Oni Duna Giasangbaa Na Wingbaduse Wa Kristo

“Oni wása awasa; mi di be zegino.”—YO. 16:⁠33.

1. Wai Yesu agisangba Mbori?

YESU KRISTO anaamanga agu apai ti aregbo dũ Mbori akpinyemuhe. Ko adunga na kandara berãpa basa sangba Bako wa gu tooni te. (Yo. 4:34; Eb. 7:26) Ono agu apai nadu tipa ko auru kpotosende, si adunga fuko nitaatapai tipa ko gi sangbaa te. Ti kina tonatona ga Yesu sunge tungusapai, avurako, kodihe kuti Satana, aʹasaditiyo ka sako ko mbu manga rurupai watadu ka mangako ngbaome ko mbuhe, watadu ka birikoko ko mbuhe. (Mt. 4:​1-11; Ruka 20:​20-25) Agi avurako re asa gupai nga ko du nifudifudiko berãko yo, ngbadukoyo, na ti kpotoko. Niyangaraha tie, i aduna diabese niʹimoyo ko ti ngbunduru ngua-rungosi. (Mt. 26:​37, 38; Ruka 22:44; Yo. 19:​1, 17, 18) Rogo agu apai yo re dũ, na zavura agu arungosiro Yesu agbiatiko nani, ko anye kindi “nigi sangba dati kpio.”​—Oni gedi AFiripoio 2:⁠8.

2, 3. Ginipai rengbe ani ka wirikaha be ga Yesu giasangbaa wa si avura du nga ko agbiatiko na arungo vurũ?

² Agu apai Yesu agbiatiko nani auru kpotosende, si asako ko wiriki vovo apai tipa giasangbaa. (Eb. 5:⁠8) Si rengbe ka wira gupai nga, kurapai aadunga ho berewe tipa Yesu wirikihe nibipa mangasunge fu Yekova te. Nirengo, ko aima gbia ngbarago be sungo na bako tipa bagbanga regbo gbe, na ko angia ga Mbori “bangbasia boro sunge.” (Snz. 8:30) Wa si avura du were, gu hipai ko adu nani niʹidapase ayugu gupai nga ko aima kakuti gako ruru mangaapai. Ko asono ki nyaki rogo toroyo. Ginipai rengbe ani ka wirikaha be agu apai namangi Yesu re?

³ Wa si avura du nga Yesu angia rengberengbe boro, ko amanganga asadatise ka giasangba Bako rogo apai dunduko nitiko te. Ko akparikpee fu Mbori tipa ko undoko ko nye na giasangbaa kindi. (Oni gedi AEbere 5:⁠7.) Tipa ani nye kindi na giasangbaa, si naida ani duna gu sino tirani nga ga kparakpee rogo umbasitise. Gu mokedi nangia Pauro arugu aKristano tipa gipai re ki yaa: “Oni dú na gi berã rogo roni yo re, nadu rogo Kristo Yesu yo a,” nga gu boro “[na]umbasi tiko, nigi sangba dati kpio, ii, nga kina gu kpio nga ga wagiwagi ngua.” (Frp. 2:​5-8) Pa nye Yesu kindi na giasangbaa ayugu gupai nga, boro rengbe arengba ka nye na giasangbaa dagba gbegberẽ aboro. Kina rengo du nga Yesu angia rengberengbe boro, ono ginipai du tipa rani tigaani nga kpakpa aboro?

Kpakpa Aboro Rengbe Arengba ka Giasangbaa

4. Gupai nga Mbori akusi rani ni agu aboro duna ranirii ka siapai, rogoyo nga gine?

⁴ Mbori akusi Adamu na Eva na tatamana na ki fu gu tandu fuyó nga ga sia wenepai ka mangaha watadu gbegberepai. Wangia ani atitayo, kina gu bangisapai re du tipa rani a. Rogo gupai yo re nga gine? Rogoho nga, Mbori afu ranirii furani tipa ani siapai; ka giasangbako watadu ka zanga giaha. Mbori afunga gu bakere ranirii re nisaha te, asunge kinaho si andu nani. Agu adiaberã ani mangaha rogo gaani raka, si rengbe ka fu unga furani watadu kpio. Si a na kina sangbanaha kuti agumerani.

5. Ginipai ani asota tipa ka mangaha wadu ani nibasasa, na wai rengbe ani ka diabehe?

⁵ Mbiko gu zanga rengba ani adihe, si nasaha ka giasangba dunga nisino rani ya. Anga si nitaatapai ti aregbo dũ ani irisi ga Mbori andiko te. Si adunga nitaatapai fu Pauro ka giasangba te. Ko akepai ki yaa: “Mi bi kura rugute rogo apare yo, si niso vura na gu rugute du berãre yo, ki ye na mi ni zizi boro ku tii gu rugute nga ga ingapai du rogo apare yo.” (Rom. 7:23) Rengo ngaha nga, si nitaatapai fu boro ní gisangbaa ho adunga ní ni rogo kpakarapai watadu rogo fudifudipai ya. Ono ginipai rengbe ani ka mangaha ho du tagbagapai ni dagba gaani giasangbaa na “gu nyemuhe nga ga borose, na gu nyemuhe nga ga bangirise”? Gi gbegberẽ nyemuhe re naye mbiko gu zangarengba du ani nani watadu mbiko gu ‘toro nga ga zegino’ du pati rani, na gu nyemuhe rengbe kadu na bakere ome kurirani. (1 Yo. 2:16; 1 Kor. 2:12) Tipa ka sovura kuti gu nyemu gbegberẽpai re, ani duwa ka ani ‘mbakadi kpotoraniyo’ mbata fu ani gbiatirani na kpakaraapai watadu asada, na ki dakuti gupai nga, ka apai vura kaa manga amanga wai vurũ, ani duwa ka ani gisangba Yekova. (Tam. 78:⁠8) Badungu akpiapai du berani rogo Ziazia Kekeapai nga ga agu aboro nadu na diabese mbiko i ambakadi kpotoyo yo.—Eza. 7:10; Dan. 1:⁠8.

6, 7. Oni funga kpiapai tipa wai rengbe wisigopai nisase ka undo rani ani mangi wene diaberã?

⁶ Gene sa dagba agu akuraha rengbe ani ka mbakada kpotoraniyo ngbaha nga kaa wisigo Ziazia Kekeapai kakaka na agu awaraga du mburuhe rii Ziazia Kekeapai. Oni moingo kpia gupai ku berã roni nga oni rogo pai wa gere. Oni naberãpa wisigopai nyemu nga gu regbo oni naamangaha ti ni. Oni ima kpara fu Yekova tipa ko undo roni na gako toro tipa oni mangi agu apai oni awirikihe rogo Fugoko. Rogo gu nyemu nika ye fuo gure, oni naida ka bi vidio rogo terevizioni. Aboro natambua gu vidio re atambua, ono gupai ini oni he tipaha nga si na wasiwasi mangaapai rogoho gbiati zuũ.

⁷ Oni berẽnga kurii agu arugute Pauro afuhe du rogo AEfeso 5:⁠3. Si nayaa: “Bari, na pa meteka dũ, na kpihe, ka oni yámbu nga rimoho dagba roni wa sa ya, ni sino ga Mbori aboro.” Si naida oni tingidi gu ga Pauro arugute du rogo Afiripoio 4:⁠8. (Oni gedihe.) A wa oni kaa berãkurii gi ga Mbori arugute re, si naida oni sana tironi nga, ‘Ka si du nga mi nika fu tire sa agi ambakadapai du rogo terevizioni re, ya mo mi apekafuo ga Yesu kpiapai nga ka nye kuti giasangba Mbori?’ Ginipai rengbe oni ka mangaha? Ya mo oni anye kindi kuti biko ngbatunga agu avidio re?

8. Tipagine si aida ti ni ani ka kuti ruru mangaapai rogo toro yo na rogo borose yo?

⁸ Si adu niʹingahe furani ka ani mbu manga ga Yekova arugute kini bihe taata, na kini berẽ gupai nga ani ima nyaka rogo toro yo, sidu, gbegberẽ kpamiatise arengba nga ka mangapai na ani te, ka si vura du vurũ nga gu mangaapai nga zuũ watadu wasiwasi ambaro du ani abihe. Kuba gure, ani duwa ka ani bandatirani na awirani be gbegberẽ mangapai nga ga Satana. Agu aboro namangasunge na kompiuta, i namanga bakere asadatise tipa ka banda agu ahe rengbe ka gbirisapa gayó kompiuta, singia gu nga ga kura aboro a. Ya mo si adanga ani mangi asadatise nyanyakii tipa ka bandatirani be ga Satana “birĩ” tee?—Ef. 6:⁠11.

9. Tipagine si aida ti ni ani diberã kaa manga gupai Yekova akpinyemuhe na aʹuru du?

⁹ Dedede, si niʹidi ani siapai singia ka mangapai ngba gu gene Yekova akpinyemuhe watadu ani aidanga ka mangaha wo te. Ka ani aida ka gbia bata, ani duwa ka ani gisangba Mbori na kini raki ringbisihe kuti gako bangua arugute. Nipeka ani fuo ga Yesu kpiapai nga ga giasangbaa “dati kpio,” ani nayugo gupai nga, ani na ndikidi idapase. Yekova afu mosoro afu furani tipa gaani ruru mangapai. Yesu akidohe ki yaa: “Gu ni nikaru ki da ho ragoho ka diga ni, ni abáta abata.” (Mt. 24:13) Si tie ziazia nga, gipai re naida wingbaduse wa gu Yesu adu.—Tam. 31:⁠24.

Yesu Nga Wene Kpiapai Rogo Wingbaduse

10. Gini ngbatunga sosoda rani rengbe ani ka gbiatirani nani, na wai rengbe ani ka sovura kuti ni?

¹⁰ Si naida ani duna wingbaduse tipa ka sovura kuti gu bipai gbiati gu mangaapai du rogo gi zagino re si andu ka birikosi rani. Agu akpakarapai aKristano naagbiatiyo nani nabipa mangapai, kodatise, zingo mosoro, na gu fudifudiapai naye be aboro pambori, si ima rengba ka nyaga yó kusayo ti ga Yekova ruru agene. Dunguyo ninaagbiatiyo na asogote be gayó aborokporo. Rogo kura aringara, badungu asukuru areme nanyakasa gupai nga, ahe akuru nisaha, na gu berã nga Mbori ti ni te. Gipai re nasona kina kumbatayo. Ho gbia ani tirani ni na ngbatunga gu sosoda rani re, si aidanga ani mbu pa tirani ambu ki zanga mangapai kuti ni te. Si naida ani mangipai amanga tipa ka sovura kuti ni tipa ka bandatirani. Ga Yesu kpiapai nayugo wai rengbe ani kadu na diabese.

11. Wai pa berã ani kurii gu kpiapai nga ga Yesu aundo rani ani duna wingbaduse?

¹¹ Yesu aya fu gako abawiriki wee: “Oni narungo arungo zegino; ono oni wása awasa; mi di be zegino.” (Yo. 16:33) Ko aambunga gu mangapai nga ga zegino si di beko te. Ko ambunga ha a si rugusiko ti gako sunge tungusapai te, watadu ka sako ko mbu songoda ndikidi irisombori gbiati ruru mangaapai. Kinagu bangisapai re si aida ani mangihe. Yesu akpari tipa gako abawiriki ki yaa: “Aboro zegino nga yo te, wa kina re adu nga ni boro zegino ya.” (Yo. 17:16) Pa wisigo ani gu wingbaduse Kristo adu nani na kini berẽ kuriihe rengbe ka undo rani ani duna wingbaduse ka kpara tirani kusayo ti zegino.

Ani Wiriki gu Wingbaduse Yesu Adu Nani

12-14. Oni yugungo gu kpiapai nayugo gupai nga, Yesu aduna wingbaduse.

¹² Ga Yesu wingbaduse adu niyuguyuguhe rogo gako sunge tungusapai. Ti kura regbo sa, ko amangisunge na gako pagbia zanga gunde “ki rimi ku rogo ga Mbori yekaru, ki bafu agu yo ku zegi yo dunduko nanababaga ahe na agu yo nanangbeka ahe yekaru yo, ki vavagadi ga abaundaamarã ambisa, na agu ambata nga ga agu yo nanababaga ambikpo.” (Mt. 21:12) Ho abanzengere ayeni ka zio Yesu rogo gu yangara yuru ko adu auru kpotosende, ko akuru fuyó niwingbaduse tipa ka banda gako abawiriki na ki yaa: “Si ngia mi oni agbata re, agi yo guari re [tie].” (Yo. 18:⁠8) Kusa, ko ape gupai fu Petero nga ko karaga gako basape ku baha yo, si kini yugu gupai nga, Yesu aadunga naa kido kuti agu aũvura du auru kpotosende te, ono ko adu naa kido kuti Yekova.—Yo. 18:⁠11.

¹³ Yesu afura zanga gunde tipa gu zire abayugupai nadu ti ragoko na ki kusi gu gayó ziree ayugopai re kuyangura. Ko aya fuyó wee: “Na gberẽ he fu roni abakeapai na aFarusi, nga airabiriki! bambiko oni nakisa gu ngbi nga ga ngbangbaturũ be aboro. . . . Oni ki he manga gu pai kii dagba arugute, nga sapangbanga [niruruhe], na inapai, na idapase. . . . Oni nazunda gii inga yo na gii kurungbu yo, ono vuru he yo hi ahi be gbu ahe na ruguzuruguzu apai.” (Mt. 23:​13, 23, 25) Si aidi ga Yesu abawiriki duna kina gu ngbatunga wingbaduse re, bambiko si adu nga zire abarumbatayo rogo pambori nika rungosiyo arungosi na ki imi aguyo.—Mt. 23:34; 24:⁠9.

¹⁴ Yesu aima ru nyanyakii a ka sovura kuti adaimona. Ti kura regbo sa, ko agbia kumba nadu na adaimona tiko. Gu kumba re aima duna ome tiko gbe ka boro arengbanga ka vo ko niʹazogbo ya. Yesu aagundenga wagu tooni te, ono ko ado gu badungu adaimona nadu ti gu kumba re dunduko. (Mk. 5:​1-13) Areme, Mbori afunga ome fu aKristano i naamanga iiriwopai nani te. Wa vura duhe wo, ani naso gu vura nga ga toro kuti Satana nga gu boro ‘nakiso ga aboro aberã nga aguyo zanga idapase.’ Ani naso gu vura re rogo gaani sunge tungusapai. (2 Kor. 4:⁠4) A wa si adu tipa Yesu, gaani ũvura sa “borose te, ono si du na tandu barangba Mbori rengbe na bafa nyanyaki agbata,” nga gu zire yugopai nga ga pambori naima sigira baha. (2 Kor. 10:⁠4) Tipa ani mangisunge wenengai na agu aũvura nga ga toro re, si naida ani wirikipai nibakerehe be gu kpiapai nga ga Yesu.

15. Ga Yesu wingbaduse aru rii ginipai?

¹⁵ Anga padu Yesu ngangaraa nasa gupai nga ko duna wingbaduse te, ono idapase nasako. Kina gu bangisapai re si aidaha tipa rani a. (Mk. 4:40) Wai rengbe ani kadu na ndikidi idapase? Berewe a, kina ga Yesu kpiapai rengbe ka undo rani. Ko amangisunge na gu inohe nga ga Ziazia Kekeapai sirisiri, na kidu na ndikidi kido kuti ni. Yesu amanganga sunge na kina boro ndikidi basape te, ono ko amangisunge na gu basape nga ga toro nga Fugo Mbori. Dedede, ko anaayugopai fu aboro na kini yugubaraha kurogo Ziazia Kekeapai. Dedede, ho ko anaafura ni, fugoko anidu nga: “Si ni keke he,” si kini yugu gupai nga, gupai re anidu rogo fugo Mbori yo.a

16. Wai rengbe ani kadu na bakere idapase?

¹⁶ Tipa ani nyakasi gaani idapase na ki ru nyanyakii barabangiri agu asada dũ nagbia rani mbiko du ani ni abawiriki, si naida ani naageda Ziazia Kekeapai na kini wisigihe na aʹuru dũ, na kini ndu kupati agu adunguratise nga ga aKristano, na kini bi gupai nga rengo nga tarã gaani idapase. (Rom. 10:17) Ani duwa ka ani berẽ dudunguroo kurii gupai ani awirikaha, na ki zihe ku ngbaduraniyo. Kina gu idapase du niungaha rengbe ka fõngbaduraniyo ani duna wingbaduse ka mangapai. (Yak. 2:17) Si naida ani kpari tipa ziazia toro tipa kadu na idapase mbiko si nga papara zuzu toro.—Gara. 5:⁠22.

17, 18. Wai paranga wirinarani sa ayugu gari ngara sukuru yo?

¹⁷ Paranga wirinarani du rimori nga Kitty, ima ino wai ndikidi idapase angarasa rani. Ho ri aduni kindi nigude, ri aima ino gupai nga si aidanga ‘zee mangi ri na wene pangbanga’ sukuru yo te, na ri aaida ka manga wene dezirepai fu akuari sukuru yo. (Rom. 1:16) Rogo agarã dunduko, ri anaamanga asadatise nyanyakii tipa ka tungusa wene pangbanga fu kura aboro, ono gupai nanaakaraga ri kusayo nga, ri adunga na wingbaduse te. Ho ri aduni kindi nigude, ri aga kurogo gu kura sukuru. Ri ayaa: “Bara gere, mi anginga mbaro berewe na gu momu du berẽ wagu mi angi mbaro na gu nadumbata te.” Kitty akpari fu Mbori tipa ko fu wingbaduse furi wagu nadu be Kristo, gbiati rugute, na momu.

¹⁸ Rogo bambata uru sukuru yo, bayugupai asasana agude nibasasa tipa i peke patiyo. Dunguyo nafura tipa agu apambori i avunguyo rogoho, na kini pe gupai nga i amanganga pai ringbisihe kuti gayó apambori te. Kitty abi gupai nga, gere nga gu momu ri akpari tipaha. Ho si adani ti ri nga ri fura, ri afura na wasa ki yaa, “Mi nga Dezire Yekova, Ziazia Kekeapai nga guhe nabanda re rogo toro yo tipa mi naamangaapai niruruhe.” Wa ri aafura, kura agude aaumori aumo. Ono gu kurayo adegatuyo kuti gupai ri aagumbaha, na ki sana ri na asanahe kusa. Gayó bayugupai atambua Kitty tipa gari wene kpiapai, wa ri asakipai tipa gari idapase ngangaraa. Kitty aduna bakere ngbarago ka wirikapai be ga Yesu kpiapai nga ga wingbaduse.

Oni Duna Idapase Gbiati Wingbaduse Wa Kristo

19. (a) Padu boro na ndikidi idapase nakoda gine? (b) Wai rengbe ani ka sa ngbarago ti Yekova?

¹⁹ Amokedi aima rugatiyo na gupai a nga, padu yó na wingbaduse naru riipa idapase. I azungodi Yesu ki yaa: “Mo kíisi gaani idapase.” (Oni gedi Ruka 17:​5, 6.) Anga padu boro na ndikidi idapase nga kungbo ida kuti gupai nga Mbori kina ti ni te. Si nakoda gupai nga ani duna wene pagume na Yekova, wagu nidu dagba tooni gude na gu bavunguru duna weneringise gbiati nyemuse. Ga Mbori toro adu kugii Soromo ko kepai ki yaa: “Ako wire, ka kpotoro yo du na tatamana, kpotore yo adú na ngbarago a. Mbisimore angí a ho mo ka gumba ruru apai ni ni ngbaro.” (Snz. 23:​15, 16) Wakina gure a, ho ani aru ni nyanyakii tipa ka songoda rurupai, si nafu ngbarago fu Yekova, naapa ino ani he wo nangarasa rani berewe gbe. Sidu tie, si naida ani naapekafuo ga Yesu kpiapai ti aregbo dũ, na kidu na wingbaduse tipa ka songoda rurupai!

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Ginipai rengbe ka undo rani ani nye kindi kuti giasangbaa wa vura du ani nikpakpa aboro?

• Ndikidi idapase naru riipa gine, na wai rengbehe ka undo rani ani du nga ngaraa?

• Gine rengbe ka manga ka ani duna giasangbaa gbiati gu wingbaduse Kristo adu nani?

[Gu kpiahe du ti kpewaraga 16]

Ya mo oni ‘mbakadi kpotoraniyo’ tipa ka diabe aʹasada?

[Gu kpiahe du ti kpewaraga 18]

Si naida ani duna gu wingbaduse du mburuhe ri idapase wa gu Yesu adu nani