe ayugu gupai nga i aamaanga berãyo sa gu nyanyakipa rengo nga ga Ziazia Kekeapai du nga—gu yugopai nga ga zingabekpio te.—Mk. 12:27; Rk. 20:38.d

10. Ginipai si aida ani moiberãrani kuti ni ho ani agedapai ni?

¹⁰ Ginipai rengbe ani ka wirikaha? Ho ani agedapai ni, si naida ani moiberãrani kuti agu apai dunduko rengbe veresi watadu pangbanga nga ga Baibiri ka yugoho furani. Ani aidanga ka gia kina rogo agu apai yo gbua du taata te, ono ani naida aida a ka giarogo gu kura nyanyakipa arengo na abangua arengo nga ga Ziazia Kekeapai. Si wakina õkoõko ũkumuko mbiko si taata ka gbiaha te.

11. Ringbisihe kuti 2 Timoteo 3:16, 17, waigu rengbe mo ka gbia gu nyanyakipa ahe nga ga toro rogo Baibiri yo?

¹¹ Waigu rengbe mo ka gbia gu nyanyakipa ahe nga ga toro ho mo ageda Baibiri ni? Ani bingo gupai 2 Timoteo 3:16, 17 apehe. (Oni gedihe.) Gi veresi re nape gupai nga, ‘Ziazia Kekeapai dunduko si . . . rengbe tipa’ (1) yugopai, (2) tipa zapai, (3) tipa ruga aboro, na (4) tipa raba aboro. Mo ima rengba ka gbia agu aundo du biama re zavura rogo agu abuku nga ga Baibiri nga gu mo naamanganga sunge na ni dedede ya. Mo wisigi gu pangbanga re tipa ka bi gupai si ayugoho foro tipa Yekova, tipa gako ringbisapai, watadu tipa agu abangua rengo nga ga Mbori. Mo bi wai duhe ni pa undo tipa zapai. Mo mangi agi apai re ni ino mo wai rengbe agi averesi re ka undo ro mo ini iraira nyemuapai watadu asino na ki nehe na mo nye niruru ro fu Yekova. Mo mangisunge na gu kekeapai re tipa ka ruga iraira bipai, isoke, gu mo nagbia tiro na ni gene tungusapai yo. Na ai gu rabahe watadu gu rugute gu veresi re afuhe, ima rengba ka undo ro mo naabi apai wa gu Yekova abihe. Ka mo moi pa agi aundo du biama re ku berãro yo, mo nika gbia gu nyanyakipa ahe nga ga toro nga gu nika undo ro mo gbia bakere undo ti gupai mo agedaha rogo Baibiri yo.

GAMO GEDAPAI DU NA MAAPAI KURIRO

12. Tipagine Yesu asana aFarusi ti ni na gu sanahe nga ‘Oni ageda ngaha te?’

¹² Yesu asana gu sanahe a nga, ‘Oni ageda ngaha te?’ tipa ka yugo gupai nga, aFarusi adu na iraira bipai tipa gupai i aagedaha rogo Ziazia Kekeapai yo. (Mt. 12:1-7)e Ti gu regbo re, aFarusi agumba gupai nga, ga Yesu abawiriki ima kuo gu ndiko nga ga Rago Sabiti. Yesu akaragapai fuyo nipe ko pa akpiapai ue rogo Ziazia Kekeapai yo na ki di pai rogo gu veresi du rogo Osea tipa ka yugo gupai nga, aFarusi aaruganga tiyo na ndu gupai i amoi gu ndiko ti ni du tipa Rago Sabiti te na i aayugonga inapai te. Tipagine agu apai agu akumba re aagedaha rogo Fugo Mbori yo aadunga ti ni na maapai kuriyo ya? Bambiko i aagedaha kidu na gbegberẽ bipai gbiati gu toro nga ga rũko. Gayo rũko asa yo ka i rugunga tiyo na gupai i aagedaha ya.—Mt. 23:23; Yo. 5:39, 40.

13. Gini bipai si aida ani du na ni ho ani ageda Baibiri ni, na tipagine?

¹³ Ani nawirika gupai ti afugo Yesu nga, si naida ani naageda Baibiri na ruru bipai. Si aidanga ani du wa aFarusi te, si naida ani du na wene bipai na kidu na nyemu ka wirikapai. Si naida ani ‘di gu pai ku gume zezeredi nga gu Mbori narũ ngbadurani yo.’ (Yak. 1:21) Ka si du nga ani na umbasitise, ani nika mbu Fugo Mbori si aria gu ngbatunga aboro nga ani. Ka ani ne du na iraira bipai watadu gu toro nga ga rũko, si nika undo rani ani mbu agu ayugopai nga ga Baibiri nga gu du tipa nunga, inapai, gbiati nyemuse tipa si du na maapai kurirani.

14. Waigu rengbe ani ka ino gupai nga, ani nambu Baibiri si du na maapai kurirani? (Oni bi asura a.)

¹⁴ Gu gene ani amangapai na akuarani ngbaha ima rengba ka yugoho singia ani nambu Fugo Mbori si du na maapai kurirani. Bambiko gupai nga aFarusi aambunga Fugo Mbori si du na maapai kuriyo te, i ‘akita ngbanga agu yo gayo pai adu ni ruruhe.’ (Mt. 12:7) Wakina gure a, wai ani abi kura aboro na kini mangi pai na yo nayugoho ayugo singia ani mbu Fugo Mbori si du na maapai kurirani. Ni kpiapai, ya mo ani ninaape pa gu weneapai dedede ani abihe rogo kura aboro yo, watadu gupai ani ninaamanga ha dedede nga kaa yugo kina gayo aingahe? Ya mo ani na inapai na kidu regerege tipa ka mbupai watadu ani nabisirapa kura aboro na kini nye na zinga kuti yo ho i naba gberãrago ni tirani? Gaani akaragapai kuti agu asanahe re ima rengba ka yugoho singia ani nambu agu apai ani agedaha si du na maapai kuri gaani aberã, abipai, gbiati mangaapai.—1 Tim. 4:12, 15; Eb. 4:12.

GEDA FUGO MBORI NAYE NA NGBARAGO

15. Ga Yesu bipai angia gine tipa Ziazia Kekeapai?

¹⁵ Yesu aima kpinyemu Ziazia Kekeapai, na agu afugo du rogo Atambuahe 40:8 aima pepa gu bipai Yesu nika du na ni. Si naya: “Ako gi Mbori rago ngba ti re ka amanga gu pai ngba angba ti ro; ii, ga rugute du kpotore yo.” Mbiko gupai nga Yesu aima kpinyemu Ziazia Kekeapai, ko adu na ngbarago gbiati diabese tingba iriso Yekova. Ani ima rengba a kadu na ngbarago gbiati diabese ka ani aageda Fugo Mbori na kini wiriki wai ka kpinyemuhe.—Tam. 1:1-3.

16. Gini apai si aida mo mangihe tipa ka gbia bakere undo ti geda Fugo Mbori? (Oni bi gu sanduki nga, “Afugo Yesu Ima Rengba ka Undo Ro Mo Girogo Gupai yo Mo Agedaha.”)

¹⁶ Ringbisihe kuti afugo Yesu gbiati gako kpiapai, si naida ani mbakadi gaani abirĩ geda Ziazia Kekeapai. Ani rengbe ka kiiso gaani giarogopai yo nga ga Ziazia Kekeapai ni manga ani kparakpee, kini gedipai zezeredi, kini sana asanahe, na kini keke wiri rukutu apai sande. Ani ima rengba ka mangasunge na rugatinapai niwisigo ani agu apai sirisiri ani agedaha, na agu awaraga du mburuhe rii Ziazia Kekeapai ima rengba ka undo rani. Ani ima rengba ka wirika wai ka mangasunge ni bakerehe na Ziazia Kekeapai zavura gu kekeapai ani ainidonga tirani na ni ya, ni ngera ani tipa gu nyanyakipa ahe nga ga toro nga gu du rogo gu ngbatunga apangbanga yo ani agedaha. Na ani ima rengba ka mbu Fugo Mbori si du na maapai kurirani ni asada ani ka banda ruru bipai tipa gupai ani agedaha. Ka ani mangi bakere asadatise tipa ka manga agi apai re, ani nika gbia bakere undo ti gaani geda Baibiri na ani ki mbedi gbe na Yekova.—Tam. 119:17, 18; Yak. 4:8.