Mbori Agumbapa Nyenye Unga Ku Auru Kpotosende

“Ũzegino adu tii kungba pai, . . . nimoi bangirise ya i batasi [he].”—ROM. 8:20, 21.

1, 2. (a) Tipagine nyakipa gupai ti ni nga ani ini gu rengo du tipa zingabekpio? (b) Tipagine badungu aboro akapa akapa ti ni kuti gupai nga, aboro nika raka auru kpotosende nyeanye kindi?

ISOKE oni natingidapa gu ngbarago atingida oni adu nani ho oni awiriki gupai ni ti bambata regbo nga, barambeda kumbatayo, aboro agbinzanga berewe na kini kpiki te, ono i nika rakaa nyeanye kindi auru kpotosende. (Yo. 17:3; Yugo. 21:3, 4) Si nawira gupai a nga oni aima digo nigumbapa nyenye unga fu kura aboro. Pa nyenye unga nga gu wene pangbanga ani naatungusaha fu aboro. Si naʹaria gaani bipai tipa raka.

² Agu aboro du rogo agu apambori du kina rimo aKristano gbua riihe gbiati gu kura apambori a, i aidanga kuti gupai nga aboro nika raka nyeanye kindi auru kpotosende te. Badungu akanisa nayugo gupai nga, he kinaho rogo boro yo nga mbisimo naraka araka fuo kpio ní rogo gu ngbii nga ga atoro, ono Ziazia Kekeapai nayugo gupai tigaha ngawee mbisimo nga guhe nakpi akpi. (Yeze. 18:20) Sidu, badungu aboro nakapa akapa kuti gupai nga, aboro nika raka araka auru kpotosende nyeanye kindi. Ono ya mo Ziazia Kekeapai nagumba gupai nzunzu nga aboro nika gbia nyenye unga auru kpotosendee? Kangia wo duhe, gini bambata regbo Mbori ayugu gupai re fu aboro?

‘Ũzegino Adu Tii Kungbopai, Nimoi Bangirise Ya I Batasihe’

3. Wai Yekova ayugu gako ringbisapai tipa aboro kinaho ko akusi bambata aboro ni ku auru kpotosende?

³ Yekova aima yugo gako ringbisapai tipa aboro kinaho ko akusi bambata aboro ni ku auru kpotosende. Ko aima gumbaha ziazia nga, Adamu nika raka nyeanye kindi ka ko duna giasangbaa. (Bam. P. 2:9, 17; 3:22) Awiri Adamu na atitako aima ino gupai nga ko abasasangbaa, ko ki da nikpakpa boro. Mbori akisi ngbadimo ati Edene, aboro ki tona ka gbinza na kini kpiki. (Bam. P. 3:23, 24) Ti tonatonaha, aboro anaaraka nigbangaha, ono wa agarã aasakatihe, garã aboro atona ka zora kusende. Adamu araki tipa agarã 930 ko ki nyasi. Gu wiri Noa nangia Seme araki tipa agarã 600 gbua. Wiriko nangia Arufakasada ki raki tipa agarã 438. Ba Abarayama nangia Tera araki tipa agarã 205. Abarayama araki tipa agarã 175, wiriko nangia Yisaka ki raki tipa agarã 180, wiri Yisaka nangia Yakobo ki raki tigako tipa agarã gbua 147. (Bam. P. 5:5; 11:10-13, 32; 25:7; 35:28; 47:28) Si nawira gupai nga badungu aboro aima kparia ndu gupai garã aboro atona ti ni kaa zora kusende, nga pa nyenye unga aima gberã beyo. Ya mo ndupai aduho i moi bangiriyo nga apai angba angba berewe?

4. Gini gopai naduho tipa gu ruru aboro nadumbata nga i aduna maabangirise nga, Mbori nika yeaye berewe na gu weneapai Adamu agberesipaha?

⁴ Fugo Mbori nayaa: ‘Gu ũzegino [nga boro] adu tii kungbapai, nimoibangirise ya i batasihe.’ (Rom. 8:20, 21) Gine nafu maabangirise? Gu sangba Mbori du rogo Ziazia Kekeapai, si afura tipa gu ‘tita’ dee nika ‘mbura rii woo.’ (Oni gedi Bambata Pai 3:1-5, 15.) Gu mokido Mbori amangihe re afu gu maabangirise fu ruru aboro nga, Mbori ambunga gu gako bambata ringbisapai nadu tipa aboro te. Si asa aboro wa Ebere na Noa i duna gu maabangirise nga, Mbori nika yeaye berewe na gu weneapai Adamu agberesipaha. Isoke agu akumba re avura ino gupai nga, pa ‘mbura yó gido’ tita dee ayugu gupai nga, kureko nika uka auka.—Bam. P. 4:4; 8:20; Eb. 11:4.

5. Ginipai nayugoho ya, Abarayama aima ida kuti zingabekpio?

⁵ Oni bingo gupai nadu tipa Abarayama. Ho Mbori aʹasadi ko ni, ko aima ida ka ‘tumo ni Yisaka’ nangia bangisa wiriko. (Eb. 11:17) Tipagine ko aidi ti ni ka manga gupai re? (Oni gedi AEbere 11:19.) Ko aidi ka mangaha mbiko gupai nga, ko aima ida kuti zingabekpio. Ko aima duna ndupai beko ka ida kuti zingabekpio. Gopai sa nga, wa Abarayama avura gbinza na diako nangia Sara ki ima gbinza a ki go ba vungu, Yekova afu gude fuyó ngba gbinza yó. (Bam. P. 18:10-14; 21:1-3; Rom. 4:19-21) Yekova aima kido Abarayama a. Ko aya fuko wee: “Rogo Yisaka yo i ka yamba ngbatungaro ni.” (Bam. P. 21:12) Sidu tie, Abarayama aima duna wene nduapai beko kadu na gu maabangirise nga, Yekova nika zingisa wiriko azingisa bekpio ka ko fuko nimotumo.

6, 7. (a) Gini mozunga Yekova amangihe na Abarayama? (b) Wai gu mozunga Yekova amangihe na Abarayama afu maabangirise fu aboro?

⁶ Mbiko ga Abarayama bakere idapase, Yekova amangi mozunga naako nibipa wiriko, watadu ‘ngbatungako.’ (Oni gedi Bambata Pai 22:18.) Si aye ka kura kusa nga, gu ngbatunga Abarayama watadu ‘tita dee’ nyaki pani gbe, ní nga Yesu Kristo. (Gara. 3:16) Yekova aya fu Abarayama berewe wee Ko nika ngeesa ‘ngbatunga Abarayama wakina akerekuru ngbangbaturũ yo na wakina ngume pangba baime,’ nga gu namba Abarayama aarengbanga ka inoho ya. (Bam. P. 22:17) Ono tie, Yekova aima yugo bange ngbatunga Abarayama kusa. Yesu Kristo gbiati gu kura aboro 144,000 nika zogarago naako, i nga ‘ngbatunga’ Abarayama. (Gara. 3:29; Yugo. 7:4; 14:1) Mbori nika “fu maku . . . fu arikaaboro zegino dunduko” rogo gu Kindo nga ga Masiya.

⁷ Abarayama aarengbanga ka rugatiko wenengai naapa gu mozunga Yekova amangihe naako te. Ono wa si avura duwo, “ko angere tipa gu bakporo du na nyanyaki mburuhe ti ni.” (Eb. 11:10) Gu bakporo re nga ga Mbori Kindo. Tipa Abarayama gbia amaku mbiko gu Kindo re, si naida ko raki araka berewe. Mbori nika zingisako azingisa bekpio tipa ko raki auru kpotosende nyeanye kindi. Agu aboro nika bata ti regbo Aramegido gbiati aguyo i nika zingisayo bekpio, ka i nye niruruyo, i raki nyeanye kindi a.—Yugo. 7:9, 14; 20:12-14.

“Gu Toro Du Rogo Re Yo Nasoda Re”

8, 9. Tipagine adunga gu kitabu ti ni nga Eyobo nigu kitabu nafura gbua tipa agu aʹasada Eyobo agbiatiko nani ya?

⁸ Tingbafuo kpio gu tita Abarayama nangia Yosefa, kumba araki rimoko angia Eyobo. Si nawira gupai nga Moize nake gu kitabu nga Eyobo. Si nagumba ndu gupai Yekova ambu Eyobo ti ni ko rungo, naapa gu weneapai namangi kumbatayo fu Eyobo. Ono tie, gu kitabu re afuranga sa tipa kina agu aʹasada nagbia Eyobo te; ono si nafura gbe tipa gupai nabi aboro na amaraika dunduko. Gu kitabu re nayugo gupai nga, Yekova nazogarago niruruhe, na si nayugo gupai nga, gu ngbanga nakuru Edene yo, si nabi gu ga Mbori amoyambu dunduko du auru kpotosende. Wa si avura du nga Eyobo aaruganga tiko naapa gi ngbanga re te, ko aambunga agu abadiangbako nadu biata i sako ko berẽ gupai nga ko akanga kuti gako rurupai te te. (Eyo. 27:5) Gipai re nanyakasa gaani idapase na ki undo rani ani rugutirani na gupai nga, ani rengbe arengba ka kakuti manga rurupai na kini songodi ga Yekova bakere pagbia.

⁹ Fuo abakurea Eyobo nyasi fugo, nga aguyo nayawee i naida ka fu wasa fuko, ‘Eriu wiri Barakere boro Buza akaragapai’ fu Eyobo. Gine nasako ko fura? Ko ayaa: “Dungu apai du ngbare, gu toro du rogo re yo nasoda re.” (Eyo. 32:5, 6, 18) Wa vura duhe nga agu apai Eriu agumbaha si aringbisitihe kuti Eyobo ho Yekova adi arungo ni tiko, agu apai ko agumbaha re naundo kura aboro aundo a. Si nafu maabangirise fu agu aboro dunduko kaa kuti rurupai.

10. Ginipai nayugo gupai nga, kura aregbo kinaho Yekova agumbapai fu bangisa boro ono gupai re kini bi aboro abi a naabayo dunduko auru kpotosende?

¹⁰ Kura aregbo kinaho Yekova agumbapai fu bangisa boro ono gupai re kini bi aboro abi a naabayo dunduko auru kpotosende. Ani rengbe ka ino gipai re ti gu ga Daniere sangbanebi nadu tipa gu musumo Bakindo Nebukadenesara ararihe ki bi bagbanga ngua i nadehe. (Dan. 4:10-27) Wa vura duhe nga sangba gu musumo re adigi kuti Nebukadenesara, si adu a tipa kura apai susi gure. Si ayugu gupai nga, gu ga Mbori zogarago nadu rogo ngbatunga Davide yo, si nika yugotihe berewe nivovoho tingbafuo agarã 2,520, nga agu agarã i atona gedaha rogo 607 M.B.K.a Ga Mbori zogarago asatihe berewe nivovoho ho i amoi Yesu Kristo ni nibakindo ngbangbaturũ yo rogo gu garã nangia 1914. Oni berẽnga pa wai ga Mbori Kindo nika digiso gu maabangirise nga ga ruru aboro barambeda!

“Mo Bátasi Ni be Ti ku Due Yo”

11. Ginipai afugo Eriu ayugoho tipa Mbori?

¹¹ Wa Eriu aakaragapai fu Eyobo, ko agumbapa gu ‘maraika nangia azarõ, nga boro sa dagba kutu yo, ka yugo gupai fu boro ruu tipa ní.’ Ginipai ka mangi wa ka gi ‘boro re kpari fu Mbori, ko ki idi pani’? Eriu ayaa: “[Mbori nainapai] fu ni, ki ya, ‘Mo bátasi ni be ti ku Due yo, bambiko mi bi motumo; Kpotoni zámbua berewe wa ga parangani; si du wa ga agu arame nga ga parangani.’” (Eyo. 33:23-26) Agu afugo re nayugo gupai nga Mbori naida naapa “motumo” tipa aboro watadu guhe nika dada gayó ingapai.—Eyo. 33:24.

12. Gini maabangirise afugo Eriu afuhe fu aboro?

¹² Wakina gupai nadu kusa tipa gu nebi nangia Daniere, Eriu aaruganga tiko wenengai na gupai ga Mbori toro adu kugiiko ko kehe tipa motumo te. (Dan. 12:8; 1 Pet. 1:10-12) Ono wa si avura duwo, gupai Eriu agumbaha re afu gu maabangirise fu aboro nga, regbo nika yeaye Mbori nika mangasunge na ga Yesu motumo ki kusi goro aboro be gbinza na bekpio. Afugo Eriu afu maabangirise tipa nyenye unga. Gu kitabu nga Eyobo, si nayugo gupai nga aboro nika zinga azinga bekpio.—Eyo. 14:14, 15.

13. Wai afugo Eriu afu wasa fu aKristano?

¹³ Areme, afugo Eriu nafu maabangirise a fu gu badungu amirioni aKristano namaabangiriyo ka bata ho Mbori nika gbarasa gi zegino re ni. Gu sosono aboro nika bata, kpotoyo akaragatihe i kidu niparanga yó. (Yugo. 7:9, 10, 14-17) Kurigure, gu maabangirise du tipa bi agu aboro berewe nakpiki, si nafu bakere ngbarago fu ruru aboro. Mbedimbedi aKristano nika gbia gu unga zanga kpio ngbangbaturũ yo na “kura akandoro” ki gbia nyenye unga auru kpotosende. I dunduko nika gbia gi mosoro re mbiko gayó idapase kuti ga Kristo motumo tumorii.—Yo. 10:16; Rom. 6:23.

Mbori Adigiso Kpio Nyeanye Kindi

14. Ginipai nayugoho nga, gu kurahe kinaho si aidihe angianga kina ga Moize aNdiko ya tipa ka sa aYisaraere i duna maabangirise tipa nyenye unga?

¹⁴ Ngbatunga Abarayama ada nigu rikaaboro nadu na ranirii ho Mbori amangi mozunga ni naayó rogo agu aNdiko yo ko afuhe kube Moize. Ho Mbori afu agu aNdiko re ni, ko ayaa: ‘Oni aká kuti gimi rugaapai na gimi ruru asarangbanga, nga agu apai ka boro amangaha ní kidu niʹungani.’ (Pa Mot. 18:5) AYisaraere aarengbanga ka irisa sangba agu aNdiko re te, si anaayugo yó kindi nikina aboro ingapai, sidu, si kini idi Mbori ye na kurapai tipa ka batasa yó.—Gara. 3:13.

15. Gini amaku nadu kumbatayo ga Mbori toro adu kugii Davide ko ke paha?

¹⁵ Tingbafuo kpio Moize, Yekova asa kura abakeke Ziazia Kekeapai i gumbapa gu maabangirise nga ga nyenye unga. (Tam. 21:4; 37:29) Nikpiapai, gu bake apapara Atambuahe nangia Davide agumbapa kodatise nga ga ndikidi irisombori Siona yo. Ko ayaa: “Yo Yekova arugu pa maku ni, nga [i fu gu] unga nye anye kindi” fu agu aboro rẽ tipaha.—Tam. 133:3.

16. Ginipai Yekova akidohe tipaha vurube gu nebi nangia Yesaya ya si nika manga kumbatayo “auru kpotosende”?

¹⁶ Ga Mbori toro adu kugii gu nebi nangia Yesaya ko gumbapa nyenye unga ku auru kpotosende ane. (Oni gedi Yesaya 25:7, 8.) Ingapai na kpio moipai kurii aboro wakina gu “ũdadahe” dadi aboro ka ba onga adunga beyo ya. Yekova nakido gako aboro kini yawee ko nika dia ingapai adia na kpio kusayo “auru kpotosende.”

17. Gini sangbanebi nafura tipa gu sunge Masiya amangaha nga gu nazaka gene sa nyenye unga?

¹⁷ Oni berẽnga pa gu mangaapai nadu rogo ga Moize aNdiko tipa gu meme i anaayamba ru nga Azazera. Bara sa rogo garã, rogo Uru Dada Ingapai, gbiamotumo ‘aniuka abeko ue kurii unga meme, ki kusipa ga awiri aYisaraere irairaapai dunduko kuriru, naapa gayo asamungu dunduko, naapa gayo aingapai dunduko; ko kini moihe kurii meme, kini kedi ru u merẽ ku ngbakungba yo ku be gu boro i anaasia ní ní ndu na u. Gu meme re nanaatinda gayo irairaapai dunduko kini ga nani ku pangba rago yo, ní kini mbu meme yo u merẽ ku ngbakungba yo.’ (Pa Mot. 16:7-10, 21, 22) Gu nebi nangia Yesaya afura tipa Masiya ya ko nika dia gu “imisiriapai” na “arungo” gbiati “gu ingaapai nga ga dungu [aboro]” kusayo.—Oni gedi Yesaya 53:4-6, 12.

18, 19. Gini maabangirise Yesaya 26:19 na Daniere 12:13 afuhe furani?

¹⁸ Yekova agumbapai vurube gu nebi nangia Yesaya fu gako aboro nangia awiri aYisaraere ki yaa: “Gamo kangba aboro adu ni ungayo, kangba yo [nga gu gamo aboro i aimi yó] azinga. Ako oni nga araki nvutu yo, oni zingi ki nibi bia ni ngbarago! Mbiko ga ndomo adu wa ndomo imarago, mo aída ha si ti ku ri ringara kangba aboro.” (Yes. 26:19) Kuru Ndika aima yugopa maabangirise tipa zingabekpio naapa raka auru kpotosende. Nikpiapai, ho garã Daniere ambedi ni kuti 100, Yekova akidoko ki yaa: “Mo aóngoda, ti digida agu arame re mo ki ru rogo kina gu ga ba i aringbisi he foro.”—Dan. 12:13.

¹⁹ Mbiko gu maabangirise Marata adu nani tipa zingabekpio, ri aya tipa kawiiri nakpi wee: “Mi ini aina ya ko azínga azinga berewe rago zingabekpio ti yangara rame.” (Yo. 11:24) Ya mo agu apai Yesu anaayugoho gbiati agu apai ga Mbori toro adu kugii gako abawiriki i kekehe, si adi gu maabangirise nadu tipa nyenye unga re kusayo? Ya mo gu maabangirise du tipa ka raka nyeanye kindi auru kpotosende, Mbori nafuhe kindi fu aboro? Ani nika wisigo karagapai kuti agi asanahe re rogo gu papara kekepai naye fuo gere.

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Gu ũzegino nga boro “adu tii kungba pai” kidu na gini maabangirise?

• Gine nayugo gupai nga Abarayama aima ida kuti zingabekpio?

• Agu apai Eriu agumbaha fu Eyobo nafu gini maabangirise fu aboro?

• Wai Kuru Ndika afu maabangirise tipa zingabekpio na tipa nyenye unga ku auru kpotosende?

[Gu kpiahe du ti kpewaraga 11]

Gupai Eriu agumbaha fu Eyobo nafu gu maabangirise furani nga, Mbori nika kusa goro aboro akusa be gbinza na bekpio

[Gu kpiahe du ti kpewaraga 12]

Mbori akido Daniere ki yawee ‘ko aru kuari ti digida arame rogo gu ba i aringbisihe fuko’