Oni Tungusi Wene Pangbanga Zanga Gunde

“Ani adu zukazuka . . . ka gumba ga Mbori wene pangbanga fu roni.”—1 Tesa. 2:2.

1. Tipagine ngbaa gu wene pangbanga du tipa ga Mbori Kindo ti ni kisusi kura apangbanga dũ?

NANGBAA gia wene pangbanga! Na gu pangbanga ngbaa kisusi nga gu wene pangbanga du tipa ga Mbori Kindo. Gi wene pangbanga re nagumbapa digo arungo furani na akaza, na ima, na kpio. Si nafu maabangirise tipa nyenye unga, kini kusi ga Mbori ringbisapai kuyangura, na kini yugu wai furani rengbe ani kadu na wene pagume na Mbori. Oni rengbe ka berãha nga aboro dunduko duna ngbarago ka gia gi wene pangbanga Yesu azinahe furani ani tungusihe fu aboro re. Ono anga wo duhe te.

2. Oni sakingo rogo gu fugo yo Yesu agumbaha ki yaa: “Mi aye ka maa kangu.”

² Yesu aya fu gako abawiriki wee: “Ka oni bérẽ nga ha ya mi aye ka maa zereda zegino ya; mi aye nga ka maa zereda te, ono kina baso! Bambiko mi aye ka maa kangu dagba ba gude na wirini, na dagba degude na nani, na dagba de na nakumbari; avura boro angia kina gani aborokporo.” (Mt. 10:34-36) Kuba gupai nga aboro naadia wene pangbanga kugume, badunguyo nakáha aká. Gu kura aboro nasa tiyó ni avura agu aboro natungusa gu pangbanga re, zavura aguyo nga kina gayó aborokporo a.

3. Gini apai si aida ani du nani tingba sunge tungusa wene pangbanga?

³ Ani natungusa kina gu bangisa wene pangbanga Yesu anaatungusaha, na aboro namangapai sani kina ngba gu gene aboro anaamangapai sani ti rago Yesu. Yesu aya fu gako abawiriki wee: “Moyambu nakia nga susi bairani te. Si ngia i arungosi re . . . , i arúngosi roni arungosi a.” (Yo. 15:20) Rogo kura aringara, i arungosingo rani arungosi te, ono ani nagbia agu aboro adunga na nyemu wene pangbanga ya. Nibi agi apai re, si naida ani du na idapase gbiati wingbaduse tipa kaa hipai tingba sunge tungusa wene pangbanga.—Oni gedi 2 Petero 1:5-8.

4. Tipagine si aidi ti ni Pauro naatungusapai zanga gunde?

⁴ Isoke kura aregbo kinaho si nidu furoni nimbumbupai ka ndu tipa tungusapai, watadu kura angbatunga gene tungusapai kinaho oni agunde agunde ka mangaha. Kangia wo duhe, oni ini gupai nga, anga kina roni sa duhe tipa roni wo te. Gu mokedi nangia Pauro angia gu batungusipai nanaagundenga ya, na ko angia gu boro naima giarogo rengo yo wenengai gbe, ono tie, kura aregbo kinaho ko anaasota asota ka tungusapai. Pauro akepai fu agu aKristano nadu Tesaronike yo ki yaa: “Ani adu zukazuka rogo gaani Mbori yo ka gumba ga Mbori wene pangbanga fu roni rogo bakere kenapai, ani nahi pai mbata, i namangi rani ni wasiro Firipoi yo, wa ini oni he [a].” (1 Tesa. 2:2) I ataki aPauro na Sira ni angbangbaki, ki bafu yó ku bambukiso yo, ki kisi nduyo nyanyakii ni angboro. (Amo. 16:16-24) Wa i avura manga aPauro na Sira were, i aatungusapai kindi zanga gunde. Wai rengbe ani ka manga wa yó? Tipa ka ino karagapai sa gu sanahe re, ani bingo agu apai naundo gu ga Mbori aboro nadu ti agu aregbo i aakeka Ziazia Kekeapai i naagumbapa Yekova zanga gunde, na ani wirikinga wai rengbe ani ka manga wa yó.

Si Aidi AKristano Duna Wingbaduse

5. Tipagine si naaida ga Yekova aboro dunduko du ti ni na wingbaduse?

⁵ Gu boro nadu na wingbaduse gbe angia Yesu Kristo. Ono tie, tona ho rago aenge ni, ga Yekova aboro dunduko si aidi i du na wingbaduse. Tipagine? Si aduwo mbiko gupai nga, fuo Adamu samungu, Yekova ayawee sogote nikadu dagba airisiko na aguyo nairiso Satana. (Bam. P. 3:15) Gu sogote re adu ziazia ho Kaina aimi wirinako ni nangia ruru boro. Kusa, gu sogote re andu a ki da ti gu ruru kumba nangia Enoka, gbiati gu kura ruru aboro naraki mbata fu Ime Akangbii. Enoka agumbapai nisangbanebi tipa Mbori ki yawee Ko nika keda gako amaraika i ye ka sapangbanga gbegberẽ aboro. (Yuda 14, 15) Badungu aboro aaidanga na gu pangbanga re te. Aboro aasoga Enoka asoga tipa gu pangbanga re na i kini idi ka imoko, si du Yekova adiko ti ni beyo. Nangbaa wai Enoka aatungusapai zanga gunde!—Bam. P. 5:21-24.

6. Tipagine si aidi ti ni Moize duna wingbaduse tipa ka fura fu Faro?

⁶ Oni berãnga pa gu wingbaduse a Moize adu nani wa ko afura fu Faro, nga gu ko aboro anaabiko nimbori, niwiri gu mbori nga ga Ezipeta ko rimoko angia Ra. Si rengbe kadu nga ko anaairisa kina kpiako nitiko, a wa gu kura aFaro anaamangaha. Gupai nanaakura ngba Faro yo angia kina ndiko. Ko angia ira-ome, irarukö, na iranyakarii. Ko anaaidanga aboro fu arugute fuko te. Gi kere boro re du gu bangerefuo anyaa nangia Moize adogodi kubarabangiri ní, zanga i yambuko ayamba, na zanga ko diko kugume. Ginipai Moize agumbapaha fu Faro? Ko agumba paye bakere agberangbii kurii Ezipeta. Ko asana Faro ko idihe fuko ko kusi badungu amirioni ga Faro akanga kusayo rogo ringara. Ya mo Moize aadunga na wingbaduse tee? Ko aima du nani nirengo!—Geda 12:3; Eb. 11:27.

7, 8. (a) Gini aʹasada gu ruru amoyambu nadumbata agbia tiyó nani? (b) Ginipai naundo gu ga Mbori amoyambu nadumbata fu regbo aKristano i duna wingbaduse ka songoda ndikidi irisombori?

⁷ Agu anebi gbiati kura ga Yekova amoyambu naye tingbafuo Moize, i aru ngangaraa tipa ndikidi irisombori. Ga Satana zegino aamanga yó gbegberẽe. Pauro akepai tipa yó ki yaa: “I asopo yo na ambia, i ayepe rogo yo, i aasadi yo, i aimi yo na basape. I anata na kpoto akandoro, na kpoto ameme. I ki du ni payapaya yo, ni rungorungo yo, i ki nimangi yo gbegberẽ.” (Eb. 11:37) Gine naundo gi ga Mbori amoyambu re i ru nyanyakii? Mbata fu Pauro gumbapa gu kereapai i amangi ga Mbori amoyambu nani, ko apepa gupai naundo Ebere, Abarayama, Sara, na gu kura aboro i ruru nyanyakii. Ko ayaa: ‘I aadianga akidohe te, ono i abihe kumbatayo ki idipaha.’ (Eb. 11:13, NW) Zanga kapa, gupai naundo ngbatunga agu anebi naduwa Eriya, Yeremaya, na gu kura ga Mbori amoyambu i ru nyanyakii tipa ndikidi irisombori angia ga Yekova akidohe.—Tito 1:2.

⁸ Gu ruru amoyambu nadumbata fu rago aKristano re, i aangera tipa gu bawene raka nadu fuyó kumbatayo. Ho i ka zingisayo ni, i nikadu nirengberengbeyo na ‘ki bati be du nikanga fu zirã.’ Yesu gbiati agu aboromotumo du tiibeko du bangeyo nga 144,000, i nika manga gipai re. (Rom. 8:21) Kurigure, Yeremaya gbiati gu kura ga Mbori ruru amoyambu nadu bakuru kusayo adu ngangaraa mbiko Yekova akido yó ki yaa: “I asó vura kuti ro; ono i adía nga be ro te, bambiko mi du na mo, ka batasa ro.” (Yere. 1:19) Areme a, pa berã ani kurii ga Yekova akidohe nga gu du kumbatayo furani, si nabanda rani rogo toro yo na kini nyakasi rani.—Snz. 2:7; oni gedi 2 AKorindo 4:17, 18.

Nyemuse Nasa Yesu Ko Duna Wingbaduse

9, 10. Ngba gini agene Yesu ayugu gako wingbaduse barangba (a) abarumbatayo rogo pambori, (b) abanzengere, (d) gbiamotumo (e) Pirato?

⁹ Yesu, nga bamoi kpiapai furani, ko aduna wingbaduse rogo dungu agene. Nikpiapai, wa si avura du nga agu aboro nadu na ome tiyó aasoga Yesu asoga, ko aambunga gumba ga Mbori pai fu aboro te. Zanga gunde, ko afura tipa gu gbegberẽ asino nadu ti abangbembatayo rogo pambori wa i anaabi tiyo ya ruru aboro nangia yó, na tipa gayó zire yugopai a. Yesu agbarasi ngbanga fuyó, kini gumbaha fuyó gbaiga na ziazia. Ti kura regbo sa, ko ayaa: “Na gberẽ he fu roni, abakeapai na aFarusi, nga airabiriki! bambiko oni du wa vurusivurusi ambia murã du ni wene he ti kpotoho bangirise, ono vuru he yo hi be memekangba aboro, na zirĩ ahe dunduko. Oni kina wo a ki wiri ruru roni bangiri aboro, ono kpotoroni yo hi be biriki na ingapai.”—Mt. 23:27, 28.

¹⁰ Ho abanzengere ayeni ka zio Yesu rogo gu ati nangia Getesemane, ko ayugu tiko fuyó zanga gunde. (Yo. 18:3-8) Kusa, i andu naako ku barangba ga aYuda agbia-ngbanga tipa gbiamotumo sasanako. Wa si avura du nga ko aima ino gupai nga gu gbiamotumo re aagbata gu ndupai ka i imiko ti ni, ko ayugu tiko fuyó zanga gunde ya ko angia Kristo na kingia Wiri Mbori. Ko aya berewe wee i abi ko abi “ko sungu pati kumbabe tandu niye rogo mai ngbangbaturũ yo.” (Mk. 14:53, 57-65) Ngbutuko fuo gure, Yesu aru barangba Pirato na abeko nivovooho, nga gu bazogo narengbe arengba ka kusa ko be zio. Ho i aagumba aziree ni kuti Yesu, ko aafuranga te. (Mk. 15:1-5) Agu apai re dũ aaida ko du na wingbaduse.

11. Wai duhe nga wingbaduse naye be nyemuse?

¹¹ Yesu aya fu Pirato wee: “Gi pai i avungu re sa ni re, gi pai mi aye sa ni re ku zegino, nga ka du ni dezire rengo.” (Yo. 18:37) Yekova afu sunge fu Yesu nga ka tungusa wene pangbanga, na Yesu adu na ngbarago ka manga gu sunge re mbiko ko akpinyemu Bako. (Ruka 4:18, 19) Yesu adu a na nyemuse koyo du aboro ni. Ko aima rugatiko na gupai nga gayó raka aadunga niwenehe te. Wakina gure a, gu nyemu Mbori du tirani na nyemu akuarani, si nasa rani ani du na wingbaduse ka manga dezirepai fu aboro.—Mt. 22:36-40.

Ziazia Toro Nafu Ome Furani Ani Du na Wingbaduse

12. Ginipai nafu ngbarago fu gu ga Yesu abawiriki nadumbata?

¹² Rogo agu aposo nasusi tingbafuo kpio Yesu, gako abawiriki adungura tiyó ka ngi mbiko Yekova aye na aboro berewe fuoyo. Oni ngere, rogo bangisa uru gbua rago Pendekote, aYuda bangeyo adu wa 3,000 na gu kura aboro nasa tiyó kurogo gu pambori nga ga aYuda azi bapatiza Yerusarema yo. Agu aboro dũ nadu Yerusarema yo aafura tipa gupai namangi re. Ziazia Kekeapai nayaa: “Gunde ki zi aboro azia dũ; amokedi ki nimangi dungu iiriwo apai na agu apai i aina apai ti ni.”—Amo. 2:41, 43.

13. Tipagine agu awirina nadumbata akpari ti ni tipa wingbaduse, na wai Mbori akaragapai sa gayó kpee?

¹³ Rago agberẽ ti abarumbatayo rogo pambori i ki zi aPetero na Yoane ku bambukiso yo tipa yuru sa, na ki rugu yó ya ka i yugungo pai tipa Yesu berewe ya. Ho i akusi yó ni, i apeke agu apai dũ namangi yó fu awirinayo, i kini kpari fu Yekova tipa ko undoyo be agu aʹasada i agbiatiyo nani. I akpari niyaa: ‘Gbia, mo idihe fu gamo amoyambu i nipeke gamo pai apeka zukazuka’ zanga gunde. Yekova agi gayó kpee ki fu ziazia toro fuyó, “i ki hiki ahika [behe] . . . dunduko, i ki nipeke ga Mbori pai apeka zukazuka.”—Amo. 4:24-31.

14. Wai ziazia toro aundo rani tingba sunge tungusapai?

¹⁴ Oni kparia gupai nga, ga Yekova ziazia toro du naaundo abawiriki i naagumba Fugo Mbori zanga gunde. Yekova naundo rani na gako ziazia toro tipa ani du na wingbaduse ka yugo rengo fu aboro, zavura aguyo nasoga rengo asoga. Ka ani sana Yekova tipa gako ziazia toro, ko fuhe afu furani. Yekova ima rengba ka undo rani tipa ani du na wingbaduse ka hi agu aʹasada dũ ani agbiatirani nani—Oni gedi Atambuahe 138:3.

Agu AKristano Du Areme Natungusapai Zanga Gunde

15. Wai rengo akparaka aboro areme?

¹⁵ Rengo nakparaka aboro ti gi gaani regbo re a wa si aakparaka yó mbata kusayo. Aboro kinaho naida na gaani irisombori na aguyo kinaho aidanga nani ya. Aguyo naabisira parani abisira, kini sawia rani, na kini sogo rani a wa Yesu agumbaha. (Mt. 10:22) Ti kura aregbo, aboro naagbandaka agu apangbanga nga ziree tipa rani rogo aũgbandaka apangbanga. (Tam. 109:1-3) Ono wa agi apai re avura kaa manga, ga Yekova aboro rogo zegino dunduko natungusa wene pangbanga zanga gunde.

16. Ginipai namangi nayugo gupai nga, gaani wingbaduse rengbe arengba ka aria gu bipai nga ga agu aboro ani atungusapai fuyó?

¹⁶ Padu ani na wingbaduse rengbe ka sa aboro i aria gayó bipai tipa gu pangbanga nga ga Kindo. Wirina sa nidee du Kyrgyzstan yo nayaa: “Ho mi aatungusapai ni rogo kura uru sa, mi andu kurogo kporo, baira gu kporo re ki ya fere wee: ‘Mi ima ida kuti Mbori, ono angianga kuti gu Mbori nga ga aKristano ko ya. Ka mi bi nduro abi berewe kpure ane, mi zaki gimi ango azaka fuoro u runduku ro!’ Gako ango adu kina giiko yo na azogbo goru yo. Ono ti regbo gu tua nadu tipa ka kparaka gu waraga Pangbangaa Nga ga Kindo nangia namba 37, nga gu riihe adu nga “Digido Zire Pambori Ima Mbeda Kada!,” mi adi berã ka ndu berewe kua gu kumba yo re tipa wa ka mi gbia gu kura gako borokporo ho. Ono tie, kina gu kumba re nazaki ngbadimo ndugu fere. Mi akpari fu Yekova nikina wiri ipo, fuoho, mi ki ya fu gu kumba re wee: ‘Sene furoni. Mi natingidapa gu fugo atingida ani afuraha na mo nigurogo, na mi natingidapa gamo ango atingida a. Ono mi naaye na kina gi waraga pangbanga re foro, bambiko mi idi kina kuti bangisa ndikidi Mbori wa mo. Mbori ima mbeda ka fu mbusa fu agu apambori afunga irisa fuko ya. Oni aino badungu apai tipa gipai re ka oni gedi gi kpewaraga re.’ Kina ngbare nazere ka bi gu kumba re ko nidi gu waraga re. Fuo gure, mi agbisi kuti kura kporo. Fuo bete aminiti, gu kumba re azubo fuo re na gu kpewaraga re beko. Ko aye ki ya fere wee: ‘Mi ima gedaha. Ginipai si aida mi mangihe tipa ka ga Mbori zinga yengo kurire ya?’” Awirina atona wisigo Ziazia Kekeapai na gu kumba re, na ko ki tona kaa ndu tipa adunguratise.

17. Wai gu wingbaduse nga ga wirina sa anyakasi gari nawiriki Ziazia Kekeapai?

¹⁷ Padu ani na wingbaduse rengbe ka sa akuarani i du a na wingbaduse. Wirina sa Russia yo afu magazini fu dee rogo baasi. Fuo bi kura kumba gipai re, ko agu rii gako basungo, ki tuka gu magazini re be gi wirina re, ki kutukpaha, ki soho ti sende. Gu kumba re asesenge gu wirina re na fugoko kuari gbe, ki ya furi ri fu gari adresi fuko, na ki za ri ka ri tungusinga pai berewe rogo gu rago ko araka rogoho ya. Gu wirina re akpari fu Yekova tipa undo, na ri atingidi gupai Yesu agumbaha ki yaa: “Ka oni gúnde nga be agu yo naimo kpotoboro ya.” (Mt. 10:28) Ri atumba tiri zezeredii, ki ya fu gu kumba re wee, “Ka mi funga gimi adresi foro te, na mi nikaa tungusapai atungusa kindi rogo gi dagbarago re.” Fuoho, ri azoro rogo baasi. Gu kurapai namangi nga, dee gu wirina re aawisigo Ziazia Kekeapai na ri adu rogo kina gu baasi re ka gi wirina re abingo ri ya. Gunde be aboro aima sa gu dee re ri mbu nduge tipa agu adunguratise nga ga aKristano. Fuo gu dee re bi gu wingbaduse nadu ti gi wirina re, ri adiberã tipa ka tona nduge tipa adunguratise berewe.

18. Ginipai rengbe ka undo rani ani tungusipai na wingbaduse a wa Yesu amangihe?

¹⁸ Rogo gi zegino adunga na sinombori re ya, si naida ani du na wingbaduse wa Yesu adu nani tipa ka tungusapai. Agu apai rengbe ka undo rani tipa ani mangihe wo nga, pa berã ani pa agu apai du kumbatayo. Pa nyakasa ani gaani nyemuse tipa Mbori na akuarani. Kparakpee fu Yekova tipa kadu na wingbaduse. Si naida ani naatingida gupai nga ani nisarani te, Yesu na kina rani. (Mt. 28:20) Ziazia toro afu ome afu furani. Na Yekova ki fu maku furani naa kini songodi rani. Sidu, ya mo ani aduna wingbaduse ka yaa: “Gbia nga gimi mounda; mi agúnde nga wa sa te; gini pai boro ka manga re na ni?”—Eb. 13:6.

Gaoni Karagapai Nga Gine?

• Tipagine si aida ti ni ga Mbori amoyambu du na wingbaduse?

• Tipa ani du na wingbaduse ginipai ani awirikaha . . .

be gu ruru aboro naraki mbata fu Yesu?

be Yesu Kristo?

be agu aKristano nadumbata?

be agu aKristano du areme?

[Gu kpiahe du ti kpewaraga 23]

Yesu afura zanga gunde tipa gu gbegberẽ asino nadu ti abarumbatayo rogo pambori

[Gu kpiahe du ti kpewaraga 25]

Yekova nasa rani ani du ngangaraa ka tungusapai