Oni Pekefuo Gu Kpiapai Nga Ga Yesu!

“Kristo . . . [a]he kpia pai fu roni, oni peke fuo ko.”—1 Pet. 2:21.

1. (a) Gini sunge Wiri Mbori amangihe ti regbo kusaahe? (b) Wai Yesu abi awiri aboro?

HO Mbori amangi ngbangbaturũ ni na kpotosende, bambata Wiriko adu kina patiko ‘nibangbasia boro sunge.’ Wiri Mbori amangisunge a sa na Bako ka kusa gu badungu anyaa na angua du auru kpotosende, na ki mbakadi gu ati nangia Paradizo tipa aboro niraki rogoho ko amangiyo nikpiako. Wiri Mbori, nga guko nagbia gu rimo kusa nga Yesu, ko aduna bakere nyemuse tipa aboro. Gumba ani he wo mbiko Ziazia Kekeapai nayawee ‘rago angba tiko mbiko awiri aboro.’—Snz. 8:27-31; Bam. P. 1:26, 27.

2. (a) Gine Yekova amangihe tipa si undo aboro? (b) Oni gumbanga pa pai sa Ziazia Kekeapai afu arugute tipaha?

² Tingbafuo Adamu na diako mangi ingapai, pa batasa aboro be gu ingapai i amangihe re angia nyanyaki papara ga Yekova ringbisapai. Yekova ambakadipai tipa Kristo tumo tipa gu ingapai re. (Rom. 5:8) Kurigure, Yekova afu Fugoko nga Ziazia Kekeapai tipa si naafu arugute tipa wai rengbe aboro kadu na diabese rogo raka i ki vurangia kpakpa aboro vurũ. (Tam. 119:105) Yekova naundo aboro na arugute rogo Fugoko tipa i naaraka wene ramukporo. Nibipa rogatise, Bambata Pai nayawee si naida kumba ‘ka kuti diako, i kidu wa boro sa.’—Bam. P. 2:24.

3. (a) Gini apai Yesu ayuguhe tipa rogatise? (b) Ginipai ani ka wirikaha rogo gi papara kekeapai re?

³ Ho Yesu atona gako sunge ni auru kpotosende, ko anyakasi gupai nga rogatise nga guhe si aida si nyeanye kindi. Ko agumba agu abangua arugute narengbe ka undo arogotise gayó ramukporo nye niwenehe. (Mt. 5:27-37; 7:12) Gi papara kekeapai re nika fura tipa wai rengbe agu apai Yesu ayuguhe na gu kpiapai ko amoihe ka undo akumbakuadee, dereakumba, avunguagude, na agude i gbia ngbarago rogo raka.

Wai Rengbe Akumbakuadee ka Fu Irisa fu Adiayo?

4. Gini awiratise duho dagba ga Yesu sunge na ga agu aKristano nga kumbakuadee?

⁴ Mbori amoi akumbakuadee ni abarii kporo, a wa Yesu adu nibarii kanisa watadu dungurati. Gu mokedi nangia Pauro ayaa: “Bambiko kumbani nga rini, a wa du Kristo ni ri kanisa, du ni tiko ni batasi kanisa nga boroko. Akumba, oni kpí nyemu adiaroni, a wa Kristo akpi nyemu kanisa a, ki fu tiko tipa ha.” (Ef. 5:23, 25) Nirengo, gu gene Yesu anaamangapai ngbaha na apefuoko, si nga kpiapai fu aKristano i naamangapai na adiayo ngbaha. Ani makianga bete agu agene Yesu amangisunge na gu pagbia ngbaha Mbori afuhe fuko.

5. Wai Yesu amangisunge na gako pagbia kurii gako abawiriki?

⁵ Yesu angia “bayee boro” na kingia “irazerangbaduse.” (Mt. 11:29) Ko angia gu boro a nanaazinga azinga ho si aniʹidihe ni wo. Ko anaahenga manga agu asunge si anaaida ko mangihe te. (Mk. 6:34; Yo. 2:14-17)Ko anifu rugute fu gako abawiriki niweneringise ho si aniʹidi ni ko fuhe. (Mt. 20:21-28; Mk. 9:33-37; Ruka 22:24-27) Ko anaabiranga yó watadu kpakana yó tipa gu wiriapai i anaakpa ti mangaha ho ko anaayugopai ni fuyó te. Ono ko anaafura wenengai tipa yó na kini ngarasi yó i naamanga agu apai ngbaangba. (Ruka 10:17-21) Nangbaa wai ga Yesu abawiriki afu irisa fuko, mbiko ko aduna nyemuse koyo du yó ni na kini mangi yó rogo nunga!

6. (a) Ginipai rengbe kumbakudee ka wirikaha be wai Yesu anaamanga gako abawiriki? (b) Gini rugute Petero afuhe fu akumbakuadee?

⁶ Ga Yesu kpiapai nayugopai fu akumbakuadee tipa i naamangasunge na gayó pagbia rogo wene gene yo angianga rogo gbegberẽ gene yo ya. Si naida akumbakuadee naamangasunge na gayó pagbia rogo irisa na nyemuse. Gu mokedi nangia Petero arugu akumbakuadee tipa i naapekafuo ga Yesu kpiapai, ‘nirakporo’ na adiayo rogo nyemuse yo, ‘nifu irisa fuyó.’ (Oni gedi 1 Peter 3:7.) Wai tie rengbe kumbakudee ka mangasunge na gani pagbia, ti kina gu bangisa regbo re, ní kini mangi diani rogo wene gene watadu rogo irisa yo?

7. Ngba gini gene rengbe kumba ka fu irisa fu diako? Oni funga kpiapai tipa gipai re.

⁷ Gene sa dagba agu akuraha rengbe akumbakuadee ka fu irisa fu adiayo ngbaha nga ka berãpa ga adiayo apai mbata fu i mangi gu diaberã nabipa gayó aborokporo. Ani bingo kpiapai sa nga: I mangi diaberã tipa ka ga na kporo kurogo kura ba watadu ka mbu gu sunge-marã i amangaha ki tona kuraha watadu gu diaberã re nabipa agu apai i naamangaha na aʹuru dunduko wa gu du tipa gu ba i aida ka ndu na ongoda kurogoho watadu ka ringbisapa gu marã i kaa ngbeka ahe nani mbiko geno ahe ima dakpa kuari. Wa duhe nga si rengbe arengba ka ye na kpakarapai ku kporo, si adu niwenepai ka kumba sana diako tipa gari bipai mbiko si rengbe ka undoko ko mangi wene diaberã na ki saha furi taata ri songodi ko nani. (Snz. 15:22) Agu akumbakuadee nairisa adiayo, adiayo nakpinyemuyo na kini irisi yó, na Yekova naida naayó.—Ef. 5:28, 29.

Wai Rengbe Diakumba ka Fu Bakere Irisa fu Kumbaari?

8. Tipagine si aidanga ti ni adee pekefuo gu kpiapai nga ga Eva ya?

⁸ Dereakumba nawirika kpiapai be Yesu ka ra kutiibe agu aboro duna pagbia beyo. Nairiwo gu kparakparapai du dagba Yesu na Eva! Eva aamaanga wene kpiapai fu adee i nipefuoho te. Ri adu na gu boro beri Yekova amoi ní niriri, nangia Adamu, na ko Yekova anaafu arugute vurubeko. Ono tie, Eva aarakanga kutiibe gu pagbia nangia ga Adamu te. Ri aadianga gu rugute kugume Adamu afuhe furi te. (Bam. P. 2:16, 17; 3:3; 1 Kor. 11:3) Wa vura duhe nga i anangi Eva ananga, si aidi ri sana kumbaari mbata fu manga ri pai kuti fugo gu boro nabiriki ki ya ní ima ino gupai ‘Mbori nainihe.’ Ono ri abihe nga gari diaberã nangba kisusi gu ka Adamu amangihe, na si ki sa ri ri du kurii Adamu.—Bam. P. 3:5, 6; 1 Tim. 2:14.

9. Gini wene kpiapai Yesu amoihe nibipa ranigose?

⁹ Ono tipa Yesu tigako, ko ayugu bawene kpiapai kisusi nga ga ranigose. Gako sino berã na gako raka ayugu gupai nga, pa “rengba ko na Mbori adu nga bangiriko ni mosoro te.” Ono “ko auka pa tiko ki du wa kina kanga, ki du wa boro.” (Frp. 2:5-7) Wa Yesu azogarago awere ngbangbaturũ yo, ko nara kindi kutiibe bako.—Mt. 20:23; Yo. 5:30; 1 Kor. 15:28.

10. Rogo gini gene rengbe diakumba ka songoda gu pagbia nga ga kumbaari?

¹⁰ Si niwenepai tipa gu dee nga Kristano songodi ga kumbaari pagbia. (Oni gedi 1 Petero 2:21; 3:1, 2.) Ani bingo kpiapai sa tipa gipai re. Gude sana nai tipa ka manga gupai ngbaa tiru. Wa duhe nga avunguni aafuranga mbata riipa ngbatunga gupai re te, nai sana ru ki yaa, “Ya mo mo sana bamo tipa gupai mo aida ka mangaha re?” Ka si du nga gu gude re naasananga bai te, si naida gupai nga nai fura riipa gupai re mbata na bai. Kurigure, si aidanga diakumba ingisi kumbaari rogo fugo yo te, na si aidanga ri bisira gako berãpai kubangiri agude te. Ka si du nga pai gudu ho kumbaari nagumbaha arunga bangiiri ya, si naida ri fura naako riipaha kinaho du yó ni ue.—Ef. 6:4.

Yesu Nga Wene Kpiapai fu Avunguagude

11. Gini kpiapai Yesu amoihe fu avunguagude?

¹¹ Wa vura duhe nga Yesu aadianga dee ki vungu agude te, ko nga bawene kpiapai fu agu aKristano nga avunguagude. Wai duhe wo? Si wo mbiko gupai nga, Yesu anaayugopai fu gako abawiriki ninyemuse na nizerangbaduse rogo fugo yo na rogo mangaapai yo. (Ruka 8:1) Gu gene Yesu anaamanga gako abawiriki ngbaha na wai ko anaabiyo, si ayugu wai fuyó si aida i naamanga akurayó.—Oni gedi Yoane 13:14-17.

12, 13. Ka avunguagude aida awiriyo du ni agu aboro nagunde ti Mbori, ginipai si aida i mangihe?

¹² Agude naapeka kina fuo gu kpiapai gbe nga ga abayo, ka si vura du nigbegberẽhe vurũ. Sidu, si naida avunguagude sananga tiyó ki yaa: ‘Ginipai ani arimisoho ku berã awirani yo ho ani adia bakere regbo ni kuti bi terevizioni na kuti agu apai nafu wasa ki susi gu regbo ani adiaha kuti wisigo Ziazia Kekeapai na kuti tungusapai? Gini apai nzunzu peresi ani paha mbatayo? Ya mo ani moi wene kpiapai fu awirani niperesa ani pa irisombori mbatayo?’ Ka avunguagude aida awiriyo du ni agu aboro nagunde ti Mbori, si naida i du a ni agu aboro nagunde ti Mbori.—Pa Rug. 6:6.

¹³ Ka avunguagude amanga asadatise kaa manga gu bangua arugute nga ga Ziazia Kekeapai rogo gayó raka, si nika sa gupai nga awiriyo gi agu apai i agumbaha na kini yuguhe. Ono ka avunguagude amanganga agu apai i ayugoho fu awiriyo ya, si nika sa gupai nga awiriyo niberẽhe ya nyakingo pa agu abangua rugute nga ga Ziazia Kekeapai te, watadu si nimbumbuhe tipa boro irisihe. Gipai re rengbe ka saha taata fu agude i merefuo gu mangaapai nga ga zegino.

14, 15. Ginipai si aida avunguagude undo awiriyo i mangihe, na gini gene sa rengbeyó ka manga gipai re ngbaha?

¹⁴ Agu avunguagude nga aKristano ini gupai nga, anga gupai sa si aida boro mangihe fu wirini nga kaa ngerafuo ru na aũborose te. Sidu tie, si adunga nipatatamana ka avunguagude undo awiriyo i moi agu asásá rengbe ka undoyo na kina aũborose te. (Batu. 7:12) Yesu arugu gako abawiriki i gbata ga Mbori ngbii na gako rurupai. (Mt. 6:33) Sidu, agu aKristano nga avunguagude nawirika fuo gu kpiapai nga ga Yesu ni asada yó tiyó ka undo awiriyo i moi agu asásá nga ga toro.

¹⁵ Gene sa dagba agu akuraha rengbe avunguagude ka manga gipai re ngbaha nga ka gbatagene tipa awiriyo naasungo dedede na agu aboro namangasunge Kindo ti aregbo dũ. Paranga aboro rengbe ka gbia bakere undo ka i inidi tiyó na abazakigene watadu babi adungurati gbiati diako. Amokedi, aboro Betere, gbiati agu aboro nata kuari na sunge dudua abambu rogo aringara, si naida i naafura zaaza tipa gu ngbarago i agbiaha mbiko manga yó sunge fu Yekova. Agu abamangisunge re na badungu wene apangbanga ngbayo nga gu rengbe ka nyakasa aboro. Gayó kpiapai rengbe ka undo awironi bakere gbe tipa i mangi agu adiaberã duna tatamana, ki moi agu asásá nga ga toro, na ki wirikipai tipa ka gbia sunge kaa undo tiyó kutingba sunge Kindo.

Agudee, Oni Pekefuo ga Yesu Kpiapai

16. Wai Yesu anaairisa bako na nako gbiati gu Bako du ngbangbaturũ yo?

¹⁶ Yesu amoi wene kpiapai furoni nga agude. Mbori afu Yesu fu aYosefa na Maria tipa i naangerafuoko, sidu ko kini gisangbayo. (Oni gedi Ruka 2:51.) Ko aini gupai nga, wa i avurangia kpakpa aboro, i nangia agu aboro Mbori amoiyo i niingerefuoko. Sidu, si aidi Yesu nifu irisa afu fuyó. (Pa Rug. 5:16; Mt. 15:4) Fuo sona Yesu, ko aamanga kina agu apai naafu ngbarago fu Bako du ngbangbaturũ yo. Ko adibe aʹasada a. (Mt. 4:1-10) Oni paranga aboro, kura aregbo kinaho rengbe oni kadu niʹasadiʹasadi roni ka basasangba avunguroni. Ono ginipai rengbe ka undo roni oni pekefuo ga Yesu kpiapai rogo gi bangiriba re?

17, 18. (a) Ginipai paranga aboro naagbiatiyo nani sukuru yo? (b) Gine rengbe ka undo paranga aboro i dibe aʹasada?

¹⁷ Si nawira gupai gbe nga, badungu agu akuaroni du oni naayó sukuru yo, i nga agu aboro airisanga agu abangua rugute nga ga Ziazia Kekeapai ya. I rengbe ka sosoda roni oni rimisi tironi kurogo gu mangaapai aboro akapa akapa kuti ni, na i rengbe ka sawia roni ka oni ká ka manga gupai re. Ya mo akuaroni naayamba arimo-wia kurironi mbiko gupai nga oni ká ka kodatironi naayó ka manga kura apai? Kangia wo si nidu, ginipai oni nimangihe ho i niyambu roni ni na arimo-wia? Oni ini gupai nga, ka gunde sa roni oni koditironi na gbegberẽ aboro, gure nga oni naba gberarago ti avunguroni na ti Yekova a. Ginipai rengbe ka manga roni ka oni mangipai wa gure? Isoke oni ima maa asásá tipa tironi wa ngbatunga agu nga kadu nibazakigene, nimoyambu-undo, ka mangasunge rogo gu dagbarago du zingo abatungusipai rogoho gbe, watadu ka mangasunge Betere yo. Ya mo ka oni akoda tironi gbe na agu akuaroni du sukuru yo, oni rengbe ka da ti gaoni asásá?

¹⁸ Oni paranga aboro, ya mo oni abingo tironi rogo gu bangiriba du gaoni idapase niasadi asadihe? Ginipai oni naamangaha ho du pai ni wa gure? Si naida oni berẽpa gu boro namoi kpiapai furoni, nga Yesu. Yesu aaidanga ka ti kurogo asada te, na ko aru nyanyakii tipa gupai ko ainihe nga si angia rurupai. Ka oni atingida gipai re, si rengbe ka undo roni oni gbia ngara ka ya fu akuaroni ziazia wee, oni aidanga ka kodatironi naayó ka manga gupai ini oni he nga runga ha te te. Wakina Yesu, si naida oni naaberãpa gu maabangirise du oni nani, kini mangisunge fu Yekova na kini gisangbako.—Eb. 12:2.

Gupai Naye na Ngbarago fu Aborokporo

19. Ginipai rengbe ka ye na ngbarago fu boro?

¹⁹ Yekova Mbori na Yesu Kristo naida kina bawene apai naamanga fu aboro. Wa vurangia ani kpakpa aboro, ani rengbe arengba ka gbia ngbarago. (Yes. 48:17, 18; Mt. 5:3) Yesu ayugu rengo fu aboro nga gu rengbe ka fu ngbarago fuyó. Ono ko aima yugo kura apai a fu aboro. Ko ayugu gu gene raka ngbaa kisusi. Kurigure, ko ayugupai fu aboro ngba gu gene ko aaraka ngbaha. Ani dunduko wa du ani kporo rengbe ka gbia undo mbiko peka ani fuo gu kpiapai nga ga Yesu. Sidu, akumbakuadee, dereakumbaa, avunguagudee, gbiati agudee, oni pekefuo gu kpiapai nga ga Yesu! Ka ani di agu apai kugume Yesu ayuguhe na kini pekefuo gako kpiapai, si rengbe ka sa rani ani gbia ngbarago rogo gaani ramukporo.

Gaoni Karagapai Nga Gine?

• Wai si aida akumbakuadee mangisunge na gu pagbia Mbori afuhe fuyó?

• Wai rengbe diakumba ka pekafuo gu kpiapai nga ga Yesu?

• Ginipai rengbe avunguagude ka wirikaha ti gu gene Yesu anaamangapai ngbaha na gako abawiriki?

• Ginipai rengbe agude ka wirikaha ti ga Yesu kpiapai?

[Gu kpiahe du ti kpewaraga 13]

Mbata fu kumbakudee mangi agu adiaberã nabipa gako aborokporo, ginipai si aida ko mangihe?

[Gu kpiahe du ti kpewaraga 14]

Rogo gini gene rengbe dee ka songoda gu pagbia nga ga kumbaari?

[Gu kpiahe du ti kpewaraga 15]

Agude nawirika gu weneapai i abihe be avunguyo